[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 3.2 # Brahmandapurana 3.2 Brahmāṇḍapurāṇa 3.2 - **Language:** Sanskrit ## Contents - [3.2.316](https://indike.org/pramana/in.purana.brahmanda.3.2.316) — 1 part ### [3.2.1](https://indike.org/pramana/in.purana.brahmanda.3.2.1) vāyuruvāca asādhāraṇavṛttaistu hutaśeṣādibhirjanaiḥ / dharmā vaiśeṣikāścaiva ācīrṇāḥ sūkṣmadarśibhiḥ // ### [3.2.2](https://indike.org/pramana/in.purana.brahmanda.3.2.2) te devaiḥ saha tiṣṭhanti maharlokanivāsinaḥ / caturdaśaite manavaḥ kīrtitāḥ kīrtivarddhanāḥ // ### [3.2.3](https://indike.org/pramana/in.purana.brahmanda.3.2.3) atītā varttamānāśca tathaivānāgatāśca ye / devāśca ṛṣayaścaiva manavaḥ pitarastathā // ### [3.2.4](https://indike.org/pramana/in.purana.brahmanda.3.2.4) sarve hyuktā mayātīta maharlokaṃ samāśritāḥ / brāhmaṇaiḥ kṣatriyairvaiśyairdhārmikaiḥ sahitaiḥ saraiḥ // ### [3.2.5](https://indike.org/pramana/in.purana.brahmanda.3.2.5) taistathākāribhiryuktaiḥ śraddhāvadbhiradarpitaiḥ / varṇāśramāṇāndharmeṣu śrautasmārtteṣu saṃsthitaiḥ / vinivṛttādhikārāste yāvanmanvantarakṣayaḥ // ### [3.2.6](https://indike.org/pramana/in.purana.brahmanda.3.2.6) ṛṣaya ūcuḥ maharlloketi yatproktaṃ mātariśvaṃstvayā vibhoḥ // ### [3.2.7](https://indike.org/pramana/in.purana.brahmanda.3.2.7) pratiloke tu karttavyaṃ tatrakiṃ samadhiṣṭhitam / provāca madhuraṃ vākyaṃ yathā tattvena tattvavit // ### [3.2.8](https://indike.org/pramana/in.purana.brahmanda.3.2.8) vāyuruvāca catardaśaiva sthānāni nirmitāni maharṣibhiḥ / lokākhyāni tu yāni syuryeṣāṃ tiṣṭhanti mānavāḥ // ### [3.2.9](https://indike.org/pramana/in.purana.brahmanda.3.2.9) sapta teṣu kṛtānyāhurakṛtāni tu sapta vai / bhūrādayastu satyāntāḥ sapta lokāḥ kṛtāstviha // ### [3.2.10](https://indike.org/pramana/in.purana.brahmanda.3.2.10) akṛtāni tu saptaiva prākṛtāni tu yāni vai / sthānāni sthānibhiḥ sārddhaṃ kṛtāni tu nibandhanam // ### [3.2.11](https://indike.org/pramana/in.purana.brahmanda.3.2.11) pṛthivī cāntarīkṣaṃ ca divyaṃ yacca mahaḥ smṛtam / sthānānyetāni catvāri smṛtānyāvarṇakāni ca // ### [3.2.12](https://indike.org/pramana/in.purana.brahmanda.3.2.12) kṣayātiśayayuktāni tathāyuktāni cakṣate / yāni naimittikāni syustiṣṭhantyābhūtasaṃplavāt // ### [3.2.13](https://indike.org/pramana/in.purana.brahmanda.3.2.13) janastapaśca satyaṃ ca sthānānyetāni trīṇi tu / ekāntikāni tāni syustiṣṭhantīhāprasaṃyamāt // ### [3.2.14](https://indike.org/pramana/in.purana.brahmanda.3.2.14) vyaktāni tu pravakṣyāmi sthānānyetāni sapta vai / bhūrlokaḥ prathamasteṣāṃ dvitīyastu bhuvaḥ smṛtaḥ // ### [3.2.15](https://indike.org/pramana/in.purana.brahmanda.3.2.15) svastṛtīyastu vijñeyaścaturtho vai mahaḥ smṛtaḥ / janastu pañcamo lokastapaḥ ṣaṣṭho vibhāvyate // ### [3.2.16](https://indike.org/pramana/in.purana.brahmanda.3.2.16) satyastu saptamo loko nirālokastataḥ param / bhūriti vyāhṛteḥ pūrva bhūrlokaśca tato 'bhavat // ### [3.2.17](https://indike.org/pramana/in.purana.brahmanda.3.2.17) dvītīyo bhuva ityukta antarikṣaṃ tato 'bhavat / tṛtīyaṃ svaritītyukto divaṃ prādurbabhūva ha // ### [3.2.18](https://indike.org/pramana/in.purana.brahmanda.3.2.18) vyāhāraistribhiretaistu brahmā lokamakalpayat / tato bhūḥ pārthivo loko hyantarikṣaṃ bhūvaḥ smṛtam // ### [3.2.19](https://indike.org/pramana/in.purana.brahmanda.3.2.19) svarlokaṃ vai divaṃ hyeṣa purāṇe niścayo gataḥ / bhūtasyādhipatiścāgnistato bhūtapatiḥ smṛtaḥ // ### [3.2.20](https://indike.org/pramana/in.purana.brahmanda.3.2.20) vāyurbhuvaścādhipatistena vāyurbhuvaspatiḥ / divasya sūryo 'dhipatistena sūryo divaspatiḥ // ### [3.2.21](https://indike.org/pramana/in.purana.brahmanda.3.2.21) maheti vyātdṛtenaiva maharlokastato 'bhavat / vinivṛttādhikāraṇāṃ devānāṃ tatra vai kṣayaḥ // ### [3.2.22](https://indike.org/pramana/in.purana.brahmanda.3.2.22) janastu pañcamo lokastasmājjāyanti vai janāḥ / tāsāṃ svāyaṃbhuvādyānāṃ prajānāṃ jananājjanaḥ // ### [3.2.23](https://indike.org/pramana/in.purana.brahmanda.3.2.23) ye te svāyaṃbhuvādyā hi purastātparikīrttitāḥ / kalpa ete yadā loke pratiṣṭhanti tadā tapaḥ // ### [3.2.24](https://indike.org/pramana/in.purana.brahmanda.3.2.24) ṛbhuḥ sanatkumārādyā yatrāsannūrddhvaretasaḥ / tapasā bhāvitātmānastatra saṃtīti vā tapaḥ // ### [3.2.25](https://indike.org/pramana/in.purana.brahmanda.3.2.25) satyeti brahmaṇaḥ śabdaḥ sattāmātrastu sa smṛtaḥ / brahmalokastataḥ satyaḥ saptamaḥ sa tu bhāsvaraḥ // ### [3.2.26](https://indike.org/pramana/in.purana.brahmanda.3.2.26) gandharvāpsaraso yakṣā guhyakāstu sarākṣasāḥ / sarvabhūtapiśācāśca nāgāśca saha mānuṣaiḥ // ### [3.2.27](https://indike.org/pramana/in.purana.brahmanda.3.2.27) svarlokavāsinaḥ sarve devā bhuvi nivāsinaḥ / maruto mātariśvāno rudrā devāstathāśvinau // ### [3.2.28](https://indike.org/pramana/in.purana.brahmanda.3.2.28) aniketāntarikṣāste bhuvarlokā divaukasaḥ / ādityā ṛbhavo viśve sādhyāśca pitarastathā // ### [3.2.29](https://indike.org/pramana/in.purana.brahmanda.3.2.29) ṛṣayoṅgira saścaiva bhuvarlokaṃ samāśritāḥ / ete vaimānikā devāstārāgrahanivāsinaḥ // ### [3.2.30](https://indike.org/pramana/in.purana.brahmanda.3.2.30) āraṃbhante tu tanmātraiḥ śuddhāsteṣāṃ parasparam / śukrādyāścakṣuṣāntāśca ye vyatītā bhuvaṃ śritāḥ // ### [3.2.31](https://indike.org/pramana/in.purana.brahmanda.3.2.31) maharlokaścaturthastu tasmiṃste kalpavāsinaḥ / ityete kramaśaḥ proktā brahmavyāhārasaṃbhavāḥ // ### [3.2.32](https://indike.org/pramana/in.purana.brahmanda.3.2.32) bhūrlokaprathamā lokā maharantāśca te smṛtāḥ / tānsarvānsaptasūryāste arcibhirnirdahanti vai // ### [3.2.33](https://indike.org/pramana/in.purana.brahmanda.3.2.33) mārīciḥ kaśyapo dakṣastathā svāyaṃbhuvoṅgirāḥ / bhṛguḥ pulastyaḥ pulahaḥ kraturityevamādayaḥ // ### [3.2.34](https://indike.org/pramana/in.purana.brahmanda.3.2.34) prajānāṃ patayaḥ sarve varttaṃnne tatra taiḥ saha / niḥsattvā nirmamāścaiva tatra te hyūrdvaretasaḥ // ### [3.2.35](https://indike.org/pramana/in.purana.brahmanda.3.2.35) ṛbhuḥ sanatkumārādyā vairājāste tapodhanāḥ / manvantarāṇāṃ sarveṣāṃ sāvarṇānāṃ tataḥ smṛtāḥ // ### [3.2.36](https://indike.org/pramana/in.purana.brahmanda.3.2.36) caturdaśānāṃ sarveṣāṃ punarāvṛttihetavaḥ / yogaṃ tapaśca sattvaṃ ca samādhāya tadātmani // ### [3.2.37](https://indike.org/pramana/in.purana.brahmanda.3.2.37) ṣaṣṭhe kāle nivarttate tadā prāhurviparyayāt / satyastu saptamo loko hyapunarmārgagāminām // ### [3.2.38](https://indike.org/pramana/in.purana.brahmanda.3.2.38) brahmalokaḥ samākhyāto hyapratīghātalakṣaṇaḥ / paryāsaparimāṇena bhūrlokaḥ samabhismṛtaḥ // ### [3.2.39](https://indike.org/pramana/in.purana.brahmanda.3.2.39) bhūmyantaraṃ yadādityādantarikṣaṃ bhuvaḥ smṛtam / sūryadhruvāntaraṃ yacca svargaloko divaḥ smṛtaḥ // ### [3.2.40](https://indike.org/pramana/in.purana.brahmanda.3.2.40) dhruvājjanāntaraṃ yacca maharlokaḥ sa ucyate / vyākhyātāḥ saptalokāstu teṣāṃ vakṣyāmi siddhayaḥ // ### [3.2.41](https://indike.org/pramana/in.purana.brahmanda.3.2.41) bhūrlokavāsinaḥ sarve unnādāstu rasātmakāḥ / bhuvi svarge ca ye sarve somapā ājyapāśca te // ### [3.2.42](https://indike.org/pramana/in.purana.brahmanda.3.2.42) caturthe ye 'pi varttante maharlokaṃ samāśritāḥ / vijñeyā mānasī teṣāṃ siddhirvai pañcalakṣaṇā // ### [3.2.43](https://indike.org/pramana/in.purana.brahmanda.3.2.43) sadyaścotpadyate teṣāṃ manasā sarvamīpsitam / ete devā yajante vai yajñaiḥ sarvaiḥ parasparam // ### [3.2.44](https://indike.org/pramana/in.purana.brahmanda.3.2.44) atītā varttamānāśca tathā ye cāpyanāgatāḥ / prathamānantaroddiṣṭā antarāḥ sāṃprataiḥ punaḥ // ### [3.2.45](https://indike.org/pramana/in.purana.brahmanda.3.2.45) nivarttate hi saṃbandho 'tīte devagaṇe tapaḥ / vinivṛttādhikārāṇāṃ siddhasteṣāṃ tu mānasī // ### [3.2.46](https://indike.org/pramana/in.purana.brahmanda.3.2.46) taṣāṃ tu mānasī jñeyā śuddhā siddhiḥ parasparāt / uktā lokāstu catvāro janasyānuvidhistathā / samāsena mayā viprā bhūyastaṃ varttayāmi vaḥ // ### [3.2.47](https://indike.org/pramana/in.purana.brahmanda.3.2.47) vāyuruvāca marīciḥ kaśyapo dakṣo vasiṣṭhaścāṅgirā bhṛguḥ // ### [3.2.48](https://indike.org/pramana/in.purana.brahmanda.3.2.48) pulastyaḥ pulahaschaiva kraturityevāmādayaḥ / pūrvaṃ te saṃprasūyante brahmaṇo mānasā iha // ### [3.2.49](https://indike.org/pramana/in.purana.brahmanda.3.2.49) tataḥ prajāḥ pratiṣṭhāpya janamevāśrayanti te / kalpadāheṣu tu sadā tathā kāleṣu teṣu vai // ### [3.2.50](https://indike.org/pramana/in.purana.brahmanda.3.2.50) bhūrādiṣu mahānteṣu bhṛśaṃ vyāpte yathāgninā / śikhāḥ saṃvarttakāgneryāḥ prāpnuvanti savāsanāḥ // ### [3.2.51](https://indike.org/pramana/in.purana.brahmanda.3.2.51) yāmādayo gaṇāḥ sarve maharlokanivāsinaḥ / maharlokeṣu dīpteṣu janamevāśrayanti te // ### [3.2.52](https://indike.org/pramana/in.purana.brahmanda.3.2.52) sarve sūkṣmaśarīrāste tatrasthāśca bhavanti te / teṣāṃ te tulyasāmarthyā stulyamūrttidharāstathā // ### [3.2.53](https://indike.org/pramana/in.purana.brahmanda.3.2.53) janaloke vivarttante saṃvarttaḥ plavate jagat / vyuṣṭāyāṃ tu rajanyāṃ vai brahmaṇo 'vyaktayonitaḥ // ### [3.2.54](https://indike.org/pramana/in.purana.brahmanda.3.2.54) aharādau prasūyante pūrvavatkramaśastviha / svāyaṃbhuvādayaḥ sarve marīcyantāstu sādhakāḥ // ### [3.2.55](https://indike.org/pramana/in.purana.brahmanda.3.2.55) devāste vai punasteṣāṃ jāyante nidhaneṣviha / yāmādayaḥ krameṇaiva kaniṣṭhādyāḥ prajāpateḥ // ### [3.2.56](https://indike.org/pramana/in.purana.brahmanda.3.2.56) pūrvaṃ pūrve prasūyante paścime paścimāstathā / devānvaye devatā hi sapta saṃbhūta yaḥ smṛtāḥ // ### [3.2.57](https://indike.org/pramana/in.purana.brahmanda.3.2.57) vyatītāḥ kalpajāsteṣāṃ tisraḥ śiṣṭāstathāpare / āvarttamānā devāste krameṇaitena sarvaśaḥ // ### [3.2.58](https://indike.org/pramana/in.purana.brahmanda.3.2.58) gatvā java javībhāvaṃ daśakṛtvāḥ punaḥ punaḥ / tataste vai gaṇāḥ sarve dṛṣṭvā bhāveṣvanityatām // ### [3.2.59](https://indike.org/pramana/in.purana.brahmanda.3.2.59) bhāvinor'thasya ca balātpuṇyakhyātibalena ca / nivṛttavṛttyaḥ sarve 'trasthāḥ sumanasastathā // ### [3.2.60](https://indike.org/pramana/in.purana.brahmanda.3.2.60) vairājamupapadyante lokānutsṛjya taṃ gatāḥ / tato 'nenaiva kālena nityayuktāstapasvinaḥ // ### [3.2.61](https://indike.org/pramana/in.purana.brahmanda.3.2.61) kathanāccaiva dharmasya teṣāṃ te jajñire 'nvaye / ihotpannāstataste vai sthānānyāpūrayantyuta // ### [3.2.62](https://indike.org/pramana/in.purana.brahmanda.3.2.62) devatve ca ṛṣitve ca manuṣyatve ca sarvaśaḥ / evaṃ devagaṇāḥ sarve daśakṛtvo nivartyavai // ### [3.2.63](https://indike.org/pramana/in.purana.brahmanda.3.2.63) vairājeṣūpapannāste daśa tiṣṭhantyupaplavān / pūrṇopūrṇo tataḥ kalpesthitvā vairājake punaḥ // ### [3.2.64](https://indike.org/pramana/in.purana.brahmanda.3.2.64) brahmaloke vivarttante pūrvapūrvakrameṇa tu / etasminbrahmaloke tu kalpe vairājake gate // ### [3.2.65](https://indike.org/pramana/in.purana.brahmanda.3.2.65) vairājaḥ punaravyakte kalpasthānamakalpayat / evaṃ pūrvānupūrvyeṇa brahmalokagatena vai // ### [3.2.66](https://indike.org/pramana/in.purana.brahmanda.3.2.66) vairājeṣūpapadyante daśakṛtvo vivartyata / evaṃ devayugānīha vyatītāni sahasraśaḥ // ### [3.2.67](https://indike.org/pramana/in.purana.brahmanda.3.2.67) nidhanaṃ brahmaloke tu gatānāmṛṣibhiḥ saha / na śakyamānupūrvyeṇa teṣāṃ vaktuṃ pravistaram // ### [3.2.68](https://indike.org/pramana/in.purana.brahmanda.3.2.68) anāditvācca kālasya hyasaṃkhyānācca sarvaśaḥ / evameva na saṃdeho yathāvatkathitaṃ mayā // ### [3.2.69](https://indike.org/pramana/in.purana.brahmanda.3.2.69) tadupaśrutya vākyārthamṛṣayaḥ saṃśayānvitāḥ / sūtamāhuḥ purāṇajñaṃ vyāsaśiṣyaṃ mahāmatim // ### [3.2.70](https://indike.org/pramana/in.purana.brahmanda.3.2.70) ṛṣaya ūcuḥ vairājāste yadāhārā yatsattvāśca yadāśrayāḥ / tiṣṭhanti caiva yatkālaṃ tanno brūhi yathātatham // ### [3.2.71](https://indike.org/pramana/in.purana.brahmanda.3.2.71) taduktamṛṣibhirvākyaṃ śrutvā lokārthatattvavit / sūtaḥ paurāṇiko vākyaṃ vinayenedama bravīt // ### [3.2.72](https://indike.org/pramana/in.purana.brahmanda.3.2.72) tataḥ prāpya tu sarveśaṃ śuddhabuddhiṃ tamāśrayat / ābhūtasaṃplavāstatra daśa tiṣṭhanti te 'jvarāḥ // ### [3.2.73](https://indike.org/pramana/in.purana.brahmanda.3.2.73) sarve sūkṣmaśarīrāste vidvāṃso ghanamūrtayaḥ / sthitalokasthitatvācca teṣāṃ bhūtaṃ na vidyate // ### [3.2.74](https://indike.org/pramana/in.purana.brahmanda.3.2.74) ūcuḥ sanatkumārādyāḥ siddhāste yogadharmiṇaḥ / evameva mahābhāgāḥ praṇavaṃ saṃpraviśya ha // ### [3.2.75](https://indike.org/pramana/in.purana.brahmanda.3.2.75) brahmaloke pravarttāmastannaḥ śreyo bhaviṣyate / evamuktvā tadā sarve brahmāṇḍādhyavasāyi naḥ // ### [3.2.76](https://indike.org/pramana/in.purana.brahmanda.3.2.76) yājayitvā tadātmāno varttante yogadharmiṇaḥ / tatraiva