Pramāṇa · Search · About · API

Brahmavaivartapurana 3.42: adhyāyaḥ 044

Brahmavaivartapurāṇa 3.42

Language
Sanskrit

adhyāyaḥ 044

3.42.1

.. śrīkṛṣṇa uvāca ..

3.42.2

vasiṣṭhasya vacaḥ śrutvā sagaṇo'pi himālayaḥ ..

3.42.3

vismito bhāryayā sārddhaṃ jahāsa pārvatī svayam .. 1 ..

3.42.4

arundhatī ca tāṃ menāṃ bodhayāmāsa kātarām ..

3.42.5

nirāhārāṃ rudantīṃ tāṃ jahau śokaṃ mudā ca sā .. 2 ..

3.42.6

arundhatīṃ bhojayitvā bubhuje bhogamuttamam ..

3.42.7

sarvaṃ prahṛṣṭamanasā maṅgalaṃ ca cakāra ha .. 3 ..

3.42.8

tataḥ saṃbhṛtasaṃbhāro vasiṣṭhasyājñayā priye ..

3.42.9

patraṃ prasthāpayāmāsa nānāsthānaṃ tvarānvitaḥ ..4..

3.42.10

tataḥ prasthāpayāmāsa śivaṃ maṅgalapatrikām ..

3.42.11

nānāprakāradravyāṇi bāhyāni ca cakāra ha ..5..

3.42.12

tandulānāṃ ca śailānvai pṛthukānāṃ ca sundari ..

3.42.13

tailānāṃ ca ghṛtānāṃ ca dadhnāṃ vāpīścakāra ha..6..

3.42.14

guḍānāmāsanānāṃ ca kṣīrāṇāṃ ca tathaiva ca ..

3.42.15

atho haiyaṃgavīnānāṃ lavaṇānāṃ paraṃ mune .. 7 ..

3.42.16

laḍḍukānāṃ śarkarāṇāṃ svastikānāṃ tathaiva ca ..

3.42.17

yavacūrṇādipiṣṭānāṃ ghṛtapakvāni tāni ca .. 8 ..

3.42.18

nānāprakāravastrāṇi vahniśaucāni yāni ca ..

3.42.19

mahāratnapravālāni suvarṇarajatāni ca ..9..

3.42.20

dravyāṇyetāni śailendra kṛtvā tu vidhipūrvakam ..

3.42.21

maṅgalaṃ kartumārebhe tatraiva maṅgale dine ..4.44.10..

3.42.22

saṃskāraṃ kārayāmāsuḥ pārvatīṃ parvatastriyaḥ ..

3.42.23

snāpayitvā vastrayugmaṃ dhārayāmāsurāśu tāḥ .. 11 ..

3.42.24

kārayitvā suveṣāṃ ca ratnabhūṣaṇabhūṣitāma ..

3.42.25

darpaṇaṃ dhārayāmāsurdūrvākṣatasamanvitam ..12..

3.42.26

daduścālaktakaṃ cāru pādāṃguliṣu pādayoḥ ..

3.42.27

gaṃḍe patrāvalīṃ ramyāṃ netre kajjalamujjvalam ..13..

3.42.28

kabarīṃ kārayāmāsurmālatīmālyaveṣṭitām ..

3.42.29

paṭṭasūtrapinaddhāṃ tāṃ vāmavaktrāṃ manoharām .. 14..

3.42.30

etasminnaṃtare rādhe samājagmuḥ sureśvarāḥ ..

3.42.31

nītvā trinetraṃ tatraiva ratnayānasthamīśvaram .. 15 ..

3.42.32

śailaḥ saṃbhṛtasaṃbhārānsaṃbhāṣayitumīśvarān ..

3.42.33

śailānprasthāpayāmāsa brāhmaṇānapi pūjitān .. 16 ..

3.42.34

prāṅgaṇaṃ kārayāmāsa rambhāstambhaiḥ samanvitam ..

3.42.35

paṭṭasūtrasannibaddharasālapallavānvitaiḥ .. 17..

3.42.36

phalapallavasaṃyuktaiḥ kalaśairjalasaṃyutaiḥ ..

3.42.37

candanāgurukastūrīsucārukusumānvitaiḥ..18..

3.42.38

mālatīmālyasaṃyuktaiḥ saṃyuktaṃ sumanoharam ..

3.42.39

deveśvarānparo dṛṣṭvā praṇanāma himālayaḥ .. 19 ..

3.42.40

ratnasiṃhāsanaṃ dātuṃ prerayāmāsa kiṅkarān ..

