Brahmavaivartapurana 3.121: adhyāyaḥ 123
Brahmavaivartapurāṇa 3.121
- Language
- Sanskrit
adhyāyaḥ 123
3.121.1
atha trayoviṃśatyadhikaśatatamo'dhyāyaḥ
nārada uvāca
gaṇeśapūjanākhyānaṃ purāṇeṣu ca durlabham .
śrutaṃ tadbrahmaṇo vaktrātsāmānyaṃ ca samāsataḥ .. 1 ..
3.121.2
mahimānaṃ gaṇapateḥ sarvabūjyeśvarasya ca .
vyāsena śrotumicchāmi yogīndrāṇāṃ gurorguroḥ .. 2 ..
3.121.3
siddhāśrame mahāpūja trailokyasthaiḥ kṛtā purā .
rādhāmādhavayostatra punaḥ saṃmīlaraṃ purā .. 3 ..
3.121.4
atīte varṣaśatake śrīdāmnaḥ śāpamokṣaṇe .
ādau cakāra pūjāṃ ca sā ca rādhā kathaṃ mune .. 4 ..
3.121.5
sthiteṣu ca surendreṣu brahmaviṣṇuśivādiṣu .
nāgendre ca sthite śeṣe nāgeṣu ca mahatsu ca .. 5 ..
3.121.6
rājendreṣu ca bhūmau ca baliṣṭheṣvasureṣu ca .
gandharveṣu ca rakṣaḥsu cānyeṣu balavatsu ca .. 6 ..
3.121.7
vistareṇa mahābhāga tanme vyākhyātumarhasi .. 7 ..
3.121.8
nārāyaṇa uvāca
trelokye pṛthivī dhanyā mānyā puṇyavatī satī .
tatra bhāratavarṣaṃ ca karmaṇāṃ phaladaṃ śubham .. 8 ..
3.121.9
dhanyaṃ yaśasyaṃ pūjyaṃ ca puṇyakṣetre ca bhārate .
siddhāśramaṃ mahāpuṇyakṣetraṃ mokṣapradaṃ śubham .. 9 ..
3.121.10
sanatkumāro bhagavāṃstatra siddho babhūva ha .
svayaṃ vidhātā tatraiva taptvā siddho babhūva ha .. 10 ..
3.121.11
yogīndrāśca munīndrāśca siddhendrāḥ kapilādayaḥ .
śatakrantūnmahendraśca tatra kṛtvā babhūva ha .. 11 ..
3.121.12
tena siddhāśramaṃ nāma sarveṣāmapi durlabham .
adhiṣṭhānaṃ gaṇeśasya tatreva satataṃ mune .. 12 ..
3.121.13
amūlyaratnanirmāṇagaṇeśapratimāṃ śubhām .
vaiśākhyāṃ pūrṇimāyāṃ ca pūjāṃ kurvanti devatāḥ .. 13 ..
3.121.14
nāgāśca mānavāścaiva daityā gandharvarākṣasāḥ .
siddhendrāśca munīndrāśca yogīndrāḥ sanakādayāḥ .. 14 ..
3.121.15
tatrā''jagāma śaṃbhuśca pārvatvā saha śaṃkaraḥ .
sagaṇaḥ kārtikeyaśca svayaṃ brahmā prajāpatiḥ .. 15 ..
3.121.16
tatrā''jagāma śeṣaśca nāgendraiḥ saha satvaram .
tajñā''jagmuḥ surāḥ sarve manavo mṛnayastathā .. 16 ..
3.121.17
ājagmuste nṛpāḥ sarve pūjārthaṃ hṛṣṭamānasāḥ .
āyayau bhagavānkṛṣṇo dvārakāvāsibhiḥ saha .. 17 ..
3.121.18
ājagāma tathā nandaḥ sārdhaṃ gokulavāsibhiḥ .
gopītriśatakoṭībhirgolokavāsibhiḥ saha .. 18 ..
3.121.19
gacendrakoṭitulyābhirbaliṣṭhābhiḥ sahā''libhiḥ .
āyayau sundarī rādhā kṛṣṇaprāṇādhidevatā .. 19 ..
3.121.20
rāseśvarī surasikā śatavarṣe gate sati .
susnātā mudatī śuddhā dhṛtvā dhaute ca vāsasī .. 20 ..
