[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.66 # Brahmandapurana 2.66 Brahmāṇḍapurāṇa 2.66 - **Language:** Sanskrit ## Contents - [2.66.57](https://indike.org/pramana/in.purana.brahmanda.2.66.57) — 1 part - [2.66.72](https://indike.org/pramana/in.purana.brahmanda.2.66.72) — 1 part - [2.66.90](https://indike.org/pramana/in.purana.brahmanda.2.66.90) — 1 part ### [2.66.1](https://indike.org/pramana/in.purana.brahmanda.2.66.1) sūta uvāca somasya tu budhaḥ putro budhasya tu purūravāḥ / tejasvī dānaśīlaśca yajvā vipuladakṣiṇaḥ // ### [2.66.2](https://indike.org/pramana/in.purana.brahmanda.2.66.2) brahmavādī parākrāntaḥ śatrubhiryudhi durjayaḥ / āharttā jāgnihotrasya yajñānāṃ ca mahīpatiḥ // ### [2.66.3](https://indike.org/pramana/in.purana.brahmanda.2.66.3) satyavāgdharmabuddhiśca kāntaḥ saṃvṛttamaithunaḥ / atīva triṣu lokeṣu rūpeṇāpratimo 'bhavat // ### [2.66.4](https://indike.org/pramana/in.purana.brahmanda.2.66.4) taṃ brahmavādinaṃ dāntaṃ dharmajñaṃ satyavādinam / urvaśī varayāmāsa hitvā mānaṃ yaśasvinī // ### [2.66.5](https://indike.org/pramana/in.purana.brahmanda.2.66.5) tayā sahāvasadrājā daśa varṣāṇi cāṣṭa ca / sapta ṣaṭsapta cāṣṭau ca daśa cāṣṭau ca vīryavān // ### [2.66.6](https://indike.org/pramana/in.purana.brahmanda.2.66.6) vane caitrarathe ramye tathā mandākinītaṭe / alakāyāṃ viśālāyāṃ nandane ca vanottame // ### [2.66.7](https://indike.org/pramana/in.purana.brahmanda.2.66.7) gandhamādanapādeṣu meruśṛṅge nagottame / uttarāṃśca kurūnprāpya kalāpagrāmameva ca // ### [2.66.8](https://indike.org/pramana/in.purana.brahmanda.2.66.8) eteṣu vanamukhyeṣu surairācariteṣu ca / urvaśyā mahito rājā reme paramayā mudā // ### [2.66.9](https://indike.org/pramana/in.purana.brahmanda.2.66.9) ṛṣaya ūcuḥ gandharvī corvaśī devī rājānaṃ mānuṣaṃ katham / utsṛjya taṃ ca saṃprāptā tanno brūhi ca duṣkṛtam // ### [2.66.10](https://indike.org/pramana/in.purana.brahmanda.2.66.10) sūta uvāca brahmaśāpābhibhūtā sā mānuṣaṃ samupasthitā / ātmanaḥ śāpamokṣārthaṃ niyamaṃ sā cakāra tu // ### [2.66.11](https://indike.org/pramana/in.purana.brahmanda.2.66.11) anagnadarśanaṃ caiva akāmātsaha maithunam / dvau meṣau śayanābhyāśe sā tāvaddhyavatiṣṭhate // ### [2.66.12](https://indike.org/pramana/in.purana.brahmanda.2.66.12) ghṛtamātraṃ tathā'hāraḥ kālamekaṃ tu pārthiva / yadyeṣa samayo rājanyāvatkālaśca te dṛḍhaḥ // ### [2.66.13](https://indike.org/pramana/in.purana.brahmanda.2.66.13) tāvatkālaṃ tu vatsyāmi eṣa naḥ samayaḥ kṛtaḥ / tasyāstaṃ samayaṃ sarvaṃ sa rājā paryapālayat // ### [2.66.14](https://indike.org/pramana/in.purana.brahmanda.2.66.14) evaṃ sā cāvasattena sahelenā bhigāminī / varṣāṇyatha catuḥṣaṣṭiṃ tadbhaktyā śāpamohitā // ### [2.66.15](https://indike.org/pramana/in.purana.brahmanda.2.66.15) urvaśī mānuṣaṃ prāptā gandharvāścintayānvitāḥ / gandharvā ūcuḥ cintayadhvaṃ mahābhāgā yathā sā tu varāṅganā // ### [2.66.16](https://indike.org/pramana/in.purana.brahmanda.2.66.16) āgacchettu punardevānurvaśī svargabhūṣaṇam / tato viśvāpasurnāma gandharvaḥ sumahāmatiḥ // ### [2.66.17](https://indike.org/pramana/in.purana.brahmanda.2.66.17) jahāroraṇakau tasyāstatpaścātsā divaṃ gatā / tasyāstu viraheṇāsau bhramamāṇastvathorvaśīm // ### [2.66.18](https://indike.org/pramana/in.purana.brahmanda.2.66.18) dadarśa ca kurukṣetre tayā saṃbhāṣito 'pyayam / gandharvānupadhāveti sa taccakre 'tha te daduḥ // ### [2.66.19](https://indike.org/pramana/in.purana.brahmanda.2.66.19) agnisthālīṃ tayā rājā gataḥ svargaṃ mahārathaḥ / eko 'gniḥ pūrvamāsīdvai ailastaṃ trīnakalpayat // ### [2.66.20](https://indike.org/pramana/in.purana.brahmanda.2.66.20) evaṃprabhāvo rājāsīdailastu dvijasattamāḥ / deśe puṇyatame caiva maharṣibhiralaṅkṛte // ### [2.66.21](https://indike.org/pramana/in.purana.brahmanda.2.66.21) rājyaṃ sa kārayāmāsa prayāge pṛthivīpatiḥ / uttare yāmune tīre pratiṣṭhāne mahāyaśāḥ // ### [2.66.22](https://indike.org/pramana/in.purana.brahmanda.2.66.22) tasya putrā babhūvurhi ṣaḍindropamatejasaḥ / gandharvaloke viditā āyurddhīmānamāvasuḥ // ### [2.66.23](https://indike.org/pramana/in.purana.brahmanda.2.66.23) viśvāvasuḥ śratāyuśca ghṛtāyuścovarśīsutāḥ / amāva sostu vai jāte bhīmo rājātha viśvacit // ### [2.66.24](https://indike.org/pramana/in.purana.brahmanda.2.66.24) śrīmānbhīmasya dāyādo rājāsītkāñcanaprabhaḥ / vidvāṃstu kāñcanasyāpi suhotro 'bhūnmahābala // ### [2.66.25](https://indike.org/pramana/in.purana.brahmanda.2.66.25) suhotrasyābhavajjahnuḥ keśinīgarbhasaṃbhavaḥ / pratigatya tato gaṅgā vitate ya5karmaṇi // ### [2.66.26](https://indike.org/pramana/in.purana.brahmanda.2.66.26) sādayāmāsa taṃ deśaṃ bhāvinor'thasya darśanāt / gaṅgayā plāvitaṃ dṛṣṭvā yajñavāṭaṃ samantataḥ // ### [2.66.27](https://indike.org/pramana/in.purana.brahmanda.2.66.27) sauhotrirapi saṃkruddho gaṅgāṃ rājā dvijottamāḥ / tadārājarṣiṇā pītāṃ gaṅgāṃ dṛṣṭvā surarṣayaḥ // ### [2.66.28](https://indike.org/pramana/in.purana.brahmanda.2.66.28) upaninyurmahābhāgā duhitṛtvena jāhnavīm / yauvanāśvasya pautrīṃ tu kāverīṃ jahnurāvahat // ### [2.66.29](https://indike.org/pramana/in.purana.brahmanda.2.66.29) yuvanāśvasya śāpena gaṅgārddhena vinirmame / kāverīṃ saritāṃ śreṣṭha jahnubhāryāmaninditām // ### [2.66.30](https://indike.org/pramana/in.purana.brahmanda.2.66.30) jahnustu dayitaṃ putraṃ sunahaṃ nāma dhārmikam / kāveryāṃ janayāmāsa ajakastasya cātmajaḥ // ### [2.66.31](https://indike.org/pramana/in.purana.brahmanda.2.66.31) ajakasya tu dāyādo balākāśvo mahāyaśāḥ / babhūva mṛga śīlaḥ suśastasyātmajaḥ smṛtaḥ // ### [2.66.32](https://indike.org/pramana/in.purana.brahmanda.2.66.32) kuśaputrā babhūvuśca catvāro devavarcasaḥ / kuśāṃbaḥ kuśānābhaśca amūrtarayamo vasuḥ // ### [2.66.33](https://indike.org/pramana/in.purana.brahmanda.2.66.33) kuśikastu tapastepe putrārthī rājasattamaḥ / pūrṇe varṣasahasre vai śatakraturapaśyata // ### [2.66.34](https://indike.org/pramana/in.purana.brahmanda.2.66.34) tamugratapasaṃ dṛṣṭvā sahasrākṣaḥ purandaraḥ / samarthaḥ putrajanane svayamevāsya śāśvataḥ // ### [2.66.35](https://indike.org/pramana/in.purana.brahmanda.2.66.35) putratvaṃ kalpayāmāsa svayameva purandaraḥ / gādhirnāmābhavatputraḥ kauśikaḥ pākaśāsanaḥ // ### [2.66.36](https://indike.org/pramana/in.purana.brahmanda.2.66.36) paurukutsyabhavadbhāryā gādhestasyāmajāyata / pūrvaṃ kanyā mahābhāgā nāmnā satyavatī śubhā // ### [2.66.37](https://indike.org/pramana/in.purana.brahmanda.2.66.37) tāṃ gādhiḥ putrakāmāya ṛcīkāya dadau prabhuḥ / tasyāḥ prītastu vai bharttā bhārgavo bhṛgunandanaḥ // ### [2.66.38](https://indike.org/pramana/in.purana.brahmanda.2.66.38) putrārthe sādhayāmāsa caruṃ gādhestathaiva ca / athāvocatpriyāṃ tatra ṛcīko bhārgavastadā // ### [2.66.39](https://indike.org/pramana/in.purana.brahmanda.2.66.39) upabhojyaścarurayaṃ tvayā mātrā ca te śubhā / tasyā janiṣyate putro dīptimānkṣattriyarṣabhaḥ // ### [2.66.40](https://indike.org/pramana/in.purana.brahmanda.2.66.40) ajeyaḥ kṣattriyairyuddhe kṣatriyarṣabhasūdanaḥ / tavāpi putraṃ kalyāṇi dhṛtimantaṃ tapodhanam // ### [2.66.41](https://indike.org/pramana/in.purana.brahmanda.2.66.41) śamātmakaṃ dvijaśreṣṭhaṃ carureṣa vidhāsyati / evamuktvā tu tāṃ bhāryāmṛcīko bhṛgunandanaḥ // ### [2.66.42](https://indike.org/pramana/in.purana.brahmanda.2.66.42) tapasyabhirato nityamaraṇyaṃ praviśeśa ha / gādhiḥ sadārastu tadā ṛcīkāśramamabhyagāt // ### [2.66.43](https://indike.org/pramana/in.purana.brahmanda.2.66.43) tīrthayātrāprasaṃgena sutāṃ draṣṭuṃ nareśvaraḥ / carudvayaṃ gṛhītvā tu ṛṣeḥ styavatī tadā // ### [2.66.44](https://indike.org/pramana/in.purana.brahmanda.2.66.44) bharturvacanamavyagrā hṛṣṭā mātre nyavedayat / mātā tu tasyai daivaina duhitre svacaruṃ dadau // ### [2.66.45](https://indike.org/pramana/in.purana.brahmanda.2.66.45) tasyāścarumathājñānādātmanaḥ sā cakāra ha / atha satyavatī garbhaṃ kṣatriyāntakaraṃ śubham // ### [2.66.46](https://indike.org/pramana/in.purana.brahmanda.2.66.46) dhārayāmāsa dīptena vapuṣā ghoradarśanā / tāmṛcīkastato dṛṣṭvā yogenāpyavamṛśya ca // ### [2.66.47](https://indike.org/pramana/in.purana.brahmanda.2.66.47) tadābravīddvijaśreṣṭhaḥ svāṃ bhāryāṃ varavarṇinīm / mātrāsi vañcitā bhadre caruvyatyāsahetunā // ### [2.66.48](https://indike.org/pramana/in.purana.brahmanda.2.66.48) janiṣyati hi putraste krūrakarmātidārumaḥ / mātā janiṣyate cāpi tathā bhūtaṃ tapodhanam // ### [2.66.49](https://indike.org/pramana/in.purana.brahmanda.2.66.49) viśvaṃ hi brahmatapasā mayā tatra samarpitam / evamuktā mahābhāgā bhartrā satyavatī tadā // ### [2.66.50](https://indike.org/pramana/in.purana.brahmanda.2.66.50) prasādayāmāsa patiṃ suto me nedṛśo bhavet / brāhmaṇāpasadastvatta ityukto munimabravīt // ### [2.66.51](https://indike.org/pramana/in.purana.brahmanda.2.66.51) naiva saṃkalpitaḥ kāmo mayā bhadre tathā tvayā / ugrakarmā bhavetputraḥ piturmātuśca kāraṇāt // ### [2.66.52](https://indike.org/pramana/in.purana.brahmanda.2.66.52) punaḥ satyavatī vākyamevamuktābravīdidam / icchaṃllokānapi mune sṛjethāḥ kiṃ punaḥ sutam // ### [2.66.53](https://indike.org/pramana/in.purana.brahmanda.2.66.53) śamātmakamṛjuṃ bharttaḥ putraṃ me dātumarhasi / kāmamevaṃvidhaḥ pautro mama syāttava suvrata // ### [2.66.54](https://indike.org/pramana/in.purana.brahmanda.2.66.54) yadyanyathā na sakyaṃ vai kartuṃmevaṃ dvijottama / tataḥ prasādamakarotsa tasyāstapaso balāt // ### [2.66.55](https://indike.org/pramana/in.purana.brahmanda.2.66.55) putre nāsti viśeṣo me pautre vā varavarṇini / tvayā yathoktaṃ vacanaṃ tathā bhadrebhaviṣyati // ### [2.66.56](https://indike.org/pramana/in.purana.brahmanda.2.66.56) tasmātsatyavatī putraṃ janayāmāsa bhārgavam / tapasyabhirataṃ dāntaṃ jamadagniṃ śamātmakam // ### [2.66.57](https://indike.org/pramana/in.purana.brahmanda.2.66.57) bhṛgoścaruviparyāse raudravaiṣṇavayoḥ purā / jamanādvaiṣṇavasyāgnerjamadagnirajāyata // ### [2.66.57.p1](https://indike.org/pramana/in.purana.brahmanda.2.66.57.p1) viśvāmitraṃ tu dāyādaṃ gādhiḥ kuśikanandanaḥ / prāpya brahmarṣisamatāṃ jagāma brahmaṇā vṛtaḥ 66.58// ### [2.66.59](https://indike.org/pramana/in.purana.brahmanda.2.66.59) sā hi satyavatī puṇyā satyavrataparāyaṇā / kauśikī tu samākhyātā pravṛtteyaṃ mahānadī // ### [2.66.60](https://indike.org/pramana/in.purana.brahmanda.2.66.60) parisrutā mahābhāgā kauśikī saritāṃ varā / ikṣvākuvaṃśaprabhavo reṇuko nāma pārthivaḥ // ### [2.66.61](https://indike.org/pramana/in.purana.brahmanda.2.66.61) tasya kanyā mahābhāgā kamalī nāma reṇukā / reṇukāyāṃ kamalyāṃ tu tapodhṛtisamādhinā // ### [2.66.62](https://indike.org/pramana/in.purana.brahmanda.2.66.62) ārcīko janayāmāma jamadagniḥ sudāruṇam / sarvavidyāntagaṃ śreṣṭhaṃ dhanurvedasya pāragam // ### [2.66.63](https://indike.org/pramana/in.purana.brahmanda.2.66.63) rāmaṃ kṣattriyahantāraṃ pradīptamiva pāvakam / aurvasyaivamṛcīkasya satyavatyāṃ mahāmanāḥ // ### [2.66.64](https://indike.org/pramana/in.purana.brahmanda.2.66.64) jamadagnistapovīryājjajñe brahmavidāṃ varaḥ / madhyamaśca śunaḥśephaḥ śunaḥ pucchaḥ kaniṣṭhakaḥ // ### [2.66.65](https://indike.org/pramana/in.purana.brahmanda.2.66.65) viśvāmitrastu dharmātmā nāmnā viśvarathaḥ smṛtaḥ / jajñe bhṛguprasādena kauśikānvayavarddhanaḥ // ### [2.66.66](https://indike.org/pramana/in.purana.brahmanda.2.66.66) viśvāmitrasya putrastu śunaḥśepho 'bhavanmuniḥ / hariścandrasya yajñe tu paśutve niyataḥ sa vai // ### [2.66.67](https://indike.org/pramana/in.purana.brahmanda.2.66.67) devairdattaḥ śunaḥśepho viśvāmitrāya vai punaḥ / devairdattaḥ sa vai yasmāddevarātastato 'bhavat // ### [2.66.68](https://indike.org/pramana/in.purana.brahmanda.2.66.68) viśvāmitrasya putrāṇāṃ śunaḥśepho 'grajaḥ smṛtaḥ / madhucchandādayaścaiva kṛtadevau dhruvāṣṭakau // ### [2.66.69](https://indike.org/pramana/in.purana.brahmanda.2.66.69) kacchapaḥ pūraṇaścaiva viśvāmitrasutāstu vai / teṣāṅgotrāṇi bahudhā kauśikānāṃ mahātmanām // ### [2.66.70](https://indike.org/pramana/in.purana.brahmanda.2.66.70) pārthivā devarātāśca jājñavalkyāḥ samarpaṇāḥ / uduṃbarāśca vātaḍyāstalakāyanacāndravāḥ // ### [2.66.71](https://indike.org/pramana/in.purana.brahmanda.2.66.71) lohiṇyo reṇavaschaiva tathā kāriṣavaḥ smṛtāḥ / babhravaḥ paṇinaschaiva dhyānajapyāstathaiva ca // ### [2.66.72](https://indike.org/pramana/in.purana.brahmanda.2.66.72) śyāmāyanā hiraṇyākṣāḥ sāṃkṛtā gālavāḥ smṛtāḥ / devalā yāmadūtāśca śālaṅkāyanabāṣkalāḥ // ### [2.66.72.p1](https://indike.org/pramana/in.purana.brahmanda.2.66.72.p1) lālāḍhyā bādarāścānye viśvāmitrasya dhīmataḥ / ṛṣyantaravivāhyāste bahabaḥ kauśikāḥ smṛtāḥ // 65.73// ### [2.66.74](https://indike.org/pramana/in.purana.brahmanda.2.66.74) kauśikāḥ sauśrutāścaiva tathānye saindhavāyanāḥ / yogeśvarasya puṇyasya bahmarṣeḥ kauśikasya vai / viśvāmitrasya putrāṇāṃ śunaḥśepho 'grajaḥ smṛtaḥ // ### [2.66.75](https://indike.org/pramana/in.purana.brahmanda.2.66.75) dṛṣadvatī sutaścāpi viśvāmitrāttathāṣṭakaḥ / aṣṭakasya suto lauhiḥ prokto jahnugaṇo mayā // ### [2.66.76](https://indike.org/pramana/in.purana.brahmanda.2.66.76) ṛṣaya ūcuḥ kiṃlakṣaṇena dharmeṇa tapaseha śrutena vā // ### [2.66.77](https://indike.org/pramana/in.purana.brahmanda.2.66.77) brāhmaṇyaṃ samanuprāptaṃ viśvāmitrādibhirnṛpaiḥ / yenayenābhidhānena brāhmaṇyaṃ kṣatriyā gatāḥ // ### [2.66.78](https://indike.org/pramana/in.purana.brahmanda.2.66.78) viśeṣaṃ jñātumicchāmi tapaso dānatastathā / evamuktastato vākyamabravīdidamarthavat // ### [2.66.79](https://indike.org/pramana/in.purana.brahmanda.2.66.79) anyāyopagatairdravyairāhūya dvijasattamān / dharmābhikāṅkṣī yajate na dharmaphalamaśnute // ### [2.66.80](https://indike.org/pramana/in.purana.brahmanda.2.66.80) japaṃ kṛtvā