[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.67 # Brahmandapurana 2.67 Brahmāṇḍapurāṇa 2.67 - **Language:** Sanskrit ## Contents - [2.67.105](https://indike.org/pramana/in.purana.brahmanda.2.67.105) — 1 part ### [2.67.1](https://indike.org/pramana/in.purana.brahmanda.2.67.1) āyoḥ putrā mahātmānaḥ pañcaivāsanmahābalāḥ / svarbhānuta nayāyāṃ te prabhāyāṃ jajñire nṛpāḥ // ### [2.67.2](https://indike.org/pramana/in.purana.brahmanda.2.67.2) nahuṣaḥ prathamasteṣāṃ kṣatravṛddhastataḥ smṛtaḥ / raṃbho rajiranenāśca triṣu lokeṣu viśrutāḥ // ### [2.67.3](https://indike.org/pramana/in.purana.brahmanda.2.67.3) kṣatravṛddhātmajaścaiva sunahotro mahāyaśāḥ / sunahotrasya dāyādāstrayaḥ paramadhārmikāḥ // ### [2.67.4](https://indike.org/pramana/in.purana.brahmanda.2.67.4) kāśaḥ śalaśca dvāvetau tathā gṛtsamadaḥ prabhuḥ / putro gṛtsamadasyāpi śunako yasya śaunakaḥ // ### [2.67.5](https://indike.org/pramana/in.purana.brahmanda.2.67.5) brāhmaṇāḥ kṣatriyāścaiva vaiśyāḥ śūdrāstathaiva ca / etasya vaṃśesaṃbhūtā vicitraiḥ karmabhirdvijāḥ // ### [2.67.6](https://indike.org/pramana/in.purana.brahmanda.2.67.6) śalātmajo hyārṣṭiṣeṇaḥ śiśirastasya jātmajaḥ / śaunakāścārṣṭiṣeṇāśca kṣatropetā dvijātayaḥ // ### [2.67.7](https://indike.org/pramana/in.purana.brahmanda.2.67.7) kāśyasya kāśipo rājā putro dīrghatapāstathā / dhanvaśca dīrghatapaso vidvāndhanvantarīstataḥ // ### [2.67.8](https://indike.org/pramana/in.purana.brahmanda.2.67.8) tapasoṃ'te mahātejā jāto vṛddhasya dhīmataḥ / athainamṛṣayaḥ procuḥ sūtaṃ vākyamida punaḥ // ### [2.67.9](https://indike.org/pramana/in.purana.brahmanda.2.67.9) ṛṣaya ūcuḥ kaśca dhanvantarirdevo mānuṣeṣviha jajñivān / etadveditumicchāmastannobrūhi parantapa // ### [2.67.10](https://indike.org/pramana/in.purana.brahmanda.2.67.10) sūta uvāca dhanvantareḥ saṃbhavo 'yaṃ śrūyatāmiha vai dvijāḥ / sa saṃbhūtaḥ samudrānte mathyamāne 'mṛte purā // ### [2.67.11](https://indike.org/pramana/in.purana.brahmanda.2.67.11) utpannaḥ kalaśātpūrvaṃ sarvataśca śriyā vṛtaḥ / sadyaḥsaṃsiddhakāryaṃ taṃ dṛṣṭvā viṣṇukhasthitaḥ // ### [2.67.12](https://indike.org/pramana/in.purana.brahmanda.2.67.12) abjastvamiti hovāca tasmādabjastu sa smṛtaḥ / abjaḥ provāca viṣṇuṃ taṃ tanayo 'smi tava prabho // ### [2.67.13](https://indike.org/pramana/in.purana.brahmanda.2.67.13) vidhatsva bhāgaṃ sthānaṃ ca mama loke surottama / evamuktaḥ sa dṛṣṭvā tu tathyaṃ provāca sa prabhuḥ // ### [2.67.14](https://indike.org/pramana/in.purana.brahmanda.2.67.14) kṛto yajñavibhāgastu daiteyairhi suraistathā / vedeṣu vidhiyuktaṃ ca vidhihotraṃ maharṣibhiḥ // ### [2.67.15](https://indike.org/pramana/in.purana.brahmanda.2.67.15) na