Pramāṇa · Search · About · API

Brahmavaivartapurana 3.122: adhyāyaḥ 124

Brahmavaivartapurāṇa 3.122

Language
Sanskrit

adhyāyaḥ 124

3.122.1

atha caturviṃśatyadhikaśatatamo'dhyoyaḥ
nālāyaṇa uvāca
rādhā saṃpūjya vidhinā stutvā lambodaraṃ satī .
amūlyaratnanirmāṇaṃ sarvāṅgabhūṣaṇaṃ dadau .. 1 ..

3.122.2

rādhāyāḥ stavanaṃ śrutvā pūjāṃ dṛṣṭvā ca vastu ca .
uvāca madhuraṃ śāntaḥ śāntāṃ trailokyamātaram .. 2 ..

3.122.3

gaṇeśa uvāca
tava pūjā jaganmātarlokaśikṣākarī śubhe .
brahmasvarūpā bhavatī kṛṣṇavakṣaḥ sthalasthitā .. 3 ..

3.122.4

yatpādapadmatulaṃ dhyāyante te sudurlabham .
surā brahmeśaśeṣādyā munīndrāḥ sanakādayaḥ .. 4 ..

3.122.5

jīvanmuktāśca bhaktāśca siddhendrāḥ kapilādayaḥ .
tasya prāṇādhidevī tvaṃ priyā prāṇādhikā parā .. 5 ..

3.122.6

vāmāṅganirmitā rādhā dakṣiṇāṅgaśca mādhavaḥ .
mahālakṣmīrjaganmātā tava vāmāṅganirmitā .. 6 ..

3.122.7

vasoḥ sarvanivāsasya prasūstvaṃ parameśvarī .
vedānāṃ jagatāmeva mūlprakṛtirīśvarī .. 7 ..

3.122.8

sarvāḥ prākṛtikā mātaḥ sṛṣṭyāṃ ca tvadvibhūtayaḥ .
viśvāni kāryarūpāṇi tvaṃ ca kāraṇarūpiṇī .. 8 ..

3.122.9

pralaye brahmaṇaḥ pāte tannimeṣo harerapi .
ādau rādhāṃ samuccārya paścātkṛṣṇaṃ parātparam .. 9 ..

3.122.10

sa eva paṇḍito yogī golokaṃ yāti līlayā .
vyatikrame mahāpāpī brahmahatyāṃ labhetdhruvam.. 10 ..

3.122.11

jagatāṃ bhavatī mātā paramātmā pitā hariḥ .
pitureva gururmātā pūjyā vandyā parātparā .. 11 ..

3.122.12

bhajate devamanyaṃ vā kṛṣṇaṃ vā sarvakāraṇam .
puṇyakṣetre mahāmūḍho yadi nindati rādhikām .. 12 ..

3.122.13

vaṃśahānirbhavettasya duḥkhaśokamihaiva ca .
pacyate niraye ghore yāvaccandradivākarau .. 13 ..

3.122.14

guruścajñānodgiraṇājjñānaṃ syānmantratantrayoḥ .
sa ca mantraśca tattantraṃ bhaktiḥ syāddhruvayoryataḥ .. 14 ..

3.122.15

niṣevya mantraṃ devānāṃ jīvā janmani janmani .
bhaktā bhavanti durgāyāḥ pādapadme sudurlabhe .. 15 ..

3.122.16

niṣevya mantre śaṃbhośca jagatāṃ kāraṇasya ca .
tadā prāpnoti yuvayoḥ pādapadmaṃ sudurlabham .. 16 ..

3.122.17

yukyoḥ pādapadmaṃ ca durlabhaṃ prāpya puṇyavān .
kṣaṇārdhaṃ ṣoḍaśāṃśaṃ ca nahi muñcati daivataḥ .. 17 ..

3.122.18

bhaktyā ca yuvacormantraṃ gṛhītvā vaiṣmapādapi .
stavaṃ vā kavacaṃ vā'pi karmamūlanikṛntanam .. 18 ..

3.122.19

yojayetparayā bhaktyā puṇyakṣetre ca bhārate .
puruṣāṇāṃ sahasraṃ ca tvātmanā sārdhamuddharet .. 19 ..

3.122.20

gurumabhyarcya vidhivadvastrālaṃkāracandanaiḥ .
kavacaṃ dhārayedyo hi viṣṇutulyo bhaveddhruvam .. 20 ..

3.122.21

yaddattaṃ vastu me mātastatsarvaṃ sārthakaṃ kuru .
dehi viprāya matprītyā tadā bhokṣyāmi sāṃpratam .. 21 ..

3.122.22

deve deyāni dānāni deve deyā ca dakṣiṇā .
tatsarvaṃ brāhmaṇe dadyāttadānantyāya kalpate .. 22 ..

3.122.23

brāhmaṇānāṃ mukhaṃ rādhe devānāṃ mukhamukhyakam .
viprabhuktaṃ ca yaddravyaṃ prāpnuvantyeva devatāḥ .. 23 ..

3.122.24

viprāṃśca bhojayāmāsa tatsarva rādhikā satī .
babhūva tatkṣaṇādeva prīto lambodaro mune .. 24 ..

3.122.25

etasminnantare devā brahmeśaśeṣasaṃjñakāḥ .
āyayurvaṭamūlaṃ ca devapūjārthameva ca .. 25 ..

3.122.26

tatra gatvā śivacaro devāndevīruvāca saḥ .
śrīkṛṣṇaṃ śuṣkakaṇṭhaśca bhayabhītaśca rakṣakaḥ .. 26 ..

3.122.27

rakṣaka uvāca
gaṇeśaṃ pūjayāmāsa sarvādau ca śubhakṣaṇe .
vṛṣabhānasutā rādhā prakṛtya svastivācanam .. 27 ..

3.122.28

sahitā sā balavatī gopītriśatakoṭibhiḥ .
vārito'haṃ valiṣṭhābhiryuṣmāṃśca kathayāmi tat .. 28 ..

3.122.29

marvādau pūjayedyo hi so'nantaṃ phalamālabhet .
madhye madhyavidhaṃ puṇyaṃ śeṣe svalpamiti smṛtam .. 29 ..

3.122.30

devendreṣu munīndreṣu devastrīṣu sthitāsu ca .
gopībhiśca saha tayā rādhayā pūjitaḥ paraḥ .. 30 ..

3.122.31

dūtavākyaṃ samākarṇya jahasuḥ sarvadevatāḥ .
munayo manavaścaiva rājāno devayoṣitaḥ .. 31 ..

3.122.32

rukmiṇyādyā ramaṇyaśca yā devyo vismayaṃ yayuḥ .
sarasvatī ca sāvitrī pārvatī parameśvarī .. 32 ..

3.122.33

rohiṇī ca satī saṃjñā svāhādyā devayoṣitaḥ .
muditāḥ prayayuḥ sarvā munipatnyaḥ pativratāḥ .. 33 ..

3.122.34

munayo manavaḥ sarve devāścāpi narāstathā .
śrīkṛṣṇaḥ sa gaṇaiḥ sārdhaṃ ye cānye prayayurmudā .. 34 ..

3.122.35

te sarve vividhairdravyaiḥ pūjāṃ cakruḥ śubhakṣaṇe .
baliṣṭhā durbalāścaiva krameṇa ca pṛthakpṛthak .. 35 ..

3.122.36

laḍḍukānāṃ ca rāśīnāṃ śatakoṭirbabhūva ha .
śarkarāṇāṃ tadardhaṃ ca svastikānāṃ tathaiva ca .. 36 ..

3.122.37

annānāṃ bhavyavastūnāṃ śatakoṭirbabhūva ha .
asaṃkhyāni phalānyeva svādūni madhurāṇi ca .. 37 ..

3.122.38

madhukulyā dugdhakulyā dadhikulyā ghṛtasya ca .
babhūvuḥ śatasaṃkhyāśca trailokyānāṃ ca pūjane .. 38 ..

3.122.39

pūjāṃ kṛtvā tu te sarve samūṣuśca sukhāsane .
pārvatī paramaprītyā rādhāsthānaṃ samāyayau .. 39 ..

3.122.40

sā rādhā pārvatīṃ dṛṣṭvā samutthāya javena ca .
yathāyogyāṃ ca saṃbhāṣāṃ cakāra sādaraṃ mudā .. 40 ..

3.122.41

āśleṣaṇaṃ cumbanaṃ ca babhūva ca parasparam .
uvāca madhuraṃ durgā rādhāṃ kṛtvā svavakṣasi .. 41 ..

3.122.42

pārvatyuvāca
kiṃvā praśnaṃ kariṣyāmi tvāṃ rādhā maṅgalālayām .
gatā te virahajvālā śrīdāmnaḥ śāpamokṣaṇe .. 42 ..

3.122.43

satataṃ manmanaḥ prāṇāstvayyeva mayi te tathā .
na hyevamāvayorbhedaḥ śaktipūruṣayostathā .. 43 ..

3.122.44

yetvāṃ nindanti madbhaktāstvadbhaktāścāpi māmapi .
kumbhīpāke ca pajyante yāvaccandra divākarau .. 44 ..

