Pramāṇa · Search · About · API

Brahmavaivartapurana 2.18: adhyāyaḥ 18

Brahmavaivartapurāṇa 2.18

Language
Sanskrit

adhyāyaḥ 18

2.18.1

nārāyaṇa uvāca ..

2.18.2

śrīkṛṣṇaṃ manasā dhyātvā rājā kṛṣṇaparāyaṇaḥ ..

2.18.3

brāhme muhūrtte cotthāya puṣpatalpānmanoharāt ..1..

2.18.4

rātrivāsaḥ parityajya snātvā maṅgalavāriṇā ..

2.18.5

dhaute ca vāsasī dhṛtvā kṛtvā tilakamujjvalam ..2..

2.18.6

cakārāhnikamāvaśyamabhīṣṭaguruvandanam ..

2.18.7

dadhyājyaṃ madhu lājāṃśca so'paśyadvastu maṅgalam .. 3 ..

2.18.8

ratnaśreṣṭhaṃ maṇiśreṣṭhaṃ vastraśreṣṭhaṃ ca kāñcanam ..

2.18.9

brāhmaṇebhyo dadau bhaktyā yathānityaṃ ca nārada .. 4 ..

2.18.10

amūlyaratnaṃ yatkiñcinmuktāmāṇikyahīrakam ..

2.18.11

dadau viprāya gurave yātrāmaṅgalahetave .. 5 ..

2.18.12

gajaratnaṃ cāśvaratnaṃ dhenuratnaṃ manoharam ..

2.18.13

dadau sarvaṃ daridrāya viprārthaṃ maṅgalāya ca .. 6 ..

2.18.14

kośāgārasahasraṃ ca nagarāṇāṃ trilakṣakam ..

2.18.15

grāmāṇāṃ śatakoṭiṃ ca brāhmaṇebhyo dadau mudā .. 7 ..

2.18.16

putraṃ kṛtvā ca rājendraṃ sucandraṃ dānaveṣu ca ..

2.18.17

putre samarpya bhāryāṃ ca rājyaṃ vai sarvasampadam .. 8 ..

2.18.18

prajānucarasaṃghaṃ ca kośaughaṃ vāhanādikam ..

2.18.19

svayaṃ sannāhayuktaśca dhanuṣpāṇirbabhūva ha .. 9 ..

2.18.20

bhṛtyadvārā krameṇaiva sa cakre sainyasaṃcayam ..

2.18.21

aśvānāṃ ca trilakṣeṇa pañcalakṣeṇa hastinām .. .. 2.18.10 ..

2.18.22

rathānāmayutenaiva dhānuṣkāṇāṃ trikoṭibhiḥ ..

2.18.23

trikoṭibhiścarmiṇāṃ ca śūlināṃ ca trikoṭibhiḥ .. 11 ..

2.18.24

kṛtā senā'parimitā dānavendreṇa nārada ..

2.18.25

yasyāṃ senāpatiścaiva yuddhaśāstraviśāradaḥ .. 12 ..

2.18.26

mahārathaḥ sa vijñeyo rathināṃ pravaro raṇe ..

2.18.27

trilakṣākṣauhiṇī senāpatiṃ kṛtvā narādhipaḥ..13..

2.18.28

triṃśadakṣauhiṇīvādyabhāṇḍaughaṃ ca cakāra saḥ ..

2.18.29

bahirbabhūva śibirānmanasā śrīhariṃ smaran..14..

2.18.30

ratnendrasārakhacitaṃ vimānaṃ hyāruroha saḥ ..

2.18.31

guruvargānpuraskṛtya prayayau śaṅkarāntikam .. 15 ..

2.18.32

puṣpabhadrānadītīre yatrākṣayavaṭaḥ śubhaḥ ..

2.18.33

siddhāśramaṃ ca siddhānāṃ siddhikṣetraṃ ca nāmataḥ ..16..

2.18.34

kapilasya tapasthānaṃ puṇyakṣetraṃ ca bhārate ..

2.18.35

paścimodadhipūrve ca malayasya ca paścime..17..

2.18.36

śrīśailottarabhāge ca gandhamādanadakṣiṇe ..

2.18.37

pañcayojanavistīrṇā dairghye śataguṇā tathā ..

2.18.38

śāśvatī jalapūrṇā ca puṣpabhadrānadī śubhā .. 18 ..

2.18.39

lavaṇodapriyā bhāryyā śaśvatsaubhāgyasaṃyutā ..

2.18.40

śuddhasphaṭikasaṅkāśā bhārate ca supuṇyadā ..19..

2.18.41

śarāvatīmiśritā ca nirgatā sā himālayāt..

2.18.42

gomantaṃ vāmataḥ kṛtvā praviṣṭā paścimodadhau ..2.18.20..

2.18.43

tatra gatvā śaṃkhacūḍo luloke candraśekharam ..

