Pramāṇa · Search · About · API

Brahmanda Purana 3.14

Brahmāṇḍapurāṇa 3.14

Language
Sanskrit

Contents

3.14.1

hayagrīva uvāca
etasminneva kāle tu brahmā lokapitāmahaḥ /
ājagāmātha deveśīṃ draṣṭukāmo maharṣibhiḥ //

3.14.2

ājagāma tato viṣṇurārūḍho vinatāsutam /
śivo 'pi vṛṣamārūḍhaḥ samāyāto 'khileśvarīm //

3.14.3

devarṣayo nāradādyāḥ samājagmurmaheśvarīm /
āyayustāṃ mahādevīṃ sarve cāpsarasāṃ gaṇāḥ //

3.14.4

viśvāvasuprabhṛtayo gandharvāścaiva yakṣakāḥ /
brahmaṇātha samādiṣṭo viśvakarmā viśāṃpatiḥ //

3.14.5

cakāra nagaraṃ divyaṃ yathāmarapuraṃ tathā /
tato bhagavatī durgā sarvamantrādhidevatā //

3.14.6

vidyādhidevatā śyāmā samājagmaturaṃbikām /
brāhayādyā mātaraścaiva svasvabhūtagaṇāvṛtāḥ //

3.14.7

siddhayo hyaṇimādyāśca yoginyaścaiva koṭiśaḥ /
bhairavāḥ kṣetrapālāśca mahāśāstā gaṇāgraṇīḥ //

3.14.8

mahāgaṇeśvaraḥ skando baṭuko vīrabhadrakaḥ /
āgatya te mahādevīṃ tuṣṭuvuḥ praṇatāstadā //

3.14.9

tatrātha nagarīṃ ramyāṃ sāṭṭaprākāratoraṇām /
gajāśvarathaśālāḍhyāṃ rājavīthivirājitām //

3.14.10

sāmantānāmamātyānāṃ sainikānāṃ dvijanma nām /
vetāladāsadāsīnāṃ gṛhāṇi rucirāṇi ca //

3.14.11

madhyaṃ rājagṛhaṃ divyaṃ dvāragopurabhūṣitam /
śālābhirbahubhiryuktaṃ sabhā bhiruṣaśobhitam //

3.14.12

siṃhāsanasabhāṃ caiva navaratnamayīṃ śubhām /
madhye siṃhāsanaṃ divyaṃ cintāmaṇivīnirmitam //

3.14.13

svayaṃ prakāśamadvandvamudayādityasaṃnibham /
vilokya cintayāmāsa brahmā lokapitāmahaḥ //

3.14.14

yastvetatsamadhiṣṭhāya vartate bāliśo 'pivā /
purasyāsya prabhāveṇa sarvalokādhiko bhavet //

3.14.15

na kevalā strī rājyārhā puruṣo 'pi tayā vinā /
maṅgalācāryasaṃyuktaṃ mahāpuruṣalakṣaṇam /
anukūlāṅganāyuktamabhiṣiñcediti śrutiḥ //

3.14.16

vibhātīyaṃ varārohā bhūrtā śṛṅgāradevatā /
varo 'syāstriṣu lokeṣu na cānyaḥ śaṅkarādṛte //

3.14.17

jaḍilo muṇḍadhārī ca virūpākṣaḥ kapālabhṛt /
kalmāṣī bhasmadigdhāṅgaḥ śmaśānāsthivibhūṣaṇaḥ //

3.14.18

amaṅgalāspadaṃ cainaṃ varayetsā sumaṅgalā /
iti cintayamānasya brahmaṇo 'gre maheśvaraḥ //

3.14.19

koṭikandarpalāvaṇyayukto divya śarīravān /
divyāṃbaradharaḥ sragvī divyagandhānulepanaḥ //

3.14.20

kirīṭahārakeyūrakuṇḍalādyairalaṅkṛtaḥ /
prādurbabhūva purato jaganmohana rupadhṛk //

3.14.21

taṃ kumāramathāliṅgya brahmā lokapitāmahaḥ /
cakre kāmeśvaraṃ nāmnā kamanīyavapurdharam //

3.14.22

tasyāstu paramāśakteranurūpo varastvayam /
iti niścitya tenaiva sahitāstāmathāyayuḥ //

3.14.23

astuvaṃste parāṃ śaktiṃ brahmaviṣṇumaheśvarāḥ /
tāṃ dṛṣṭvā mṛgaśāvākṣīṃ kumāro nīlalohitaḥ /
abhavanmanmathāviṣṭo vismṛtya sakalāḥ kriyāḥ //

3.14.24

sāpi taṃ vīkṣya tanvaṅgo mūrtiṃmantamiva smaram /
madanāviṣṭasarvāṅgī svātmarūpamamanyata /
anyonyālokanāsaktau tāvṛbhau madanāturau //

3.14.25

sarvabhāvaviśeṣajñau dhṛtimantau manasvinau /
parairajñātacāritrau muhūrtāsvasthacetanau //

3.14.26

athovāca mahādevīṃ brahmā lokaikanāyikām /
ime devāśca ṛṣayo gandharvāpsarasāṃ gaṇāḥ /
tvāmīśāṃ draṣṭumicchanti sapriyāṃ paramāhave //

3.14.27

ko vānurūpaste devi priyo dhanyatamaḥ pumān /
lokasaṃrakṣaṇārthāya bhajasva puruṣaṃ param //

3.14.28

rājñī bhava purasyāsya sthitā bhava varāsane /
abhiṣiktāṃ mahābhāgairdevārṣe bhirakalmaṣaiḥ //

3.14.29

sāmrājyacihnasaṃyuktāṃ sarvābharaṇasaṃyutām /
sapriyāmāsanagatāṃ draṣṭumicchāmahe vayam //

3.14.29.p1

iti śrībrahmāṇḍe mahāpurāṇe uttarabhāge hayagrīvāgastyasaṃvāde lalitopākhyāne madanakāmeśvaraprādurbhāvo nāma caturdaśo 'dhyāyaḥ

Linked texts (1)