3.121.21
saṃyatā sā nirāhārā gatvā ca maṇimaṇḍapam .
suprakṣālitapādābjā kāntā bhuvanapāvanī .. 21 ..
3.121.22
śrīkṛṣṇaprītikāmā'tha susaṃkalpaṃ vidhāya ca .
gaṅgodakena herambaṃ snāpayāmāsa bhaktitaḥ .. 22 ..
3.121.23
dhyārna ca sāmavedoktaṃ cakāra śuklapuṣpataḥ .
mātā caturṇāṃ vedānāṃ vasośca jagatāmapi .. 23 ..
3.121.24
buddhirūpā bhagavatī jñānināṃ jananī parā .
dhyānātmakaṃ svapusraṃ taṃ paraṃ dhyānaṃ cakāra sā .. 24 ..
3.121.25
śarvaṃ lambodaraṃ sthūlaṃ jvalantaṃ brahmatejasā .
gajavaktraṃ vahnivarṇamekadantamanantakam .. 25 ..
3.121.26
siddhānāṃ yogināmeva jñānināṃ ca gurorgurum .
dhyātaṃ munīndrairdevendrairbrahmeśaśeṣasaṃjñakaiḥ .. 26 ..
3.121.27
siddhendrairmunibhiḥ sadbhirbhagavantaṃ sanātanam .
brahmasvarūpaṃ paramaṃ maṅgalaṃ maṅgalālayam .. 27 ..
3.121.28
sarvavighnaharaṃ śāntaṃ dātāraṃ sarvasaṃpadām .
bhavābdhimāyāpotena karṇadhāraṃ ca karmiṇām .. 28 ..
3.121.29
śaraṇāgatadīnārtaparitrāṇaparāyaṇam .
dhyāyeddhyānātmakaṃ sādhyaṃ bhakteśaṃ bhaktavatsalam .. 29 ..
3.121.30
iti dhyātvā svaśirasi dattvā puṣpaṃ punaḥ satī .
sarvāṅgaśodhanaṃ nyāsaṃ vedoktaṃ ca cakāra sā .. 30 ..
3.121.31
punaśca dhyātvā dhyānena tenaiva śubhadāyinā .
dadau puṣpaṃ pādapadme rādhā lambodarasya ca .. 31 ..
3.121.32
saptatīrthodakenaiva śītena vāsitena ca .
dadau pādyaṃ pādapadme taiḥ padmādibhirarcite .. 32 ..
3.121.33
dūrvākṣataiḥ śuklapuṣpaiḥ sugandhicandanodakaiḥ .
arghyaṃ dadau tacchirasi svayaṃ golokavāsinī .. 33 ..
3.121.34
sacandanaṃ sgdhimālyaṃ pārijātasya sundaram .
dadau gale gaṇeśasya svayaṃ rāsaṃśvarī mudā .. 34 ..
3.121.35
kastūrīkuṅkumāktaṃ ca sugandhi snigdhacandanam .
sarvāṅge pradadau tasya vṛndāvanavinodinī .. 35 ..
3.121.36
sugandhi śuklaṃ puṣpaṃ ca sugandha candanārcitam .
dadau tasya padāmbhoje mahāpadmalayā satī .. 36 ..
3.121.37
sugandhiyuktaṃ dhūpaṃ ca pūtairvastubhiranvitam .
dadau kṛṣṇapriyā tasmai jagatāmīśvarāya ca .. 37 ..
3.121.38
dīpaṃ ghṛtapradīptaṃ ca dhvāntavidhvaṃsakāraṇam .
dadau tasmai sureśāya paramādyā sanātanī .. 38 ..
3.121.39
naivedya vividhaṃ ramyaṃ susvādu sumanoharam .
coṣyaṃ carvyaṃ lehyapeye sudhātulyaṃ caturvidham .. 39 ..
3.121.40
phalāni ca supakvāni trailokye durlabhāni ca .
madhurāṇi ca mūlāni grāmyāraṇyāni nārada .. 40 ..
3.121.41
tāni tvanyānyasaṃkhyāni tilānāṃ laḍḍukāni ca .
laḍḍukāni supakvāni svādūni surasāni ca .. 41 ..
