Brahmandapurana 2.55
Brahmāṇḍapurāṇa 2.55
- Language
- Sanskrit
Contents
- 2.55.27 — 1 part
2.55.1
Äḥ
abhinandyāśiṣātyarthaṃ lālayanpraśaśaṃsa ha //
2.55.2
atha ṛtviksadasyaiśca sahito rājasattamaḥ /
upākramata taṃ yajñe vidhivadvedapāragaiḥ //
2.55.3
tataḥ pravavṛte yajñaḥ sarvasaṃpadguṇānvitaḥ /
samyagaurvavasiṣṭhādyairmunibhiḥ saṃpravarttitaḥ //
2.55.4
hiraṇmayamayī vediḥ pātrāṇyuccāvacāni ca /
susamṛddhaṃ yathāśāstraṃ yajñe sarvaṃ babhūva ha //
2.55.5
evaṃ pravarttitaṃ yajñamṛtvijaḥ sarva eva te /
kramātsamāpayāmāsuryajamānapurassarāḥ //
2.55.6
samāpayitvā taṃ yajñaṃ rājā vidhividāṃ varaḥ /
yathāvaddakṣiṇāṃ caiva ṛtvijāṃ pradadau tadā //
2.55.7
atha ṛtviksadasyānāṃ brāhmaṇānāṃ tathārthinām /
tatkāṅkṣitādabhyadhikaṃ pradadau vasu sarvaśaḥ //
2.55.8
evaṃ saṃtarpya viprādīndakṣiṇābhiryathākramam /
kṣamāpayāmāsa gurūnsadasyānpraṇipatya ca //
2.55.9
brāhmaṇādyaistato varṇairṛtvigbhiśca samanvitaḥ /
vārakīyākadaṃbaiśca sūtamāgadhavandibhiḥ //
2.55.10
anvīyamānaḥ sastrīkaḥ śvetacchatravirājitaḥ /
dodhūyamānacamaro vālavyajanarājitaḥ //
2.55.11
nānāvāditranirghoṣairbadhirīkṛtadiṅmukhaḥ /
sa gatvā sarayūtīraṃ yathāśāśtraṃ yathāvidhi //
2.55.12
cakārāvabhṛthasnānaṃ muditaḥ sahabandhubhiḥ /
evaṃ snātvā sapatnīkaḥ suhṛdbhirbrāhmaṇaiḥ saha //
2.55.13
vīṇāveṇumṛdaṅgādinānāvāditraniḥsvanaiḥ /
maṅgalyairvedaghoṣaiśca saha viprajaneritaiḥ //
2.55.14
saṃstūyamānaḥ paritaḥ sūtamāgadhabandibhiḥ /
praviveśa purīṃ ramyāṃ hṛṣṭapuṣṭajanāyutam //
2.55.15
śvetavyajana sacchatrapatākādhvajamālinīm /
siktasaṃmṛṣṭabhūbhāgāpaṇaśobhāsamanvitām //
2.55.16
kailāsādriprakāśābhirujjvalāṃ saudhapaṅktibhiḥ /
sa tatrāgarudhūpotthagandhāmoditadiṅmukham //
2.55.17
vikīryamāṇaḥ paritaḥ pauranārījanairmuhuḥ /
lājavarṣeṇa sānandaṃ vīkṣamāṇaśca nāgaraiḥ //
2.55.18
upadābhiranekābhistatratatra vaṇigjanaiḥ /
saṃbhāvyamānaḥ śanakairjagama svapuraṃ prati //
2.55.19
sa praviśya gṛhaṃ ramyaṃ sarvamaṇḍalamaṇḍitam /
samyaksaṃbhāvayāmāsa suhṛdo brāhmaṇānapi //
2.55.20
saṃsevyamānaśca tadā nānādeśeśvarairnṛpaiḥ /
sabhāyāṃ rājaśārdūlo reme śakra ivāparaḥ //
2.55.21
evaṃ suhṛdbhiḥ sahitaḥ pūrayitvā manoratham /
sagaraḥ saha bhāryābhyāṃ reme nṛpavarottamaḥ //
2.55.22
aṃśumantaṃ tataḥ pautraṃ mudā vinayaśālinam /
vasiṣṭhānumate rājā yauvarājye 'bhyaṣecayat //
2.55.23
paurajānapadānāṃ tu bandhūnāṃ suhṛdāmapi /
sa priyo 'bhavadatyarthamudāraiśca guṇairnṛpaḥ //
2.55.24
prajāstamanvarajyanta bālamapyamitaujasam /
navaṃ ca śuklapakṣādauśītāṃśumaciroditam //
2.55.25
sa tena sahitaḥ śrīmānsutdṛdbhiśca nṛpottamaḥ /
bhāryābhyāmanurūpābhyāṃ ramamāṇo 'vasacciram //
2.55.26
yuvaiva rājaśārdūlaḥ sākṣāddharma ivāparaḥ /
pālayāmāsa vasudhāṃ saśailavanakānanām //
2.55.27
evaṃ mahānahimadīdhitivaṃśamauliratnāya yamānavapuruttarakosaleśaḥ /
pūrṇenduvatsakalalokamano 'bhirāmaḥ sārddha prajābhirakhilābhiralaṃ jaharṣa //
2.55.27.p1
iti śrībrahmāṇḍe mahāpurāṇe vāyuprokte madhyamābhāge tṛtīya upoddhātapāde sāgaropākhyāneśumato rājyaprāptirnāma pañcapañcaśattamo 'dhyāyaḥ // 55//