Pramāṇa · Search · About · API

Brahmavaivartapurana 3.108: adhyāyaḥ 110

Brahmavaivartapurāṇa 3.108

Language
Sanskrit

adhyāyaḥ 110

3.108.1

atha daśādhikaśatatamo'dhyāyaḥ

3.108.2

nārāyaṇa uvāca
āgateṣu gateṣvevaṃ sāṅge maṅgalakarmaṇi .
nando yaśodayā sārdha putrābhyāśaṃ samāyayau .. 1 ..

3.108.3

yaśodovāca
jñānaṃ ca bhavatā dattaṃ pitre nandāya mādhava .
māṃ cāpi mātaraṃ vatsa kṛpāṃ kuru kṛpānidhe .. 2 ..

3.108.4

māmuddhara mahābhāga dharoddhāraṇakāraṇa .
bhavābdhitaraṇe bhīmau bhītāṃ ca patitāmapi .. 3 ..

3.108.5

māyāmayī sā prakṛtirbhavābdhitaraṇe tariḥ .
tvameva karṇadhāraśca bhaktottīrṇe kṛpāmaya .. 4 ..

3.108.6

yaśodāvacanaṃ śrutvā jahāsa puruṣottamaḥ .
uvāca mātaraṃ bhaktyā jñānināṃ ca gurorguruḥ .. 5 ..

3.108.7

śrībhagavānuvāca
jñānaṃ yogātmakaṃ mātarjñānaṃ ca viṣayātmakam .
jñānaṃ bhaktyātmakaṃ śreṣṭhaṃ maddāsyakāraṇaṃ śubham .. 6 ..

3.108.8

jñānaṃ pañcavidhaṃ proktaṃ sarvavedeṣu saṃmatam .
bhaktyātmakaṃ sarvaparaṃ teṣāṃ ca lakṣaṇaṃ śṛṇu .. 7 ..

3.108.9

kṣutpipāsādikānāṃ ca khaṇḍanaṃ svāntaśodhanam .
nāḍīnāṃ śodhanaṃ caiva cakrāṇāmapi bhedanam .. 8 ..

3.108.10

śaktikuṇḍalinīyuktamīśvaraṃ cintayettataḥ .
indriyāṇāṃ ca damanaṃ laubhādīnāṃ ca varjanam .. 9 ..

3.108.11

mūlādhāraṃ svadhiṣṭhānaṃ maṇipūramanāhatam .
viśuddhaṃ ca tathā jñākhyaṃ cakraṣaṭkaṃ prakīrtitam .. 10 ..

3.108.12

nārīṇāmapi durbodhaṃ murkhāṇāṃ ca viśeṣataḥ .
jñānaṃ yogātmakaṃ sādhvi siddhānāṃ sādhyamīpsitam .. 11 ..

3.108.13

jantūnāmapi sarveṣāṃ jñānaṃ svaviṣaye tathā .
santaḥ sarve vijānanti svecchayā ca madīyayā .. 12 ..

3.108.14

siddhyātmakaṃ ca siddhānāṃ niyuktaṃ sarvakarmasu .
catustriṃśatsu siddhānāṃ sādhanaṃ bodhanaṃ tathā .. 13 ..

3.108.15

jñānaṃ maukṣātmakaṃ siddhaṃ paraṃ nirvāṇakāraṇam .
nivṛttimārgamārūḍhaṃ bhaktastatraiva vāñchati .. 14 ..

3.108.16

bhaktyātmakaṃ ca yajjñānaṃ tubhyaṃ rādhā pradāsyati .
tasyāṃ ca mānavaṃ bhāvaṃ tyaktvā jñānaṃ kariṣyati .. 15 ..

3.108.17

nandāya dattaṃ yajjñānaṃ tacca tubhyaṃ pradāsyati .
gaccha nandavrajaṃ mātarnandena saha sādaram .. 16 ..

3.108.18

ityuktvā vinayaṃ kṛtvā jagāmābhyantaraṃ hariḥ .
nando yaśodayā sārdhaṃ prayayau kadalīvanam .. 17 ..

3.108.19

dadarśa rādhāṃ tatraiva nidritāṃ tyaktabhūṣaṇam .
dadhānāṃ śuklavastraṃ ca nirāhārāṃ kṛśodarīm .. 18 ..

3.108.20

paṅkasthe paṅkajadale sajale candanārcite .
śayānāṃ śuṣkitauṣṭhīṃ ca sāśrunetrāṃ ca mūrcchitām .. 19 ..

