Pramāṇa · Search · About · API

Brahmavaivartapurana 2.20: adhyāyaḥ 20

Brahmavaivartapurāṇa 2.20

Language
Sanskrit

adhyāyaḥ 20

2.20.1

nārāyaṇa uvāca ..

2.20.2

śivastattvaṃ samākarṇya tattvajñānaviśāradaḥ ..

2.20.3

yayau svayaṃ ca samaraṃ svagaṇaiḥ saha nārada .. 1 ..

2.20.4

śaṃkhacūḍaḥ śivaṃ dṛṣṭvā vimānādavaruhya ca ..

2.20.5

nanāma parayā bhaktyā daṇḍavatpatito bhuvi .. 2 ..

2.20.6

taṃ praṇamya ca vegena vimānaṃ hyāruroha saḥ ..

2.20.7

tūrṇaṃ cakāra sannāhaṃ dhanurjagrāha durvaham .. 3 ..

2.20.8

śivadānavayoryuddhaṃ pūrṇamabdaṃ babhūva ha ..

2.20.9

na vai babhūvaturbrahmaṃstayorjayaparājayau .. 4 ..

2.20.10

nyastaśastraśca bhagavānnyastaśastraśca dānavaḥ ..

2.20.11

rathasthaḥ śaṃkhacūḍaśca vṛṣastho vṛṣabhadhvajaḥ .. 5 ..

2.20.12

dānavānāṃ ca śatakamudvṛttaṃ ca babhūva ha ..

2.20.13

raṇe ye mṛtāḥ śaṃbhorjīvayāmāsa tānvibhuḥ .. 6 ..

2.20.14

tato viṣṇurmahāmāyo vṛddhabrāhmaṇarūpadhṛk ..

2.20.15

āgatya ca raṇasthānamavocaddānaveśvaram..7..

2.20.16

vṛddhabrāhmaṇa uvāca ..

2.20.17

dehi bhikṣāṃ ca rājendra mahyaṃ viprāya sāmpratam ..

2.20.18

tvaṃ sarvasampadāṃ dātā yanme manasi vāñchitam .. 8 ..

2.20.19

nirāhārāya vṛddhāya tṛṣitāyāturāya ca ..

2.20.20

paścāttvāṃ kathayiṣyāmi puraḥ satyaṃ ca kurviti ..9..

2.20.21

omityuvāca rājendraḥ prasannavadanekṣaṇaḥ ..

2.20.22

kavacārthī janaścāhamityuvāca sa māyayā .. 2.20.10 ..

2.20.23

tacchrutvā dānavaśreṣṭho dadau kavacamuttamam ..

2.20.24

gṛhītvā kavacaṃ divyaṃ jagāma harireva ca .. 11 ..

2.20.25

śaṅkhacūḍasya rūpeṇa jagāma tulasīṃ prati ..

2.20.26

gatvā tasyāṃ māyayā ca vīryyādhānaṃ cakāra ha .. 12 ..

2.20.27

atha śambhurhareḥ śūlaṃ dānavārthaṃ samagrahīt ..

2.20.28

grīṣmamadhyāhnamārttaṇḍaśatakaprabhamujjvalam .. 13 ..

2.20.29

nārāyaṇādhiṣṭhitāgraṃ brahmādhiṣṭhitamadhyamam ..

2.20.30

śivādhiṣṭhitamūlaṃ ca kālādhiṣṭhitadhārakam ..14..

2.20.31

kiraṇāvalisaṃyuktaṃ pralayāgniśikhopamam ..

2.20.32

durnivāryaṃ ca durdharṣamavyarthaṃ vairighātakam .. .. 15 ..

2.20.33

tejasā cakratulyaṃ ca sarvaśastravighātakam ..

2.20.34

śivakeśavayoranyad durvahaṃ ca bhayaṃkaram .. 16 ..

2.20.35

dhanussahasraṃ dairghyeṇa vistṛtyā śatahastakam ..

2.20.36

sajīvaṃ brahmarūpaṃ ca nityarūpamanirmitam .. 17 ..