sakyamiha homaṃ vai tubhyaṃ kartuṃ kadāyana / arvāksūto 'si he deva tava mantro na vai prabho // ### [2.67.16](https://indike.org/pramana/in.purana.brahmanda.2.67.16) dvitīyāyāṃ tu saṃbhūtyāṃ loke khyātiṃ gamiṣyasi / aṇimādiyutāṃ siddhiṃ gatastatra bhaviṣyasi // ### [2.67.17](https://indike.org/pramana/in.purana.brahmanda.2.67.17) etenaiva śarīreṇa devatvaṃ prāpsyasi prabho / cā (ca) turmantrairghṛtairgavyairyakṣyante tvāṃ dvijātayaḥ // ### [2.67.18](https://indike.org/pramana/in.purana.brahmanda.2.67.18) atha vā tvaṃ punaścaiva hyāyurvedaṃ vidhāsyasi / avaśyabhāvīhyartho 'yaṃ prāgdṛṣṭastvabjayoninā // ### [2.67.19](https://indike.org/pramana/in.purana.brahmanda.2.67.19) dvitīyaṃ dvāpara prāpya bhavitā tvaṃ na saṃśayaḥ / tasmāttasmai varaṃ dattvā viṣṇurantardadhe tataḥ // ### [2.67.20](https://indike.org/pramana/in.purana.brahmanda.2.67.20) dvitīye dvāpare prāpte saunahotraḥ sa kāśirāṭ / putrakāmastapastepe nṛpo dīrghatapāstathā // ### [2.67.21](https://indike.org/pramana/in.purana.brahmanda.2.67.21) abjaṃ devaṃ tu putrārthe hyārirādhayiṣurnṛpaḥ / vareṇa cchandayāmāsa tato dhanvantarirnṛpam // ### [2.67.22](https://indike.org/pramana/in.purana.brahmanda.2.67.22) nṛpa uvāca bhagavanyadi tuṣṭastvaṃ putro me gatimānbhaveḥ / tatheti samanujñāya tatraivāntaradhātprabhuḥ // ### [2.67.23](https://indike.org/pramana/in.purana.brahmanda.2.67.23) tasya gehe samutpanno devo dhanvantaristadā / kāśirājo mahārājaḥ sarva rogapraṇāśanaḥ // ### [2.67.24](https://indike.org/pramana/in.purana.brahmanda.2.67.24) āyurvedaṃ bharadvājātprāpyeha sabhiṣakkriyam / tamaṣṭadhā punarvyasya śiṣyebhyaḥ pratyapādayat // ### [2.67.25](https://indike.org/pramana/in.purana.brahmanda.2.67.25) dhanvantarisutaścāpi ketumāniti viśrutaḥ / atha ketumataḥ putro jajñe bhīmaratho nṛpaḥ // ### [2.67.26](https://indike.org/pramana/in.purana.brahmanda.2.67.26) putro bhīmarathasyāpi jāto dhīmānprajeśvaraḥ / divodāsa iti khyāto vārāṇasyadhipo 'bhavat // ### [2.67.27](https://indike.org/pramana/in.purana.brahmanda.2.67.27) etasminneva kāle tu purīṃ vārāmasīṃ purā / śūnyāṃ niveśayāmāsa kṣemako nāma rākṣasaḥ // ### [2.67.28](https://indike.org/pramana/in.purana.brahmanda.2.67.28) śaptā hi sā purī pūrvaṃ nikuṃbhena mahātmanā / śūnyā varṣasahasraṃ vai bhavitrīti punaḥ punaḥ // ### [2.67.29](https://indike.org/pramana/in.purana.brahmanda.2.67.29) tasyāṃ tu śaptamātrāyāṃ divodāsaḥ prajeśvaraḥ / viṣayānte purīṃ ramyāṃ gomatyāṃ saṃnyaveśayat // ### [2.67.30](https://indike.org/pramana/in.purana.brahmanda.2.67.30) ṛṣaya ūcuḥ vārāṇasīṃ kimarthaṃ tāṃ nikuṃbhaḥ śaptavānpurā / nikuṃbhaścāpi dharmātmā