Pramāṇa · Search · About · API

Brahmavaivartapurana 3.37: adhyāyaḥ 039

Brahmavaivartapurāṇa 3.37

Language
Sanskrit

adhyāyaḥ 039

3.37.1

.. śrīkṛṣṇa uvāca ..

3.37.2

iti stutvā himagirirvasataḥ śaṅkarasya ca ..

3.37.3

uvāsa purato dūre labdhājñaḥ sarvasaṃmataḥ .. 1 ..

3.37.4

madhuparkādikaṃ tasmai pradadau bhaktipūrvakam ..

3.37.5

munīnsaṃpūjayāmāsa tataḥ śaṅkarapārṣadān .. 2 ..

3.37.6

tadā tatra samāgatya menakā strīgaṇaiḥ saha ..

3.37.7

dadarśa vaṭamūlasthaṃ śaṅkaraṃ candraśekharam .. 3 ..

3.37.8

īṣaddhāsyaprasannāsyaṃ vasantaṃ vyāghracarmaṇi ..

3.37.9

madhye munigaṇānāṃ ca jvalantaṃ brahmatejasā ..4..

3.37.10

yathā''kāśe tārakāṇāṃ dvijarājaṃ virājitam ..

3.37.11

paramāhlādakaṃ rūpaṃ kaṃdarpakoṭisannibham ..5..

3.37.12

vihāya vārddhakāvasthāṃ dadhataṃ navayauvanam ..

3.37.13

atīva sundaraṃ ramyaṃ cittacoraṃ ca yoṣitām .. 6 ..

3.37.14

kāmaṃ kāmāturāṇāṃ ca satīnāṃ ca sutaṃ yathā ..

3.37.15

vaiṣṇavānāṃ mahāviṣṇuṃ śaivānāṃ ca sadāśivam .. 7 ..

3.37.16

śaktisvarūpaṃ śāktānāṃ saurāṇāṃ sūryarūpiṇam ..

3.37.17

kālasvarūpaṃ duṣṭānāṃ śiṣṭānāṃ paripālakam..8..

3.37.18

kālakālasamaṃ mṛtyormṛtyumṛtyu bhayānakam ..

3.37.19

vyāghracarma cāruvastraṃ babhūva bhasma caṃdanam..9..

3.37.20

sarpāḥ suṃdaramālyāni kastūrī yā viṣaprabhā ..

3.37.21

jaṭāsu lalitā cūḍā caṃdrastvalikacaṃdanam .. 4.39.10 ..

3.37.22

sucārvī mālatīmālā gaṃgādhārā manoharā ..

3.37.23

asthimālā ratnamālā dhattūraṃ cārucaṃpakam ..11..

3.37.24

ekībhūtaṃ paṃcavaktraṃ netrayugmābjaśobhitam ..

3.37.25

śaratpārvaṇacaṃdrābhaṃ pracchādya dīptamuttamam.. 12 ..

3.37.26

baṃdhujīvaviniṃdyaikamoṣṭhādharamanoharam ..

3.37.27

śvetaścandro vṛṣeṃdraśca bhūtādyā nartakā iva ..13..

3.37.28

sadyo vyatikramaṃ sarvaṃ maheśasya maheśvari ..

3.37.29

dṛṣṭvaivaṃ śivarūpaṃ ca menā tuṣṭā babhūva ha ..14..

3.37.30

kāścinnimeṣarahitāḥ kāmena pulakāṃcitāḥ ..

3.37.31

atikāmāturāḥ satyaḥ prāpurmūrcchāṃ ca kāścana .. .. 19 ..

3.37.32

kāścidviniṃdya kāṃtāṃśca praśaśaṃsurmaheśvaram ..

3.37.33

manorathena manasā samāśliṣyaṃti kāścana .. 16 ..

3.37.34

kācinmānasikaṃ kāmātkurvantī cumbanaṃ mudā ..

3.37.35

dhruvaṃ kāmaṃ kariṣyāmo vayaṃ ca kāmasāgare .. 17 ..

3.37.36

asmākameva bhartā cetparatraiva yaśo bhavet ..

3.37.37

ihaivaṃ kiṃ kariṣyāmo vayaṃ kāṃtairatairalam .. 18 ..

3.37.38

dṛṣṭvā tamevaṃ suciramiti jalpaṃti kāścana ..

3.37.39

kāściddṛṣṭvā śivaṃ kiṃcinmukhamācchādya vāsasā .. 19 ..

3.37.40

sasmitā vakranayanāḥ paśyaṃtyeva punaḥpunaḥ ..

3.37.41

vayaṃ gṛhaṃ na yāsyāmo yāsyāmaḥ śivasannidhim .. 4.39.20 ..

3.37.42

śaratsudhāṃśuvadanaṃ drakṣyāmo'harniśaṃ mudā ..

3.37.43

saṃsāraṃ na kariṣyāmaḥ praviśāmo hutāśanam ..21 ..

