Pramāṇa · Search · About · API

Brahmandapurana 3.19

Brahmāṇḍapurāṇa 3.19

Language
Sanskrit

Contents

3.19.1

agastya uvāca
cakrarājarathendrasya yāḥparvaṇi samāśritāḥ /
devatā prakaṭābhikhyāstāsāmākhyāṃ nivedaya //

3.19.2

saṃkhyāśca tāsāmakhilā varṇabhedāṃśca śobhanān /
āyudhāni ca divyāni kathayasva hayānana //

3.19.3

hayagrīva uvāca
navamaṃ parva dīptasya rathasya samupasthitāḥ /
taśa proktā siddhidevyastāsāṃ nāmāni macchṛṇu //

3.19.4

aṇimā mahimācaiva laghimā garimā tathā /
īśitā vaśitā caiva prāptiḥ siddhiśca saptamī //

3.19.5

prākāmyamuktisiddhiśca sarvakāmābhidhāparā /
etādevyaścaturbāhvyo japākusumasaṃnibhāḥ //

3.19.6

cintāmaṇikapālaṃ ca triśūlaṃ siddhikajjalam /
dadhānā dayayā pūrṇā yogibhiśca niṣevitāḥ //

3.19.7

tatra pūrvārddhabhāge ca brahmādyā aṣṭa śaktayaḥ /
brāhmī māheśvarī caiva kaumārī vaiṣmavī tathā /
vārāhī caiva māṃhendrī cāmuṇḍā caiva saptamī //

3.19.8

mahālakṣmīraṣṭamī ca dvibhujāḥ śoṇavigrahāḥ /
kapālamutpalaṃ caiva bibhrāṇā raktavāsasaḥ //

3.19.9

atha vānya prakāreṇa keciddhyānaṃ pacakṣate /
brahmādisadṛśākārā brahmādisadṛśāyudhāḥ //

3.19.10

brahmādīnāṃ paraṃ cihnaṃ dhārayantyaḥ prakīrtitāḥ /
tāsāmūrdhvasthānagatāṃ mudrā devyo mahattarāḥ //

3.19.11

mudrāviracanāyuktairhastaiḥ kamalakāntibhiḥ /
dāḍimīpuṣpasaṅkāśāḥ pītāṃbaramanoharāḥ //

3.19.12

caturbhujā bhujadvandvadhṛtacarmakṛpāṇakāḥ /
madaraktavilolākṣyastāsāṃ nāmāni macchṛṇu //

3.19.13

sarvasaṃkṣobhiṇī caiva sarvavidrāviṇī tathā /
sarvākarṣaṇakṛnmudrā tathā sarvavaśaṅkarī //

3.19.14

sarvonmādanamudrā ca yaṣṭiḥ sarvamahāṅkuśā /
sarvakhecarikā mudrā sarvabījā tathāparā //

3.19.15

sarvayoniśca navamī tathā sarvatriśaṇḍikā /
siddhibrāhayādimudrāstā etāḥ prakaṭaśaktayaḥ //

3.19.16

bhaṇḍāsurasya saṃhāraṃ kartuṃ raktarathe sthitāḥ /
yā guptākhyāḥ pūrvamuktāstāsāṃ nāmāni macchṛṇu //

3.19.17

kāmākarṣaṇikā caiva buddhyākarṣaṇikā kalā /
ahaṅkārākarṣiṇī ca śabdākarṣaṇikā kalā //

3.19.18

sparśākarṣaṇikā nityā rūpākarṣaṇikā kalā /
rasākarṣaṇikā nityā gandhākarṣaṇikā kalā //

3.19.19

cittākarṣaṇikā nityā dhairyākarṣaṇikā kalā /
smṛtyā karṣaṇikā nityā nāmākarṇaṇikā kalā //

3.19.20

bījākarṣaṇikā nityā cātmakarṣaṇikā kalā /
amṛtākarṣaṇī nityā śarīrākarṣiṇī kalā //

3.19.21

etāḥ ṣoḍaśa śītāṃśukalārūpāśca śaktayaḥ /
aṣṭamaṃ parva samprāptā guptā nāmnā prakīrtitāḥ //

3.19.22

vidrumadrumasaṅkāśā mandasmita manoharāḥ /
caturbhujāstrinetrāśca candrārkamukujojjvalāḥ //

3.19.23

cāpabāṇau carmakhaḍgau dadhānā divyakāntayaḥ /
bhaṇḍāsuravadhārthāya pravṛttāḥ kumbhasambhava //

