Brahmanda Purana 3.17
Brahmāṇḍapurāṇa 3.17
- Language
- Sanskrit
Contents
- 3.17.51 — 1 part
3.17.1
daṇḍanāthāviniryāṇe saṃkhyātītaiḥ sitaprabhaiḥ /
chatrairgaganamāreje niḥsaṃkhyāśaśimaṇḍitam //
3.17.2
anyonyasaktairthavalacchatrairantarghanībhavat /
timiraṃ nunude bhūyastatkāṇḍamaṇirociṣā //
3.17.3
vajraprabhādhagadhagacchāyāpūritadiṅmukhāḥ /
tālavṛntāḥ śatavidhāḥ kroḍamukhyā bale 'calan //
3.17.4
caṇḍo daṇḍādayastīvrābhairavāḥ śulapāṇayaḥ /
jvalatkeśāpiśaṅgābhāstaḍidbhāsuradiṅmukhāḥ //
3.17.5
dahatya iva daityaughāṃstīkṣṇairmārgaṇavahnibhiḥ /
pracelurdaṇḍanāthāyāssenā nāsīradhāvitāḥ //
3.17.6
atha potrīmukhīdevīsamānākṛtibhūṣaṇāḥ /
tatsamānāyudhakarāstatsamānasvavāhanāḥ //
3.17.7
tīkṣmadaṃṣṭa3viniṣṭhyūtavahridhūmāmitāṃbarāḥ /
tamālaśyāmalākārāḥ kapilāḥ krūralocanāḥ //
3.17.8
sahasramahiṣārūḍhāḥ praceluḥ sūkarānanāḥ /
atha śrīdaṇḍanāthā ca karicakrarathottamāt //
3.17.9
avaruhya mahāsiṃhamāruroha svavāhanam /
vajraghoṣa iti khyātaṃ dhūtakesaramaṇḍalam //
3.17.10
vyaktāsyaṃ vikaṭākāraṃ viśaṅkaṭavilocanam /
daṃṣṭrākaṭakaṭatkārabadhirīkṛtadiktaṭam //
3.17.11
ādikūrmakaṭhorāsthi kharparapratimairnakhaiḥ /
vibantamiva bhūcakramāpātālaṃ nimajjibhiḥ //
3.17.12
yojanatrayamuttuṅgaṃ vagāduddhūtavāladhim /
siṃhavāhanamāruhya vyacaladdaṇḍanāyikā //
3.17.13
tasyāmasurasaṃhāre pravṛttāyāṃ jvalatkrudhi /
udvegaṃ bahulaṃ prāpa trailokyaṃ sacarācaram //
3.17.14
kimasau dhakṣyati ruṣā viśvamadyaiva potriṇī /
kiṃ vā musalaghātena bhūmiṃ dvedhā kariṣyati //
3.17.15
atha vā halanirghātaiḥ kṣobhayiṣyati vāridhīn /
iti trastahṛdaḥ sarve gagane nākināṃ gaṇāḥ //
3.17.16
dūrādrutaṃ vimānaiśca satrāsaṃ dadṛśurgatāḥ /
vavandire ca tā devā baddhāñjalipuṭānvitāḥ /
muhurdvādaśanāmāni kīrtayanto nabhastale //
3.17.17
agastya uvāca
kāni dvādaśanāmāni tasyā devyā vada prabho /
aśvānana mahāprājña yeṣu me kautukaṃ mahat //
3.17.18
hayagrīva uvāca
śṛṇu dvādaśanāmāni tasyā devyā ghaṭodbhava /
yadākarṇanamātreṇa prasannā sā bhaviṣyati /
pañcamī daṇḍanāthā ca saṃketā samayeśvarī //
3.17.19
tathā samayasaṃketā vārāhī potriṇī tathā /
vārtālī ca mahāsenāpyājñā cakreśvarī tathā //
3.17.20
arighnī ceti samproktaṃ nāmadvādaśakaṃ mune /
nāmadvādaśakābhikhyavajrapañjaramadhyagaḥ /
saṃkaṭe duḥkhamāpnoti na kadācana mānavaḥ //
3.17.21
etairnāmabhirabhrasthāḥ saṃketāṃ bahu tuṣṭuvuḥ /
teṣāmanugrahārthāya pracacālaca sā punaḥ //
3.17.22
atha saṃketayoginyā mantranāthā padaspṛśaḥ /
niryāṇasūcanakarī divi dadhvāna kāhalī //
3.17.23
śṛṅgāraprāyabhūṣāṇāṃ śārdūlaśyāmalatviṣām /
vīṇāsaṃyatapāṇīnāṃ śaktīnāṃ niryayau balam //
3.17.24
kāścadgāyanti nṛtyanti mattakokilaniḥsvanāḥ /
vīṇāveṇumṛdaṅgādyāḥ savilāsapadakramāḥ //
3.17.25
praceluḥ śaktayaḥ śyāmā harṣayantyo jagajjanān /
mayūravāhanāḥ kāścitkaticiddhaṃsavāhanāḥ //
3.17.26
