Brahmandapurana 3.18
Brahmāṇḍapurāṇa 3.18
- Language
- Sanskrit
Contents
- 3.18.19 — 1 part
3.18.1
atha rājanāyikā śritājvalitāṅkuśā phaṇisamānapāśabhṛt /
kalanikvaṇadvalayamaikṣvaṃ dhanurdadhatī pradīptakusumeṣupañcakā //
3.18.2
udayatsahatsramahasā sahasrato 'pyatipāṭalaṃ nijavapuḥ prabhājharam /
kiratī diśāsu vadanasya kāntibhiḥ sṛjatīva candramayamabhramaṇḍalam //
3.18.3
daśayojanāyatimātā jagattrayīmabhivṛṇvatā viśadamauktikātmanā /
dhavalātapatravalayena bhāsurā śaśimaṇḍalasya sakhitāmupeyuṣā //
3.18.4
abhivījitā ca maṇikāntaśobhinā vijayādimukhyaparicārikāgaṇaiḥ /
navacandrikālaharikāntikandalīcatureṇa cāmaracatuṣṭayena ca //
3.18.5
śaktyaikarājyapadavīmabhisūcayantī sāmrājyacihnaśatamaṇḍitasainyadeśā /
saṃgītavādyaracanābhirathāmarīṇāṃ saṃstūyamānavibhavā viśadaprakāśā //
3.18.6
vācāmagocaramagocarameva buddherīdṛktayā na kalanīyamananyatulyam //
3.18.7
trailokyagarbhaparipūritaśakticakrasāmrājyasaṃpadabhimānamabhispṛśantī /
ābaddhabhaktivipulāñjaliśekharāṇāmārādahaṃprathamikā kṛtasevanānām //
3.18.8
brahmeśaviṣṇuvṛṣamukhyasurottamānāṃ vaktrāṇivarṣitanutīni kaṭākṣayantī /
uddīptapuṣpaśarapañcakataḥ samutthaijyotirmayaṃ tribhuvanaṃ sahasā dadhānā //
3.18.9
vidyutsamadyutibhirapsarasāṃ samūhairvikṣipyamāṇajayamaṅgalalājavarṣā /
kāmeśvarīprabhṛtibhiḥ kamanīyabhābhiḥ saṃgrāmaveṣaracanāsumanoharābhiḥ //
3.18.10
dīptāyudhadyutitiraskṛta bhāskarābhirnityābhiraṅghrisavidhe samupākyamānā /
śrīcakranāmatilakaṃ daśayojanātituṅgadhvajollikhitameghakadaṃbamuccaiḥ //
3.18.11
tīvrābhirāvaṇasuśaktiparaṃparabhiryuktaṃ rathaṃ samarakarmaṇi cālayantī /
prodyatpiśaṅgarucibhāgamalāṃśukena vītāmanohararucissamare vyabhāsīt //
3.18.12
pañcādhikairviśatināmaratnaiḥ prapañcapāpapraśamātidakṣaiḥ /
saṃstūyamānā lalitā marudbhiḥ saṃgrāmamuddiśya samuccacāla //
3.18.13
agastya uvāca
vījivaktra mahābuddhe pañcaviṃśatināmabhiḥ /
lalitāparameśānyā dehi karṇarasāyanam //
3.18.14
hayagrīva uvāca
siṃhāsanā śrīlalitā mahārājñī parāṅkuśā /
cāpinī tripurā caiva mahātripurasundarī //
3.18.15
sundarī cakranāthā ca sāmrājī cakriṇī tathā /
cakreśvarī mahādevī kāmeśī parameśvarī //
3.18.16
kāmarājapriyā kāmakoṭigā cakravartinī /
mahāvidyā śivānaṅgavallabhā sarvapāṭalā //
3.18.17
kulanāthāmnāyanāthā sarvāmnāyanivāsinī /
śṛṅgāranāyikā ceti pañcaviṃśatināmabhiḥ //
3.18.18
stuvanti ye mahābhāgāṃ lalitāṃ parameśvarīm /
te prāpnuvanti saubhāgyamaṣṭau siddhīrmahadyaśaḥ //
3.18.19
itthaṃ pracaṇḍasaṃraṃbhaṃ cālayantī mahadbalam /
bhaṇḍāsuraṃ prati kruddhā cacāla lalitāṃbikā //
3.18.19.p1
iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne lalitāparameśvarīsenājaya yātrā nāmāṣṭādaśo 'dhyāyaḥ