3.37.44

bhavitā naḥ śivaḥ svāmītyevaṃ jalpaṃti kāścana ..

3.37.45

aho puṇyavatī durgā ślāghyate janma bhārate .. 22 ..

3.37.46

yasyā ayaṃ śivaḥ svāmītyevaṃ jalpaṃti kāścana ..

3.37.47

mudā menā śivaṃ dṛṣṭvā gṛhaṃ tābhirjagāma ha .. 23 ..

3.37.48

śivaṃ saṃpūjya śaileṃdraḥ praṇamya svagṛhaṃ yayau ..

3.37.49

kṛtvā'numānaṃ rahasi girīśo menayā saha .. 24 ..

3.37.50

durgāṃ prasthāpayāmāsa śivāya śivasannidhim ..

3.37.51

pārvatī sakhibhiḥ sārddhaṃ veṣaṃ kṛtvā manoharam .. 25 ..

3.37.52

bhāvānuraktā harṣeṇa jagāma śivasaṃnidhim ..

3.37.53

dṛṣṭvā śivā śivaṃ śāṃtaṃ prasannavadanekṣaṇam .. 26 ..

3.37.54

saptapradakṣiṇaṃ kṛtvā sasmitā praṇanāma sā ..

3.37.55

ananyabhāvaṃ guṇinamaparaṃ jñānināṃ varam .. 27 ..

3.37.56

suṃdaraṃ labha bhartāraṃ sundarītyāśiṣaṃ dadau ..

3.37.57

bhavitā tava saubhāgyaṃ śubhe svāmini saṃtatam .. 28..

3.37.58

putraste bhavitā sādhvi nārāyaṇasamo guṇaiḥ ..

3.37.59

bhavitā te parā pūjā trailokye jagadambike ..29..

3.37.60

brahmāṇḍeṣu ca sarveṣu sarveṣāṃ ca parā bhava ..

3.37.61

saptapradakṣiṇāḥ kṛtvā yato bhaktyā tvayā natam ..4.39.30..

3.37.62

saptajanmani tuṣṭo'haṃ tatphalaṃ labha sundari ..

3.37.63

tīrthe kānte'bhīṣṭadeve gurau mantre tathauṣadhe .. 31 ..

3.37.64

āsthā ca yādṛśī yāsāṃ siddhistāsāṃ ca tādṛśī ..

3.37.65

ityuktvā śaṅkarastūrṇaṃ brahmajyotiḥ paraṃ ca mām .. 32 ..

3.37.66

dadhyau yogāsanaṃ kṛtvā yogīśo vyāghracarmaṇi ..

3.37.67

prakṣālya caraṇau devī papau taccaraṇodakam .. 33 ..

3.37.68

cakāra mārjanaṃ bhaktyā vahniśaucena vāsasā ..

3.37.69

ratnasiṃhāsanaṃ ramyaṃ viśvakarmādinirmitam ..34..

3.37.70

apūrvaṃ kāṃsyapātrasthaṃ naivedyaṃ pradadau kila ..

3.37.71

arghyaṃ maṃdākinītoya saṃyuktaṃ caraṇe dadau ..35..

3.37.72

sugandhicandanaṃ cāru kastūrīkuṅkumānvitam ..

3.37.73

pradadau mālatīmālāṃ gale garalasundare ..36..

3.37.74

bhaktyā pūjāṃ cakārātha puṣpavṛṣṭiṃ ca tuṣṭaye ..

3.37.75

pīyūṣaṃ svarṇapātrasthaṃ pradadau madhuraṃ madhu .. 37 ..

3.37.76

ratnapradīpaśatakaṃ samantāddhūpamuttamam ..

3.37.77

trailokyadurlabhaṃ vastraṃ svarṇayajñopavītakam .. 38 ..

3.37.78

sugandhiśītatoyaṃ ca pānārthaṃ pārvatī dadau ..

3.37.79

atīva sundaraṃ ramyaṃ ratnasārendrabhūṣaṇam..39..

3.37.80

durlabhāṃ kāmadhenuṃ ca svarṇaśṛṅgasamanvitām ..

3.37.81

snānīyaṃ tīrthatoyaṃ ca tāmbūlaṃ ca manoharam .. 4.39.40 ..

3.37.82

dattvā ṣoḍaśopacāraṃ praṇanāma punaḥ punaḥ ..

3.37.83

saṃpūjya śūlinaṃ bhaktyā yayau nityaṃ piturgṛham ..41..

3.37.84

śuśrāvāpsarasāṃ vaktrāddevīmindro maheśvaraḥ ..

3.37.85

śrutvā vārtāṃ śunāsīro nanarta harṣasaṃyutaḥ .. 42 ..

3.37.86

dūtadvārā kāmadevamānināya tvarānvitaḥ ..

3.37.87

indrājñayā kāmadevaḥ prajagāmāmarāvatīm .. 43 ..

3.37.88

tūrṇaṃ prasthāpayāmāsa taṃ ca yatra śivaḥ śivā ..

