Brahmanda Purana 3.16
Brahmāṇḍapurāṇa 3.16
- Language
- Sanskrit
Contents
- 3.16.36 — 1 part
3.16.1
atha sā jagatāṃ mātā lalitā parameśvarī /
trailokyakaṇṭakaṃ bhaṇḍaṃ daityaṃ jetuṃ viniryayau //
3.16.2
cakāra mardalākārānaṃbhorāśīṃstu sapta te /
prabhūtamarddaladhvānaiḥ pūrayāmāsuraṃbaram //
3.16.3
mṛdaṅgamurajāścaiva paṭaho 'tukulīṅgaṇāḥ /
selukājhallarīrāṅghāhuhukāhuṇḍukāghaṭāḥ //
3.16.4
ānakāḥ paṇavāścaiva gomukhāścārdhacandrikāḥ /
yavamadhyā muṣṭimadhyā marddalāḍiṇḍimā api //
3.16.5
jharjharāśca barītāśca iṅgyāliṅgyaprabhedajāḥ /
uddhakāścaituhuṇḍāśca niḥsāṇā barbarāḥ pare //
3.16.6
huṅkārā kākatuṇḍāśca vādyabhedāstathāpare /
dadhvanuḥ śaktisenābhirāhatāḥ samarodyame //
3.16.7
lalitāparameśānyā aṅkuśāstrānsamudgatā /
saṃpatkarī nāma devī cacāla saha śaktibhiḥ //
3.16.8
anekakoṭimātaṅgaturaṅgarathapaṅktibhiḥ /
sevitā taruṇādityapāṭalā saṃpadīśvarī //
3.16.9
mattamuddaṇḍasaṃgrāmarasikaṃ śailasannibham /
raṇakolāhalaṃ nāma sāruroha mataṅgajam //
3.16.10
tāmanvagā yayau senā mahatī dhorarāviṇī /
lolābhiḥ ketumālābhirullikhantī dhanādhanāt //
3.16.11
tasyāśca saṃpannāthāyāḥ pīnastanasusaṃkaṭaḥ /
kaṇṭako ghanasaṃnāho ruruce vakṣasisthitaḥ //
3.16.12
kaṃpamānā khaḍgalatā vyarucattatkare dhṛtā /
kuṭilā kālanāthasya bhṛkuṭīva bhayaṅkarā //
3.16.13
utpātavātasaṃpātāccalitā iva parvatāḥ /
tāmanvagā yayuḥ koṭisaṃkhyākāḥ kuñjarottamāḥ //
3.16.14
atha śrīlalitādevyā śrīpāśāyudhasaṃbhavā /
atitvaritavikrāntiraśvārūḍhācalatpuraḥ //
3.16.15
tayā saha hayaprāyaṃ sainyaṃ heṣātaraṅgitam /
vyacaratkhurakuddālavidāritamahītalam //
3.16.16
vanāyujāśca kāṃbojāḥ pāradāḥ siṃdhudeśajāḥ /
ṭaṅkaṇāḥ parvatīyāśca pārasīkāstathā pare //
3.16.17
ajāneyā ghaṭṭadharā daradāḥ kāla vandijāḥ /
vālmīkayāvanodbhūtā gāndharvāścātha ye hayāḥ //
3.16.18
prāgdeśajātāḥ kairātā prāntadeśodbhavāstathā /
vinītāḥ sādhuvoḍhāro veginaḥ sthiracetasaḥ //
3.16.19
svāmicittaviśeṣajñā mahāyuddhasahiṣṇavaḥ /
lakṣaṇairbahubhiryuktā jitakrodhā jitaśramāḥ //
3.16.20
pañcadhārāsu śakṣaḍhyā vinītāśca plavānvitāḥ //
3.16.21
phalaśuktiśriyā yuktāḥ śvetaśuktisamanvitāḥ /
devapadmaṃ devamaṇiṃ devasvastikameva ca //
3.16.22
atha svastikaśuktiśca gaḍuraṃ puṣpagaṇḍikām /
etāni śubhalakṣmāṇi jyarājyapradāni ca /
vahanto vātajavanā vājinastāṃ samanvayuḥ //
3.16.23
aparājitanāmānamatitejasvinaṃ calam /
atyantottuṅgavarṣmāṇaṃ kavikāvilasanmukham //
3.16.24
pārśvadvaye 'pi patitasphuratkesaramaṇḍalam /
sthūlavāladhivikṣepakṣipyamāṇapayodharam //
3.16.25
jaṅghākāṇḍasamunnaddhamaṇikiṅkiṇibhāsuram /
vādayantamivoccaṇḍaiḥ khuraniṣṭhurakuṭṭanaiḥ //
3.16.26
bhūmaṇḍalamahāvādyaṃ vijayasya samṛddhaye /
ghoṣamāṇaṃ prati muhuḥ saṃdarśitagatikramam //
3.16.27
ālolacāmaravyājādvahantaṃ pakṣatī iva /
bhāṇḍairmanoharairyuktaṃ ghargharījālamaṇḍitam //
3.16.28
eṣāṃ ghoṣasya kapaṭāddhuṅkurvatīmi vāsurān /
aśvārūḍhā mahādevī samārūḍhā hayaṃ yayau //
3.16.29
caturbhirvāhubhiḥ pāśamaṅkuśaṃ vetrameva ca /
hayavalgāṃ ca dadhatī bahuvikramaśobhinī //
3.16.30
taruṇādityasaṅkāśā jvalatkāñcītaraṅgiṇī /
sañcacāla hayārūḍhā nartayantīva vājinam //
3.16.31
atha śrīdaṇḍanāthāyā niryāṇapaṭahadhvaniḥ /
uddaṇḍasindhunisvānaścakāra badhiraṃ jagat //
3.16.32
vajrabāṇaiḥ kaṭhoraiścabhindantyaḥ kakubho daśa /
anyuddhatabhujāśmānaḥ śaktayaḥ kāściducchritāḥ //
3.16.33
kāścicchrīdaṇḍanāthāyāḥ senānāsīrasaṅgatāḥ /
khaḍgaṃ phalakamādāya pupluvuścaṇḍasaktayaḥ //
3.16.34
atyantasainyasambādhaṃ vetrasaṃtāḍanaiḥ śataiḥ /
nivārayantyo vetriṇyo vyucchalanti smaśaktayaḥ //
3.16.35
atha tuṅgadhvajaśreṇīrmahiṣāṅkā mṛgāṅkikām /
sihāṅkāścaiva bibhrāṇāḥ śaktayo vyacalanpurā //
3.16.36
tataḥ śrīdaṇḍanāthāyāḥ śvetacchatraṃ sahasraśaḥ /
sphuratkarāḥ pracalitāḥ śaktayaḥ kāścidādaduḥ //
3.16.36.p1
iti śrībrahmāṇḍe mahāpurāṇe uttarabhāge hayagrīvāgastyasaṃvāde lalitopākhyāne sasenavijayayātrā nāma ṣoḍaśo 'dhyāyaḥ
Linked texts (1)
- Lalitāsahasranāmastotra — Śambhu, Sanskrit