3.121.42
yavagodhūmacūrṇānāṃ pakvāni piṣṭakāni ca .
ghṛtāktāni ca ramyāṇi śarkarāsahitāni ca .. 42 ..
3.121.43
svāstikānāṃ laḍḍukāni sthūlāni sundarāṇi ca .
bhṛṣṭadravyaṃ ca vividhamakṣataṃ śarkarānvitam .. 43 ..
3.121.44
ghṛtakulyāṃ dugdhakulayāṃ madhukulyaṃ manoharām .
guḍasya dadhnaḥ kulyāṃ ca pāyasānāṃ tathaiva ca .. 44 ..
3.121.45
piṣṭakānāṃ svastikānāṃ rambhāṇāṃ rāśireva ca .
miṣṭavyañjanayuktāni śālyannāni śubhāni ca .. 45 ..
3.121.46
dadau tasmai sureśāya kṛṣṇaprāṇādhidevatā .
amūlyaratnanirmāṇaṃ ramyaṃ siṃhāsanaṃ varam .. 46 ..
3.121.47
dadau vighnapināśāya virājataṭavāsinī .
sūkṣmavastrayugaṃ ramyamamūlyaṃ vahniśuddhakam .. 47 ..
3.121.48
dadau śailātmajāyaiva śataśṛṅganivāsinī .
viśuddhasarpiṣā yuktaṃ nirmalaṃ madhuraṃ madhu .. 48 ..
3.121.49
madhuparkaṃ dadau tasmai vṛndāvananivāsinī .
tāmbūlaṃ ca varaṃ ramyaṃ karpūrādisuvāsitam .. 49 ..
3.121.50
sarvasaṃpatpradātre ca vṛṣabhānasutā dadau .
saptatīrthodakaṃ śuddhaṃ susitaṃ suvāsitam .. 50 ..
3.121.51
pānārtha ca jalaṃ tasmai dadau gaupośvarī mudā .
amūlyaṃ durlabhaṃ caiva viśuddhaṃ śvetacāmaram .. 51 ..
3.121.52
dadau tasmai pareśāya mūlaprakṛtirīśvarī .
amūlyaratnanirmāṇaṃ muktāmāṇikyahīrakaiḥ .. 52 ..
3.121.53
pariṣkṛtaṃ sutalpaṃ ca puṣpacandanacarcitam .
sitasūkṣmāśukenaiva paritaśca pariṣkṛtam .. 53 ..
3.121.54
dadau śivātmajāyaiva kṛṣṇavakṣaḥsthalasthitā .
dattvā ca kāmadhenuṃ ca savatsāṃ vāñchitapradām .. 54 ..
3.121.55
kṛtvā'tīva parīhāraṃ vṛndā puṣpāñjaliṃ dadau .
divyena mūlmanunā sabījenojjvalena ca .. 55 ..
3.121.56
dadau ṣoḍaśopacāraṃ kālindīkulavāsinī .
oṃ gaṃ gauṃ gaṇapataye vighnavināśine svāhā .. 56 ..
3.121.57
ityevameva mantraṃ ca gāṇeśaṃ ṣoḍaśākṣaram .
sā jajāpa sahasraṃ ca paraṃ salpataruṃ varam .. 57 ..
3.121.58
tuṣṭāva parayā bhaktyā bhaktinamrātmakaṃdharā .
sāśrunetrā pulakitā stotreṇa kauthumena ca .. 58 ..
3.121.59
rādhikovāca
paraṃ dhāma paraṃ brahma pareśaṃ parameśvaram .
vighnanighnakaraṃ śāntaṃ puṣṭaṃ kāntamanantakam .. 59 ..
3.121.60
surāsurendraiḥ siddhendraiḥ stutaṃ staumi parātparam .
surapadmadineśaṃ ca gaṇeśaṃ maṅgalāyanam .. 60 ..
3.121.61
idaṃ stotraṃ mahāpuṇyaṃ vighnaśokaharaṃ param .
yaḥ paṭhetprātarutthāya sarvavighnātpramucyate .. 61 ..
3.121.62
iti śrībrahmao mahāo śrīkṛṣṇajanmakhao uttao nāradanāo trayoviṃśatya-
dhikaśatatamo'dhyoyaḥ .. 123 ..