3.37.89

pañcasāyakasaṃyukto jagāma pañcasāyakaḥ ..44..

3.37.90

prasannavadanaḥ śrīmānyatra śaktiyutaḥ śivaḥ..

3.37.91

gatvā dadarśa madanaḥ śivāyuktaṃ śivaṃ vibhum..45..

3.37.92

śāntaṃ trailokyakāntaṃ ca prasannavadanekṣaṇam..

3.37.93

kāmaḥ sthito'ntarikṣe ca dhṛtvā ca saśaraṃ dhanuḥ .. 46 ..

3.37.94

cikṣepāstraṃ durnivāryamamoghaṃ śaṃkare mudā ..

3.37.95

babhūvāmoghamastraṃ ca moghaṃ tatparamātmani..47..

3.37.96

ākāśa iva nirlipte nirlipte paramātmani ..

3.37.97

moghībhūte ca śastre ca bhayamāpa ca manmathaḥ .. 48 ..

3.37.98

cakampe purataḥ sthitvā dṛṣṭvā mṛtyuṃjayaṃ vibhum ..

3.37.99

sasmāra tridaśānkāmaḥ śakrādīnbhayavihvalaḥ ...49...

3.37.100

āyayurdevatāḥ sarvāḥ śaṃbhukopena vepitāḥ..

3.37.101

cakruḥ stutiṃ ca stotreṇa śaṃkaraṃ tridaśeśvaram ..4.39.50...

3.37.102

kopāgnimudgirantaṃ taṃ kapālalocanādaho ..

3.37.103

stutiṃ kurvatsu deveṣu sa vahniḥ śaṃbhusaṃbhavaḥ..51..

3.37.104

jajvālordhvaśikho dīptaḥ pralayāgniśikhopamaḥ ..

3.37.105

utpatya gagane ghūrṇannipatya dharaṇītale ..

3.37.106

bhrāmaṃbhrāmaṃ ca paritaḥ papāta madanopari .. 52 ..

3.37.107

babhūva bhasmasātkāmaḥ kṣaṇena harakopataḥ..

3.37.108

viṣaṇṇā devatāḥ sarvā natavaktrā ca pārvatī ..53..

3.37.109

vilalāpa bahutaraṃ harasya purato ratiḥ ..

3.37.110

tuṣṭuvurdevatāḥ sarvāḥ kampitāścandraśekharam .. 54 ..

3.37.111

ratimūcuḥ surāḥ sarve ruruduśca muhurmuhuḥ ..

3.37.112

kiṃcidbhasma gṛhītvā ca rakṣa mātarbhayaṃ tyaja ..55..

3.37.113

vayaṃ taṃ jīvayiṣyāmo labhiṣyasi priyaṃ punaḥ ..

3.37.114

harakopāpanayane suprasanne dine tathā ..56..

3.37.115

dṛṣṭvā ratervilāpaṃ ca mūrcchāṃ saṃprāpa pārvatī ..

3.37.116

atīndriyaṃ guṇātītaṃ tuṣṭāva candraśekharam..57..

3.37.117

rudantīṃ pārvatīṃ tyaktvā svasthānaṃ prayayau śivaḥ..

3.37.118

sadyo babhūva tatraiva pārvatīdarpamokṣaṇam..58..

3.37.119

rūpayauvanayorgarvaṃ tatyāja śailakanyakā ..

3.37.120

mukhaṃ darśayituṃ lajjā tadbabhūva sakhīgaṇe .. 59 ..

3.37.121

surāśca ratimāśvāsya sarve jagmuḥ svamandiram ..

3.37.122

praṇamya daṇḍavadrudraṃ śokādudvignamānasāḥ ..4.39.60..

3.37.123

stutvā ruditvā śokena bhayena kāmakāminī ..

3.37.124

koparaktekṣaṇaṃ rudraṃ rādhike svālayaṃ yayau .. 61 ..

3.37.125

na jagāma piturgehaṃ pārvatī sā tu lajjayā ..

3.37.126

svālibhirvāryamāṇā'pi jagāma tapase vanam .. 62 ..

3.37.127

prajagmuḥ sahacāriṇyastatpaścācchokavihvalāḥ ..

3.37.128

mātṛbhirvāryamāṇā sā svarṇadītīrajaṃ vanam ..63..

3.37.129

suciraṃ ca tapastaptvā sā saṃprāpa trilocanam ..

3.37.130

ratiḥ saṃprāpa madanaṃ śaṃkarasya vareṇa ca .. 64 ..

3.37.131

ityevaṃ kathitaṃ sarvaṃ pārvatīdarpamokṣaṇam ..

3.37.132

nigūḍhacaritaṃ rādhe kiṃ bhūyaḥ śrotumicchasi .. 65 ..

3.37.133

iti śrībrahmavaivarte mahāpurāṇe śrīkṛṣṇajanmakhaṇḍe nārāyaṇanāradasaṃvāde ekonacatvāriṃśo'dhyāyaḥ .. 39 ..

Linked texts (2)