3.42.41

nārāyaṇo hi bhagavānuvāsa pārṣadaiḥ saha .. 4.44.20 ..

3.42.42

vinatānandanāttūrṇamavaruhya caturbhujaḥ ..

3.42.43

caturbhujaiḥ pārṣadaiśca ratnabhūṣaṇabhūṣitaiḥ .. 21 ..

3.42.44

ratnamuṣṭinibaddhaiśca sevitaḥ śvetacāmaraiḥ ..

3.42.45

ṛṣiśreṣṭhaiḥ suraśreṣṭhaiḥ stūyamānaśca saṃsadi .. 22 ..

3.42.46

īṣaddhāsyaprasannāsyo bhaktānugrahakātaraḥ ..

3.42.47

uvāsa ca tadabhyāśe brahmā devagaṇaiḥ saha ..23..

3.42.48

ṛṣayo munayaścaiva samūṣurmaṅgale sthale ..

3.42.49

etasminnantare śambhuravaruhya rathādaho ..24..

3.42.50

ratnāsane samuttiṣṭhandadarśa parvatālayam..

3.42.51

samājagmuḥ śivaṃ draṣṭuṃ śailendranagarastriyaḥ .. 25 ..

3.42.52

vṛddhā bālā yuvatyaśca vastrābharaṇabhūṣitāḥ..

3.42.53

kāścitkajjalahastāśca vastrahastāśca kāścana ..26..

3.42.54

kāścitsindūrahastāśca kāścitkaṃkatihākarāḥ ..

3.42.55

veṣārdhabhūṣitāḥ kāścitkāścinnaivārdhabhūṣitāḥ .. 27 ..

3.42.56

kāścinnirbhūṣitāḥ kāścitsarvābharaṇabhūṣitāḥ..

3.42.57

sarvā āgatya saṃtasthuḥ sasmitā parvatālaye ..28..

3.42.58

ṛṣikanyā devakanyā nāgakanyā manoharāḥ ..

3.42.59

gandharvaśailakanyāśca rājakanyāḥ samāgatāḥ ..29 ..

3.42.60

sarvā apsaraso divyā rambhādyā samupasthitāḥ ..

3.42.61

menā kanyāgaṇaiḥ sārddhaṃ dadarśa śaṃkaraṃ varam .. 4.44.30 ..

3.42.62

cārucampakavarṇābhamekavaktraṃ trilocanam ..

3.42.63

īṣaddhāsyaprasannāsyaṃ ratnābharaṇabhūṣitam ..31..

3.42.64

candanāgurukastūrīcārukuṅkumabhūṣitam ..

3.42.65

mālatīmālyasaṃyuktaṃ sadratnamukuṭojjvalam .. 32 ..

3.42.66

vahniśaucenātulena cātisūkṣmeṇa cāruṇā ..

3.42.67

amūlyavastrayugmena vicitreṇātibhūṣitam .. 33 ..

3.42.68

ratnadarpaṇahastaṃ ca kajjalojjvalalocanam ..

3.42.69

sarvayā prabhayācchannamatīva sumanoharam ..34..

3.42.70

atīva taruṇaṃ ramyairbhūṣitāṅgaiśca bhūṣitam ..

3.42.71

bibhrantaṃ rūpamatulaṃ paraṃ nārāyaṇājñayā ..35..

3.42.72

yogasvarūpaṃ yogeśaṃ yogīndrāṇāṃ gurorgurum ..

3.42.73

svecchāmayaṃ guṇātītaṃ brahma jyotiḥ sanātanam ..36 ..

3.42.74

guṇabhedādrūpabhedaṃ dhatte'nantamarūpakam ..

3.42.75

tāraṇaṃ taṃ bhavasthānāṃ sṛṣṭisthityaṃtakāraṇam .. 37 ..

3.42.76

sarvādhāraṃ sarvabījaṃ sarveśaṃ sarvajīvanam ..

3.42.77

sākṣirūpaṃ nirīhaṃ ca paramānandamakṣaram 38 ..

3.42.78

ādyantamadhyarahitaṃ sarvādyaṃ sarvarūpakam ..

3.42.79

dṛṣṭvā jāmātaraṃ menā jahau śokaṃ mudānvitā .. 39 ..

3.42.80

praśaśaṃsuryuvatyaśca dhanyā dhanyā satīti tāḥ ..

3.42.81

durgā bhāgyavatītyevamūcuḥ kāścana kanyakāḥ .. 4.44.40 ..

3.42.82

kāmena kāścitkāminyo maunībhūtāśca stambhitāḥ ..

