Pramāṇa · Search · About · API

Brahmanda Purana 3.15

Brahmāṇḍapurāṇa 3.15

Language
Sanskrit

Contents

3.15.1

tacchrutvā vacanaṃ devī mandasmitamukhāṃbujā /
uvāca sa tato vākyaṃ brahmaviṣṇumukhānsurān //

3.15.2

svatantrāhaṃ sadā devāḥ svecchācāravihāriṇī /
mamānurūpacarito bhavitā tu mama priyaḥ //

3.15.3

tatheti tatpratiśrutya sarverdevaiḥ pitāmahaḥ /
uvāca ca mahādevīṃ dharmārthasahitaṃ vacaḥ //

3.15.4

kālakrītā krayakrītā pitṛdattā svayaṃyutā /
nārīpuruṣayorevamudvāhastu caturvidhaḥ //

3.15.5

kālakrītā tu veśyā syātkrayakrītā tu dāsikā /
gandharvodvāhitā yuktā bhāryā syātpitṛdattakā //

3.15.6

samānadharmiṇī yuktā bhāryā pitṛvaśaṃvadā /
yadadvaitaṃ paraṃ brahma sadasadbhāvavarjitam //

3.15.7

cidānandātmakaṃ tasmātprakṛtiḥ samajāyata /
tvamevāsīcca tadbrahma prakṛtiḥ sā tvameva hi //

3.15.8

tvamevānādirakhilā kāryakāraṇarūpiṇī /
tvāmeva hi vicinvanti yoginaḥ sanakādayaḥ //

3.15.9

sadasatkarmarūpāṃ ca vyaktāvyakto dayātmikām /
tvāmeva hi praśaṃsaṃti pañcabrahmasvarūpiṇīm //

3.15.10

tvāmeva hi sṛjasyādau tvameva hyavasi kṣaṇāt /
bhajasva puruṣaṃ kañcillokānugrahakāmyayā //

3.15.11

iti vijñāpitā devī brahmaṇā sakalaiḥ suraiḥ /
srajamudyamya hastena cakṣepa gaganāntare //

3.15.12

tayotsṛṣṭā hi sā mālā śobhayantī nabhasthalam /
papāta kaṇṭhadeśe hi tadā kāmeśvarasya tu //

3.15.13

tato mumudire devā brahmaviṣṇupurogamāḥ /
vavṛṣuḥ puṣpavarṣāṇi mandavāteritā ghanāḥ //

3.15.14

athovāca vidhātā tu bhagavantaṃ janārdanam /
kartavyo vidhinodvāhastvanayoḥ śivayorhare //

3.15.15

muhurto devasamprāpto jaganmaṅgalakārakaḥ /
tvadrūpā hi mahādevī sahajaśca bhavānapi //

3.15.16

dātumarhasi kalyāṇīmasmai kāmaśivāya tu /
tacchrutvā vacanaṃ tasya devadevastrivikramaḥ //

3.15.17

dadau tasyai vidhānena prītyā tāṃ śaṅkarāya tu /
devarṣipitṛmukhyānāṃ sarveṣāṃ devayoginām //

3.15.18

kalyāṇaṃ kārayāmāsa śivayorādikeśavaḥ /
upāyanāni pradaduḥ sarve brahmādayaḥ surāḥ //

3.15.19

dadau brahmekṣucāpaṃ tu vajrasāramanaśvaram /
tayoḥ puṣpāyudhaṃ prādādamlānaṃ hariravyayam //

3.15.20

nāgapāśaṃ dadau tābhyāṃ varuṇo yādasāṃpatiḥ /
aṅkuśaṃ ca dadau tābhyāṃ viśvakarmā viśāṃpatiḥ //

3.15.21

kirīṭamagniḥ prāyacchattāṭaṅkau candrabhāskarau /
navaratnamayīṃ bhūṣāṃ prādādratnākaraḥ svayam //

3.15.22

dadau surāṇāmadhipo madhupātramathākṣayam /
cintāmaṇimayīṃ mālāṃ kuberaḥ pradadau tadā //

3.15.23

sāmrājyasūcakaṃ chatraṃ dadau lakṣmīpatiḥ svayam /
gaṅgā ca yamunā tābhyāṃ cāmare candrabhāsvare //

3.15.24

aṣṭau ca vasavo rudrā ādityāścāśvinau tathā /
dikpālā marutaḥ sādhyā gandharvāḥ pramatheśvarāḥ /
svānisvānyāyudhānyasyai pradaduḥ paritoṣitāḥ //

3.15.25

rathāṃśca turagānnāgānmahāvegānmahābalān /
uṣṭānarogānaśvāṃstānkṣuttṛṣṇāparivarjitān /
dadurvajropamākārānsāyudhānsaparicchadān //

3.15.26

athābhiṣekamātenuḥ sāmrājye śivayoḥ śivam /
athākarodvimānaṃ ca nāmnā tu kusumākaram //

3.15.27

vidhātāmlānamālaṃ vai nityaṃ cābhedyamāyudhaiḥ /
divi bhuvyantarikṣe ca kāmagaṃ susamṛddhimat //

3.15.28

yadgandhaghrāṇamātreṇa bhrāntirogakṣurdhātayaḥ /
tatkṣaṇādeva naśyanti manohlādakaraṃ śubham //

3.15.29

tadvimānamathāropya tāvubhau divyadaṃpatī /
cāmakhyājanacchatradhvajayaṣṭimanoharam //

3.15.30

vīṇāveṇumṛdaṅgādivividhaistauryavādanaiḥ /
sevyamānā suragaṇairnirgatya nṛpamandirāt //