tathā tīvraṃ dhanalobhānniraṅkuśaḥ / rāgamohānvito hyante pāvanārthaṃ dadāti yaḥ // ### [2.66.81](https://indike.org/pramana/in.purana.brahmanda.2.66.81) tena dattāni dānāni hyaphalāni bhavantyuta / tasya dharmapravṛttasya hiṃsakasya durātmanaḥ // ### [2.66.82](https://indike.org/pramana/in.purana.brahmanda.2.66.82) evaṃ labdhvā dhane mohāddadato yajataśca ha / saṃkliṣṭaṃ karmaṇā dānaṃ na tiṣṭhati durātmanaḥ // ### [2.66.83](https://indike.org/pramana/in.purana.brahmanda.2.66.83) nyāyāgatānāṃ dravyāṇāṃ tīrthaṃ saṃpratipādanam / kāmānanabhi saṃdhāya yajate ca dadāti ca // ### [2.66.84](https://indike.org/pramana/in.purana.brahmanda.2.66.84) sa dānaphalamāpnoti tacca dānaṃ sukhodayam / dānena bhogānāpnoti svargaṃ satyena gacchati // ### [2.66.85](https://indike.org/pramana/in.purana.brahmanda.2.66.85) tapasā tu sutaptena lokānviṣṭabhya tiṣṭhati / satyaṃ tu tapasaḥ śreyastasmājjñānaṃ guru smṛtam // ### [2.66.86](https://indike.org/pramana/in.purana.brahmanda.2.66.86) śrūyate hi tapassiddhāḥ kṣattropetā dvijātayaḥ / viśvāmitro narapatirmāndhātā saṃkṛtiḥ kapiḥ // ### [2.66.87](https://indike.org/pramana/in.purana.brahmanda.2.66.87) kāśyaśca purukutsaśca śalo gṛtsamadaḥ prabhuḥ / ārṣṭiṣeṇo 'jamīḍhaśca bhārgavyomastathaiva ca // ### [2.66.88](https://indike.org/pramana/in.purana.brahmanda.2.66.88) kakṣīvāṃścaivauśijaśca nṛpaśca śiśirastathā / rathāntaraḥ śaunakaśca viṣṇuvṛddhādayo nṛpāḥ // ### [2.66.89](https://indike.org/pramana/in.purana.brahmanda.2.66.89) kṣatropetāḥ smṛtā hyete tapasā ṛṣitāṃ gatāḥ / ete rājarṣayaḥ sarve siddhiṃ tu mahatīṃ gatāḥ // ### [2.66.90](https://indike.org/pramana/in.purana.brahmanda.2.66.90) ata jñardhvaṃ pravakṣyāmi āyorvaṃśaṃ mahātmanaḥ // ### [2.66.90.p1](https://indike.org/pramana/in.purana.brahmanda.2.66.90.p1) iti śrībrahmāṇḍe mahāpurāṇe vāyuprokte madhyamabhāge tṛtīya uvoddhāta pāde bhārgavacarite amāvasuvaṃśānukīrttanaṃ nāma ṣaṭṣaṣṭitamo 'dhyāyaḥ // 66// ## Linked texts (6) - [Vāyupurāṇa](https://indike.org/pramana/in.purana.vayu.2.27.79) — Vyāsa, Sanskrit - [Brahmapurāṇa](https://indike.org/pramana/in.purana.brahma.10.1) — Vyāsa, Sanskrit - [Vulgate](https://indike.org/pramana/in.lit.mahabharata.harivamsa*vulgate.1.26.1) — Sanskrit - [Vulgate (Nīlakaṇṭha's text)](https://indike.org/pramana/in.lit.mahabharata.vyasa*vulgate.12.49.5) — Sanskrit - [Skanda Purāṇa (Kumāra Kavi)](https://indike.org/pramana/in.purana.skandapurana.100.4) — Kumāra Kavi, Sanskrit - [Ṭoḍarānanda](https://indike.org/pramana/in.niti.dharma.nibandha.mahanibandha.todarananda.9.85) — Ṭoḍaramalla 1564, Sanskrit --- Source: [https://indike.org/pramana/in.purana.brahmanda.2.66](https://indike.org/pramana/in.purana.brahmanda.2.66) · Pramāṇa