saṃpralīyante śāntā dīparciṣo yathā // ### [3.2.77](https://indike.org/pramana/in.purana.brahmanda.3.2.77) brahmakāyamavarttanta puna rāvṛttidurlabham / lokaṃ taṃ samanuprāpya sarve te bhāvanāmayam // ### [3.2.78](https://indike.org/pramana/in.purana.brahmanda.3.2.78) ānandaṃ brahmaṇaḥ prāpya amṛtatvāya te gatāḥ / vairājebhyastathaivorddhva mantare ṣaḍguṇe tataḥ // ### [3.2.79](https://indike.org/pramana/in.purana.brahmanda.3.2.79) brahmalokaḥ samākhyāto yatra brahmā purohitaḥ / te sarve praṇavātmāno buddhiśuddhatayā sthitāḥ // ### [3.2.80](https://indike.org/pramana/in.purana.brahmanda.3.2.80) ānandaṃ brahmaṇaḥ prāpya hyamṛtatvaṃ bhajantyuta / dvandvaiste nābhibhūyante bhāvatrayavivarjitāḥ // ### [3.2.81](https://indike.org/pramana/in.purana.brahmanda.3.2.81) ādhipatyaṃ vinā tulyā brahmaṇaste mahaujasaḥ / prabhāvavijayaiśvaryasthitivairāgyadarśanaḥ // ### [3.2.82](https://indike.org/pramana/in.purana.brahmanda.3.2.82) te brahmalaukikāḥ sarve gatiṃ prāpyānivarttinīm / brahmaṇā sahadevaiśca saṃprāpte pratisaṃcare // ### [3.2.83](https://indike.org/pramana/in.purana.brahmanda.3.2.83) tapasoṃ'te kriyātmāno buddhāvasthā manīṣiṇaḥ / avyakte saṃpralīyante sarve te kṣaṇadarśinaḥ // ### [3.2.84](https://indike.org/pramana/in.purana.brahmanda.3.2.84) ityetadamṛtaṃ śukraṃ nityamakṣayavyayam / devarṣayo brahmasatraṃ sanātanamupāsate // ### [3.2.85](https://indike.org/pramana/in.purana.brahmanda.3.2.85) apunarmārakādīnāṃ teṣāṃ caivoddhvaretasām / karmābhyāsakṛtāṃ śraddhāṃ vedānteṣūpalakṣyate // ### [3.2.86](https://indike.org/pramana/in.purana.brahmanda.3.2.86) tatra te 'bhyāsino yuktāḥ parāṃ kāṣṭhāmupāsate / hitvā śarīraṃ pāpmānamamṛtatvāya te gātāḥ // ### [3.2.87](https://indike.org/pramana/in.purana.brahmanda.3.2.87) vītarāgā jitakrodhā nirmohāḥ satyavādinaḥ / śāntāḥ praṇihitātmāno dayāvanto jitendriyāḥ // ### [3.2.88](https://indike.org/pramana/in.purana.brahmanda.3.2.88) niḥsaṃgāḥ śucayaścaiva brahmasāyujyagāḥ smṛtāḥ / akāmayuktairye vīrāstapobhirdagdhakilbiṣāḥ // ### [3.2.89](https://indike.org/pramana/in.purana.brahmanda.3.2.89) teṣāṃmabhraṃśino lokā aprameyasukhāḥ smṛtāḥ / etadbrahmapadaṃ divyaṃ parame vyomni bhāsvaram / yatra gatvā na śocanti hyamarā brahmaṇā saha // ### [3.2.90](https://indike.org/pramana/in.purana.brahmanda.3.2.90) ṛṣaya ūcuḥ kasmādeṣu parārddhaṃśca kaścaiva para ucyate / etadveditumicchāmastanno nigada sattama // ### [3.2.91](https://indike.org/pramana/in.purana.brahmanda.3.2.91) sūta uvāca śṛṇudhvaṃ me parārddhasya parisaṃkhyāṃ parasyaca // ### [3.2.92](https://indike.org/pramana/in.purana.brahmanda.3.2.92) ekaṃ daśaśataṃ caiva sahasraṃ caiva saṃkhyāyā / vijñeyamāsahasraṃ tu sahasrāṇi daśāyutam // ### [3.2.93](https://indike.org/pramana/in.purana.brahmanda.3.2.93) ekaṃ śatasahasraṃ tu niyutaṃ procyate budhaiḥ / tathā śatasahasrāṇāṃ daśaprayutamucyate // ### [3.2.94](https://indike.org/pramana/in.purana.brahmanda.3.2.94) tathā daśasahasrāṇāmayutaṃ koṭirucyate / arbudaṃ daśakoṭyastu hyabjaṃ koṭiśataṃ viduḥ // ### [3.2.95](https://indike.org/pramana/in.purana.brahmanda.3.2.95) sahasramāpi koṭīnāṃ kharvamāhurmanīṣiṇaḥ / daśakoṭisahasrāṇi nikharvamiti taṃ viduḥ // ### [3.2.96](https://indike.org/pramana/in.purana.brahmanda.3.2.96) śataṃ koṭi sahasrāṇāṃ śaṅkurityabhidhīyate / sahasraṃ tu sahasrāṇāṃ koṭīnāṃ padmamucyate // ### [3.2.97](https://indike.org/pramana/in.purana.brahmanda.3.2.97) sahasrāṇi sahasrāṇāṃ koṭīnāṃ daśadhā punaḥ / guṇitāni samudraṃ vai prāhuḥ saṃkhyāvido janāḥ // ### [3.2.98](https://indike.org/pramana/in.purana.brahmanda.3.2.98) koṭīsahasraniyutamantyamityabhidhīyate / koṭīsahasraprayutaṃ madhyamityabhisaṃjñitam // ### [3.2.99](https://indike.org/pramana/in.purana.brahmanda.3.2.99) koṭikoṭisahasraṃ tu parārddha iti kīrtyate / parārddhaṃ dviguṇaṃ cāpi paramāhurmanīṣiṇaḥ // ### [3.2.100](https://indike.org/pramana/in.purana.brahmanda.3.2.100) śatamāhuḥ parivṛḍhaṃ sahasraṃ paripadmakam / vijñeyamayutaṃ tasmānniyutaṃ prayutaṃ tataḥ // ### [3.2.101](https://indike.org/pramana/in.purana.brahmanda.3.2.101) arbudaṃ nyarbudaṃ caiva kharbudaṃ ca tataḥ smṛtam / kharvaṃ caiva nikharvaṃ ca śaṅkuḥ padmantathaiva ca // ### [3.2.102](https://indike.org/pramana/in.purana.brahmanda.3.2.102) samudramantyaṃ madhyaṃ ca parārddhaṃ ca paraṃ tataḥ / evamaṣṭādaśaitāni sthānāni gaṇanāvidhau // ### [3.2.103](https://indike.org/pramana/in.purana.brahmanda.3.2.103) śatādīni vijānīyātsaṃjñitāni maharṣibhiḥ / kalpasaṃkhyāpravṛttasya parārddho brahmamaḥ smṛtaḥ // ### [3.2.104](https://indike.org/pramana/in.purana.brahmanda.3.2.104) tāvaccheṣo 'pi kālo 'sya tasyānte pratitiṣṭhate / para eva parārddhaśca saṃkhyātaḥ saṃkhyāyā mayā // ### [3.2.105](https://indike.org/pramana/in.purana.brahmanda.3.2.105) yasmādasya paraṃ viryaṃ paramāyuḥ paraṃ tapaḥ / parā śaktiḥ paro dharmaḥ parāvidyā parā dhṛtiḥ // ### [3.2.106](https://indike.org/pramana/in.purana.brahmanda.3.2.106) paraṃ brahma paraṃ jñānaṃ paramaiśvaryameva ca / tasmātparataraṃ bhūtaṃ brahmaṇo yanna vidyate // ### [3.2.107](https://indike.org/pramana/in.purana.brahmanda.3.2.107) pare sthito hyeṣa paraḥ sarvārthevu tataḥ param / saṃkhyātastu paro brahmā tasyārddhasya parārddhatā // ### [3.2.108](https://indike.org/pramana/in.purana.brahmanda.3.2.108) saṃkhyeyaṃ cāpyasaṃkhyeyaṃ satataṃ cāpi tāntrikam / saṃkhyeyaṃ saṃkhyayā dṛṣṭamaparārddhādvibhāṣyate // ### [3.2.109](https://indike.org/pramana/in.purana.brahmanda.3.2.109) rāśau dṛṣṭe na saṃkhyāsti tadasaṃkhyāstu lakṣṇam / ānantyaṃ sikatā dyeṣu hṛṣṭaṃ cānyaṃ tvalakṣaṇam // ### [3.2.110](https://indike.org/pramana/in.purana.brahmanda.3.2.110) īśvaraistatprasaṃkhyānaṃ śuddhatvāddivyadṛṣṭibhiḥ / evaṃ jñānapratiṣṭhatvātsarvaṃ brahmānupaśyati // ### [3.2.111](https://indike.org/pramana/in.purana.brahmanda.3.2.111) etacchrutvā tu te sarve naimiṣeyāstapasvinaḥ / bāṣpaparyākulākṣāstu praharṣādgadgadasvarāḥ // ### [3.2.112](https://indike.org/pramana/in.purana.brahmanda.3.2.112) papracchurmātāriśvānaṃ sarve te brahmavādinaḥ / brahmalokastu bhagavanyāvanmātrāntare prabho // ### [3.2.113](https://indike.org/pramana/in.purana.brahmanda.3.2.113) yojanāgreṇa saṃkhyātaḥ sādhanaṃ yojanasya tu / krośasya ca parīmāṇaṃ śrotumīcchāma tattvataḥ // ### [3.2.114](https://indike.org/pramana/in.purana.brahmanda.3.2.114) teṣāṃ tadvacanaṃ śrutvā mātariśvā vinītavat / uvāca madhuraṃ vākyaṃ yathādṛṣṭaṃ yathākramam // ### [3.2.115](https://indike.org/pramana/in.purana.brahmanda.3.2.115) vāyuruvāca etadvo 'haṃ pravakṣyāmi śruṇudhvaṃ me vivakṣitam / avyaktādvyaktabhāgo vai mahānsthūlo vibhāṣyate // ### [3.2.116](https://indike.org/pramana/in.purana.brahmanda.3.2.116) daśaiva mahato bhāgā bhūtādiḥ sthūla ucyate / daśabhāgādhikaṃ cāpi bhūtādiparimāṇakam // ### [3.2.117](https://indike.org/pramana/in.purana.brahmanda.3.2.117) paramāṇuḥ susūkṣmastu bhāvagrāhyo na cakṣuṣā / yadabhedyatamaṃ loke vijñeyaṃ paramāṇuvat // ### [3.2.118](https://indike.org/pramana/in.purana.brahmanda.3.2.118) jālāntaragate bhānaiṃ yatsūkṣmaṃ dṛśyate rajaḥ / prathamaṃ tatpramāṇānāṃ paramāṇuṃ pracakṣate // ### [3.2.119](https://indike.org/pramana/in.purana.brahmanda.3.2.119) aṣṭānāṃ paramāṇūnāṃ samāvāyo yadā bhavet / trasareṇuḥ samākhyātastatpadmaraja ucyate // ### [3.2.120](https://indike.org/pramana/in.purana.brahmanda.3.2.120) trasareṇavo 'tha ye 'pyaṣṭau rathareṇustu sasmṛtaḥ / te 'pyaṣṭau samavāyasthā bālāgraṃ tatsmṛtaṃ budhaiḥ // ### [3.2.121](https://indike.org/pramana/in.purana.brahmanda.3.2.121) bālāgrāṇyaṣṭalikṣā syādyūkālikṣāṣṭakaṃ bhavet / yūkāṣṭakaṃ yavaprāhuraṅgulaṃ tu yavāṣṭakam // ### [3.2.122](https://indike.org/pramana/in.purana.brahmanda.3.2.122) dvādaśāṅgulaparvāṇi vitastisthānamucyate / ratniścāguliparvāṇi vijñeyo hyekaviṃśatiḥ // ### [3.2.123](https://indike.org/pramana/in.purana.brahmanda.3.2.123) catvāro viṃśatiścaiva hastaḥ syādaṅgulāni tu / kiṣkurdviratnirvijñeyo dvicatvāriṃśadaṅgulaḥ // ### [3.2.124](https://indike.org/pramana/in.purana.brahmanda.3.2.124) ṣaṇṇavatyaṅgulaṃ caiva dhanurāhurmanīṣiṇaḥ / etadgavyūtisaṃkhyāyāmādānaṃ dhanuṣaḥ smṛtam // ### [3.2.125](https://indike.org/pramana/in.purana.brahmanda.3.2.125) dhanurdaṇḍayugaṃ nālī tulyānyastaistathāṅgulaiḥ / dhanuṣāṃ triśataṃ nalvamāhuḥ saṃkhyāvido janāḥ // ### [3.2.126](https://indike.org/pramana/in.purana.brahmanda.3.2.126) dhanuḥ sahasre dve cāpi gavyūtirupadiśyate / aṣṭau dhanuḥ sahasrāṇi yojanaṃ tu vidhīyate // ### [3.2.127](https://indike.org/pramana/in.purana.brahmanda.3.2.127) etena dhanuṣā caiva yojanaṃ tu samāpyate / etatsahasraṃ vijñeyaṃ śakrakośāntaraṃ tathā // ### [3.2.128](https://indike.org/pramana/in.purana.brahmanda.3.2.128) yojanānāṃ ca saṃkhyātaṃ saṃkhyājñānaviśāradaiḥ / etena yojanāgreṇa śṛṇudhvaṃ brahmaṇoṃ'tare // ### [3.2.129](https://indike.org/pramana/in.purana.brahmanda.3.2.129) mahītalātsahasrāṇāṃ rātādūrdhvaṃ divākaraḥ / divākarātsahasre tu śate caurddhvaṃ niśākaraḥ // ### [3.2.130](https://indike.org/pramana/in.purana.brahmanda.3.2.130) pūrṇaṃ śatasahasraṃ tu yojanānāṃ niśākarāt / nakṣatramaṇḍalaṃ kṛtsnamupariṣṭātprakāśata // ### [3.2.131](https://indike.org/pramana/in.purana.brahmanda.3.2.131) śataṃ sahasraṃ saṃkhyātametaddviguṇitaṃ punaḥ / grahāntaramathaikaikamūrddhvaṃ nakṣatramaṇḍarāt // ### [3.2.132](https://indike.org/pramana/in.purana.brahmanda.3.2.132) tārāgrahāṇāṃ sarveṣāmadhyastāccarate budhaḥ / tasyorddhvaṃ carate śukrastasmādūrddhvaṃ ca lohitaḥ // ### [3.2.133](https://indike.org/pramana/in.purana.brahmanda.3.2.133) tato bṛhaspatiścorddhvaṃ tasmādūrddhvaṃ śanaiścaraḥ / urddhvaṃ śatasahasraṃ tu yojanānāṃ śanaiścarāt // ### [3.2.134](https://indike.org/pramana/in.purana.brahmanda.3.2.134) saptarṣimaṇḍalaṃ kṛtsnamupariṣṭātprakāśate / ṛṣibhyastu sahasrāṇāṃ śatādūrddhvaṃ vibhāṣyate // ### [3.2.135](https://indike.org/pramana/in.purana.brahmanda.3.2.135) yo 'sau tārāmaye divye vimāne hrasvarūpake / uttānapādaputro 'sau meḍhībhūto dhruvo divi // ### [3.2.136](https://indike.org/pramana/in.purana.brahmanda.3.2.136) trailokyasyaiṣa utsedho vyākhyāto yojanairmayā / manvantareṣu devānāmijyā yatraiva laukikī // ### [3.2.137](https://indike.org/pramana/in.purana.brahmanda.3.2.137) varṇāśramebhya iṣṭā tu loke 'sminsaṃpravarttate / sarvāsāṃ devayonīnāṃ sthitihetuḥ sa vai smṛtaḥ // ### [3.2.138](https://indike.org/pramana/in.purana.brahmanda.3.2.138) trailokyametadvyākhyātamata ūrddhvaṃ nibodhata / dhruvādūrddhvaṃ maharloko yasmiṃste kalpavāsinaḥ // ### [3.2.139](https://indike.org/pramana/in.purana.brahmanda.3.2.139) ekāyojanakoṭīśā ityevaṃ niścayogataḥ / dvīkoṭyāṃ tu maharlokājjanaloko vyavasthitaḥ // ### [3.2.140](https://indike.org/pramana/in.purana.brahmanda.3.2.140) yatra te brahmaṇaḥ putrā dakṣādyāḥ sādhakāḥ smṛtāḥ // ### [3.2.141](https://indike.org/pramana/in.purana.brahmanda.3.2.141) vai rājā yatra te devā bhūtadāhavivarjitāḥ / ṣaḍguṇaṃ tu tapolokātsatyalokāntaraṃ smṛtam // ### [3.2.142](https://indike.org/pramana/in.purana.brahmanda.3.2.142) apunarmārako nāma brahmalokaḥ sa ucyate / yasminna cyavate bhūyo brahmaṇaṃ ya upāsate // ### [3.2.143](https://indike.org/pramana/in.purana.brahmanda.3.2.143) ekakoṭiryojanānāṃ pañcāśanniyutāni tu / ūrddhvabhāgastatoṃ'ḍasya brahmalokātparaḥ smṛtaḥ // ### [3.2.144](https://indike.org/pramana/in.purana.brahmanda.3.2.144) caturdaśaiva koṭyastu niyutāni ca pañca ṣaṭ / sa caurddhva saṃpracāro 'sya gatyantaścaparaḥ smṛtaḥ // ### [3.2.145](https://indike.org/pramana/in.purana.brahmanda.3.2.145) dhruvāgrametadvyākhyātaṃ yojanagrādyathāśrutam / adhogatīnāṃ vakṣyāmi bhūtānāṃ sthānakalpanām // ### [3.2.146](https://indike.org/pramana/in.purana.brahmanda.3.2.146) gacchanti ghorakarmāṇaḥ prāṇino yatra karmabhiḥ / narako rauravo ghoraḥ śūkarastāla evaṃ ca // ### [3.2.147](https://indike.org/pramana/in.purana.brahmanda.3.2.147) taptakumbho mahājvālaḥ śabalo 'tha vimohanaḥ / kṛmī ca kṛmibhakṣaśca lālābhakṣo viśaṃsanaḥ // ### [3.2.148](https://indike.org/pramana/in.purana.brahmanda.3.2.148) adhaḥśirāḥ pūyavaho rudhirāndhustathaivaca / viṣṭākīrṇaśca narako mūtrakīrṇa stathaiva ca // ### [3.2.149](https://indike.org/pramana/in.purana.brahmanda.3.2.149) tathā vaitaraṇī kṛṣṇamasipatravanaṃ tathā / agnijvālo mahāghoraḥ saṃdaṃśo 'thāśvabhojanaḥ // ### [3.2.150](https://indike.org/pramana/in.purana.brahmanda.3.2.150) tamaścakṛṣṇasūtraśca lohaścāpyabhijastathā / apratiṣṭho 'tha vīciśca narakā hyevamādayaḥ // ### [3.2.151](https://indike.org/pramana/in.purana.brahmanda.3.2.151) tāmasā narakāḥ sarve yamasya viṣaye sthitāḥ / yeṣu duṣkṛtakarmāṇaḥ patantīha vṛthakpṛthak // ### [3.2.152](https://indike.org/pramana/in.purana.brahmanda.3.2.152) bhūmeradhastātte sarve rauravādyaḥ prakīrttitāḥ / raurave kūṭasākṣe tumithyā yaścābhiśasati // ### [3.2.153](https://indike.org/pramana/in.purana.brahmanda.3.2.153) krūragraha pakṣavādī