2.18.44

vaṭamūle samāsīnaṃ sūryyakoṭisamaprabham .. 21 ..

2.18.45

kṛtvā yogāsane sthitvā mudrāyuktaṃ ca sasmitam ..

2.18.46

śuddhasphaṭika saṅkāśaṃ jvalantaṃ brahmatejasā .. 22 ..

2.18.47

triśūlapaṭṭiśadharaṃ vyāghracarmāmbaraṃ varam ..

2.18.48

taptakāñcanavarṇābhaṃ jaṭājālaṃ ca bibhratam .. 23 ..

2.18.49

trinetraṃ pañcavaktraṃ ca nāgayajñopavītinam ..

2.18.50

mṛtyuñjayaṃ kālamṛtyuṃ viśvamṛtyukaraṃ param .. 24 ..

2.18.51

bhaktamṛtyuharaṃ śāntaṃ gaurīkāntaṃ manoramam ..

2.18.52

tapasāṃ phaladātāraṃ dātāraṃ sarvasampadām .. 25 ..

2.18.53

āśutoṣaṃ prasannāsyaṃ bhaktānugrahakārakam ..

2.18.54

viśvanāthaṃ viśvarūpaṃ viśvabījaṃ ca viśvajam .. 26 ..

2.18.55

viśvambharaṃ viśvavaraṃ viśvasaṃhārakāraṇam ..

2.18.56

kāraṇaṃ kāraṇānāṃ ca narakārṇavatāraṇam .. 27 ..

2.18.57

jñānapradaṃ jñānabījaṃ jñānānandaṃ sanātanam ..

2.18.58

avaruhya vimānācca sa dṛṣṭvā dānaveśvaraḥ .. 28 ..

2.18.59

sarvaiḥ sārddhaṃ bhaktiyuktaḥ śirasā praṇanāma saḥ ..

2.18.60

vāmato bhadrakālīṃ ca skandaṃ tatpurataḥ sthitam .. 29 ..

2.18.61

āśiṣaṃ ca dadau tasmai kālī skandaśca śaṅkaraḥ ..

2.18.62

uttasthurdānavaṃ dṛṣṭvā sarve nandīśvarādayaḥ ..2.18.30..

2.18.63

parasparaṃ ca sambhāṣāṃ te cakustatra sāmpratam..

2.18.64

rājā kṛtvā ca sambhāṣāmuvāsa śivasannidhau ..31..

2.18.65

prasannātmā mahādevo bhagavāṃstamuvāca ha .. 32 ..

2.18.66

śrīmahādeva uvāca ..

2.18.67

vidhātā jagatāṃ brahmā pitā dharmasya dharmavit ..

2.18.68

marīcistasya putraśca vaiṣṇavaścāpi dhārmikaḥ .. 33 ..

2.18.69

kaśyapaścāpi tatputro dharmiṣṭhaśca prajāpatiḥ ..

2.18.70

dakṣaḥ prītyā dadau tasmai bhaktyā kanyāstrayodaśa .. 34 ..

2.18.71

tāsvekā ca danuḥ sādhvī tatsaubhāgyena varddhitā ..

2.18.72

catvāriṃśaddanoḥ putrā dānavāstejasojjvalāḥ .. 35 ..

2.18.73

teṣveko vipracittiśca mahābalaparākramaḥ ..

2.18.74

tatputro dhārmiko dambho viṣṇubhakto jitendriyaḥ .. 36 ..

2.18.75

jajāpa paramaṃ mantraṃ puṣkare lakṣavatsaram ..

2.18.76

śukācāryyaṃ guruṃ kṛtvā kṛṣṇasya paramātmanaḥ .. 37 ..

2.18.77

tadā tvāṃ tanayaṃ prāpa paraṃ kṛṣṇaparāyaṇam ..

2.18.78

purā tvaṃ pārṣado gopo gopeṣvaṣṭasu dhārmikaḥ .. 38 ..

2.18.79

adhunā rādhikāśāpādbhārate dānaveśvaraḥ ..

2.18.80

ābrahmastambaparyantaṃ bhramaṃ mene ca vaiṣṇavaḥ .. 39 ..

2.18.81

sālokyasārṣṭisārūpyasāmīpyaikyaṃ harerapi ..

2.18.82

dīyamānaṃ na gṛhṇanti vaiṣṇavāḥ sevanaṃ vinā..2.18.40..

2.18.83

brahmatvamamaratvaṃ vā tucchaṃ mene ca vaiṣṇavaḥ ..

2.18.84

indratvaṃ vā kuberatvaṃ na mene gaṇanāsu ca .. 41 ..

2.18.85

kṛṣṇabhaktasya te kiṃ vā devānāṃ viṣaye bhrame ..

2.18.86

dehi rājyaṃ ca devānāṃ matprītiṃ kuru bhūmipa .. 42 ..

