[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 3.6 # Brahmandapurana 3.6 Brahmāṇḍapurāṇa 3.6 - **Language:** Sanskrit ## Contents - [3.6.73](https://indike.org/pramana/in.purana.brahmanda.3.6.73) — 1 part ### [3.6.1](https://indike.org/pramana/in.purana.brahmanda.3.6.1) athopaveśya caivainamāsane paramādbhute / hayānanamupāgatyāgastyo vākyaṃ samabravīt // ### [3.6.2](https://indike.org/pramana/in.purana.brahmanda.3.6.2) bhagavansarvadharmajña sarvasiddhāntavittam / lokābhyudayaheturhi darśanaṃ hi bhavādṛśām // ### [3.6.3](https://indike.org/pramana/in.purana.brahmanda.3.6.3) āvirbhāvaṃ mahādevyāstasyā rūpāntarāṇi ca / vihāraścaiva mukhyā ye tānno vistarato vada // ### [3.6.4](https://indike.org/pramana/in.purana.brahmanda.3.6.4) hayagrīva uvāca anādirakhilādhārā sadasatkarmarūpiṇī / dhyānaikadṛśyā dhyānāṅgī vidyāṅgī hṛdayāspadā // ### [3.6.5](https://indike.org/pramana/in.purana.brahmanda.3.6.5) ātmaikyādvyaktimāyāti cirānuṣṭhānagauravāt // ### [3.6.6](https://indike.org/pramana/in.purana.brahmanda.3.6.6) ādau prādurabhūcchaktirbrahmaṇo dhyānayogataḥ / prakṛtirnāma sā khyātā devānāmiṣṭasiddhidā // ### [3.6.7](https://indike.org/pramana/in.purana.brahmanda.3.6.7) dvitīyamudabhūdrūpaṃ pravṛtte 'mṛtamanthane / śarvasaṃmohajanakamavāṅmanasagojaram // ### [3.6.8](https://indike.org/pramana/in.purana.brahmanda.3.6.8) yaddarśanādabhūdīśaḥ sarvajño 'pi vimohitaḥ / visṛjya pārvatīṃ śīghrantayā ruddho 'tanodratam // ### [3.6.9](https://indike.org/pramana/in.purana.brahmanda.3.6.9) tasyāṃ vai janayāmāsa śāstāramasurārdanam // ### [3.6.10](https://indike.org/pramana/in.purana.brahmanda.3.6.10) agastya uvāca kathaṃ vai sarvabhūteśo vaśī manmatha śāsanaḥ / aho vimohito devyā janayāmāsa cātmajam // ### [3.6.11](https://indike.org/pramana/in.purana.brahmanda.3.6.11) hayagrīva uvāca purāmarapurādhīśo vijayaśrīsamṛddhimān / trailokyaṃ pālayāmāsa sadevāsuramānuṣam // ### [3.6.12](https://indike.org/pramana/in.purana.brahmanda.3.6.12) kailāsaśikharākāraṃ gajendramadhiruhya saḥ / cacārākhilalokeṣu pūjyamāno 'khilairapi / taṃ pramattaṃ viditvātha bhavānīpatikhyayaḥ // ### [3.6.13](https://indike.org/pramana/in.purana.brahmanda.3.6.13) durvāsasamathāhūya prajighāya tadantikam / khaṇḍājinadharo daṇḍīdhūridhūsaravigrahaḥ / unmattarūpadhārī ca yayau vidyādharādhvanā // ### [3.6.14](https://indike.org/pramana/in.purana.brahmanda.3.6.14) etasminnantare kāle kācidvidyādharāṅganā / yadṛcchayāgatā tasya puraścārutarākṛtiḥ // ### [3.6.15](https://indike.org/pramana/in.purana.brahmanda.3.6.15) cirakālena tapasā toṣayitvā parāṃbikām / tatsamarpitamālyaṃ ca labdhvā saṃtuṣṭamānasā // ### [3.6.16](https://indike.org/pramana/in.purana.brahmanda.3.6.16) tāṃ dṛṣṭvā mṛguśāvākṣīmuvāca munipuṅgavaḥ / kutra vā gamyate bhīru kuto labdhamidaṃ tvayā // ### [3.6.17](https://indike.org/pramana/in.purana.brahmanda.3.6.17) praṇamya sā mahātmānamuvāca vinayānvitā / cireṇa tapasā brahmandevyā dattaṃ prasannayā // ### [3.6.18](https://indike.org/pramana/in.purana.brahmanda.3.6.18) tachrutvā vacanaṃ tasyāḥ so 'pṛcchanmālyamuttamam / pṛṣṭamātreṇa sā tuṣṭā dadau tasmai mahātmane // ### [3.6.19](https://indike.org/pramana/in.purana.brahmanda.3.6.19) karābhyāṃ tatsamādāya kṛtārtho 'smīti satvaram / dadhau svaśirasā bhaktyā tāmuvācātirṣitaḥ // ### [3.6.20](https://indike.org/pramana/in.purana.brahmanda.3.6.20) brahmādīnāmalabhyaṃ yattallabdhaṃ bhāgyato mayā / bhaktirastu padāṃbhoje devyāstava samujjvalā // ### [3.6.21](https://indike.org/pramana/in.purana.brahmanda.3.6.21) bhaviṣyacchobhanākāre gaccha saumye yathāsukham / sā taṃ praṇamya śirasā yayau tuṣṭā yathāgatam // ### [3.6.22](https://indike.org/pramana/in.purana.brahmanda.3.6.22) preṣayitvā sa tāṃ bhūyo yayau vidyādharādhvanā / vidyādharavadhūhastātpratijagrāha vallakīm // ### [3.6.23](https://indike.org/pramana/in.purana.brahmanda.3.6.23) divyasraganulepāṃśca divyānyābharaṇāni ca / kvacidgṛhṇankvacidgā yankvaciddhasan // ### [3.6.24](https://indike.org/pramana/in.purana.brahmanda.3.6.24) svecchāvihārī sa muniryayau yatra purandaraḥ / svakarasthāṃ tato mālāṃ śakrāya pradadau muniḥ // ### [3.6.25](https://indike.org/pramana/in.purana.brahmanda.3.6.25) tāṃ gṛhītvā gajaskandhe sthāpayāmāsa devarāṭ / gajastu tāṃ gṛhītvātha preṣayāmāsa bhūtale // ### [3.6.26](https://indike.org/pramana/in.purana.brahmanda.3.6.26) tāṃ dṛṣṭvā preṣitāṃ mālāṃ tadā krodhena tāpasaḥ / uvāca na dhṛtā mālā śirasā tu mayārpitā // ### [3.6.27](https://indike.org/pramana/in.purana.brahmanda.3.6.27) trailokyaiśvaryamattena bhavatā hyavamānitā / mahādevyā dhṛtā yā tu brahmādyaiḥ pūjyatehi sā // ### [3.6.28](https://indike.org/pramana/in.purana.brahmanda.3.6.28) tvayā yacchāsito lokaḥ sadevāsuramānuṣaḥ / aśobhano hyatejasko mama śāpādbhaviṣyati // ### [3.6.29](https://indike.org/pramana/in.purana.brahmanda.3.6.29) iti śaptvā vinītena tena saṃpūjito 'pi saḥ / tūṣṇīmeva yayau brahmanbhāvikāryamanusmaran // ### [3.6.30](https://indike.org/pramana/in.purana.brahmanda.3.6.30) vijayaśrīstatastasya daityaṃ tu balimanvagāt / nityaśrīrnityapuruṣaṃ vāsudevamathānvagāt // ### [3.6.31](https://indike.org/pramana/in.purana.brahmanda.3.6.31) indro 'pi svapuraṃ gatvā sarvadevasamanvitaḥ / viṣaṇṇacetā niḥśrīkaścintayāmāsa devarāṭ // ### [3.6.32](https://indike.org/pramana/in.purana.brahmanda.3.6.32) athāmarapure dṛṣṭvā nimittānyaśubhāni ca / bṛhaspatiṃ samāhūya vākyametaduvāca ha // ### [3.6.33](https://indike.org/pramana/in.purana.brahmanda.3.6.33) bhagavansarvadharmajña trikālajñānakovida / dṛśyate 'dṛṣṭapūrvāṇi nimittānyaśubhāni ca // ### [3.6.34](https://indike.org/pramana/in.purana.brahmanda.3.6.34) kiṃphalāni ca tāni syurupāyo vātha kīdṛśaḥ / iti tadvacanaṃ śrutvā devendrasya bṛhaspatiḥ / pratyuvāca tato vākyaṃ dharmārthasahitaṃ śubham // ### [3.6.35](https://indike.org/pramana/in.purana.brahmanda.3.6.35) kṛtasya karmaṇo rājankalpakoṭiśatairapi / prāyaścittopabhogābhyāṃ vinā nāśo na jāyate // ### [3.6.36](https://indike.org/pramana/in.purana.brahmanda.3.6.36) indra uvāca karma vā kīdṛśaṃ brahmanprāyaścittaṃ ca kīdṛśam / tatsarvaṃ śrotumicchāmi tanme vistarato vada // ### [3.6.37](https://indike.org/pramana/in.purana.brahmanda.3.6.37) bṛhaspatiruvāca hananasteyahiṃsāśca pānamanyāṅganāratiḥ / karma pañcavidhaṃ prāhurduṣkṛtaṃ dharaṇīpateḥ // ### [3.6.38](https://indike.org/pramana/in.purana.brahmanda.3.6.38) brahmakṣatriyaviṭśūdragoturaṅgakharoṣṭrakāḥ / catuṣpado 'ṇḍajābjāśca tiryaco 'nasthikāstathā // ### [3.6.39](https://indike.org/pramana/in.purana.brahmanda.3.6.39) ayutaṃ ca sahasraṃ ca śataṃ daśa tathā daśa / daśapañcatrirekārdhamānupūrvyādidaṃ bhavet // ### [3.6.40](https://indike.org/pramana/in.purana.brahmanda.3.6.40) brahmakṣatraviśāṃ strīṇāmuktārthe pāpamādiśet / pitṛmātṛgurusvāmi putrāṇāṃ caiva niṣkṛtiḥ // ### [3.6.41](https://indike.org/pramana/in.purana.brahmanda.3.6.41) gurvājñayā kṛtaṃ pāpaṃ tadājñālaṅghaner'thakam / daśabrāhmaṇabhṛtyarthamekaṃ hanyāddvijaṃ nṛpaḥ // ### [3.6.42](https://indike.org/pramana/in.purana.brahmanda.3.6.42) śatabrāhmaṇabhṛtyarthaṃ brāhmaṇo brāhmaṇaṃ tu vā / pañcabrahmavidāmarthe traiśyamekaṃ tu daṇḍayet // ### [3.6.43](https://indike.org/pramana/in.purana.brahmanda.3.6.43) vaiśyaṃ daśaviśāmarthe viśāṃ vā daṇḍayettathā / tathā śataviśāmarthe dvijamekaṃ tu daṇḍayet // ### [3.6.44](https://indike.org/pramana/in.purana.brahmanda.3.6.44) śūdrāṇāṃ tu sahasrāṇāṃ daṇḍayedbrāhmaṇaṃ tu vā / tacchatārthaṃ tu vā vaiśyaṃ taddaśārddhaṃ tu śūdrakam // ### [3.6.45](https://indike.org/pramana/in.purana.brahmanda.3.6.45) bandhūnāṃ caiva mitrāṇāmiṣṭārthe tu tripādakam / arthaṃ kalatraputrārthe svātmārthe na tu kiñcana // ### [3.6.46](https://indike.org/pramana/in.purana.brahmanda.3.6.46) ātmānaṃ hantumārabdhaṃ brāhmaṇaṃ kṣatriyaṃ viśam / gāṃ vā turagamanyaṃ vā hatvā doṣairna lipyate // ### [3.6.47](https://indike.org/pramana/in.purana.brahmanda.3.6.47) ātmadārātmajabhrātṛbandhūnāṃ ca dvijottama / kramāddaśaguṇo doṣo rakṣaṇe ca tathā phalam // ### [3.6.48](https://indike.org/pramana/in.purana.brahmanda.3.6.48) bhūpadvijaśrotriyavedavidvratīvedāntavidvedavidāṃ vināśe / ekadvipañcāśadathāyutaṃ ca syānniṣkṛtiśceti vadanti saṃtaḥ // ### [3.6.49](https://indike.org/pramana/in.purana.brahmanda.3.6.49) teṣāṃ ca rakṣaṇavidhau hi kṛte ca dāne pūrvoditottaraguṇaṃ pravadanti puṇyam / teṣāṃ ca darśanavidhau namane cakārye śūśrūṣaṇe 'pi caratāṃ sadṛśāṃśca teṣām // ### [3.6.50](https://indike.org/pramana/in.purana.brahmanda.3.6.50) siṃhavyāghramṛgādīni lokahiṃsākarāṇi tu / nṛpo hanyācca satataṃ devārthe brāhmaṇārthake // ### [3.6.51](https://indike.org/pramana/in.purana.brahmanda.3.6.51) āpatsvātmārthake cāpi hatvā medhyāni bhakṣayet // ### [3.6.52](https://indike.org/pramana/in.purana.brahmanda.3.6.52) nātmārthe pācayedanna nātmārthe pācayetpaśūn / devārthe brāhmaṇārthe vā pacamāno na lipyate // ### [3.6.53](https://indike.org/pramana/in.purana.brahmanda.3.6.53) purā bhagavatī māyā jagadujjīvanonmukhī / sasarja sarvadevāṃśca tathaivāsuramānuṣān // ### [3.6.54](https://indike.org/pramana/in.purana.brahmanda.3.6.54) teṣāṃ saṃrakṣaṇārthāya paśūnapi caturdaśa / yajñāśca tadvidhānāni kṛtvā cainānuvāca ha // ### [3.6.55](https://indike.org/pramana/in.purana.brahmanda.3.6.55) yajadhvaṃ paśubhirdevānvidhinānena mānavāḥ / iṣṭāni ye pradāsyanti puṣṭāste yajñabhāvitāḥ // ### [3.6.56](https://indike.org/pramana/in.purana.brahmanda.3.6.56) evaṃ pravartitaṃ cakraṃ nānuvartayatīha yaḥ / daridro nārakaścaiva bhavejjanmani janmani // ### [3.6.57](https://indike.org/pramana/in.purana.brahmanda.3.6.57) devatārthe ca pitrarthe tathaivābhyāgate gurau / mahadāgamane caiva hanyānmedhyānpaśūndvijaḥ // ### [3.6.58](https://indike.org/pramana/in.purana.brahmanda.3.6.58) āpatsu brāhmaṇo māṃsaṃ medhyamaśnanna doṣabhāk / vihitāni tu kāryāṇi pratiṣiddhāni varjayet // ### [3.6.59](https://indike.org/pramana/in.purana.brahmanda.3.6.59) purābhūdyuvanāśvasya devatānāṃ mahākratuḥ / mamāyamiti devānāṃ kalahaḥ samajāyata // ### [3.6.60](https://indike.org/pramana/in.purana.brahmanda.3.6.60) tadā vibhajya devānāṃ mānuṣāṃśca paśūnapi / vibhajyaikaikaśaḥ pradādbrahmā lokapitāmahaḥ // ### [3.6.61](https://indike.org/pramana/in.purana.brahmanda.3.6.61) tatastu paramā śaktirbhūtasaṃdhasahāyinī / kupitābhūttato brahmā tāmuvāca nayānvitaḥ // ### [3.6.62](https://indike.org/pramana/in.purana.brahmanda.3.6.62) prādurbhūtā samudvīkṣya