siddhakṣetraṃ śaśāpa yaḥ // ### [2.67.31](https://indike.org/pramana/in.purana.brahmanda.2.67.31) sūta uvāca divodāsastu rājarṣirnagarīṃ prāpya pārthivaḥ / vasate sa mahātejāḥ sphītāyāṃ vai narādhipaḥ // ### [2.67.32](https://indike.org/pramana/in.purana.brahmanda.2.67.32) etasminneva kāle tu kṛtadāro maheśvaraḥ / devyāḥ sa priyakāmastu vasanvai śvaśurāntike // ### [2.67.33](https://indike.org/pramana/in.purana.brahmanda.2.67.33) devājñayā pāriṣadā viśvarupāstapodhanāḥ / pūrvoktarūpasaṃveṣaistoṣayanti maheśvarīm // ### [2.67.34](https://indike.org/pramana/in.purana.brahmanda.2.67.34) hṛṣyate tairmahādevo menā naiva tu tuṣyati / jugupsate sā nityaṃ vai devaṃ devīṃ tathaiva ca // ### [2.67.35](https://indike.org/pramana/in.purana.brahmanda.2.67.35) mama pārśve tvanācārastava bharttā maheśvaraḥ / daridraḥ sarvathaiveha hā kaṣṭaṃ lajjate na vai // ### [2.67.36](https://indike.org/pramana/in.purana.brahmanda.2.67.36) mātrā tathoktā vacasā strīsvabhāvānna cakṣame / smitaṃ kṛtvā tu varadā harapārśvamathāgamat // ### [2.67.37](https://indike.org/pramana/in.purana.brahmanda.2.67.37) viṣaṇṇavadanā devī mahādevamabhāṣata / neha vatsyāmyahaṃ deva naya māṃ svaṃ niveśanam // ### [2.67.38](https://indike.org/pramana/in.purana.brahmanda.2.67.38) tathoktastu mahādevaḥ sarvāṃllokānnirīkṣya ha / vāsārthaṃ rocayāmāsa pṛthivyāṃ tu dvijottamāḥ // ### [2.67.39](https://indike.org/pramana/in.purana.brahmanda.2.67.39) vārāṇasīṃ mahātejāḥ siddhakṣetraṃ maheśvaraḥ / divodāsena tāṃ jñātvā niviṣṭāṃ nagarīṃ bhavaḥ // ### [2.67.40](https://indike.org/pramana/in.purana.brahmanda.2.67.40) pārśvasthaṃ sa samāhūya gaṇeśaṃ kṣemamabravīt / gaṇeśvara purīṃ gatvā śūnyāṃ vārāṇasīṃ kuru // ### [2.67.41](https://indike.org/pramana/in.purana.brahmanda.2.67.41) mṛdunā cābhyupāyena ativīryaḥ sa pārthivaḥ / tato gatvā nikuṃbhastu purīṃ vārāṇasīṃ purā // ### [2.67.42](https://indike.org/pramana/in.purana.brahmanda.2.67.42) svapne saṃdarśayāmāsa maṅkanaṃ nāmato dvijam / śreyaste 'haṃ kariṣyāmi sthānaṃ me rocayānagha // ### [2.67.43](https://indike.org/pramana/in.purana.brahmanda.2.67.43) madrūpāṃ pratimāṃ kṛtvā nagaryante niveśaya / tathā svapne yathā dṛṣṭaṃ sarvaṃ kāritavāndvijaḥ // ### [2.67.44](https://indike.org/pramana/in.purana.brahmanda.2.67.44) nagarīdvāryanujñāpya rājānaṃ tu yathāvidhi / pūjā tumahatī caiva nityameva prayujyate // ### [2.67.45](https://indike.org/pramana/in.purana.brahmanda.2.67.45) gandhairdhūpaiśca vālyaiśca prekṣaṇīyestathaiva ca / annapradānayuktaiśca hyatyadbhutamivābhavat // ### [2.67.46](https://indike.org/pramana/in.purana.brahmanda.2.67.46) evaṃ saṃpūjyate tatra nityameva gaṇeśvaraḥ / tato varasahasrāṇi nāgarāṇāṃ prayacchati // ### [2.67.47](https://indike.org/pramana/in.purana.brahmanda.2.67.47) putrānhiraṇyamāyūṃṣi sarvakāmāṃstathaiva ca / rājñastu mahiṣī śreṣṭā suyaśā nāma viśrutā // ### [2.67.48](https://indike.org/pramana/in.purana.brahmanda.2.67.48) putrārthamāgatā sādhvī rājñā devī pracoditā / pūjāṃ tu vipulāṃ kṛtvā devī putrānayācata // ### [2.67.49](https://indike.org/pramana/in.purana.brahmanda.2.67.49) punaḥ punarathāgatya bahuśaḥ putrakāraṇāt / na prayacchati putrāṃstu nikuṃbhaḥ kāraṇena tu // ### [2.67.50](https://indike.org/pramana/in.purana.brahmanda.2.67.50) krudhyate yadi rājā tu tata kiñcitpravarttate / atha dīrgheṇa kālena krodho rājānamāviśat // ### [2.67.51](https://indike.org/pramana/in.purana.brahmanda.2.67.51) bhūtaṃ tvidaṃ maṃhaddvāri nāgarāṇāṃ prayacchati / prītyā varāṃśca śataśo na kiñcinnaḥ prayacchati // ### [2.67.52](https://indike.org/pramana/in.purana.brahmanda.2.67.52) māmakaiḥ pūjyate nityaṃ nagaryāṃ mama caiva tu / sa yācitaśca bahuśo devyā me putrakāraṇāt // ### [2.67.53](https://indike.org/pramana/in.purana.brahmanda.2.67.53) na dadāti ca putraṃ me kṛtaghno bahubhojanaḥ / ato nārhati pūjā tu matsakāśātkathañcana // ### [2.67.54](https://indike.org/pramana/in.purana.brahmanda.2.67.54) tasmāttu nāśayiṣyāmitasya sthānaṃ durātmanaḥ / evaṃ tu sa viniścitya durātmā rājakilbiṣī // ### [2.67.55](https://indike.org/pramana/in.purana.brahmanda.2.67.55) sthānaṃ gaṇapateśtasya nāśayāmāsa durmatiḥ / bhagnamāyatanaṃ dṛṣṭvā rājānamaśapatprabhuḥ // ### [2.67.56](https://indike.org/pramana/in.purana.brahmanda.2.67.56) yasmādvināparādhaṃ me tvayā sthānaṃ vināśitam / akasmāttu purī śūnyā bhavitrīte narādhipa // ### [2.67.57](https://indike.org/pramana/in.purana.brahmanda.2.67.57) tatastena tu śāpena śūnyā vārāṇasī tadā / śaptvā purīṃ nikuṃbhastu mahādevamathānayat // ### [2.67.58](https://indike.org/pramana/in.purana.brahmanda.2.67.58) śūnyāṃ purīṃ mahā devo nirmame padamātmanaḥ / tulyāṃ devavibhūtyā tu devyāścaiva mahāmanāḥ // ### [2.67.59](https://indike.org/pramana/in.purana.brahmanda.2.67.59) ramate tatra vai devī hyaiśvaryātsā tu vismitā / devyā krīḍārthamīśāno devo vākyamathābravīt // ### [2.67.60](https://indike.org/pramana/in.purana.brahmanda.2.67.60) nāhaṃ veśma vimokṣyāmi hyavimuktaṃ hi me gṛham / prahasyaināmathovāca hyavimuktaṃ hi me gṛham / nāhaṃ devi gamiṣyāmi tvanyatredaṃ vihāya vai // ### [2.67.61](https://indike.org/pramana/in.purana.brahmanda.2.67.61) mayā saha ramasveha kṣetre bhāminyanuttame / tasmāttadavimuktaṃ hi proktaṃ devena vai svayam // ### [2.67.62](https://indike.org/pramana/in.purana.brahmanda.2.67.62) evaṃ vārāṇasī śaptā hyavimuktaṃ ca kīrttitā / yasminvasedbhavo devaḥ sarvadevanamaskṛtaḥ // ### [2.67.63](https://indike.org/pramana/in.purana.brahmanda.2.67.63) yugeṣu triṣu dharmātmā saha devyā maheśvaraḥ / antarddhānaṃ kalau yāti tatpuraṃ tu mahātmanaḥ // ### [2.67.64](https://indike.org/pramana/in.purana.brahmanda.2.67.64) antarhite pure tasminpurī sā vasate punaḥ / evaṃ vārāṇasī śaptā niveśaṃ punarāgatā // ### [2.67.65](https://indike.org/pramana/in.purana.brahmanda.2.67.65) bhadrasenasya putrāṇāṃ śatamuttamadhanvinām / hatvā niveśayāmāsa divodāso narādhipaḥ // ### [2.67.66](https://indike.org/pramana/in.purana.brahmanda.2.67.66) bhadrasenasya rājyaṃ tu hataṃ tena balīyasā / bhadrasenasya putrastu durmado nāma nāmataḥ // ### [2.67.67](https://indike.org/pramana/in.purana.brahmanda.2.67.67) divodāsena bāleti ghṛṇayā sa visarjitaḥ / divodāsāddṛṣadvatyāṃ vīro jajñe pratarddanaḥ // ### [2.67.68](https://indike.org/pramana/in.purana.brahmanda.2.67.68) tena putreṇa bālena prahṛtaṃ tasya vai punaḥ / vairasyānta mahārāja tadā tena vidhitsatā // ### [2.67.69](https://indike.org/pramana/in.purana.brahmanda.2.67.69) pratardanasya putrau dvau vatso gargaśca viśrutau / vatsaputro hyalarkastu sannatistasya cātmajaḥ // ### [2.67.70](https://indike.org/pramana/in.purana.brahmanda.2.67.70) alarkaṃ prati rājarṣiṃ śrokoṃ gītaḥ purātanaiḥ / ṣaṣṭivarṣasahasrāṇi ṣaṣṭivarṣaśatāni ca // ### [2.67.71](https://indike.org/pramana/in.purana.brahmanda.2.67.71) yuvā rūpeṇa saṃpanno hyalarkaḥ kāśisattamaḥ / lopāmudrāprasādena paramāyuravāptavān // ### [2.67.72](https://indike.org/pramana/in.purana.brahmanda.2.67.72) śāpasyānte mahābāhurhatvā kṣemakarākṣasam / ramyāmāvāsayāmāsa purīṃ vārāṇasīṃ nṛpaḥ // ### [2.67.73](https://indike.org/pramana/in.purana.brahmanda.2.67.73) sannaterapi dāyādaḥ sunītho nāma dhārmikaḥ / sunīthasya tu dāyādaḥ kṣaimākhyo nāma dhārmikaḥ // ### [2.67.74](https://indike.org/pramana/in.purana.brahmanda.2.67.74) kṣemasya ketumānputraḥ suketustasya cātmajaḥ / suketutanayaścāpi dharmaketuriti śrutaḥ // ### [2.67.75](https://indike.org/pramana/in.purana.brahmanda.2.67.75) dharmaketostu dāyādaḥ satyaketurmahārathaḥ / satyaketusutaścāpi vibhurnāma prajeśvaraḥ // ### [2.67.76](https://indike.org/pramana/in.purana.brahmanda.2.67.76) suvibhustu vibhoḥ putraḥ sukumārastataḥ smṛtaḥ / sukumārasya putrastu dhṛṣṭaketuḥ sudhārmikaḥ // ### [2.67.77](https://indike.org/pramana/in.purana.brahmanda.2.67.77) dhṛṣṭaketostu dāyādo veṇuhotraḥ prajeśvaraḥ / veṇuhotrasutaścāpi gārgyo vai nāma viśrutaḥ // ### [2.67.78](https://indike.org/pramana/in.purana.brahmanda.2.67.78) gārgyasya