3.15.31

yayau vīthīṃ vihāreśā śobhayantī nijaujasā /
pratiharmyāgrasaṃsthābhirapsarobhiḥ sahasraśaḥ //

3.15.32

salājākṣatahastābhiḥ purandhrībhiśca varṣitā /
gāthābhirmaṅgalārthābhirvīṇāveṇvādinisvanaiḥ /
tuṣyantī vīvīthivīthīṣu mandamandamathāyayau //

3.15.33

pratigṛhyāpsa robhistu kṛtaṃ nīrājanāvidhim /
avaruhya vimānagrātpraviveśa mahāsabhām //

3.15.34

siṃhāsanamadhiṣṭhāya saha devena śaṃbhunā /
yadyadvāñchanti tatrasthā manasaiva mahājanāḥ /
sarvajñā sākṣipātena tattatkāmānapūrayat //

3.15.35

taddṛṣṭvā caritaṃ devyā brahmā loka pitāmahaḥ /
kāmākṣīti tadābhikhyāṃ dadau kāmeśvarīti ca //

3.15.36

vavarṣāścaryamegho 'pi pure tasmiṃstadājñayā /
mahārhāṇi ca vastūni divyānyābharaṇāni ca //

3.15.37

cintāmaṇiḥ kalpavṛkṣaḥ kamalā kāmadhenavaḥ /
prativeśma tatastasthuḥ puro devyājayāya te //

3.15.38

tāṃ sevaikarasākārāṃ vimuktānyakriyāguṇāḥ /
sarvakāmārthasaṃyuktā hṛṣyantaḥ sārvakālikam //

3.15.39

pitāmaho hariścaiva mahādevaśca vāsavaḥ /
anye diśāmadhīśāstu sakalā devatāgaṇāḥ //

3.15.40

devarṣayo nāradādyāḥ sanakādyāśca yoginaḥ /
maharṣayaśca manvādyā vaśiṣṭhādyāstapodhanāḥ //

3.15.41

gandharvāpsaraso yakṣā yāścānyā devajātayaḥ /
divi bhūmyantarikṣeṣu sasaṃbādhaṃ vasaṃti ye //

3.15.42

te sarve cāpyasaṃbādhaṃ nivasaṃti sma tatpure //

3.15.43

evaṃ tadvatsalā devī nānyatraityakhilājjanāt /
toṣayāmāsa satatamanurāgeṇa bhūyasā //

3.15.44

rājño mahati bhūrloke viduṣaḥ sakalepsitām /
rājñī dudohābhīṣṭāni sarvabhūtalavāsinām //

3.15.45

trilokaikamahīpāle sāṃbike kāmaśaṅkare /
daśavarṣasahasrāṇi yayuḥ kṣaṇa ivāparaḥ //

3.15.46

tataḥ kadā cidāgatya nārado bhagavānṛṣiḥ /
praṇamya paramāṃ śaktiṃ provāca vinayānvitaḥ //

3.15.47

para brahma paraṃ dhāma pavitraṃ paramaiśvari /
madasadbhāvasaṃkalpavikalpakalanātmikā //

3.15.48

jagadabhyudayārthāya vyaktabhāvamupāgatā /
asajjanavināśārthā sajjanābhyudayārthinī /
pravṛttistava kalyāṇi sādhūnāṃ rakṣaṇāya hi //

3.15.49

ayaṃ bhaṇḍo 'suro devi bādhate jagatāṃ trayam /
tvayaikayaiva jetavyo na śakyastvaparaiḥ suraiḥ //

3.15.50

tvatsevaikaparā devāścirakālamihoṣitāḥ /
tvadājñayā gamiṣyanti svānisvāni purāṇi tu //

3.15.51

amaṅgalāni śūnyāni samṛddhārthāni saṃtvataḥ /
evaṃ vijñāpitā devī nāradenākhileśvarī /
svasvavāsanivāsāya preṣayāmāsa cāmarān //

3.15.52

brahmāṇaṃ ca hariṃ śaṃbhuṃ vāsavādīndiśāṃ patīn /
yathārhaṃ pūjayitvā tu preṣayāmāsa cāṃbikā //

3.15.53

aparādhaṃ tatastyaktumapi saṃpreṣitāḥ surāḥ /
svasvāṃśaiḥ śivayoḥ sevāmādipitrorakurvata //

3.15.54

etadākhyānamāyuṣyaṃ sarvamaṅgalakāraṇam /
āvirbhāvaṃ mahādevyāstasyā rājyābhiṣecanam //

3.15.55

yaḥ prātarutthito vidvānbhaktiśraddhāsamanvitaḥ /
japeddhanasamṛddhaḥ syātsudhāsaṃmitavāgbhavet //

3.15.56

nāśubhaṃ vidyate tasya paratreha ca dhīmataḥ /
yaśaḥ prāpnoti vipulaṃ samānottamatāmapi //

3.15.57

acalā śrīrbhavetasya śreyaścaiva padepade /
kadācinna bhayaṃ tasya tejasvī vīryavānbhavet //

3.15.58

tāpatrayavihīnaśca puruṣārthaiśca pūryate /
trisaṃdhyaṃ yo japennityaṃ dhyātvā siṃhāsaneśvarīm //

3.15.59

ṣaṇmāsānmahatīṃ lakṣmīṃ prāpnuyājjāpakottamaḥ //

3.15.59.p1

iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne vaivāhikotsavo nāma pañcadaśo 'dhyāyaḥ

Linked texts (2)