Pramāṇa · Search · About · API

Brahmandapurana 2.60

Brahmāṇḍapurāṇa 2.60

Language
Sanskrit

Contents

2.60.1

sūta uvāca
tato manvantare 'tīte cākṣuṣe daivataiḥ saha /
vaivasvatāya mahate pṛthivīrājyamādiśat //

2.60.2

tasmādvaivasvatātputrā jajñire daśa tatsamāḥ /
ikṣvākuśca nṛgaścaiva dhṛṣṭaḥ śaryātirevaca //

2.60.3

nariṣyantastathā prāṃśurnābhāgo diṣṭa eva ca /
karūṣaśca pṛṣadhraśca navaite mānavāḥ smṛtāḥ //

2.60.4

brahmaṇā tu manuḥ pūrvaṃ coditastu prabodhitam /
yaṣṭuṃ prajakrame kāmaṃ hayamedhena bhūpatiḥ //

2.60.5

athākarotputrakāmaḥ parāmiṣṭiṃ prajāpatiḥ /
mitrāvaruṇayoraṃśe analāhutimeva yat //

2.60.6

tatra divyāṃbaradharā divyābharaṇabhūṣitā /
divyāsaṃhananā caiva ilā jajña iti śrutam //

2.60.7

tāmiletyatha hovāca manurdaṇḍadharastataḥ /
anugacchasva bhadraṃ te tamilā pratyuvāca ha //

2.60.8

dharmayuktamidaṃ vākyaṃ putrakāmaṃ prajāpatim /
mitrāvaruṇayoraṃśe jātāsmi vadatāṃ vara //

2.60.9

tayoḥ sakāśaṃ yāsyāmi māto dharmo hato vadhīt /
evamuktvā punardevī tayorantikamāgamat //

2.60.10

gatvāntikaṃ varārohā prāñjalirvākyamabravīt /
aṃśe 'sminyuvayorjātā devau kiṃ karavāṇi vām //

2.60.11

manunaivāhamuktāsmi anugacchasva māmiti /
tathā tu bruvatīṃ sādhvīmiḍāmāśritya tāvubhau //

2.60.12

devau ca mitrāvaruṇāvidaṃ vacanamūcatuḥ /
anena tava dharmajñe praśrayoṇa damena ca //

2.60.13

satyena caiva suśroṇi prītau svau varavarṇini /
āvayostvaṃ mahābhāge khyātiṃ kanye prayāsyasi //

2.60.14

sudyumna iti vikhyātastriṣu lokeṣu pūjitaḥ /
jagatpriyo dharmaśīlo manorvaṃśavivarddhanaḥ //

2.60.15

mānavaḥ sa tu sudyumnaḥ strībhāvamagamatprabhuḥ /
sā tu devī varaṃ labdhvā nivṛttā pitaraṃ prati //

2.60.16

budhenottaramāsādya maithunāyopamantritā /
somaputrādbudhāccāsyāmailo jajñe purūkhāḥ //

2.60.17

budhātsā janayitvā tu sudyumnatvaṃ punargatāḥ /
sudyumnasya tu dāyādāstrayaḥ paramadhārmikāḥ //

2.60.18

utkalaśca gayaścaiva vinataśca tathaiva ca /
utkalasyotkalaṃ rāṣṭraṃ vinatasyāpi paścimam //

2.60.19

dikpūrvā tasya rājarṣergayasya tu gayā purī /
praviṣṭetu manau tasminprajāḥ sṛṣṭvā divākaram //

2.60.20

daśadhā tadadhātkṣattramakarotpṛthivīmimām /
ikṣvākureva dāyādo bhāgaṃ daśamamāptavān //

2.60.21

kanyābhāvattu sudyumno naiva bhāgamavāptavān /
vasiṣṭhavacanāccāsītpratiṣṭhāne mahādyutiḥ //

2.60.22

pratiṣṭhāṃ dharmarājasya sudyumnasya mahātmanaḥ /
etacchrutvā tu ṛṣayaḥ papracchuḥ sūtajaṃ prati /
mānavaḥ sa tu sudyamnaḥ strībhāvamagamatkatham //

2.60.23

sūta uvāca
purā maheśvaraṃ draṣṭuṃ kumārāssanakādayaḥ /
ilāvṛtaṃ samājagmurdadṛśurvṛṣabhadhvajam //

2.60.24

umayā ramamāṇaṃ taṃ vilokya pihitesthale /
pratijagmustataḥ sarve vrīḍitābhūcchivāpyatha //

2.60.25

provāca vacanaṃ devī priyahetoḥ priyaṃ priyā /
imaṃ mamāśramaṃ deva yaḥ pumānsaṃ pravekṣyati //

2.60.26

bhaviṣyati dhruvaṃ nārī sa tulyāpsarasāṃ śubhā /
tatra sarvāṇi bhūtāni piśācāḥ paśavaśca ye //

2.60.27

strībhūtāḥ saharudreṇa kroḍantyapsaraso yathā /
umāvanaṃ praviṣṭastu sa rājā mṛgayāṃ gataḥ //

2.60.28

piśācaiḥ saha bhūtaistu rudre strībhāvamāsthite /
tasmātsarājā sudyumnaḥ strībhāvaṃ labdhavānpunaḥ /
mahādevaprasādācca mānavatvamavāptavān //

2.60.28.p1

iti śrībrahmāṇḍe mahāpurāṇe madhyamabhāge vāyuprokte vaivasvatamanoḥ sṛṣṭirnāma ṣaṣṭitamo 'dhyāyaḥ // 60//

Linked texts (7)