[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 3.35 # Brahmandapurana 3.35 Brahmāṇḍapurāṇa 3.35 - **Language:** Sanskrit ## Contents - [3.35.105](https://indike.org/pramana/in.purana.brahmanda.3.35.105) — 1 part ### [3.35.1](https://indike.org/pramana/in.purana.brahmanda.3.35.1) hayagrīva uvāca atha vāpītra yādīnāṃ kakṣyābhedānpracakṣmahe / eṣāṃ śravaṇamātreṇa jāyate śrīmahodayaḥ // ### [3.35.2](https://indike.org/pramana/in.purana.brahmanda.3.35.2) sahasrastambhaśālasyātaramārutayojane / mano nāma mahāśālaḥ sarvaratnavicitritaḥ // ### [3.35.3](https://indike.org/pramana/in.purana.brahmanda.3.35.3) pūrvavadgopuradvārakapāṭārgalasaṃyutaḥ / tanmadhyakakṣyābhāgastu sarvāpyamṛtavāpikā // ### [3.35.4](https://indike.org/pramana/in.purana.brahmanda.3.35.4) yatpītvā yoginaḥ siddhā vajrakāyā mahābalāḥ / bhavanti puruṣāḥ prājñāstadeva hi rasāyanam // ### [3.35.5](https://indike.org/pramana/in.purana.brahmanda.3.35.5) vāpyāmamṛtamayyāṃ tu vartate toyatāṃ gatam / tadgandhāghrāṇamātreṇa siddhikāntāpatirbhavet // ### [3.35.6](https://indike.org/pramana/in.purana.brahmanda.3.35.6) aspṛśannapi vindhayāre puruṣaḥ kṣīṇakalmaṣaḥ / ubhayoḥ śālayoḥ pārśve sudhāvāpītaṭadvaye // ### [3.35.7](https://indike.org/pramana/in.purana.brahmanda.3.35.7) adhakrośasamāyāmā anyāssarvāśca vāpikāḥ / caturyojanadūraṃ tu talaṃ tasyā jalāntare // ### [3.35.8](https://indike.org/pramana/in.purana.brahmanda.3.35.8) sopānāvalayastasyā nānāratnavicitritāḥ / svarṇavarṇā ratnavarṇāstasyāṃ haṃsāśca sārasāḥ // ### [3.35.9](https://indike.org/pramana/in.purana.brahmanda.3.35.9) āsphoṭyate taṭadvandvataraṅgairmandacañcalaiḥ / pakṣiṇastajjalaṃ pītvā rasāyanamayaṃ navam // ### [3.35.10](https://indike.org/pramana/in.purana.brahmanda.3.35.10) ajarāmaratāṃ prāptāstatra vindhyaniṣūdana / sadākūjitalakṣeṇa tatra kāraṇḍavadvijāḥ // ### [3.35.11](https://indike.org/pramana/in.purana.brahmanda.3.35.11) japanti lalitādevyā mantrameva mahattaram / parito vāpikācakrapariveṣaṇabhūyasā // ### [3.35.12](https://indike.org/pramana/in.purana.brahmanda.3.35.12) na tatra gantu mārgo 'sti naukāvāhanamantarā / ājñayā kevalaṃ tatra mantriṇī daṇḍanāthayoḥ / tārā nāma mahāśaktirvartate toraṇeśvarī // ### [3.35.13](https://indike.org/pramana/in.purana.brahmanda.3.35.13) bahvyastatrotpalaśyāmāstārāyāḥ paricārikāḥ / ratnanaukāsahasreṇa khelantyo sarasījale // ### [3.35.14](https://indike.org/pramana/in.purana.brahmanda.3.35.14) aparaṃ pāramāyānti punaryānti paraṃ taṭam / vīṇāveṇumṛdaṅgādi vādayantyo muhurmuhuḥ // ### [3.35.15](https://indike.org/pramana/in.purana.brahmanda.3.35.15) koṭiśastatra tārāyā nāvikyo navayauvanāḥ / muhurgāyanti nṛtyanti devyāḥ puṇyatamaṃ yaśaḥ // ### [3.35.16](https://indike.org/pramana/in.purana.brahmanda.3.35.16) aritrapāṇayaḥ kāścitkāścicchūgāmbupāṇayaḥ / pibantyastatsudhātoyaṃ saṃcarantyastarīśataiḥ // ### [3.35.17](https://indike.org/pramana/in.purana.brahmanda.3.35.17) tāsāṃ naukāvāhikānāṃ śaktīnāṃ śyāmalatviṣām / pradhānabhūtā tārāṃbā jalaughaśamanakṣamā // ### [3.35.18](https://indike.org/pramana/in.purana.brahmanda.3.35.18) ājñāṃ vinā tayostārā mantriṇīdaṇḍadhārayoḥ / trinetrasyāpi no datte vāpikāṃbhasi santaram // ### [3.35.19](https://indike.org/pramana/in.purana.brahmanda.3.35.19) gāyantīnāṃ calantīnāṃ naukābhirmaṇicārubhiḥ / mahārājñī mahaudāryaṃ patantīnāṃ padepade // ### [3.35.20](https://indike.org/pramana/in.purana.brahmanda.3.35.20) pibantīnāṃ madhu bhṛśaṃ māṇikyacaṣakodaraiḥ / pratinaukaṃ maṇigṛhe vasantīnāṃ manohare // ### [3.35.21](https://indike.org/pramana/in.purana.brahmanda.3.35.21) tārātaraṇiśaktīnāṃ samavāyo 'tisundaraḥ / kāścinnaukāḥ suvarṇāḍhyāḥ kāścidratnakṛtā mune // ### [3.35.22](https://indike.org/pramana/in.purana.brahmanda.3.35.22) makarākāramāpannāḥ kāścinnaukā mṛgānanāḥ / kāścitsiṃhāsanā nāvaḥ kāściddantāvalānanāḥ // ### [3.35.23](https://indike.org/pramana/in.purana.brahmanda.3.35.23) itthaṃ vicitrarūpābhirnauṅkābhiḥ pariveṣṭitā / tārāṃbāmahatīṃ naukāmadhigamya virājate // ### [3.35.24](https://indike.org/pramana/in.purana.brahmanda.3.35.24) anulomavilomābhyāṃ sañcāraṃ vāpikājale / tanvānā satataṃ tārā kakṣyāmenāṃ hi rakṣati // ### [3.35.25](https://indike.org/pramana/in.purana.brahmanda.3.35.25) manaśālasyāntarāle saptayojanadūrataḥ / buddhiśāla iti khyātaścaturyojanamucchritaḥ // ### [3.35.26](https://indike.org/pramana/in.purana.brahmanda.3.35.26) tanmadhyakakṣyābhāge 'sti sarvāpyānandavāpikā / tatra divyaṃ mahāmadyaṃ bakulāmodameduram / prataptakanakacchāyaṃ tajjalatvena varttate // ### [3.35.27](https://indike.org/pramana/in.purana.brahmanda.3.35.27) ānandavāpikāgādhāḥ pūrvavatparikīrttitāḥ / sopānādikramaścaiva pakṣiṇāstatra pūrvavat // ### [3.35.28](https://indike.org/pramana/in.purana.brahmanda.3.35.28) tatratyaṃ salilaṃ madyaṃ pāyampāyaṃ taṭasthitāḥ / viharanti madonmattāḥ śaktayo madapāṭalāḥ // ### [3.35.29](https://indike.org/pramana/in.purana.brahmanda.3.35.29) sākṣācca vāruṇī devī tatra naukādhināyikā / yāṃ sudhāmālinīmāhuryāmā huramṛteśvarīm // ### [3.35.30](https://indike.org/pramana/in.purana.brahmanda.3.35.30) sā tatra maṇinaukāsthaśaktisenāsamāvṛtā / īṣadālokamātreṇa trailokyamadadāyinī // ### [3.35.31](https://indike.org/pramana/in.purana.brahmanda.3.35.31) taruṇāditya saṅkāśa madāraktakapolabhūḥ / pārijātaprasūnasrakparivītakacācitā // ### [3.35.32](https://indike.org/pramana/in.purana.brahmanda.3.35.32) vahantī madirāpūrṇaṃ caṣakaṃ loladutpalam / pakvaṃ piśitakhaṇḍaṃ ca maṇipātre tathānyake // ### [3.35.33](https://indike.org/pramana/in.purana.brahmanda.3.35.33) vāruṇītaraṇiśreṇīnāyikā tatra rājate / sāpyājñayaiva sarveṣāṃ mantriṇīdaṇḍanāthayoḥ / dadāti vāpītaraṇaṃ trinetrasyāpi nānyathā // ### [3.35.34](https://indike.org/pramana/in.purana.brahmanda.3.35.34) atha buddhimahāśālāntare mārutayojane / ahaṅkāramahāśālaḥ pūrvavadgopurānvitaḥ // ### [3.35.35](https://indike.org/pramana/in.purana.brahmanda.3.35.35) tayostu śālayormadhye kakṣyābhūrakhilā mune / vimarśavāpikā nāma sauṣumṇāmṛtarūpiṇī // ### [3.35.36](https://indike.org/pramana/in.purana.brahmanda.3.35.36) tanmahāyogināmantarmano mārutapūritam / suṣumṇadaṇḍavivare jāgarti paramāmṛtam // ### [3.35.37](https://indike.org/pramana/in.purana.brahmanda.3.35.37) tadeva tasyāḥ salilaṃ vāpikāyāstapodhana / pūrvavattaṭasopānapakṣinaukā hi tāḥ smṛtāḥ // ### [3.35.38](https://indike.org/pramana/in.purana.brahmanda.3.35.38) tatra naukeśvarī devī klarukulletiviśrutā / tamālaśyāmalākārā śyāmakañcukadhāriṇī // ### [3.35.39](https://indike.org/pramana/in.purana.brahmanda.3.35.39) naukeśvarībhiranyābhissvasamānābhirāvṛtā / ratnāritrakarā nityamullasanmadamāṃsalā // ### [3.35.40](https://indike.org/pramana/in.purana.brahmanda.3.35.40) parito bhrāmyati mune maṇinaukādhirohiṇī / vāpikā payasāgādhā pūrvavatparikīrtitā // ### [3.35.41](https://indike.org/pramana/in.purana.brahmanda.3.35.41) ahaṅkārasya śālasyāntare mārutayojane / sūryabiṃbamahāśālaścaturyojana mucchritaḥ // ### [3.35.42](https://indike.org/pramana/in.purana.brahmanda.3.35.42) sūryasyāpi mahānāsīdyadabhūdaruṇodayaḥ / tanmadhyakakṣyā vasudhā khacitā kuravindakaiḥ // ### [3.35.43](https://indike.org/pramana/in.purana.brahmanda.3.35.43) tatra bālātapodgāre lalitā parameśvarī / atitīvratapastaptvā sūryo 'labhata tāṃ dyutim // ### [3.35.44](https://indike.org/pramana/in.purana.brahmanda.3.35.44) graharāśigaṇāḥ sarve nakṣatrāṇyapi tārakāḥ / te 'treva hi tapastaptvā lokabhāsakatāṃ gatāḥ // ### [3.35.46](https://indike.org/pramana/in.purana.brahmanda.3.35.46) mārtaṇḍabhairavastatra bhinno dvādaśadhā mune / śaktibhistaijasībhiśca koṭisaṃkhyābhiranvitaḥ 35.45 / mahāprakāśarūpaśca madāruṇavilocanaḥ / kaṅkolitarukhaṇḍeṣu nityaṃ krīḍārasotsukaḥ / vartate vindhyadarpāre pāre yastanmayasthitaḥ // ### [3.35.47](https://indike.org/pramana/in.purana.brahmanda.3.35.47) mahāprakāśanāmrāsti tasya śaktirmahīyasī / cakṣuṣmatyaparāśaktiśchāyā devī parā smṛtā // ### [3.35.48](https://indike.org/pramana/in.purana.brahmanda.3.35.48) itthaṃ tisṛbhi riṣṭābhiḥ śaktibhiḥ parivāritaḥ / lalitāyā maheśānyāḥ sadā vidyā hṛdā japan // ### [3.35.49](https://indike.org/pramana/in.purana.brahmanda.3.35.49) tadbhaktānāmindriyāṇi bhāsvarāṇi prakāśayan / bahirantastamojālaṃ samūlamavamardayan // ### [3.35.50](https://indike.org/pramana/in.purana.brahmanda.3.35.50) tatra bālātapodgāre bhāti mārtaṇḍabhairavaḥ / sūryabimbamahāśālāntare mārutayojane // ### [3.35.51](https://indike.org/pramana/in.purana.brahmanda.3.35.51) candrabimbamayaḥ śālaścaturyojanamucchritaḥ / pūrvavadgopuradvārakapāṭārgalasaṃyutaḥ // ### [3.35.52](https://indike.org/pramana/in.purana.brahmanda.3.35.52) tanmadhyabhūḥ samastāpi candrikādvāramucyate // ### [3.35.53](https://indike.org/pramana/in.purana.brahmanda.3.35.53) tatraiva candrikādvāre tapastaptvā sudāruṇam / atrinetrasamutpannaścandramāḥ kāntimāyayau // ### [3.35.54](https://indike.org/pramana/in.purana.brahmanda.3.35.54) atra śrīsomanāthākhyo vartate nirmalākṛtiḥ / devastralokyatimiradhvaṃsī saṃsāravartakaḥ // ### [3.35.55](https://indike.org/pramana/in.purana.brahmanda.3.35.55) pibañca ṣakasampūrṇaṃ nirmalaṃ candrikāmṛtam / saptaviṃśatinakṣatraśaktibhiḥ parivāritaḥ // ### [3.35.56](https://indike.org/pramana/in.purana.brahmanda.3.35.56) sadā pūrṇanijākāro niṣkalaṅko nijākṛtiḥ / tatraiva candrikādvāre vartate bhagavāñchaśī // ### [3.35.57](https://indike.org/pramana/in.purana.brahmanda.3.35.57) lalitāyā japaidhyānaiḥ stotraiḥ pūjāśatairapi / aśvinyādiyutastatra kālaṃ nayati candramāḥ // ### [3.35.58](https://indike.org/pramana/in.purana.brahmanda.3.35.58) anyāśca śaktayastārānāmadheyāḥ sahasraśaḥ / santi tasyaiva nikaṭe sā kakṣā tatpra pūritā // ### [3.35.59](https://indike.org/pramana/in.purana.brahmanda.3.35.59) atha candrasya śālasyāntare mārutayojane / śṛṅgāro nāma śālo 'sti caturyojanamucchritaḥ // ### [3.35.60](https://indike.org/pramana/in.purana.brahmanda.3.35.60) śṛṅgārāgārarūpaistu kaustubhairiva nirmitaḥ / mahāśṛṅgāraparikhā tanmadhye vasudhākhilā // ### [3.35.61](https://indike.org/pramana/in.purana.brahmanda.3.35.61) parikhāvalaye tatra śṛṅgārarasapūrite / śṛṅgāraśaktayaḥ santi nānābhūṣaṇabhāsurāḥ // ### [3.35.62](https://indike.org/pramana/in.purana.brahmanda.3.35.62) tatra naukāsahasreṇa saṃcarantyo madoddhatāḥ / upāsate sadā sattaṃ naukāsthaṃ kusumāyudham // ### [3.35.63](https://indike.org/pramana/in.purana.brahmanda.3.35.63) sa tu saṃmohayatyeva viśvaṃ sammohanādibhiḥ / viśikhairakhilāṃllokāṃllalitājñāvaśaṃvadaḥ // ### [3.35.64](https://indike.org/pramana/in.purana.brahmanda.3.35.64) tatprabhāveṇa saṃmūḍhā mahāpadmāṭavīsthalam / vanituṃ śuddhaveṣāśca lalitābhaktinirbharāḥ / sāvadhānena manasā yānti padmāṭadīsthalam // ### [3.35.65](https://indike.org/pramana/in.purana.brahmanda.3.35.65) na gantuṃ pārayatyeva surasiddhanarāḥ surāḥ / brahmaviṣṇumaheśāstu śuddhacittāḥ svabhāvataḥ / tadājñayā paraṃ yānti mahāpadmāṭavīsthalam // ### [3.35.66](https://indike.org/pramana/in.purana.brahmanda.3.35.66) saṃsāriṇaśca rāgāndhābahusaṃkalpakalpanāḥ / mahākulāśca puruṣā vikalpajñānadhūsarāḥ // ### [3.35.67](https://indike.org/pramana/in.purana.brahmanda.3.35.67) prabhūtarāgagahanāḥ prauḍhavyāmohadāyinīm / mahāśṛṅgāraparikhāntarituṃ na vicakṣaṇāḥ // ### [3.35.68](https://indike.org/pramana/in.purana.brahmanda.3.35.68) yasmādajeyasaindaryastrailokyajanamohanaḥ / mahāśṛṅgāraparikhādhikārī vartate smaraḥ // ### [3.35.69](https://indike.org/pramana/in.purana.brahmanda.3.35.69) tasya sarvamatikramya mahatāmapi mohanam / mahāpadmāṭavīṃ gantuṃ na ko 'pi bhavati kṣamaḥ // ### [3.35.70](https://indike.org/pramana/in.purana.brahmanda.3.35.70) atha śṛṅgāraśālasyāntarāle saptayojane / cintāmaṇigṛhaṃ nāma cakrarājamahālayaḥ // ### [3.35.71](https://indike.org/pramana/in.purana.brahmanda.3.35.71) tanmadhyabhūḥ samastāpi parito ratnabhūṣitā / mahāpadmāṭavī nāma sarvasaubhāgyadāyinī // ### [3.35.72](https://indike.org/pramana/in.purana.brahmanda.3.35.72) śṛṅgārākhyāmahākālaparyantaṃ gopuraṃ mune / caturdikṣvapyevameva gopurāṇāṃ vyavasthitiḥ // ### [3.35.73](https://indike.org/pramana/in.purana.brahmanda.3.35.73) sarvadikṣu taduktāni gopurāṇiśata mune / śālāstu viṃśatiḥ proktāḥ pañcasaṃkhyādhikāḥ śubhāḥ // ### [3.35.74](https://indike.org/pramana/in.purana.brahmanda.3.35.74) sarveṣāmapi śālānāṃ mūlaṃ yojanasaṃmitam / padmāṭavīsthalaṃ vakṣye sāvadhāno mune śṛṇu // ### [3.35.75](https://indike.org/pramana/in.purana.brahmanda.3.35.75) samastaratnakhacite tatra ṣaḍyojanāntare / paritasthalapadmāni mahākāṇḍāni saṃti vai // ### [3.35.76](https://indike.org/pramana/in.purana.brahmanda.3.35.76) kāṇḍāstu yojanāyāmā mṛdubhiḥ kaṇṭakairvṛtāḥ / patrāṇi tāladaśakamātrāyāmāni saṃti vai // ### [3.35.77](https://indike.org/pramana/in.purana.brahmanda.3.35.77) kesarāśca sarojānāṃ pañcatālasamāyatāḥ / daśatālasamunnamraḥ karṇikāḥ parikīrtitāḥ // ### [3.35.78](https://indike.org/pramana/in.purana.brahmanda.3.35.78) atyantakomalānyatra sadā vikasitāni ca / navasaurabhahṛdyāni viśaṅkaṭadalāni ca / bahuśaḥ saṃti padmāni koḍīnāmapi koḍiśaḥ // ### [3.35.79](https://indike.org/pramana/in.purana.brahmanda.3.35.79) mahāpadmāḍavīkakṣyāpūrvabhāge ghaṭodbhava / krośonnato vahnirūpo vartulākārasaṃsthitaḥ // ### [3.35.80](https://indike.org/pramana/in.purana.brahmanda.3.35.80) arddhayojanavistāraḥ kalābhirdaśabhiryutaḥ / arghyapātramahādhāro vartate kumbhasambhava // ### [3.35.81](https://indike.org/pramana/in.purana.brahmanda.3.35.81) tadādhārasya paritaḥ śaktayodīptavigrahāḥ / dhūmrārciḥpramukhā bhānti kalā daśa vibhāvasoḥ // ### [3.35.82](https://indike.org/pramana/in.purana.brahmanda.3.35.82) dīptatāruṇyalakṣmīkā nānālaṅkārabhūṣitāḥ / ādhārarūpaṃ śrīmantaṃ bhagavantaṃ havirbhujam / pariṣvajyaiva parito vartante manmathālasāḥ // ### [3.35.83](https://indike.org/pramana/in.purana.brahmanda.3.35.83) dhūmrārciruṣṇā jvalinī jvālinī visphuliṅginī / suśrīḥsurūpā kapilā havyakavyavahetica / etā daśakalāḥ proktā vahnerādhārarūpiṇaḥ // ### [3.35.84](https://indike.org/pramana/in.purana.brahmanda.3.35.84) tatrādhāre sthito devaḥ pātrarūpaṃ samāśritaḥ / sūryastrilokītimirapradhvaṃsaprathitodayaḥ // ### [3.35.85](https://indike.org/pramana/in.purana.brahmanda.3.35.85) sūryātmakaṃ tu tatpātraṃ sārddhayojanamunnatam / yojanāyāmavistāraṃ mahājyotiḥ prakāśitam // ### [3.35.86](https://indike.org/pramana/in.purana.brahmanda.3.35.86) tatpātrātparitaḥ saktavapuṣaḥ putrikā iva / vartante dvādaśa kalā atibhāsvararociṣaḥ // ### [3.35.87](https://indike.org/pramana/in.purana.brahmanda.3.35.87) tapinī tāpinī dhūmrā marīcirjvalinī ruciḥ / suṣumṇā bhogadā viśvā bodhinī dhāriṇī kṣamā // ### [3.35.88](https://indike.org/pramana/in.purana.brahmanda.3.35.88) tasminpātre parānandakāraṇaṃ paramāmṛtam / sarvauṃṣadhi rasāḍhyaṃ ca hṛdyasaurabhasaṃyutam // ### [3.35.89](https://indike.org/pramana/in.purana.brahmanda.3.35.89) nīlotpalaiśca kahlārairamlānairatisaurabhaiḥ / vāsyamānaṃ sadā hṛdyaṃ śītalaṃ laghu nirmalam // ### [3.35.90](https://indike.org/pramana/in.purana.brahmanda.3.35.90) caladvīciśatodāraṃ lalitābyarcanocitam / sadā śabdāyamānaṃ ca bhāsater'canakāraṇam // ### [3.35.91](https://indike.org/pramana/in.purana.brahmanda.3.35.91) tadarghyamamṛtaṃ proktaṃ niśākarakalāmayam / tasmiṃstanīyasīrnauṅkā maṇikḷptāḥ samāsthitāḥ / niśākarakalā hṛdyāḥ krīḍanti navayauvanāḥ // ### [3.35.92](https://indike.org/pramana/in.purana.brahmanda.3.35.92) amṛtā mānadā pūṣṇā tuṣṭiḥ puṣṭī ratirdhṛtiḥ / śaśinī candrikā kāntirjyotsnā śrīḥ prītiraṅgadā // ### [3.35.93](https://indike.org/pramana/in.purana.brahmanda.3.35.93) pūrṇā pūrṇāmṛtā ceti kalāḥ pīyūṣa rociṣaḥ / navayauvanasaṃpūrṇāḥ sadā prahasitānanāḥ // ### [3.35.94](https://indike.org/pramana/in.purana.brahmanda.3.35.94) puṣṭirṛddhiḥ sthitirmedhā kāntirlakṣmīrdyutirdhṛtiḥ / jarā siddhiriti proktāḥ krīḍanti brahmaṇaḥ kalāḥ // ### [3.35.95](https://indike.org/pramana/in.purana.brahmanda.3.35.95) sthitiśca