hyasaktaḥ patate naraḥ / rādho godhro bhrūṇahā ca hyagnidātā purasya ca // ### [3.2.154](https://indike.org/pramana/in.purana.brahmanda.3.2.154) śūkare brahmahā majjetsurāpaḥ svarṇataskaraḥ / tāle patetkṣatriyahā hatvā vaiśyaṃ ca majjati // ### [3.2.155](https://indike.org/pramana/in.purana.brahmanda.3.2.155) brahmahatyā ca yaḥ kuryādyaśca syādgurutalpagaḥ / saptakumbheṣvasau gāmī tathā rājabhaṭaśca yaḥ // ### [3.2.156](https://indike.org/pramana/in.purana.brahmanda.3.2.156) saṃtāpyate vāśvaṇiktathāca dhanarakṣitā / sādhvīvikrayakarttā ca yastu bhaktaṃ parityajet // ### [3.2.157](https://indike.org/pramana/in.purana.brahmanda.3.2.157) mahājvāle duhitaraṃ snuṣāṃ gacchati yastu vai / vedaṃ vikrīṇateye ca vedaṃ vai dūṣayanti ye // ### [3.2.158](https://indike.org/pramana/in.purana.brahmanda.3.2.158) guruṃścaivāvamanyante vākśaraistāḍayanti ca / agamyagāmī ca naro narakaṃ śabalaṃ vrajet // ### [3.2.159](https://indike.org/pramana/in.purana.brahmanda.3.2.159) vimohe patate ghore maryādāṃ yobhinatti vai / duriṣṭaṃ kurute yastu kīḍalohaṃ prapadyate // ### [3.2.160](https://indike.org/pramana/in.purana.brahmanda.3.2.160) devabrāhmaṇavidveṣṭā gurūṇāṃ vāpyapūjakaḥ / ratnaṃ dūṣayate yastu kṛmibhakṣe prapadyate // ### [3.2.161](https://indike.org/pramana/in.purana.brahmanda.3.2.161) paryaśnāti ya eko 'nnaṃ brāhmaṇānsuhṛdo vinā / lālābhakṣe sa tiṣṭhettu durgandhe narake gataḥ // ### [3.2.162](https://indike.org/pramana/in.purana.brahmanda.3.2.162) kāṇḍakarttā kulālaśca niṣkahartā cikitsakaḥ / ārāme 'pyagnidātā yaḥ patate sa viśaṃsani // ### [3.2.163](https://indike.org/pramana/in.purana.brahmanda.3.2.163) asatpratigrahī yaśca tathaivāyājyayājakaḥ / nakṣatrairjīvate yaśca naro gacchatyadhomukham // ### [3.2.164](https://indike.org/pramana/in.purana.brahmanda.3.2.164) kṣīraṃ surāṃ ca lavaṇaṃ lākṣāṃ gandhaṃ rasaṃ tilān evamādīni vikrīṇanghore pūyavahe patet // ### [3.2.165](https://indike.org/pramana/in.purana.brahmanda.3.2.165) yaḥ kukkuṭānnibadnāti mārjārānsūkarāṃstathā / pakṣiṇaśca mṛgāñchāgānso 'pyenaṃ narakaṃ vrajet // ### [3.2.166](https://indike.org/pramana/in.purana.brahmanda.3.2.166) ajāviko māhiṣikastathā cakradhvajī ca yaḥ / raṅgopajīvako vipraḥ śākanirgrāmayājakaḥ // ### [3.2.167](https://indike.org/pramana/in.purana.brahmanda.3.2.167) agāradāhī garadaḥ kuṇḍāśī somavikrayī / surāpo māsabhakṣaśca tathā ca paśughātakaḥ // ### [3.2.168](https://indike.org/pramana/in.purana.brahmanda.3.2.168) viśastā mahiṣādīnāṃ mṛgahantā tathaiva ca / parvakāraśca mūcī ca yaśca syānmitraghātakaḥ // ### [3.2.169](https://indike.org/pramana/in.purana.brahmanda.3.2.169) rudhirāndhau patantyete hyevamāhurmanīṣiṇaḥ / upaviṣṭaṃ bhoktumatha paṅktyāṃ vai vañcayanti ye // ### [3.2.170](https://indike.org/pramana/in.purana.brahmanda.3.2.170) patanti narake ghore viḍbhuje nātra saṃśayaḥ / mṛṣāvādī naro yaśca tathā prākrośako 'śubhaḥ // ### [3.2.171](https://indike.org/pramana/in.purana.brahmanda.3.2.171) patate narake ghore mūtrākīrṇe sa pāpakṛta / madhugrāhābhihantāro yānti vaitagṇīṃ narāḥ // ### [3.2.172](https://indike.org/pramana/in.purana.brahmanda.3.2.172) unmattāścittabhagnāścaśaucācāravivarjitāḥ / krodhanā duḥkhadā ye ca kuhakāḥ kṛṣṇagāminaḥ // ### [3.2.173](https://indike.org/pramana/in.purana.brahmanda.3.2.173) asipatra vanacchadakṛto hyorabhrikāśca ye / karttanaṣu vikṛtyanta mṛgavyādhaḥ sudāruṇaiḥ // ### [3.2.174](https://indike.org/pramana/in.purana.brahmanda.3.2.174) āśrama pratyavasitā hyagnijvāle patanti vai / bhakṣyante śyāmaśabalairayastuḍaśva vāyasaiḥ // ### [3.2.175](https://indike.org/pramana/in.purana.brahmanda.3.2.175) iṣṭāpūrtavratālopātsaṃdaṃśe narake patet / skandante ye divāsvapne vratino brahmacāriṇaḥ // ### [3.2.176](https://indike.org/pramana/in.purana.brahmanda.3.2.176) putrairadhyāpitā ye ca putrairākṣāpitāśca ye / te sarva narakaṃ yānti niyataṃ tu śvabhojanam // ### [3.2.177](https://indike.org/pramana/in.purana.brahmanda.3.2.177) varṇāśramaviruddhā ye krodhaharṣasamanvitāḥ / karmāṇi ye tu kurvanti sarve nirayavāsinaḥ // ### [3.2.178](https://indike.org/pramana/in.purana.brahmanda.3.2.178) upariṣṭātsthito ghora uṣṇātmā rauravo mahān / sudāruṇastu śītātmā tasyādhastāttapaḥ smṛtaḥ // ### [3.2.179](https://indike.org/pramana/in.purana.brahmanda.3.2.179) evamādikrameṇaiva