3.122.45

rādhāmādhavayorbhedaṃ ye kurvanti narādhamāḥ .
vaṃśahānirbhavetteṣāṃ pacyante narake ciram .. 45 ..

3.122.46

yānti sūkarayoniṃ ca pitṛbhiḥ śatakaiḥ saha .
ṣaṣṭivarṣasahasrāṇi viṣṭhāyāṃ kṛmayastathā .. 46 ..

3.122.47

tvayaiva pūjitaḥ putro na mayā ca gaṇeśvaraḥ .
sarvādau sarvapūjyo'yaṃ yathā tava tathā mama .. 47 ..

3.122.48

yāvajjīvanaparyantaṃ na vicchedo bhaviṣyati .
rādhāmādhavayordevi dugdhadhāvalyayoryathā .. 48 ..

3.122.49

siddhāśrame mahātīrthe puṇyakṣetre ca bhārate .
nirvaghnaṃ labhagovindaṃ saṃpūjya vighnakhaṇḍanam .. 49 ..

3.122.50

rāseśvarī tvaṃ rasikā śrīkṛṣṇo rasikeśvaraḥ .
vidagdhāyā vidagdhena saṃgamo guṇavānbhadet .. 50 ..

3.122.51

śrīdāmnaḥ śāpanirmuktā śatavarṣāntare sati .
kuruṣva madreṇādya kṛṣṇena saha saṃgamam .. 51 ..

3.122.52

mamā''jñayā durlabhayā suveṣaṃ kuru sundari .
sudurlabhaḥ kāminīnāṃ satpuṃsā saha saṃgamaḥ .. 52 ..

3.122.53

cakruḥ suveṣaṃ rādhāyāḥ priyālyaśca śivājñayā .
ratnasiṃhāsane ramye vāsayāmāsurīśvarīm .. 53 ..

3.122.54

purato ratnamālā sā ratnamālāṃ gale dadau .
rādhāyā dakṣiṇe haste krīḍāpadmaṃ manoharam .. 54 ..

3.122.55

dadau padmamukhī pādapadmayugme'pyalaktakam .
pradadau sundarī gopī sindūraṃ sundaraṃ varam .. 55 ..

3.122.56

candanena samayutaṃ sīmantādhaḥ sthalojjvalam .
sucārukabarīṃ ramyāṃ cakāra mālatī satī .. 56 ..

3.122.57

manoharāṃ munīnāṃ ca mālatīmālyabhūṣitām .
kastūrīkuṅkumāktaṃ ca cārucandanapatrakam .. 57 ..

3.122.58

stanayugme sukaṭhine cakāra candanā satī .
cārucampakapuppāṇāṃ mālāṃ gandhamanoharām .. 58 ..

3.122.59

mālāvatī dadau tasyau praphullāṃ navamallikām .
ratīṣu rasikā gopī ratnabhūṣaṇabhūṣitām .. 59 ..

3.122.60

tāṃ cakārātirasikāṃ varāṃ ratirasotsukām .
śaratpadmadalābhaṃ ca lojanaṃ kajjalojjvalam .. 60 ..

3.122.61

kṛtvā dadau sulalitaṃ vastraṃ ca lalitā satī .
mahendreṇa pradattaṃ ca pārijātaprasūnakam .. 61 ..

3.122.62

sugandhiyuktaṃ tasyāśca pārijātaṃ kare dadau .
suśīlaṃ madhuroktaṃ ca bhartuḥ pārśve yathocitam .. 62 ..

3.122.63

śikṣāṃ cakāra nītiṃ ca suśīlā gopikā satī .
strīṇāṃ ca ṣoḍaśakalāṃ vipattau vismṛtāṃtayoḥ .. 63 ..

3.122.64

smaraṇaṃ kārayāmāsa rādhāmātā kalāvatī .
śrṛṅgāraviṣayoktaṃ ca vacanaṃ ca sudhopamam .. 64 ..

3.122.65

smaraṇaṃ kārayāmāsa bhaginī ca sudhāmukhī .
kamalānāṃ campakānāṃ dale candanacarcite .. 65 ..

3.122.66

cakāra ratitalpaṃ ca kamalā cā''śu komalam .
cārucampakapuṣpaṃ ca kṛṣṇārthaṃ puṭakasthitam .. 66 ..

3.122.67

cakāra candanāktaṃ ca svayaṃ ca pārvatī satī .
puṣpaṃ kelikadambānāṃ stabakaṃ ca manoharam .. 67 ..