3.108.21

dhyāyamānāṃ padāmbhojaṃ kṛṣṇasya paramātmanaḥ .
bāhyajñānaparityaktāṃ tanni viṣṭaikamānasām .. 20 ..

3.108.22

paśyantīṃ sasmitaṃ kāntaṃ paśyantīṃ tanmukhāmbujam .
hasantīṃ ca rudantīṃ ca svapne kāntasamīpataḥ .. 21 ..

3.108.23

sakhībhiḥ paritaḥ śaśvatsevitāṃ ścetacāmaraiḥ .
divāniśaṃ rakṣitāṃ ca gopībhiḥ śatakoṭibhiḥ .. 22 ..

3.108.24

sāvadhānaparābhiśca vetrahastābhirīśvarīm .
saptadvāreṣu yuktābhiḥ paritaḥ prāṅgaṇeṣu ca .. 23 ..

3.108.25

tāṃ dṛṣṭvā vismayaṃ prāpya sabhāryo nanda eva ca .
nanāma parayā bhaktyā daṇḍavatpraṇipatya ca .. 24 ..

3.108.26

nidrāṃ tyāktvā ca sahasā bubudhe seśvarecchayā .
kṣaṇena cetanāṃ prāpa viṣayajñānavarcitām .. 25 ..

3.108.27

purato daṃpatī dṛṣṭvā papraccha sādaraṃ satī .
uvāca madhuraṃ caivaṃ tatraiva sakhisaṃsadi .. 26 ..

3.108.28

rādhikovāca
kastvaṃ cātra samāyāto brūhi vā kiṃ prayojanam .
na ca me viṣayajñānaṃ na jānāmi naraṃ paśum .. 27 ..

3.108.29

kiṃ jalaṃ vā sthalaṃ kiṃvā naktaṃ tinaṃ śruṇu .
striyaṃ pumāṃsaṃ klībaṃ vā nāhaṃ jānāmi bhedākam .. 28 ..

3.108.30

rādhikāvacanaṃ śrutvā nandaśca vismayaṃ yayau .
bhītā yaśodā nikaṭaṃ gopīsaṃbhāṣitā yayau .. 29 ..

3.108.31

uvāsa nikaṭe tasyāḥ samuvāca priyaṃ vacaḥ .
uvāsa tatra nandaśca gopīdattāsanena ca .. 30 ..

3.108.32

yaśodovāca
cetanaṃ kuru rādhe tvamātmānaṃ rakṣa yatnataḥ .
drakṣyasi prāṇanāthaṃ ca saṃprāpte maṅgale dine .. 31 ..

3.108.33

tvatto viśvaṃ pavitraṃ ca svakulaṃ ca sureśvari .
gopyaśca puṇyavatyaśca tvatpādāmbujasevayā .. 32 ..

3.108.34

lokā gāsyanti tvatkīrtitīrthapūtāṃ sumaṅgalām .
santo vedāśca catvāraḥ purāṇāni purātanīm .. 33 ..

3.108.35

ahaṃ yaśodā nando'yaṃ buddhirūpe nibodha mām .
vṛṣabhānasutā tvaṃ ca māṃ niśāmaya suvrate .. 34 ..

3.108.36

dvārakānagarādbhadre śrīkṛṣṇasaṃnidhānataḥ .
tavāntikamāgatā'haṃ preritā hariṇā sati .. 35 ..

3.108.37

śṛṇu maṅgalavārtāṃ ca maṅgalaṃ ca gadābhṛtaḥ .
ārāddrakṣyasi kṛṣṇaṃ taṃ he devi cetanaṃ kuru .. 36 ..

3.108.38

bhaktyā tmakaṃ parijñānaṃ dehi mahyaṃ ca sāṃpratam .
tvadbharturupadeśena tvatsamīpaṃ samāgatau .. 37 ..

3.108.39

paścadāyāsyati haristvāṃ muhūrtaṃ varānane .
bhaviṣyatyacireṇaiva śrīdāmnaḥ śāpamocanam .. 38 ..

3.108.40

yaśodāvacanaṃ śrutvā vārtāṃ prāpya gadābhṛtaḥ .
śrīkṛṣṇanāmasmaraṇāddūribhūtamamaṅgalam .. 39 ..

3.108.41

saṃprāpa cetanaṃ rādhā saṃbhāvya kṛṣṇamātaram .
uvāca madhuraṃ śāntā laukikīṃ bhaktimuttamām .. 40 ..

3.108.42

iti śrībrahmao mahāo śrīkṛṣṇajanmakhao uttao nāradanāo rādhāyaśodāsaṃo daśādhikaśatatamo'dhyāyaḥ .. 110 ..

Linked texts (2)