2.18.87

sukhaṃ svarājye tvaṃ tiṣṭha devāssantu svake pade ..

2.18.88

alaṃ bhrātṛvirodhena sarve kaśyapavaṃśajāḥ .. 43 ..

2.18.89

yāni kāni ca pāpāni brahmahatyādikāni ca ..

2.18.90

jñātidrohasya pāpasya kalāṃ nārhanti ṣoḍaśīm .. 44 ..

2.18.91

svasampadāṃ ca hāniṃ ca yadi rājendra manyase ..

2.18.92

sarvāvasthāsu samatā keṣāṃ yāti ca sarvadā..45..

2.18.93

brahmaṇaśca tirobhāvo laye prākṛtike sati ..

2.18.94

āvirbhāvaḥ punastasya prabhavedīśvarecchayā.. .. 46 ..

2.18.95

jñānaṃ buddhiśca tapasā smṛtirlokasya niścitam ..

2.18.96

karoti sṛṣṭiṃ jñānena sraṣṭā so'pi krameṇa ca ..47..

2.18.97

paripūrṇatamo dharmaḥ satye satyāśrayaḥ sadā ..

2.18.98

so'pi tribhāgastretāyāṃ dvibhāgo dvāpare smṛtaḥ .. 48 ..

2.18.99

ekabhāgaḥ kaleḥ pūrve taddhrāsaśca krameṇa ca ..

2.18.100

kalāmātraṃ kaleḥ śeṣe kuhvāṃ candrakalā yathā .. 49 ..

2.18.101

yādṛktejo ravergrīṣme na tādṛkśiśire punaḥ ..

2.18.102

dine ca yādṛṅ madhyāhne sāyaṃprātarna tatsamam .. 2.18.50 ..

2.18.103

udayaṃ yāti kālena bālyatāṃ ca krameṇa ca ..

2.18.104

prakāṇḍatāṃ ca tatpaścātkāle'staṃ punareva saḥ .. 51 ..

2.18.105

dine pracchannatāṃ yāti kāle vai durdine ghane ..

2.18.106

rāhugraste kampitaśca punareva prasannatām .. 52 ..

2.18.107

paripūrṇatamaścandraḥ pūrṇimāyāṃ ca yādṛśaḥ.. .
tādṛśo na bhavennityaṃ kṣayaṃ yāti dinedine ..53..

2.18.108

punaḥ sa puṣṭatāṃ yāti parakuhvā dinedine ..

2.18.109

sampadyuktaḥ śuklapakṣe kṛṣṇe mlānaśca yakṣmaṇā .. 54 ..

2.18.110

rāhugraste dine mlāno durdine nibiḍe ghane ..

2.18.111

kāle candro bhavecchuddho bhraṣṭaśrīḥ kālabhedake .. 55 ..

2.18.112

bhaviṣyati baliścendro bhraṣṭaśrīḥ sutale'dhunā ..

2.18.113

kālena pṛthvī sasyāḍhyā sarvādhārā vasundharā .. 56 ..

2.18.114

kāle jale nimagnā sā tirobhūtā vipadgatā ..

2.18.115

kāle naśyanti viśvāni prabhavantyeva kālataḥ .. 97 ..

2.18.116

carācarāśca kālena naśyanti prabhavanti ca ..

2.18.117

īśvarasyaiva samatā kṛṣṇasya paramātmanaḥ .. 58 ..

2.18.118

ahaṃ mṛtyuñjayo yasmādasaṃkhyaṃ prākṛtaṃ layam ..

2.18.119

adṛśyaṃ cāpi paśyāmi vāraṃ vāraṃ punaḥ punaḥ .. .. 59 ..

2.18.120

sa ca prakṛtirūpaśca sa eva puruṣaḥ smṛtaḥ ..

2.18.121

sa cātmā sarvajīvaśca nānārūpadharaḥ paraḥ .. 2.18.60 ..

2.18.122

karoti satataṃ yo hi tannāmaguṇakīrttanam ..

2.18.123

kālaṃ mṛtyuṃ sa jayati janma rogaṃ jarāṃ bhayam .. 61 ..

2.18.124

sraṣṭā kṛto vidhistena pātā viṣṇuḥ kṛto bhave ..

2.18.125

ahaṃ kṛtaśca saṃharttā vayaṃ viṣayiṇo yataḥ ..62..

2.18.126

kālāgnirudraṃ saṃhāre niyujya viṣaye nṛpa ..

2.18.127

ahaṃ karomi satataṃ tannāmaguṇakīrttanam .. .. 63 ..

2.18.128

tena mṛtyuñjayo'haṃ ca jñānenānena nirbhayaḥ ..

2.18.129

mṛtyurmatto bhayādyāti vainateyādivoragaḥ .. 64 ..