katicinnakulārūḍhāḥ katicitkokilāsanāḥ /
sarvāśca śyāmalākārāḥ kāścitkarṇīrathasthitāḥ //
3.17.27
kādaṃbamadhumattāśca kāścidārūḍhasaindhavāḥ /
mantranāthāṃ puraskṛtya saṃpraceluḥ puraḥ puraḥ //
3.17.28
athāruhya samuttuṅgadhvajacakraṃ mahāratham /
bālārkavarṇakavacā madālolavilocanā //
3.17.29
īṣatprasvedakaṇikāmanoharamukhāṃbujā /
prekṣayantī kaṭākṣaudhauḥ kiñcidbhrūvallitāṇḍavaiḥ //
3.17.30
samastamapi tatsainyaṃ śaktīnāmuddhatoddhatam /
picchatrikoṇacchatreṇa birudena mahīyasā //
3.17.31
āsāṃ madhye na cānyāsāṃ śaktīnāmujjvalodayā /
nirjagāma ghanaśyāmaśyāmalā mantranāyikā //
3.17.32
tāṃ tuṣṭuvuḥ ṣoḍaśabhirnāmabhirnākavāsinaḥ /
tāni ṣoḍaśanāmāni śṛṇu kuṃbhasamudbhava //
3.17.33
saṃgītayoginī śyāmā śyāmalā mantranāyikā /
mantriṇī saciveśī ca pradhāneśī śukapriyā //
3.17.34
vīṇāvatī vaiṇikī ca mudriṇī priyakapriyā /
nipapriyā kadaṃbeśī kadaṃbavanavāsinī //
3.17.35
sadāmadā ca nāmāni ṣoḍaśaitāni kuṃbhaja /
etairyaḥ saciveśānīṃ sakṛtstauti śarīravān /
tasya trailokyamakhilaṃ haste tiṣṭhatyasaṃśayam //
3.17.36
mantrināthā yatrayatra kaṭākṣaṃ vikiratyasau /
tatratatra gatāśaṅkaṃ śatrusainyaṃ patatyalam //
3.17.37
lalitāparameśānyā rājyacarcā tu yāvatī /
śaktīnāmapi carcā yā sā sarvatra jayapradā //
3.17.38
atha saṃgītayoginyāḥ karasthācchukapotakāt /
nirjagāma dhanurvedo vahansajjaṃśarāsanam //
3.17.39
caturbāhuyuto vīrastriśirāstrivilocanaḥ /
namaskṛtya pradhāneśīmidamāha sa bhaktimān //
3.17.40
devi bhaṇḍāsuredrasya yuddhāya tvaṃ pravarttase /
atastava mayā sāhyaṃ kartavyaṃ mantrināyike //
3.17.41
catrajīvamimaṃ nāma kodaṇḍaṃ sumahattaram /
gṛhāṇa jagatāmaṃba dānavānāṃ nibarhaṇam //
3.17.42
imau cākṣayabāṇāḍhyau tūṇīrau svarṇacitritau /
gṛhāṇa daityanāśāya mamānugrahahetave //
3.17.43
iti praṇamya śirasā dhanurvedena bhaktitaḥ /
arpitāṃścāpatūṇīrāñjagrāha priyakapriyā //
3.17.44
citrajīvaṃ mahācāpamādāya ca śūkapriyā /
visphāraṃ janayāmāsa maurvīmudvādya bhūriśaḥ //
3.17.45
saṃgītayoginī cāpadhvaninā pūritaṃ jagat /
nākālayānāṃ ca manona yanānandasaṃpadā //
3.17.46
yantriṇī ceti dve tasyāḥ paricārike /
śukaṃ vīṇāṃ ca sahasā vahantyau pariceratuḥ //
3.17.47
ālolavalayakvāṇavardhiṣṇuguṇanisvanam /
dhārayantī ghanaśyāmā cakārātimanoharam //
3.17.48
citrajīvaśarāsena bhūṣitā gītayoginī /
kadaṃbinīva ruruce kadambacchatrakārmukā //
3.17.49
kālīkaṭākṣavattīkṣṇo nṛtyadbhujagabhīṣaṇaḥ /
ullasandakṣiṇe pāṇau vilalāsa śilīmukhaḥ //
3.17.50
geyacakrarathārūḍhāṃ tāṃ paścācca siṣevire /
tadvacchyāmalaśobhāḍhyā devyo bāṇadhanurdharāḥ //
3.17.51
sahasrākṣauhiṇīsaṃkhyāstīvravegā madālasāḥ /
āpūrayantyaḥ kakubhaṃ kalaiḥ kilikilāravaiḥ //
3.17.51.p1
iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne daṇḍanāthāśyāmalāsenāyātrā nāma saptadaśo 'dhyāyaḥ
Linked texts (1)
- Kāśīpurāṇa — Sanskrit