varṇyamānānnibodhata / bhūmeradhastātsaptaiva narakāḥ parikīrttitāḥ // ### [3.2.180](https://indike.org/pramana/in.purana.brahmanda.3.2.180) adharmasūtayaste syurandhatāmisrakādayaḥ / rauravaḥ prathamasteṣāṃ mahāraurava eva ca // ### [3.2.181](https://indike.org/pramana/in.purana.brahmanda.3.2.181) asyādhaḥ punarapyanyaḥ śītastapa iti smṛtaḥ / tṛtīyaḥ kālasūtraḥ syānmahāhirvividhaḥ smṛtaḥ // ### [3.2.182](https://indike.org/pramana/in.purana.brahmanda.3.2.182) apratiṣṭhaścaturthaḥ syāda vīciḥ pañcamaḥ smṛtaḥ / lohaḥ ṣaṣṭhaḥ smṛtasteṣāmavidheyastu saptamaḥ // ### [3.2.183](https://indike.org/pramana/in.purana.brahmanda.3.2.183) ghorātvādrauravaḥ proktaḥ soṣṇako dahanaḥ smṛtaḥ / sudāruṇastu śītātmā tsyādhastāttapo 'dhamaḥ // ### [3.2.184](https://indike.org/pramana/in.purana.brahmanda.3.2.184) savāṃ nikṛntanaḥ prokto kālasūtro 'tidāruṇaḥ / apratiṣṭhe sthitirnāsti bhramastasminsadā smṛtaḥ // ### [3.2.185](https://indike.org/pramana/in.purana.brahmanda.3.2.185) avīcirdāruṇaḥ prokto yantrasaṃpīḍanācca saḥ / tasmātsudāruṇo lohaḥ karmaṇāṃ śrayaṇācca saḥ // ### [3.2.186](https://indike.org/pramana/in.purana.brahmanda.3.2.186) tathābhūtaśarītvādavidheyastu sa smṛtaḥ / pīḍābandhavadhāsaṃgādapratīkāralakṣaṇaḥ // ### [3.2.187](https://indike.org/pramana/in.purana.brahmanda.3.2.187) ūrddhvādhaḥ saṃgatāste tu nirālokāśca te smṛtāḥ / duḥkhotkarṣastu sarveṣu hyadharmasya nimittataḥ // ūrddhvalokaiḥ samāvetau nirālokau ca tāvubhau / kūṭāgārapra māṇaiśca śarīraistatra nārakāḥ // ### [3.2.188](https://indike.org/pramana/in.purana.brahmanda.3.2.188) upabhogasamarthaistu sadyo jāyanti karmabhiḥ / duḥkhaprakarṣaścograstu teṣu sarveṣu vai smṛtaḥ // ### [3.2.189](https://indike.org/pramana/in.purana.brahmanda.3.2.189) upabhogasamarthaistu sadyo jāyanti karmabhiḥ / duḥkhaprakarṣaścograstu teṣu sarveṣu vai smṛtaḥ // ### [3.2.190](https://indike.org/pramana/in.purana.brahmanda.3.2.190) yātanāścāpyasaṃkhyeyā nārakāṇāṃ tathā smṛtāḥ / tatrānubhūyate duḥkhaṃ kṣīṇe karmaṇi vai punaḥ // ### [3.2.191](https://indike.org/pramana/in.purana.brahmanda.3.2.191) tiryagyonau prasūyante karmaśeṣeṇa teṃ'tataḥ / devāṃśca tārakāścaiva hyūrddhvaṃ cādhaśca saṃsthitāḥ // ### [3.2.192](https://indike.org/pramana/in.purana.brahmanda.3.2.192) dharmādharmanimittena sadyo jāyanti mūrttayaḥ / upabhogārthamutpattiraupapattikakarmataḥ // ### [3.2.193](https://indike.org/pramana/in.purana.brahmanda.3.2.193) paśyanti nārakāndevā hyadhovaktrā hyaghogatān / nārakāṃśca tathā devānsarvānpaśyaṃ tyadhemukhān // ### [3.2.194](https://indike.org/pramana/in.purana.brahmanda.3.2.194) anayostulyatā yasmāddhāramāśca svabhāvataḥ / tasmādūrddhvamadhobhāvo lokāloke na vidyate // ### [3.2.195](https://indike.org/pramana/in.purana.brahmanda.3.2.195) eṣā svābhāvikī saṃjñā lokāloke pravarttate / athābruvanpunarvāyuṃbrāhmaṇāḥ satriṇastadā // ### [3.2.196](https://indike.org/pramana/in.purana.brahmanda.3.2.196) ṛṣaya ūcuḥ sarveṣāmeva bhūtānāṃ lokālokanivāsinām / saṃsāre saṃsarantīha yāvantaḥ prāṇinaśca te // ### [3.2.197](https://indike.org/pramana/in.purana.brahmanda.3.2.197) saṃkhyāyā parisaṃkhyāya tānnaḥ prabrūhi kṛtsnaśaḥ / ṛṣīṇāṃ tadvacaḥ śrutvā maruto vākyamabravīt // ### [3.2.198](https://indike.org/pramana/in.purana.brahmanda.3.2.198) vāyuruvāca na śakyaṃ divyayā dṛṣṭyā jñātuṃ jñānena vā punaḥ / cakṣuṣā vai prasaṃkhyātumato hyante na ca dvijāḥ // ### [3.2.199](https://indike.org/pramana/in.purana.brahmanda.3.2.199) anādhyānādameyatvānnaiva praśno vidhīyate / brahmaṇā saṃjñitaṃ yattu saṃkhyayā tannibodhata // ### [3.2.200](https://indike.org/pramana/in.purana.brahmanda.3.2.200) yaḥ sahasratamo bhāgaḥ sthāvarāṇāṃ bhavediha / pārthivāḥ kṛmayastāvatsaṃsekādyeṣu saṃbhavaḥ // _First 200 of 318 passages. [Read on](https://indike.org/pramana/in.purana.brahmanda.3.2)_ ## Linked texts (3) - [Vāyupurāṇa](https://indike.org/pramana/in.purana.vayu.2.39.3) — Vyāsa, Sanskrit - [Garuḍapurāṇa](https://indike.org/pramana/in.purana.garuda.2.3.50) — Vyāsa, Sanskrit - [Bakhshālī Manuscript](https://indike.org/pramana/in.astro.ganita.patibija.bakhshali.p126) — Sanskrit --- Source: [https://indike.org/pramana/in.purana.brahmanda.3.2](https://indike.org/pramana/in.purana.brahmanda.3.2) · Pramāṇa