2.18.130

ityuktvā sa ca sarveśaḥ sarvajñaḥ sarvabhāvanaḥ ..

2.18.131

virarāmātha śarvaśca sabhāmadhye ca nārada .. 69 ..

2.18.132

rājā tadvacanaṃ śrutvā praśaśaṃsa punaḥ punaḥ ..

2.18.133

uvāca suṃdaraṃ devaṃ paraṃ vinayapūrvakam .. 66 ..

2.18.134

śaṃkhacūḍa uvāca ..

2.18.135

tvayā yatkathitaṃ nātha sarvaṃ satyaṃ ca nānṛtam ..

2.18.136

tathā'pi kiñcidyatsatyaṃ śrūyatāṃ mannivedanam .. 67 ..

2.18.137

jñātidrohe mahatpāpaṃ tvayoktamadhunā trayam ..

2.18.138

gṛhītvā tasya sarvasvaṃ kutaḥ prasthāpito baliḥ .. 68 ..

2.18.139

mayā samuddhṛtaṃ sarvamaiśvaryyaṃ vikrameṇa ca ..

2.18.140

sutalācca samuddhartuṃ nālaṃ so'pi gadādharaḥ ..69 ..

2.18.141

sabhrātṛko hiraṇyākṣaḥ kathaṃ devaiśca hiṃsitaḥ ..

2.18.142

śumbhādayaścāsurā vai kathaṃ devairnipātitāḥ .. 2.18.70 ..

2.18.143

purā samudramathane pīyūṣaṃ bhakṣitaṃ suraiḥ ..

2.18.144

kleśabhājo vayaṃ tatra taiḥ sarvaphalabhājanaiḥ.. .. 71 ..

2.18.145

krīḍābhāṇḍamidaṃ viśvaṃ kṛṣṇasya paramātmanaḥ ..

2.18.146

yadā dadāti yasmai sa tasyaiśvaryaṃ bhavettadā .. 72 ..

2.18.147

devadānavayorvādaḥ śaśvannaimittikaḥ sadā ..

2.18.148

parājayo jayasteṣāṃ kāle'smākaṃ krameṇa ca .. 73 ..

2.18.149

tatrāvayorvirodhe ca gamanaṃ niṣphalaṃ tava ..

2.18.150

sama sambandhinorbandhvorīśvarasya mahātmanaḥ .. 74 ..

2.18.151

jāyate mahatī lajjā sparddhā'smābhiḥ sahādhunā ..

2.18.152

tato'dhikā ca samare kīrtti hāniḥ parājaye .. 75 ..

2.18.153

śaṃkhacūḍavacaḥ śrutvā prahasyāha trilocanaḥ ..

2.18.154

yathocitaṃ sumadhuramatyugraṃ dānaveśvaram .. 76 ..

2.18.155

śrīmahādeva uvāca ..

2.18.156

yuṣmābhiḥ saha yuddhaṃ me brahmavaṃśasamudbhavaiḥ ..

2.18.157

kā lajjā mahatī rājannakīrtirvā parājaye .. 77 ..

2.18.158

yuddhamādau harereva madhunā kaiṭabhena ca ..

2.18.159

hiraṇyakaśipoścaiva saha tenātmanā nṛpa .. 78 ..

2.18.160

hiraṇyākṣasya yuddhaṃ ca punastena gadābhṛtā ..

2.18.161

tripuraiḥ saha yuddhaṃ ca mayā cāpi purā kṛtam .. 79 ..

2.18.162

sarveśvaryyāḥ sarvamātuḥ prakṛtyāśca babhūva ha ..

2.18.163

saha śumbhādibhiḥ pūrvaṃ samaraṃ paramādbhutam .. 2.18.80 ..

2.18.164

pārṣadapravarastvaṃ ca kṛṣṇasya paramātmanaḥ ..

2.18.165

ye ye hatāśca te daityā nahi ke'pi tvayā samāḥ.. 81 ..

2.18.166

kā lajjā mahatī rājanmama yuddhe tvayā saha ..

2.18.167

surāṇāṃ śaraṇasyaiva preṣitasya hareraho .. 82 ..

2.18.168

dehi rājyaṃ ca devānāṃ vāgvyaye kiṃ prayojanam ..

2.18.169

yuddhaṃ mā kuru matsārddhamiti me niścitaṃ vacaḥ .. 83 ..

2.18.170

ityuktvā śaṃkarastatra virarāma ca nārada ..

2.18.171

uttasthau śaṃkhacūḍaśca svāmānyaiḥ saha satvaraḥ .. 84 ..

2.18.172

iti śrībrahmavaivartte mahāpurāṇe nāradanārāyaṇasaṃvāde dvitīye prakṛtikhaṇḍe tulatyupākhyāne śiva śaṃkhacūḍasaṃvāde'ṣṭādaśo'dhyāyaḥ .. 18 ..

Linked texts (2)