bhūtānandabhayānvitaḥ / prāñjaliḥ praṇatastutvā prasīdeti punaḥ punaḥ // ### [3.6.63](https://indike.org/pramana/in.purana.brahmanda.3.6.63) prādurbhūtā yato 'si tvaṃ kṛtartho 'smi puro mama / tvayaitadakhilaṃ karma nirmitaṃ suśubhāśubham // ### [3.6.64](https://indike.org/pramana/in.purana.brahmanda.3.6.64) śrutayaḥ smṛtayaścaiva tvayaiva pratipāditāḥ / tvayaiva kalpitā yāgā manmukhāttu mahākratau // ### [3.6.65](https://indike.org/pramana/in.purana.brahmanda.3.6.65) ye vibhaktāstu paśavo devānāṃ parameśvari / te sarve tāvakāḥ saṃtubhūtānāmapi tṛptaye // ### [3.6.66](https://indike.org/pramana/in.purana.brahmanda.3.6.66) ityuktvāntardadhe teṣāṃ pura eva pitāmahaḥ / taduktenaiva vidhinā cakāra ca mahākratūn // ### [3.6.67](https://indike.org/pramana/in.purana.brahmanda.3.6.67) iyāja ca parāṃ śaktiṃ hatvā medhyānpaśūnapi / tattadvibhāgo vedeṣu proktatvādiha noditaḥ // ### [3.6.68](https://indike.org/pramana/in.purana.brahmanda.3.6.68) striyaḥ śudrāstathā māṃsamādadyurbrāhmaṇaṃ vinā / āpatsu brāhmaṇo vāpi bhakṣayedgurvanujñayā // ### [3.6.69](https://indike.org/pramana/in.purana.brahmanda.3.6.69) śivodbhavamida piṇḍamatyatha śivatāṃ gatam / udbudhyasva paśo tvaṃ hi nāśivaḥ sañchivo hyasi // ### [3.6.70](https://indike.org/pramana/in.purana.brahmanda.3.6.70) īśaḥ sarvajagatkartā prabhavaḥ pralayastathā / yato viśvādhiko rudrastena rudro 'si vai paśo // ### [3.6.71](https://indike.org/pramana/in.purana.brahmanda.3.6.71) anena turagaṃ gā vā gajoṣṭramahiṣādikam / ātmārthaṃ vā parārthaṃ vā hatvā doṣairna lipyate // ### [3.6.72](https://indike.org/pramana/in.purana.brahmanda.3.6.72) gṛhāniṣṭakarānvāpi nāgākhubalivṛścikān / etadgṛhāśramasthānāṃ kriyāphalamabhīpsatām / manaḥsaṃkalpasiddhānāṃ mahatāṃ śivavarcasām // ### [3.6.73](https://indike.org/pramana/in.purana.brahmanda.3.6.73) paśuyajñena cānyeṣāmiṣṭā pūrtikaraṃ bhavet / japahomārcanādyaistu teṣāmiṣṭaṃ ca sidhyati // ### [3.6.73.p1](https://indike.org/pramana/in.purana.brahmanda.3.6.73.p1) iti śrībrahmāṇḍe mahāpurāṇe uttarabhāge hayagrīvāgastyasaṃvāde lalitopākhyāne hiṃsādyasvarūpakathanaṃ nāma ṣaṣṭho 'dhyāyaḥ ## Linked texts (3) - [Kulavṛtti](https://indike.org/pramana/in.sampradaya.general.sakta.kulavrtti.1.414) — Sanskrit - [Agnikāryapaddhati](https://indike.org/pramana/in.niti.dharma.prayoga.homa.agnikaryapaddhati-kasmira.3.554) — Sanskrit - [Ānandeśvarapaddhati](https://indike.org/pramana/in.sampradaya.general.sakta.anandesvarapaddhati.91) — Sanskrit --- Source: [https://indike.org/pramana/in.purana.brahmanda.3.6](https://indike.org/pramana/in.purana.brahmanda.3.6) · Pramāṇa