pālinī śāntiśceśvarī tatikāmike / varadāhlādinī prītirdīrghā ceti hareḥ kalāḥ // ### [3.35.96](https://indike.org/pramana/in.purana.brahmanda.3.35.96) tīkṣṇā raudrī bhayā nidrā tandrā kṣutkrodhinī trapā / utkārī mṛtyurapyetā roddhryastatra sthitāḥ kālāḥ // ### [3.35.97](https://indike.org/pramana/in.purana.brahmanda.3.35.97) īśvarasya kalāḥ pītāḥ śvetāścaivāruṇāḥ sitāḥ / catasreva proktāstu śaṅkarasya kalā atha // ### [3.35.98](https://indike.org/pramana/in.purana.brahmanda.3.35.98) nivṛttiśca pratiṣṭhā ca tridyā śāntistathaiva ca / indirā dīpikā caiva recikā caiva mocikā // ### [3.35.99](https://indike.org/pramana/in.purana.brahmanda.3.35.99) parā sūkṣmā ca vindhyāre tathā sūkṣmāmṛtā kalā / jñānāmṛtā vyādhinī ca vyāpinī vyomarūpikā / etāṃ ṣoḍaśa saṃproktāstatra krīḍanti śaktayaḥ // ### [3.35.100](https://indike.org/pramana/in.purana.brahmanda.3.35.100) rudranaukāsamārūḍhāstataścetaśca cañcalāḥ / śaktirupeṇa khelanti tatra vidyāḥ sahasraśaḥ // ### [3.35.101](https://indike.org/pramana/in.purana.brahmanda.3.35.101) arghyasaṃśodhanārthāya kalpitāḥ parameṣṭhinā / tadarghyamamṛtaṃ pītvā sadā mādyanti śaktayaḥ // ### [3.35.102](https://indike.org/pramana/in.purana.brahmanda.3.35.102) mahāpadmāṭavīvāsā mahācakrasthitā api / muhurmuhurnavanavaṃ muhuscābaddhasaurabham // ### [3.35.103](https://indike.org/pramana/in.purana.brahmanda.3.35.103) ratnakumbhasahasraiśca suvarṇaghaṭakoṭibhiḥ / āpūryāpūrya satataṃ tadarghyamamṛtaṃ mahat // ### [3.35.104](https://indike.org/pramana/in.purana.brahmanda.3.35.104) cintāmaṇigṛhasthānāṃ paricārakaśaktayaḥ / aṇimādikaśaktīnāmarghyayanti madoddhatāḥ // ### [3.35.105](https://indike.org/pramana/in.purana.brahmanda.3.35.105) mahāpadmāṭavīkakṣyāpūrvabhāger'ghyakalpanam / ittha samīritaṃ paścāttatrānyadapi kathyate // ### [3.35.105.p1](https://indike.org/pramana/in.purana.brahmanda.3.35.105.p1) iti śrībrahmāṇḍamahāpurāṇe uttarabhāge hayagrīvāgastyasaṃvāde lalitopākhyāne mahāpadmāṭavyārghyasthāpanakathanaṃ nāma pañcatriṃśo 'dhyāyaḥ ## Linked texts (4) - [Śrītattvanidhi](https://indike.org/pramana/in.art.silpa.pratima.sritattvanidhi.1.266) — Sanskrit - [Tantrasāra (Kṛṣṇānanda)](https://indike.org/pramana/in.sampradaya.general.sakta.tantrasara.3.p18) — Kṛṣṇānanda Āgamavāgīśa 1550, Sanskrit - [Bṛhattantrasāra](https://indike.org/pramana/in.sampradaya.general.sakta.brhattantrasara.12.18) — Sanskrit - [Tattvanidhi](https://indike.org/pramana/in.art.silpa.pratima.tattvanidhi.16.1-61) — Kṛṣṇadevarāya, Sanskrit --- Source: [https://indike.org/pramana/in.purana.brahmanda.3.35](https://indike.org/pramana/in.purana.brahmanda.3.35) · Pramāṇa