gargabhūmistu vaṃśo vatsasya dhīmataḥ / brāhmaṇāḥ kṣatriyāścaiva tayoḥ putrāḥ sudhārmikāḥ // ### [2.67.79](https://indike.org/pramana/in.purana.brahmanda.2.67.79) vikrāntā balavantaśca sihatulyaparākramāḥ / ityete kāśyapāḥ proktā rajerapi nibodhata // ### [2.67.80](https://indike.org/pramana/in.purana.brahmanda.2.67.80) rajeḥ putraśatānyāsanpañca vīryavato bhuvi / rājeyamiti vikhyātaṃ kṣatra siṃdrabhayāvaham // ### [2.67.81](https://indike.org/pramana/in.purana.brahmanda.2.67.81) tadā devāsure yuddhe samutpanne sudāruṇe / devāścaivāsurāścaiva pitāmahamathābruvan // ### [2.67.82](https://indike.org/pramana/in.purana.brahmanda.2.67.82) āvayorbhagavanyuddhe vijetā ko bhaviṣyati / brūhi naḥ sarvalokeśa śrotumicchāmahe vayam // ### [2.67.83](https://indike.org/pramana/in.purana.brahmanda.2.67.83) brahmovāca / yeṣāmarthāya saṃgrāme rajirāttāyudhaḥ prabhuḥ / yotsyate te vijaṣyante trīṃllokānnātra saṃśayaḥ // ### [2.67.84](https://indike.org/pramana/in.purana.brahmanda.2.67.84) rajiryatastato lakṣmīryato lakṣmīstato dhṛtiḥ / yato dhṛtistato dharmo yato dharmastato jayaḥ // ### [2.67.85](https://indike.org/pramana/in.purana.brahmanda.2.67.85) te devā dānavāḥ sarve tataḥ śrutvā rajerjayam / abhyayurjayamicchantaḥ stuvanto rājasattamam // ### [2.67.86](https://indike.org/pramana/in.purana.brahmanda.2.67.86) te hṛṣṭamanasaḥ sarve rājānaṃ devadānavāḥ / ūcurasmajjayāya tvaṃ gṛhāma varakārmukam // ### [2.67.87](https://indike.org/pramana/in.purana.brahmanda.2.67.87) rajiruvāca ahaṃ jeṣyāmi bho daityā devāñccha krapurogamān / indro bhavāmi dharmātmā tato yotsye raṇājire // ### [2.67.88](https://indike.org/pramana/in.purana.brahmanda.2.67.88) dānavā ūcuḥ asmākamindraḥ prahlādastasyārthe vijayāmahe / asmintu samaye rājaṃstiṣṭhethā devanodite // ### [2.67.89](https://indike.org/pramana/in.purana.brahmanda.2.67.89) sa tatheti bruvanneva devairapyabhinoditaḥ / bhaviṣyasīṃdro jitveti devairapi nimantritaḥ // ### [2.67.90](https://indike.org/pramana/in.purana.brahmanda.2.67.90) jaghāna dānavānsarvānye 'vadhyā vajrapāṇayaḥ / sa vipranaṣṭāṃ devānāṃ paramaśrīḥ śriyaṃ vaśī // ### [2.67.91](https://indike.org/pramana/in.purana.brahmanda.2.67.91) nihatya dānavānsarvā nājahāra rajiḥ prabhuḥ / taṃ tathāha rajiṃ tatra devaiḥ saha śatakratuḥ // ### [2.67.92](https://indike.org/pramana/in.purana.brahmanda.2.67.92) rajiputro 'hamityuktvā punarevābrahavīdvacaḥ / indro 'si rājandevānāṃ sarveṣāṃ nātra saṃśayaḥ // ### [2.67.93](https://indike.org/pramana/in.purana.brahmanda.2.67.93) yasyāhamindraḥ putraste khyātiṃ yāsyāmi śatruhan / sa tu śakravacaḥ śrutvā vañcitastena māyayā // ### [2.67.94](https://indike.org/pramana/in.purana.brahmanda.2.67.94) tathetyevāha vai rājā prīyamāṇaḥ śatakratum / tasmiṃstu devasadṛśe divaṃ prāpte mahīpatau // ### [2.67.95](https://indike.org/pramana/in.purana.brahmanda.2.67.95) dāyādyamindrādā jahnurācāryatanayā rajeḥ / tāni putraśatānyasya tacca sthānaṃ śacīpateḥ // ### [2.67.96](https://indike.org/pramana/in.purana.brahmanda.2.67.96) samākrāmanta bahudhā svargalokaṃ triviṣṭapam / tataḥ kāle bahutithe samatīte mahābalaḥ // ### [2.67.97](https://indike.org/pramana/in.purana.brahmanda.2.67.97) hatarājyo 'bravīcchakro hatabhāgo bṛhaspatim / badarī phalamātraṃ vai puroḍāśaṃ vidhatsva me // ### [2.67.98](https://indike.org/pramana/in.purana.brahmanda.2.67.98) brahmarṣe yena tiṣṭheyaṃ tejasāpyāyitastataḥ / brahmankṛśo 'haṃ vimanā tdṛtarājyo hṛtāsanaḥ // ### [2.67.99](https://indike.org/pramana/in.purana.brahmanda.2.67.99) hataujā durbalo yuddhe rajiputreḥ prasīda me / bṛhaspatiruvāca yadyevaṃ coditaḥśakra tvayāsyāṃ pūrvameva hi // ### [2.67.100](https://indike.org/pramana/in.purana.brahmanda.2.67.100) nābhaviṣyattvatpriyārthamakarttavyaṃ mamānagha / prayatiṣyāmi devendra tvaddhitārthaṃ mahādyute // ### [2.67.101](https://indike.org/pramana/in.purana.brahmanda.2.67.101) yajñabhāgaṃ ca rājyaṃ ca acirātpratipatsyase / tathā śakra gamiṣyāmi mā bhūtte viklavaṃ manaḥ // ### [2.67.102](https://indike.org/pramana/in.purana.brahmanda.2.67.102) tataḥ karma cakārāsya tejaḥsaṃvarddhanaṃ mahat / teṣāṃ ca buddhisaṃmohamakarodbuddhisattamaḥ // ### [2.67.103](https://indike.org/pramana/in.purana.brahmanda.2.67.103) te yadā tu susaṃmūḍā rāgānmatto vidharmiṇaḥ / brahmadviṣaśca saṃbṛttā hatavīryaparākramāḥ // ### [2.67.104](https://indike.org/pramana/in.purana.brahmanda.2.67.104) tato lebhe 'suraiśvaryamaindrasthānaṃ tathottamam / hatvā rajisutānsarvānkāmakrodhaparāyaṇān // ### [2.67.105](https://indike.org/pramana/in.purana.brahmanda.2.67.105) ya idaṃ cyavanaṃ sthānātpratiṣṭhāṃ ca śatakratoḥ / śṛṇuyācchrāvayedvāpi na sa daurātmyamāpnuyāt // ### [2.67.105.p1](https://indike.org/pramana/in.purana.brahmanda.2.67.105.p1) iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāde dhanvantarisaṃbhavādivarṇanaṃ nāma saptaṣaṣṭitamo 'dhyāyaḥ // 67// ## Linked texts (3) - [Vāyupurāṇa](https://indike.org/pramana/in.purana.vayu.2.30.4) — Vyāsa, Sanskrit - [Vulgate](https://indike.org/pramana/in.lit.mahabharata.harivamsa*vulgate.1.29.6) — Sanskrit - [Brahmapurāṇa](https://indike.org/pramana/in.purana.brahma.11.32) — Vyāsa, Sanskrit --- Source: [https://indike.org/pramana/in.purana.brahmanda.2.67](https://indike.org/pramana/in.purana.brahmanda.2.67) · Pramāṇa