2.20.37

saṃhartuṃ sarvavidhyaṇḍamekadā daivalīlayā ..

2.20.38

cikṣepa ghūrṇanaṃ kṛtvā śaṃkhacūḍe ca nārada .. 18 ..

2.20.39

rājā cāpaṃ parityajya śrīkṛṣṇacaraṇāmbujam ..

2.20.40

dhyānaṃ cakāra bhaktyā ca kṛtvā yogāsanaṃ dhiyā .. ..19..

2.20.41

śūlaṃ ca bhramaṇaṃ kṛtvā nyapataddānavopari ..

2.20.42

cakāra bhasmasāttaṃ ca sarathaṃ caiva līlayā .. 2.20.20 ..

2.20.43

rājā dhṛtvā divyarūpaṃ bālakaṃ gopaveṣakam ..

2.20.44

dvibhujaṃ muralīhastaṃ ratnabhūṣaṇabhūṣitam ..21..

2.20.45

nānāratnasubhūṣāḍhyagopakoṭibhirāvṛtam ..

2.20.46

golokādāgataṃ yānamāruhya tatpuraṃ yayau..22..

2.20.47

gatvā nanāma śirasā rādhāmādhavayormune ..

2.20.48

bhaktyā taccaraṇāmbhojaṃ rāse vṛndāvane mune..

2.20.49

sudāmānaṃ tau ca dṛṣṭvā prasanna vadanekṣaṇau .. 23 ..

2.20.50

tadā ca cakratuḥ kroḍe snehena parisaṃplutau ..

2.20.51

atha śūlaśca vegena prayayau śūlinaḥ karam .. 24 ..

2.20.52

śaṅkarastena śūlena dānavasyāsthijālakam .. 25 ..

2.20.53

premṇā ca prerayāmāsa lavaṇode ca sāgare ..

2.20.54

asthibhiḥ śaṃkhacūḍasya śaṃkhajātirbabhūva ha .. .. 26 ..

2.20.55

nānāprakārarūpā ca śreṣṭhā pūtā surārcane ..

2.20.56

praśastaṃ śaṃkhatoyaṃ ca devānāṃ prītidaṃ param .. 27 ..

2.20.57

tīrthatoyasvarūpaṃ ca pavitraṃ śaṃkaraṃ vinā ..

2.20.58

śaṃkhaśabdo bhavedyatra tatra lakṣmīśca susthirā .. 28 ..

2.20.59

sa snātaḥ sarvatīrtheṣu yaḥ snātaḥ śaṃkhavāriṇā ..

2.20.60

śaṃkhaṃ hareradhiṣṭhānaṃ yatra śaṃkhastato hariḥ .. 29 ..

2.20.61

tatraiva satataṃ lakṣmīrdūrībhūtamamaṅgalam ..

2.20.62

strīṇāṃ ca śaṃkhadhvanibhiḥ śūdrāṇāṃ ca viśeṣataḥ ..

2.20.63

bhītā ruṣṭā yāti lakṣmīḥ sthalamanyaṃ sthalāttataḥ ..2.20.30..

2.20.64

śivaśca dānavaṃ hatvā śivalokaṃ jagāma saḥ..

2.20.65

prahṛṣṭo vṛṣamāruhya svagaṇaiśca samāvṛtaḥ .. 31 ..

2.20.66

surāḥ svaviṣayaṃ prāpuḥ paramānandasaṃyutāḥ ..

2.20.67

nedurdundubhayaḥ svarge jagurgandharvakinnarāḥ .. .. 32 ..

2.20.68

babhūva puṣpavṛṣṭiśca śivasyopari santatam ..

2.20.69

praśaśaṃsuḥ surāstaṃ ca munīndrapravarādayaḥ .. 33 ..

2.20.70

iti śrībrahmavaivartte mahāpu rāṇe dvitīye prakṛtikhaṇḍe nāradanārāyaṇasaṃvāde tulasyupākhyāne śaṃkhacūḍavadhe śaṃkhaprastāvo nāma viṃśo'dhyāyaḥ .. 20 ..

Linked texts (4)