3.122.68

kadambamālāṃ kṛṣṇārtha vidyamānāṃ cakāra sā .
tāmbūlaṃ ca varaṃ samyaṃ karpūrādisuvāsitam .. 68 ..

3.122.69

kṛṣṇapriyā ca kṛṣṇārthaṃ cakāra vāsitaṃ jalam .
etasminnantare sarvamāśramaṃ sajalasthalam .. 69 ..

3.122.70

sākṣādgorocanābhaṃ ca dadṛśurmunayaḥ surāḥ .
te sarve vismayaṃ gatvā papracchuḥ kṛṣṇamīśvaram .. 70 ..

3.122.71

uvāca bhagavāṃstāśca sarvajñaḥ sarvakārāṇā .. 71 ..

3.122.72

śrībhagavānuvāca
abhiśaptā ca śrīdāmnā bhraṣṭaśobhā rādhikā .
sarvaṃ jñānaṃ visasmāra madvicchedajvarāturā .. 72 ..

3.122.73

vimukte varṣaśatake jñānaṃ sasmāra sā satī .
siddhāśramaṃ ca pītābhaṃ rāseśvaryāśca tejasā .. 73 ..

3.122.74

paramāhlādakaṃ tejaścandrakoṭisamaprabham .
sukhadṛśyaṃ ca sukhadaṃ cakṣudhāṃ prāṇināmapi .. 74 ..

3.122.75

tacchrutvā paramāścaryaṃ munayo manavastathā .
devyaśca sarvadevāste brahmeśānādayastathā .. 75 ..

3.122.76

javena gatvā tatsthānaṃ bhaktinamrātmakaṃdharā .
sarve janāste dadṛśustrailokyasthāśca rādhikām .. 76 ..

3.122.77

śvetacampakavarṇābhāmatulāṃ sumanoharām .
mohinīṃ mānasānāṃ ca munīnāmūrdhvaretasām .. 77 ..

3.122.78

sukeśīṃ sundarīṃ śyāmāṃ nyagrodhaparimaṇḍalām .
nitambakaṭhinaśroṇīṃ stanayugmonnatānanām .. 78 ..

3.122.79

koṭīnduninditāsyāṃ tāṃ sasmitāṃ sudatīṃ satīm .
kajjalojjvalarūpāṃ ca śaratkamalalojanām .. 79 ..

3.122.80

mahālakṣmīṃ bījarūpāṃ parāmādyāṃ sanātīm .
paramātmasvarūpasya prāṇādhiṣṭhātṛdevatām .. 80 ..

3.122.81

stutāṃ ca pūjitāṃ caiva parāṃ ca paramātmane .
brahmasvarūpāṃ nirliptāṃ nityarūpāṃ ca nirguṇām .. 81 ..

3.122.82

viśvānurodhātprakṛtiṃ bhaktānugrahavigrahām .
matyasvarūpāṃ śuddhāṃ ca pūtāṃ patitapāvanīm .. 82 ..

3.122.83

sutīrthapūtāṃ satkīrtiṃ vidhātrīṃ vedasāmapi .
mahatpriyāṃ ca mahatīṃ mahāviṣṇośca mātaram .. 83 ..

3.122.84

rāseśvareśvarīṃ ramyāṃ rasikāṃ rasikeśvarīm .
vahniśuddhāṃśukādhāmāṃ svecchārūpāṃ śubhālayām .. 84 ..

3.122.85

gopībhiḥ saptabhiḥ śaśvatsevitāṃ śvetacāmaraiḥ .
catasṛbhiḥ priyālībhiḥ pādapadmopasevitām .. 85 ..

3.122.86

amūlyaratnanirmāṇabhūṣaṇoccairvibhūṣitām .
cārukuṇḍalayugmena śrutigaṇḍasthalojjvalām .. 86 ..

3.122.87

sunāsāṃ gajamuktārhāṃ khagendracañcuninditām .
kuṅkumālaktakastūrīsnigdhacandanacarcitām .. 87 ..

3.122.88

dadhānāṃ sukapolaṃ ca komalāṅgīṃ sukāmukīm .
gacendragāminīṃ rāmāṃ kāmanīyāṃ sukāminīm .. 88 ..

3.122.89

kāmāstrajayarūpāṃ ca kāmakāmyālayāṃ varām .
krīḍākamalamamlānaṃ pārijātaprasūnakam .. 89 ..

3.122.90

amūlyaratnanirmāṇaṃ dadhānāṃ darpaṇojjvalam .
nānāratnavicitrāḍhyaratanasiṃhāsanasthitām .. 90 ..

