Pramāṇa · Search · About · API

Brahmandapurana 3.42

Brahmāṇḍapurāṇa 3.42

Language
Sanskrit

Contents

3.42.1

agastya uvāca
mudrāviracanārītimaśvānana nivedaya /
yābhirviracitābhistu śrīdevī saṃprasīdati //

3.42.2

hayagrīva uvāca
āvāhanī mahāmudrā trikhaṇḍeti prakīrtitā /
parivṛtya karau spaṣṭamaṅguṣṭhau kārayetsamau //

3.42.3

anāmāntargate kṛtvā tarjanyau kuṭilākṛtī /
kaniṣṭhike niyuñjīta nijasthāne tapodhana /
saṃkṣobhiṇyākhyāmudrāṃ tu kathayāmyadhunā śruṇu //

3.42.4

madhyame madhyage kṛtvā kaniṣṭhāṅguṣṭarodhite /
tarjanyo daṇḍavatkṛtvā madhyamoparyanāmike //

3.42.5

etasyā eva mudrāyā madhyame sarale yadi /
kriyate vindhyadarpāre mudrā vidrāviṇī tathā //

3.42.6

madhyamātarjanībhyāṃ tu kaniṣṭhānāmike same /
aṅkuśākārarūpābhyāṃ madhyage kalaśodbhava /
iyamākarṣiṇī mudrā trailokyākarṣaṇe kṣamā //

3.42.7

puṭākārau karau kṛtvā tarjanyāvaṅkuśākṛtī /
parivartakrameṇaiva madhyame tadadhogate //

3.42.8

krameṇānena devarṣe madhyamāmadhyage 'nuje /
anāmike tu sarale tadbahistarjanīdvayam //

3.42.9

daṇḍākārau tatoṃ'guṣṭhau madhyamāvartadeśagau /
mudraiṣonmādinī nāmnā khyātā vātāpitāpana //

3.42.10

asyāstvanāmikāyugmamadhaḥ kṛtvāṅkuśākṛti /
tarjanyāvapi tenaiva krameṇa viniyojayet //

3.42.11

iyaṃ mahāṅkuśā mudrā sarvakāryārthasādhikā //

3.42.13

savyaṃ dakṣiṇādeśe tu dakṣiṇaṃ savyadeśataḥ /
bāhū kṛtvā tu devarṣe hastau samparivartya ca 42.12 /
kaniṣṭhānāmike yukte krameṇānena tāpasa /
tarjanībhyāṃ samākrānte sarvordhvamapi madhyame //

3.42.14

lopāmudrāpateṅguṣṭhau kārayetsakalāvapi /
iyaṃ tu khecarī nāma mudrā sarvottamottamā /
etadvijñānamātreṇa yoginīnāṃ priyo bhavet //

3.42.15

parivartya karau spṛṣṭāvardhacandrasamākṛtī /
tarjanyaṅguṣṭhayugalaṃ yugapadyojayettataḥ //

3.42.16

adhaḥ kaniṣṭhāvaṣṭabdhamadhyame viniyojayet /
athaite kuṭile yuktvā sarvādhastādanāmike /
bījamudreyamācirātsarvasiddhapravartinī //

3.42.17

madhyāgre kuṭilākāre tarjanyupari saṃsthite /
anāmikāmadhyagate tathaiva hi kaniṣṭike //

3.42.18

sarvā ekatra saṃyojya cāṅguṣṭhaparipīḍitāḥ /
eṣā tu prathamā mudrā yonimudreti saṃjñitā //

3.42.19

etā mudrāstu devarṣe śrīdevyāḥ prītihetavaḥ /
pūjākāle prayoktavyā yathānukramayogataḥ //

3.42.19.p1

iti śrībrahmāṇḍamahāpurāṇe uttarabhāge lalitopākhyāne hayagrīvāgastyasamvāde dvācatvāriṃśo 'dhyāyaḥ

Linked texts (3)