Brahmandapurana 2.64
Brahmāṇḍapurāṇa 2.64
- Language
- Sanskrit
Contents
- 2.64.24 — 1 part
2.64.1
sūta uvāca
anujasya vikukṣestu nimervaṃśaṃ niboghata /
yo 'sau niveśayāmāsa puraṃ devapuropamam //
2.64.2
jayantamiti vikhyātaṃ gautamasyāśramāntikam /
yasyānvavāye jajñe vai janako nṛpasattamaḥ //
2.64.3
nimirnāma sudharmātmā sarvasattvanamaskṛtaḥ /
āsītputro mahārāja caikṣvākorbhūritejasaḥ //
2.64.4
sa śāpena vasiṣṭhasyavidehaḥ samapadyata /
tasya putro mithirnāma janitaḥ parvabhistribhiḥ //
2.64.5
araṇyāṃ mathyamānāyā prādurbhūto mahāyaśāḥ /
nāmnā mithiriti khyāto jananājjanako 'bhavat //
2.64.6
mithirnāma mahāvīryo yenāsau mithilābhavat /
rājāsau nāma janako janakāccā pyudāvasuḥ //
2.64.7
udāvasostu dharmātmā jāto 'sau nandivarddhanaḥ /
nandivardhanataḥ śūraḥ suketurnāma dhārmikaḥ //
2.64.8
suketorapi dharmātmā devarāto mahābalaḥ /
devarātasya dharmātmā bṛhaduktha iti śrutaḥ //
2.64.9
bṛhadukthasya tanayo mahāvīryaḥ pratāpavān /
mahāvīryasya dhṛtimān sudhṛti stasya cātmajaḥ //
2.64.10
sudhṛterapi dharmātmā dhṛṣṭaketuḥ parantapaḥ /
dhṛṣṭaketusutaścāpi haryaśvo nāma viśrutaḥ //
2.64.11
haryaśvasya maruḥ putro maroḥ putraḥ pratiṃbakaḥ /
pratiṃbakasya dharmātmā rājā kīrttirathaḥ smṛtaḥ //
2.64.12
putraḥ kīrttirathasyāpi devamīḍha iti śrutaḥ /
devamīḍhasya vibudho vibudhasya mahādhṛtiḥ //
2.64.13
mahādhṛtisuto rājā kīrttirātaḥ pratāpavān /
kīrtirātātmajo vidvān mahārometi viśrutaḥ //
2.64.14
mahāromṇastu vikhyātaḥ svarṇaromā vyajāyata /
svarṇaromātmajaścāpi hrasvaromābhavannṛpaḥ //
2.64.15
hrasvaromānmajo vidvān sariddhvaja iti śrutaḥ /
udbhinnā karṣatā yena sītā rājñā yaśasvinī //
2.64.16
rāmasya mahidhī sādhvī suvratā niyatavratā /
vaiśaṃpāyana uvāca
kathaṃ sītā samutpanna kṛṣyamāṇa yaśasvinī //
2.64.17
kimarthaṃ vākṛṣadrājā kṣetraṃ yasmin babhūva ha /
sūta uvāca
agnikṣetre kṛṣyamāṇe aśvamedhe mahātmanaḥ //
2.64.18
vidhinā suprayatnena tasmātsā tu samutthitā /
sīradhvajānujātastu bhānumānnāma maithilaḥ //
2.64.19
bhrātā kuśadhvajastasya sa kāśyadhipatirnṛpaḥ /
tasya bhānumataḥ putraḥ pradyumnaśca patāpavān //
2.64.20
munistasya sutaścāpi tasmādūrjavahaḥ smṛtaḥ /
ūrjavahātsanadvājaḥ śakunistasya cātmajaḥ //
2.64.21
svāgataḥ śakuneḥ putraḥ suvarcāstatsutaḥ smṛtaḥ /
sutopastasya dāyādaḥ suśrutastasya cātmajaḥ //
2.64.22
suśrutasya jayaḥ putro jayasya vijayaḥ sutaḥ /
vijayasya kratuḥ putra- kratośca sunayaḥ smataḥ //
2.64.23
sunayādvītahavyastu vītahavyātmajo dhṛtiḥ /
dhṛtestu bahulāśvo 'bhūdbahulāśvasutaḥ kṛtiḥ //
2.64.24
tasminsaṃtiṣṭhate vaṃśo canakānāṃ mahātmanām /
ityete maithilāḥ proktāḥ somasyāpi nibodhata //
2.64.24.p1
eti śrībrahmāṇḍe mahāpurāṇe vāyuprokte madhyamabhāge tṛtīye upoddhātapāde nimivaṃśānukīrtanaṃ nāma catuḥṣaṣṭitamo 'dhyāyaḥ // 64//
Linked texts (2)
- Vāyupurāṇa — Vyāsa, Sanskrit
- Critical edition (Baroda) — Sanskrit