3.122.91

padmaiḥ padmārcitaṃ pādapadmaṃ ca maṅgalālayam .
hṛtpadme dhyāyamānaṃ ca kṛṇasya paramātmanaḥ .. 91 ..

3.122.92

karmaṇā manasā vācā svapne jāgaraṇe'pi ca .
tatprītiṃ prema saubhāgyaṃ smarantīṃ nityanūtanam .. 92 ..

3.122.93

bhāvānuraktasaṃsaktāṃ śuddhabhaktāṃ pativratām .
dhanyāṃ mānyāṃ gauravarṇāṃ śaśvadvakṣaḥ sthalasthitām .. 93 ..

3.122.94

priyāsu priyabhakteṣu supriyāṃ priyavādinīm .
kṛṣṇavāmāṅgasaṃbhūtāmabhedāṃ guṇarūpayoḥ .. 94 ..

3.122.95

golokavāsinīṃ devadevīṃ sarvoparisthitam .
vṛṣabhānasutākhyāṃ tāṃ puṇyakṣetre ca bhārate .. 95 ..

3.122.96

gopīśvarīṃ guptarūpāṃ siddhidāṃ siddhirūpiṇīm .
dhyānāsādhyāṃ durārādhyāṃ vande sadbhaktavanditām .. 96 ..

3.122.97

dhyāne dhyānena rādhāyā vyāyante dhyānatatparāḥ .
ihaiva jīvanmuktāste paratra kṛṣṇapārṣadāḥ .. 97 ..

3.122.98

dṛṣṭvā brahmā ca sarvādau tuṣṭāva parameśvarīm .
svayaṃ vidhātā jagatāṃ mātaraṃ vedhasāmapi .. 98 ..

3.122.99

brāhmovāca
ṣaṣṭivarṣasahasraṇi divyāni parameśvari .
puṣkare ca tapastaptaṃ puṇyakṣetre ca bhārate .. 99 ..

3.122.100

tvatpādapadmadhuramadhulubdhena cetasā .
madhuvratena lolena preritena mayā sati .. 100 ..

3.122.101

tathā'pi na mayā labdhaṃ tvatpādapadmamīpsitam .
na dṛṣṭamapi svapne'yi jātā vāgaśarīriṇī .. 101 ..

3.122.102

vārāhe bhārate varṣe puṇye vṛndāvane vane .
siddhāśrame gaṇeśasya pādapadmaṃ ca drakṣyasi .. 102 ..

3.122.103

rādhāmādhavayordāsyaṃ kuto viṣayiṇastava .
nivartasva mahābhāga parametatmudurlabham .. 103 ..

3.122.104

iti śrutvā nivṛtto'haṃ tapase bhagnamānasaḥ .
paripurṇa tadadhunā vāñchitaṃ tapasaḥ phalam .. 104 ..

3.122.105

mahādeva uvāca
padmaiḥ padmārcitaṃ pādapadamaṃ yasya sudurlabham .
dhyāyante dhyānaniṣṭhāśca śāśvadrabrahmādayaḥ surāḥ .. 105 ..

3.122.106

munayo manavaścaiva siddhāḥ santaśca yoginaḥ .
draṣṭuṃ naiva kṣamāḥ svapne bhavatī tasya vakṣasi .. 106 ..

3.122.107

ananta uvāca
vedāśca vedamātā ca purāṇāni ca suvrate .
ahaṃ sarasvatī santa stotuṃ nālaṃ ca saṃtatam .. 107 ..

3.122.108

asmākaṃ stavane yasya bhrūbhaṅgaṃ ca sudurlabham .
tavaiva bhatsene bhītāścāvayorantaraṃ hareḥ .. 108 ..

3.122.109

evaṃ devāśca devyaścāpyanye ye ca samāgatāḥ .
praṇatāstuṣṭuvuḥ sarve munimanvādayastathā .. 109 ..

3.122.110

lajjayā namravaktrāśca rukmiṇyadyāśca yoṣitaḥ .
malīmasaṃ ca cakrustāḥ śvāsena ratnadarpaṇam .. 110 ..

3.122.111

mṛtatulyā satyabhāmā nirāhārā kṛśodarī .
manaso'pyabhimānaṃ ca sarva tatyāca nārada .. 111 ..

3.122.112

iti śrībrahmao mahāo śrīkṛṣṇajanmakhao uttao nāradanāo
siddhāśramatīrthayātrāprasaṅgegaṇeśapūjanaṃ brahmeśaśeṣādikṛtarādhikāstotraṃ nāma
caturviṃśatyadhikaśatatamo'dhyāyaḥ .. 124 ..

Linked texts (2)