[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.8 # Brahmandapurana 2.8 Brahmāṇḍapurāṇa 2.8 - **Language:** Sanskrit ## Contents - [2.8.102](https://indike.org/pramana/in.purana.brahmanda.2.8.102) — 1 part ### [2.8.1](https://indike.org/pramana/in.purana.brahmanda.2.8.1) sūta uvāca evaṃ prajāsu sṛṣṭāsu kaśyapena mahātmanā / pratiṣṭhitāsu sarvāsu carāsu sthāvarāsu ca // ### [2.8.2](https://indike.org/pramana/in.purana.brahmanda.2.8.2) abhiṣicyādhipatyeṣu teṣāṃ mukhyānprajāpatiḥ / tataḥ krameṇa rājyāni ādeṣṭumupacakrame // ### [2.8.3](https://indike.org/pramana/in.purana.brahmanda.2.8.3) dvijānāṃ vīrudhāṃ caiva nakṣatrāṇāṃ grahaiḥ saha / yajñānāṃ tapasāṃ caiva somaṃ rājye 'bhyaṣecayat // ### [2.8.4](https://indike.org/pramana/in.purana.brahmanda.2.8.4) bṛhaspatiṃ tu viśveṣāṃ dadāvaṅgirasāṃ patim / bhṛgūṇāmadhipaṃ caiva kāvyaṃ rājye 'bhyaṣecayat // ### [2.8.5](https://indike.org/pramana/in.purana.brahmanda.2.8.5) ādityānāṃ punarviṣṇuṃ vasūnāmatha pāvakam / prajāpatīnāṃ dakṣaṃ ca marutāmatha vāsavam // ### [2.8.6](https://indike.org/pramana/in.purana.brahmanda.2.8.6) daityānāmatha rājānaṃ prahrādaṃ ditinandanam / nārāyaṇaṃ tu sādhyānāṃ rudraṇāṃ ca vṛṣadhvajam // ### [2.8.7](https://indike.org/pramana/in.purana.brahmanda.2.8.7) vipracittiṃ ca rājānaṃ dānavānāmathādiśat / apāṃ ca varuṇaṃ rājye rājñāṃ vaiśravaṇaṃ tathā // ### [2.8.8](https://indike.org/pramana/in.purana.brahmanda.2.8.8) yakṣāṇāṃ rākṣasānāṃ ca pārthivānāṃ dhanasya ca / vaivasvataṃ pitṝṇāṃ ca yamaṃ rājye 'bhyaṣecayat // ### [2.8.9](https://indike.org/pramana/in.purana.brahmanda.2.8.9) sarvabhūtapiśācānā giriśaṃ śūlapāṇinam / śailānāṃ himavantaṃ ca nadīnāmatha sāgaram // ### [2.8.10](https://indike.org/pramana/in.purana.brahmanda.2.8.10) gandharvāṇāmadhipatiṃ cakre citrarathaṃ tathā / uccaiḥśravasamaśvānāṃ rājānaṃ cābhyaṣecayat // ### [2.8.11](https://indike.org/pramana/in.purana.brahmanda.2.8.11) mṛgāṇāmatha śārdūlaṃ govṛṣaṃ ca kakudminām / pakṣiṇāmatha sarveṣāṃ garuḍaṃ patatāṃ varam // ### [2.8.12](https://indike.org/pramana/in.purana.brahmanda.2.8.12) gandhānāṃ marutāṃ caiva bhūtānāmaśarīriṇām / samakālabalānāṃ ca vāyuṃ balavatāṃ varam // ### [2.8.13](https://indike.org/pramana/in.purana.brahmanda.2.8.13) sarveṣāṃ daṃṣṭriṇāṃ śeṣaṃ nāgānāmatha vāsukim / sarīsṛpāṇāṃ sarpāṇāṃ pannagānāṃ ca takṣakam // ### [2.8.14](https://indike.org/pramana/in.purana.brahmanda.2.8.14) sāgarāṇāṃ nadīnāṃ ca meghānāṃ varṣitasya ca / ādityānāmanyatamaṃ parjanyamabhiṣiktavān // ### [2.8.15](https://indike.org/pramana/in.purana.brahmanda.2.8.15) sarvāpsarogaṇānāṃ ca kāmadevaṃ tathā prabhum / ṛtūnāmatha māsānāmārttavānāṃ tathaiva ca // ### [2.8.16](https://indike.org/pramana/in.purana.brahmanda.2.8.16) yakṣāṇāṃ ca vipakṣāṇāṃ muhūrttānāṃ ca parvaṇām / kalākāṣṭhāpramāṇānāṃ gaterayanayostathā // ### [2.8.17](https://indike.org/pramana/in.purana.brahmanda.2.8.17) gaṇitasyātha yogasya cakre saṃvatsaraṃ prabhum / prajāpatervirajasaḥ pūrvasyāṃ diśi viśrutam // ### [2.8.18](https://indike.org/pramana/in.purana.brahmanda.2.8.18) putraṃ nāmnā sudhanvānaṃ rājānaṃ so 'bhyaṣecayat / dakṣiṇāsyāṃ diśi tathā kardamasya prajāpateḥ // ### [2.8.19](https://indike.org/pramana/in.purana.brahmanda.2.8.19) putrāṃ śaṅkhapadaṃ nāma rājānaṃ sobhyaṣecayat / pascimasyāṃ diśi tathā rajasaḥ putramacyutam // ### [2.8.20](https://indike.org/pramana/in.purana.brahmanda.2.8.20) ketumantaṃ mahātmānaṃ rājānaṃ cābhyaṣecayat / tathā hiraṇyaromāṇaṃ parjanyasya prajāpateḥ // ### [2.8.21](https://indike.org/pramana/in.purana.brahmanda.2.8.21) udīcyāṃ diśi durddharṣaputraṃ rājye 'bhyaṣecayat / manuṣyāṇāmadhipatiṃ cakre vaivasvataṃ manum // ### [2.8.22](https://indike.org/pramana/in.purana.brahmanda.2.8.22) tairiyaṃ pṛthivī sarvā saptadvīpā sapattanā / yathāpradeśamadyāpi dharmeṇa paripālyate // ### [2.8.23](https://indike.org/pramana/in.purana.brahmanda.2.8.23) svāyaṃbhuventare pūrvaṃ brahmaṇā te 'bhiṣecitāḥ / nṛpāścaite 'bhiṣicyante manavo ye bhavanti vai // ### [2.8.24](https://indike.org/pramana/in.purana.brahmanda.2.8.24) manvantareṣvatīteṣu gatā hyeteṣu pārthivāḥ / evamanye 'bhiṣicyante prāpte manvantare punaḥ // ### [2.8.25](https://indike.org/pramana/in.purana.brahmanda.2.8.25) atītānāgatāḥ sarve smṛtā manvantareśvarāḥ / rājasūye 'bhiṣiktaśca pṛthu rebhirnarottamaḥ // ### [2.8.26](https://indike.org/pramana/in.purana.brahmanda.2.8.26) vedadṛṣṭena vidhinā hyadhirājaḥ pratāpavān / etānutpādya putrāṃstu prajāsantānakāraṇāt // ### [2.8.27](https://indike.org/pramana/in.purana.brahmanda.2.8.27) punareva mahā bhāgaḥ prajānāṃ patirīśvaraḥ / kaśyapo gotrakāmastu cacāra paramaṃ tapaḥ // ### [2.8.28](https://indike.org/pramana/in.purana.brahmanda.2.8.28) putrau gotrakarau mahyaṃ bhavetāmiti cintayan / tasyapradhyāyamānasya kaśyapasya mahātmanaḥ // ### [2.8.29](https://indike.org/pramana/in.purana.brahmanda.2.8.29) brahmaṇoṃ'śau sutau paścātprādurbhūtau mahaujasau / vatsāraścāsitaścaiva tāvubhau brahma vādanā // ### [2.8.30](https://indike.org/pramana/in.purana.brahmanda.2.8.30) vatsārānnidhruvo jajñe rebhyaśca suhamāyaśāḥ / rebhyasya raibhyo vijñeyo nidhruvasya nibodhata // ### [2.8.31](https://indike.org/pramana/in.purana.brahmanda.2.8.31) cyavanasya sukanyāyā sumedhāḥ samapadyata / nidhruvasya tu yā patnī mātā vai kuṇḍapāyirām // ### [2.8.32](https://indike.org/pramana/in.purana.brahmanda.2.8.32) asitasyaikaparṇāyāṃ brahmiṣṭhaḥ samapadyata / śāṇḍilyānāṃ varaḥ śrīmān devalaḥ sumahāyaśāḥ // ### [2.8.33](https://indike.org/pramana/in.purana.brahmanda.2.8.33) nidhruvāḥ śāṇḍilā raibhyāstrayaḥ pakṣāstu kāśyapāḥ / vajriprabhṛtayo devā devāstasya prajā svimāḥ // ### [2.8.34](https://indike.org/pramana/in.purana.brahmanda.2.8.34) caturyuge tvatikrānte manorhyekādaśe prabhoḥ / athāvaśiṣṭe tasmiṃstu dvāpare saṃprarttite // ### [2.8.35](https://indike.org/pramana/in.purana.brahmanda.2.8.35) maruttasya nariṣyaṃ tastasya putro damaḥ kila / rājyavarddhanakastasya sudhṛtistatsuto naraḥ // ### [2.8.36](https://indike.org/pramana/in.purana.brahmanda.2.8.36) kevalaśca tatastasya bandhumānvegavāṃstataḥ / budhastasyā bhavadyasyā tṛṇabindurmahīpatiḥ // ### [2.8.37](https://indike.org/pramana/in.purana.brahmanda.2.8.37) tretāyugamukhe rājā tṛtīye sa babhūva ha / tasya celavilā kanyālaṃbuṣāgarbhasaṃbhavā // ### [2.8.38](https://indike.org/pramana/in.purana.brahmanda.2.8.38) tasyāṃ jāto viśravāstu vaulastyakulavarddhanaḥ / bṛhaspatibṛrhatkīrtirdevācāryastu kīrttitaḥ // ### [2.8.39](https://indike.org/pramana/in.purana.brahmanda.2.8.39) kanyāṃ tasyopayeme sa nāmnā vai devavarṇinīm / puṣpotkaṭāṃ ca vākāṃ ca sute mālyavatastathā // ### [2.8.40](https://indike.org/pramana/in.purana.brahmanda.2.8.40) kaikasīṃ mālinaḥ kanyāṃ tāsāṃ tu śṛṇuta prajāḥ / jyeṣṭhaṃ vaiśravaṇaṃ tasya suṣuve devavarṇinī // ### [2.8.41](https://indike.org/pramana/in.purana.brahmanda.2.8.41) divyena vidhinā yuktamārṣeṇa ca śrutena ca / rākṣasena ca rūpeṇa āsureṇa balena ca // ### [2.8.42](https://indike.org/pramana/in.purana.brahmanda.2.8.42) tripādaṃ sumahā kāyaṃ sthūlaśīrṣaṃ mahāhanum / aṣṭadaṃṣṭraṃ harichmaśruṃ śaṅkukarṇaṃ vilohitam // ### [2.8.43](https://indike.org/pramana/in.purana.brahmanda.2.8.43) hrasvabāhuṃ prabāhuṃ ca pigalaṃ sudvibhīṣaṇam / vaivarttajñānasaṃpannaṃ saṃbuddhaṃ caiva saṃbhavāt // ### [2.8.44](https://indike.org/pramana/in.purana.brahmanda.2.8.44) pitā dṛṣṭvābravīttaṃ tu kubero 'yamiti svayam / kutsāyāṃ kviti śabdo 'yaṃ śarīraṃ beramucyate // ### [2.8.45](https://indike.org/pramana/in.purana.brahmanda.2.8.45) kuberaḥ kuśarīratvānnāmnā vai tena soṃ'kitaḥ / yasmādviśravaso 'patyaṃ sādṛśyādviśravā iva // ### [2.8.46](https://indike.org/pramana/in.purana.brahmanda.2.8.46) tasmādvaiśravaṇo nāma nāmnā tena bhaviṣyati / ṛdrayāṃ kubero 'janayadviśrutaṃ nalakūbaram // ### [2.8.47](https://indike.org/pramana/in.purana.brahmanda.2.8.47) rāvaṇaṃ kumbhakarṇaṃ ca kanyāṃ śūrpaṇakhīṃ tathā / vibhīṣaṇacaturthāṃstu kaikasyajanayatsutān // ### [2.8.48](https://indike.org/pramana/in.purana.brahmanda.2.8.48) śaṅkukarṇo daśagrīvaḥ piṅgalo raktamūrddhajaḥ / catuṣpādviṃśatibhujo mahākāyo mahābalaḥ // ### [2.8.49](https://indike.org/pramana/in.purana.brahmanda.2.8.49) jātyañja nanibho daṃṣṭrī lohitagrīva eva ca / rākṣasenaujasā yukto rūpeṇa ca balena ca // ### [2.8.50](https://indike.org/pramana/in.purana.brahmanda.2.8.50) sattvabuddhijitaircaṅkṣarā asaireva rāvaṇaḥ / visargadāruṇaḥ krūro rāvaṇo drāvaṇastu saḥ // ### [2.8.51](https://indike.org/pramana/in.purana.brahmanda.2.8.51) hiraṇyakaśipurhyāsīdrāvaṇaḥ pūrvajanmani / caturyugāni rājābhūt trayodaśa sa rākṣasaḥ // ### [2.8.52](https://indike.org/pramana/in.purana.brahmanda.2.8.52) tāḥ pañcakoṭyo varṣāṇāṃ saṃkhyātāḥ saṃkhyayā dvijāḥ / niyutānyekaṣaṣṭiṃ ca śaradāṃ gaṇitāni vai // ### [2.8.53](https://indike.org/pramana/in.purana.brahmanda.2.8.53) ṣaṣṭiṃ caiva sahasrāṇi varṣāṇāṃ vai sa rāvaṇaḥ / devatānāmṛṣīṇāṃ ca ghoraṃ kṛtvā prajāgaram // ### [2.8.54](https://indike.org/pramana/in.purana.brahmanda.2.8.54) tretāyuge caturviṃśe rāvaṇastapasaḥ kṣayāt / rāmaṃ dāśarathiṃ prāpya sagaṇaḥ kṣayamīyivān // ### [2.8.55](https://indike.org/pramana/in.purana.brahmanda.2.8.55) mahodaraḥ prahastaśca mahāpārśvaḥ kharastathā / puṣpotkaṭāyāḥ putrāste kanyā kumbhīnasī tathā // ### [2.8.56](https://indike.org/pramana/in.purana.brahmanda.2.8.56) triśirā dūṣaṇaścaiva vidyujjihvaḥ sarākṣasaḥ / kanyānupālikā caiva vākāyāḥ prasavaḥ smṛtaḥ // ### [2.8.57](https://indike.org/pramana/in.purana.brahmanda.2.8.57) ityete krūra karmāṇaḥ paulastyā rākṣasā daśa / dāruṇābhijanāḥ sarve devairapi durāsadāḥ // ### [2.8.58](https://indike.org/pramana/in.purana.brahmanda.2.8.58) sarve labdhavarāḥ śūrāḥ putrapautraiḥ samanvitāḥ / yakṣāṇāṃ caiva sarveṣāṃ paulastyā ce ca rākṣasāḥ // ### [2.8.59](https://indike.org/pramana/in.purana.brahmanda.2.8.59) āgastyavaiśvāmitrāṇāṃ krūrāṇāṃ brahmarakṣasām / vedādhyayanaśīlānāṃ tapovrataniṣeviṇām // ### [2.8.60](https://indike.org/pramana/in.purana.brahmanda.2.8.60) teṣāmaiḍaviḍo rājā paulastyaḥ savyapiṅgalaḥ / itare ye yajñajuṣaste vai rakṣogaṇāstrayaḥ // ### [2.8.61](https://indike.org/pramana/in.purana.brahmanda.2.8.61) yātudhānā brahmadhānā vārttāścaiva divācarāḥ / niśācaragaṇāsteṣāṃ catvāraḥ kavibhiḥ smṛtāḥ // ### [2.8.62](https://indike.org/pramana/in.purana.brahmanda.2.8.62) paulastyā nairṛtāścaiva āgastyāḥ kauśikāstathā / ityetāḥ sapta teṣāṃ vai jātayo rākṣasāḥ smṛtāḥ // ### [2.8.63](https://indike.org/pramana/in.purana.brahmanda.2.8.63) teṣāṃ rupaṃ pravakṣyāmi svābhāvyena vyavasthitam / vṛttākṣāḥ piṅgalāścaiva mahākāyā mahodarāḥ // ### [2.8.64](https://indike.org/pramana/in.purana.brahmanda.2.8.64) aṣṭadaṃṣṭrāḥ śaṅkukārṇā ūrddhvaromāṇa eva ca / ākarṇā hāritasyāśca muñjadhūmrordhvamūrdhajāḥ // ### [2.8.65](https://indike.org/pramana/in.purana.brahmanda.2.8.65) sthūlaśīrṣāḥ sitābhāśca hrasvasakthiprabāhavaḥ / tāmrāsyā laṃbajihvoṣṭhā laṃbabhrūsthūlanāsikāḥ // ### [2.8.66](https://indike.org/pramana/in.purana.brahmanda.2.8.66) nīlāṅgā lohitagrīvā gaṃbhīrākṣā vibhīṣaṇāḥ / mahāghorasvarāścaiva vikaṭodbaddhapiṇḍikāḥ // ### [2.8.67](https://indike.org/pramana/in.purana.brahmanda.2.8.67) sthūlāśca tuṅganāsāśca śilāsaṃhananā dṛḍhāḥ / dāruṇābhijanāḥ krūrāḥ prāyaśaḥ kliṣṭakarmiṇaḥ // ### [2.8.68](https://indike.org/pramana/in.purana.brahmanda.2.8.68) sakuṇḍalāṅgadāpīḍā mukuṭoṣṇīṣadhāriṇaḥ / vicitrābharaṇāścitramālyagandhānulepanāḥ // ### [2.8.69](https://indike.org/pramana/in.purana.brahmanda.2.8.69) annādāḥ piśitādāśca puruṣādāśca te smṛtāḥ / ityetadrūpasādharmyaṃ rākṣasānāṃ smṛtaṃ budhaiḥ // ### [2.8.70](https://indike.org/pramana/in.purana.brahmanda.2.8.70) na samāste bale buddhau yuddhe māyā kṛte tadā / pulahasya mṛgāḥ putrāḥ sarve vyālāśca daṃṣṭriṇaḥ // ### [2.8.71](https://indike.org/pramana/in.purana.brahmanda.2.8.71) bhūtāḥ sarppāḥ piśācāśca sṛmarā hastinastathā / vānarāḥ kinnarāśceva māyuḥ kiṃpuruṣāstathā // ### [2.8.72](https://indike.org/pramana/in.purana.brahmanda.2.8.72) prāgapyete parikrāntā mayā krodhavaśānvayāḥ / anapatyaḥ kraturhyasminsmṛto vaivasvateṃ'tare // ### [2.8.73](https://indike.org/pramana/in.purana.brahmanda.2.8.73) na tasya patnyaḥ putrā vā tejaḥ saṃkṣivya ca sthitaḥ / atrervaśaṃ pravakṣyāmi tṛtīyasya prajāpateḥ // ### [2.8.74](https://indike.org/pramana/in.purana.brahmanda.2.8.74) tasya patnyastu sundaryoṃ daśaivāsanpativratāḥ / badrāśvasya ghṛtācyāṃ vai daśāpsarasi sūnavaḥ // ### [2.8.75](https://indike.org/pramana/in.purana.brahmanda.2.8.75) bhadrā śūdrā ca madrā ca śālabhā maladā tathā / balā halā ca saptaitā yā ca gocapalāḥ smṛtāḥ // ### [2.8.76](https://indike.org/pramana/in.purana.brahmanda.2.8.76) tathā tāmarasā caiva ratnakūṭā ca tādṛśaḥ / tatra yo vaṃśakṛccāsau tasya nāma prabhākaraḥ // ### [2.8.77](https://indike.org/pramana/in.purana.brahmanda.2.8.77) madrāyāṃ janayāmāsa somaṃ putraṃ yaśasvinam / svarbhānunā hate sūrye patamāne divo mahīm // ### [2.8.78](https://indike.org/pramana/in.purana.brahmanda.2.8.78) tamo 'bhibhūte loke 'sminprabhā yena pravarttitā / svasti testviti caukto vai patanniha divākaraḥ // ### [2.8.79](https://indike.org/pramana/in.purana.brahmanda.2.8.79) brahmarṣervacanāttasya na papāta divo mahīm / atriśreṣṭhāni gotrāṇi yaścakāra mahātapāḥ // ### [2.8.80](https://indike.org/pramana/in.purana.brahmanda.2.8.80) yajñeṣvanidhanaṃ caiva surairyasya pravartitam / sa tāsu janayāmāsa putrānātmasamānakān // ### [2.8.81](https://indike.org/pramana/in.purana.brahmanda.2.8.81) daśa tānvai sumahatā tapasā bhāvitaḥ prabhuḥ / svastyātreyā iti khyātā ṛṣayo vedapāragāḥ // ### [2.8.82](https://indike.org/pramana/in.purana.brahmanda.2.8.82) teṣāṃ dvau khyātayaśasau brahmiṣṭhau sumahaujasau / datto hyanumato jyeṣṭho durvāsāstasya cānujaḥ // ### [2.8.83](https://indike.org/pramana/in.purana.brahmanda.2.8.83) yavīyasī sutā teṣāmabalā brahmavādinī / atrāpyudāharantīmaṃ ślokaṃ paurāṇikāḥ purā // ### [2.8.84](https://indike.org/pramana/in.purana.brahmanda.2.8.84) atreḥ putraṃ mahātmānaṃ śāntātmānamakalmaṣam / dattātreyaṃ tanuṃ viṣaṇoḥ purāṇajñāḥ prajakṣate // ### [2.8.85](https://indike.org/pramana/in.purana.brahmanda.2.8.85) tasya gotrānvayajjātāścatvāraḥ prathitā bhuvi / śyāvāśvā mudgalāścaiva vāgbhūtakagavi sthirāḥ // ### [2.8.86](https://indike.org/pramana/in.purana.brahmanda.2.8.86) ete 'trīṇāṃ tu catvāraḥ smṛtāḥ pakṣā mahaujasaḥ / kāśyapo nāradaścaiva parvato 'rundhatī tathā // ### [2.8.87](https://indike.org/pramana/in.purana.brahmanda.2.8.87) jajñire mānasā hyete 'rudhatyāstannibodhata / nāradastu vasiṣṭhāyārundhatī pratyapādayat // ### [2.8.88](https://indike.org/pramana/in.purana.brahmanda.2.8.88) ūrddhvaretā mahātejā dakṣaśāpāttu nāradaḥ / purā devāsure tasminsaṃgrāme tārakāmaye // ### [2.8.89](https://indike.org/pramana/in.purana.brahmanda.2.8.89) anāvṛṣṭyā hate loke vyagre śaste suraiḥ saha / vasiṣṭhastapasā dhīmāñjīvayāmāsa vai prajāḥ // ### [2.8.90](https://indike.org/pramana/in.purana.brahmanda.2.8.90) anekaphalamūlinya auṣadhīśca pravartayan / tāstena jīvayāmāsa kāruṇyādauṣadhena saḥ // ### [2.8.91](https://indike.org/pramana/in.purana.brahmanda.2.8.91) arundhatyāṃ vasiṣṭastu śaktimutpādaya tsutam / svāṅgaja janayacchaktiradṛśyantyāṃ parāśaram // ### [2.8.92](https://indike.org/pramana/in.purana.brahmanda.2.8.92) kālyāṃ parāśarājjajñe kṛṣṇadvaipāyanaḥ prabhuḥ / dvaipāyanādaraṇyāṃ vai śuko jajñe guṇānvitaḥ // ### [2.8.93](https://indike.org/pramana/in.purana.brahmanda.2.8.93) udapadyanta ṣaḍime pīvaryāṃ śukasūnavaḥ / bhūriśravāḥ prabhuḥ śaṃbhuḥ kṛṣṇo gauraśca pañcamaḥ // ### [2.8.94](https://indike.org/pramana/in.purana.brahmanda.2.8.94) kanyā kīrtimatī caiva yogamātā dhṛtavratā / jananī brahmadattasya patnī sā tvaṇuhasya ca // ### [2.8.95](https://indike.org/pramana/in.purana.brahmanda.2.8.95) śvetāḥ kṛṣṇāśca paurāśca śyāmadhūmrāśca caṇḍinaḥ / ūṣmādā dārikāścaiva nīlāścaiva parāśarāḥ // ### [2.8.96](https://indike.org/pramana/in.purana.brahmanda.2.8.96) parāśarāṇāmaṣṭau te pakṣāḥ proktā mahātmanām / ata ūrddhva nibodha tvamindrapramati saṃbhavam // ### [2.8.97](https://indike.org/pramana/in.purana.brahmanda.2.8.97) vasiṣṭhasya kapiñjalyāṃ ghṛtācyāmudapadyata / kuṇīti yaḥ samākhyāta indrapramatirucyate // ### [2.8.98](https://indike.org/pramana/in.purana.brahmanda.2.8.98) pṛthoḥ sutāyāṃ saṃbhūtaḥ putrastasyābhavadvasuḥ / upamanyuḥ sutastasya yasyeme hyaupamanyavaḥ // ### [2.8.99](https://indike.org/pramana/in.purana.brahmanda.2.8.99) mitrāvaruṇayoścaiva kuṇḍineyāḥ pariśrutāḥ / ekārṣeyāstathā cānye vasiṣṭhā nāma viśrutāḥ // ### [2.8.100](https://indike.org/pramana/in.purana.brahmanda.2.8.100) ete pakṣā vasiṣṭhānāṃ smṛtā hyekādaśaiva tu / ityete brahmaṇaḥ putrā mānasā aṣṭa viśrutāḥ // ### [2.8.101](https://indike.org/pramana/in.purana.brahmanda.2.8.101) bhrātaraḥ sumahābhāgā yeṣāṃ vaṃśāḥ pratiṣṭhitāḥ / trīṃllokāndhārayantīmāndevarṣigaṇasaṃkulān // ### [2.8.102](https://indike.org/pramana/in.purana.brahmanda.2.8.102) teṣāṃ putrāśca pautrāśca śataśo 'tha sahasraśaḥ / vyāptā yestu trayo lokāḥ sūryasyeva gabhastibhiḥ // ### [2.8.102.p1](https://indike.org/pramana/in.purana.brahmanda.2.8.102.p1) iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde ṛṣivaṃśavarṇanaṃ nāmāṣṭamo 'dhyāyaḥ // 8// ## Linked texts (11) - [Vāyupurāṇa](https://indike.org/pramana/in.purana.vayu.2.9.3) — Vyāsa, Sanskrit - [Liṅgapurāṇa](https://indike.org/pramana/in.purana.linga.1.63.43) — Vyāsa, Sanskrit - [Brahmapurāṇa](https://indike.org/pramana/in.purana.brahma.4.6) — Vyāsa, Sanskrit - [Śivapurāṇa (complete text)](https://indike.org/pramana/in.purana.siva*complete-2.5.33.25) — Sanskrit - [Viṣṇupurāṇa (vulgate)](https://indike.org/pramana/in.purana.visnu*vulgate.1.22.13) — Sanskrit - [Mudgalapurāṇa](https://indike.org/pramana/in.purana.upa.surya.mudgala.2.28.43) — Sanskrit - [Nāradapurāṇa](https://indike.org/pramana/in.purana.narada.1.2.2) — Vyāsa, Sanskrit - [Bhāgavatapurāṇa](https://indike.org/pramana/in.purana.bhagavata.9.2.30) — Vyāsa, Sanskrit - [Saurapurāṇa](https://indike.org/pramana/in.purana.upa.saiva.saura.30.26) — Sanskrit - [Narasiṃhapurāṇa](https://indike.org/pramana/in.purana.upa.vaisnava.narasimha.2.20) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.70.43) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.brahmanda.2.8](https://indike.org/pramana/in.purana.brahmanda.2.8) · Pramāṇa