3.19.24

sāyantanajvaladdīpaprakhyacakrarathasya tu /
saptame parvaṇi kṛtāvāsā guptatarābhidhāḥ //

3.19.25

anaṅgamadanānaṅgamadanāturayā saha /
anaṅgalekhā cānaṅgavegānaṅgāṅkuśāpi ca //

3.19.26

anaṅgamāligyaparā etā devyo japātviṣaḥ /
ikṣucāpaṃ puṣpaśarānpuṣpakandukamutpalam //

3.19.27

bibhratyo 'dabhravikrāntiśālinyo lalitājñayā /
bhaṇḍāsuramabhikruddhāḥ prajvalantya iva sthitāḥ //

3.19.28

atha cakrarathendrasya ṣaṣṭhaṃ parva samāśritāḥ /
sarvasaṃkṣobhiṇīmukhyāḥ sampradāyākhyayā yutāḥ //

3.19.29

veṇīkṛtakacastomāḥ siṃdūratilakojjvalāḥ /
atitīvrasvabhāvāśca kālānalasamatviṣaḥ //

3.19.30

vahnibāṇaṃ vahnicāpaṃ vahnirūpamasiṃ tathā /
vahnicakrākhyāphalakaṃ dadhānā dīptavigrahāḥ //

3.19.31

asurendraṃ prati kruddhāḥ kāmabhasmasamudbhavāḥ /
ājñāśaktaya evaitā lalitāyā mahaujasaḥ //

3.19.32

sarvasaṃkṣobhiṇī caiva sarvavidrāviṇī tathā /
sarvākarṣaṇikā śaktiḥ sarvāhlādinikā tathā //

3.19.33

sarvasaṃmohinīśaktiḥ sarvastambhanaśaktikā /
sarvajṛṃbhaṇaśaktiśca sarvonmādanaśaktikā //

3.19.34

sarvārthasādhikā śaktiḥ sarvasampattipūraṇī /
sarvamantramayī śaktiḥ sarvadvandvakṣayaṅkarī //

3.19.35

evaṃ tu sampradāyānāṃ nāmāni kathitāni vai /
atha pañcamaparvasthāḥ kulottīrṇā iti smṛtāḥ //

3.19.36

tāśca saptaṭikasaṅkāśāḥ paraśuṃ pāśameva ca /
gadāṃ ghaṇṭāṃ maṇiṃ caiva dadhānā dīptavigrahāḥ //

3.19.37

devadviṣamati kruddhā bhrukuṭīkuṭilānanāḥ /
etāsāmapi nāmāni samākarmaya kumbhaja //

3.19.38

sarvasiddhipradā devī sarvasampatpradā tathā /
sarvapriyaṅkarī devī sarvamaṅgalakāriṇī //

3.19.39

sarvakāmapradā devī sarvaduḥkhavimocinī //

3.19.40

sarvamṛtyupraśaminī sarvavighnanivāriṇī /
sarvāṅgasundarī devī sarvasaubhāgyadāyinī //

3.19.41

daśaintāḥ kathitā devyo dayayā pūritāśayāḥ /
cakre turīyaparvasthā muktāhārasamatviṣaḥ //

3.19.42

nigarbhayoginīnāmnā prathitā daśa kīrtitāḥ /
sarvajñā sarvaśaktiśca sarvaiśvaryapradā tathā //

3.19.43

sarvajñānamayī devī sarvavyādhivināśinī /
sarvādhārasvarūpā ca sarvapāpaharā tathā //

3.19.44

sarvānandamayī devī sarvarakṣāsvarūpiṇī /
daśamī devatājñeyā sarveṣsitaphalapradā //

3.19.45

etāścaturbhujā jñeyā vajraṃ śaktiṃ ca tomaram /
cakraṃ caivābhibibhrāṇā bhaṇḍāsuravadhodyatāḥ //

3.19.46

atha cakrarathendrasya tṛtīyaṃ parvasaṃśritāḥ /
rahasyayoginīnāmnā prakhyātā vāgadhīśvarāḥ //

3.19.47

raktāśokaprasūnābhābāṇakārmukapāṇayaḥ /
kavacacchannasarvāṅgayo vīṇāpustakaśobhitāḥ //

3.19.48

vaśinī caiva kāmeśī bhoginī vimalā tathā /
aruṇāca javinyākhyā sarveśī kaulinī tathā //

3.19.49

aṣṭāvetāḥ smṛtā devyo daityasaṃhārahetavaḥ /
atha cakrarathendrasya dvitīyaṃ parvasaṃśritāḥ //

3.19.50

cāpabāṇau pānapātraṃ māturuṅgaṃ kṛpāṇikām /
tisrastripīṭhanilayā aṣṭabāhusamanvitāḥ //

3.19.51

palakaṃ nāgapāśaṃ ca ghaṇṭāṃ caiva mahādhvanim /
vibhrāṇā madirāmattā atiguptarahasyakāḥ //

3.19.52

kāmeśī caiva vajreśī bhagamālinyathāparā /
tisra etāḥ smṛtā devyo bhaṇḍe kopasamanvitāḥ //

3.19.53

lalitāsamamāhātmyā lalitāsamatejasaḥ /
etāstu nityaṃ śrīdevyā antaraṅgāḥ prakīrtitāḥ //

3.19.54

athānandamahāpīṭhe rathamadhyamaparvaṇi /
parito racitāvāsāḥ proktāḥ pañcadaśākṣarāḥ //

3.19.55

tithinityāḥ kālarūpā viśvaṃ vyāpyaiva saṃsthitāḥ /
bhaṇḍāsurādidaityeṣu prakṣubdhabhrukuṭītaṭāḥ //

3.19.56

devīsamanijākārā devīsamanijāyudhāḥ /
jagatāmupakārāya vartamānā yugeyuge //

3.19.57

tāsāṃ nāmāni mattastvamavadhārayakumbhaja /
kāmeśī bhagamālā ca nityaklinnā tathaiva ca //

3.19.58

bheruṇḍā vahnivāsinyo mahāvajreśvarī tathā /
datī ca tvaritā devī navamī kulasundarī //

3.19.59

nityā nīlapatākā ca vijayā sarvamaṅgalā /
jvālāmālinikācitre daśa pañca ca kīrtitāḥ //

3.19.60

etābhiḥ sahitā devī sadā sevaikabuddhibhiḥ /
duṣṭaṃ bhaṇḍāsuraṃ jetuṃ niryayau parameśvarī //

3.19.61

mantrināthā mahācakre gītiṃ cakre rathottame /
saptaparvāṇi coktāni tatra devyāśca tāḥ śṛṇu //

3.19.62

geyacakrarathe parvamadhyapīḍhaniketanā /
saṃgītayoginī proktā śrīdevyā ativallabhā //

3.19.63

tadeva prathamaṃ parva mantriṇyāstu nivāsabhūḥ /
atha dvitīyaparvasthā geyacakre rathottame //

3.19.64

ratiḥ prītirmanojā ca vīṇākārmukapāṇayaḥ /
tamālaśyāmalākārā dānavonmūlanakṣamāḥ //

3.19.65

tṛtīyaparvasaṃrūḍhā manobhūbāṇadevatā /
drāviṇī śoṣiṇī caiva bandhinī mohinī tathā //

3.19.66

unmādinīti pañcaitā dīptakārmukapāṇayaḥ /
tatra parvaṇyadhastāttu vartamānā mahaujasaḥ //

3.19.67

kāmarājaśca kandarpauṃ manmatho makaradhvajaḥ /
manobhavaḥ pañcamaḥ syādete trailokyamohanāḥ //

3.19.68

kastūrītilakollāsibhālāmuktāvirājitāḥ /
kavacacchannasarvāṅgāḥ palāśaprasavatviṣaḥ //

3.19.69

pañcakāmā ime proktā bhaṇḍāsuravadhārthinaḥ /
jeyacakrarathendrasya caturthaṃ parva saṃśritāḥ //

3.19.70

brahmīmukhyāstu pūrvoktāścaṇḍikā tvaṣṭamī parā /
tatra parvaṇyadhastācca lakṣmīścaiva sarasvatī //

3.19.71

ratiḥ prītiḥ kīrtiśāntī puṣṭistuṣṭiśca śaktayaḥ /
etāścakrodharaktākṣyo daityaṃ hantuṃ mahābalam //

3.19.72

kuntacakradharāḥ proktāḥ kumāryaḥ kuṃbhasaṃbhava /
pañcamaṃ parva saṃprāptā vāmādyāḥ ṣoḍaśāparāḥ //

3.19.73

gītiṃ cakrū rathendrasya tāsāṃ nāmāni macchṛṇu /
vāmā jyeṣṭā ca raudrī ca śāntiḥ śraddhā sarasvatī //

3.19.74

śrībhūśāktiśca lakṣmīśca sṛṣṭiścaiva tu mohinī /
tathā pramāthinī cāśvasinī vīcistathaiva ca //

3.19.75

vidyunmālinyatha surānandātho nāgabuddhikā /
etāstu kuravindābhā jagatkṣobhaṇalaṃpaṭāḥ //

3.19.76

mahāsarasamannāhamādadhānāḥ padepade /
vajrakaṅkaṭasaṃchannā aṭṭahāsojjvalāḥ pare /
vajradaṇḍau śataghnīṃ ca saṃbibhrāṇā bhuśuṇḍikāḥ //

3.19.77

atha gītirathendrasya ṣaṣṭhaṃ parva samāśritāḥ /
asitāṅgaprabhṛtayo bhairavāḥ śastrabhīṣaṇāḥ //

3.19.78

triśikhaṃ pānapātraṃ ca bibhrāṇā nīlavarcasaḥ /
asitāṅgo ruruścaṇḍaḥ krodha unmattabhairavaḥ //

3.19.79

kapālī bhīṣaṇaścaiva saṃhāraścāṣṭa bhairavāḥ /
atha gītirathendrasya saptamaṃ parva saṃśritāḥ //

3.19.80

mātaṅgī siddhalakṣmīśca mahāmātaṅgikāpi ca /
mahatī siddhalakṣmīśca śoṇā bāṇadhanurdharāḥ //

3.19.81

tasyaiva parvaṇo 'dhastādgaṇapaḥ kṣetrapastathā /
durgāṃbā baṭukaśceṃva sarve te śastrapāṇayaḥ //

3.19.82

tatraiva parvaṇo 'dhastāllakṣmīścaiva sarasvatī /
śaṅkhaḥ padmo nidhiścaiva te sarve śastrapāṇayaḥ //

3.19.83

lokadviṣaṃ prati kruddhā bhaṇḍaṃ caṇḍaparākramam /
śakrādayaśca viṣmvantā daśa dikcakranāyakāḥ //

3.19.84

śaktirūpāstatra parvaṇyadhastātkṛtasaṃśrayāḥ /
vajre śaktiṃ kāladaṇḍamakiṃ pāśaṃ dhvajaṃ tathā //

3.19.85

gadāṃ triśūlaṃ darbhāstraṃ vajraṃ ca dadhatastvamī /
sevante mantrināthāṃ tāṃ nityaṃ bhaktisamanvitāḥ //

3.19.86

bhaṇḍāsurāndurdurūḍhānnihantuṃ viśvakaṇṭakān /
mantrināthāśrayadvārā lalitājñāpanotsukāḥ //

3.19.87

gīticakrarathopānte dikpālāḥ saṃśrayaṃ daduḥ /
sarveṣāṃ caiva devānāṃ mantriṇī dvārataḥ kṛtā //

3.19.88

vijñāpanā mahādevyāḥ kāryasiddhiṃ prayacchati /
rākṣī vijñāpanā ceti pradhānadvārataḥ kṛtā //

3.19.89

yathā khalu phalaprāptiḥ sevakānāṃ hi jāyate /
anyathā kathameteṣāṃ sāmarthyaṃ jvalitaujasaḥ //

3.19.90

apadhṛṣyaprabhāvāyāḥ śrīdevyā upasarpaṇe /
sā hi saṃgītavidyeti śrīdevyā ativallabhā //

3.19.91

nātilaṅghati ca kvāpi taduktaṃ kāryasiddhiṣu /
śrīdevyāḥśaktisāmrājye sarvakarmāṇi mantriṇī //

3.19.92

akarttumanyathā kartuṃ kartuṃ caiva pragalbhate /
tasmātsarve 'pi dikpālāḥ śrīdevyā jayakāṅkṣiṇaḥ /
tasyāḥ pradhānabhūtāyāḥ sevāmeva vitanvate //

3.19.93

iti śrīlalitādevyāścakrarājarathottame /
parvasthitānāṃ devīnāṃ nāmāni kathitānyalam //

3.19.94

bhaṇḍāsurasya saṃhāre tasyā divyāyudhānyapi /
proktāni geyacakrasya parvadevyāśca kīrtitāḥ //

3.19.95

imāni sarvadevīnāṃ nāmānyākarṇayanti ye /
sarvapāpavinirmuktāste syurvijayino narāḥ //

3.19.95.p1

iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopakhyāne śrīcakrarājarathajñeyacakrarathaparvasthadevatānāmaprakāśanaṃ nāmaikonaviṃśo 'dhyāyaḥ

Linked texts (7)