3.42.83

na dṛṣṭo vara ityevamasmābhirjñānagocare .. 41 ..

3.42.84

kāścinnimeṣarahitā mūrcchāmāpuśca kāścana ..

3.42.85

nininduḥ svapatiṃ kāścitsvecchāṃ cakruśca kāścana .. 42 ..

3.42.86

kāścidbhāvena ruruduḥ pulakāñcitavigrahāḥ ..

3.42.87

jagurgandharvapatayo nanṛtuścāpsarogaṇāḥ .. 43 ..

3.42.88

dṛṣṭvā śaṃkararūpaṃ ca prahṛṣṭāḥ sarvadevatāḥ ..

3.42.89

nānāprakāravādyāni cārūṇi madhurāṇi ca .. 44 ..

3.42.90

vādakā vādayāmāsurnānāśilpena tatra vai ..

3.42.91

etasminnantare durgā śailāntaḥpuracārikā ..45 ..

3.42.92

bahiścakāra sadratnāsanasthāṃ ratnavedikām ..

3.42.93

kastūrībindubhiḥ sāndrasindūrabindubhūṣitām ..46..

3.42.94

cārucandanacandrābhāṃ namrabhālasthalojjvalām ..

3.42.95

ratnendrasārahāreṇa vakṣaḥsthalavibhūṣitām .. 47 ..

3.42.96

trinetradattanetrāṃ tāmanyavāritalocanām ..

3.42.97

atīṣaddhāsyayuktāsyāṃ sakaṭākṣāṃ manoharām .. 48 ..

3.42.98

ratnakeyūravalayaratnakaṅkaṇamaṇḍitām ..

3.42.99

ratnapāśakasaṃsaktāṃ kvaṇanmañjīraraṃjitām .. 49 ..

3.42.100

amūlyātulyacitrāḍhyavastrayugma suśobhitām..

3.42.101

sadratnakuṇḍalābhyāṃ ca cārugaṇḍasthalojjvalām..4.44.50..

3.42.102

maṇisāraprabhāmuṣṭadantarājivirājitām..49..

3.42.103

ratnadarpaṇahastāṃ ca krīḍāpadmaṃ vighūrṇatīm..51 ..

3.42.104

candanāgurukastūrīkuṅkumenāṅgacarcitām..

3.42.105

muditā dadṛśuḥ sarve jagadādyāṃ jagatprasūm .. 92 ..

3.42.106

trinetro netrakoṇena tāṃ dadarśa mudā'nvitaḥ ..

3.42.107

sarvāṃ satyākṛtiṃ dṛṣṭvā vijahau virahajvaram ..53..

3.42.108

śivaḥ sarvaṃ visasmāra durgāsanyastamānasaḥ ..

3.42.109

pulakāṃcitasarvāṃgo harṣāśruyuktalocanaḥ..54..

3.42.110

etasminnantare śailaḥ prahṛṣṭaḥ sapurohitaḥ..

3.42.111

taṃ varaṃ varayāmāsa vastracaṃdanabhūṣaṇaiḥ..55..

3.42.112

bhaktyā pādyādibhirmālyairdivyagaṃdhamanoharaiḥ ..

3.42.113

tataḥ śīghraṃ vedamaṃtraiḥ saṃpradānaṃ cakāra tām .. 56 ..

3.42.114

yautukāni dadau tasmai ratnāni vividhāni ca ..

3.42.115

cāruratnavikāraṇi pātrāṇi sundarāṇi ca ..57..

3.42.116

gavāṃ lakṣaṃ gajeṃdrāṇāṃ sahasrāṇi ca rādhike ..

3.42.117

ratnakaṃbalayuktāni sāṃkuśāni mudānvitaḥ ..58..

3.42.118

triṃśallakṣaṃ hayānāṃ ca sajjitānāmakātaraḥ ..

3.42.119

dāsīnāmanuraktānāṃ lakṣaṃ sadratnabhūṣitam .. 59 ..

3.42.120

śataṃ dvijabaṭūnāṃ ca pārvatībhrātṛkalpakam ..

3.42.121

rathānāṃ ca śataṃ ramyaṃ ratnendrasāranirmitam ..4.44.60 ..

3.42.122

pārvatīṃ vastusahitāṃ svastītyuccārya śaṃkaraḥ ..

3.42.123

jagrāhānaṃdamanasā yatnācchailasamarpitām .. 61 ..

3.42.124

himālayaḥ sutāṃ dattvā parihāraṃ cakāra tam ..

3.42.125

mādhyaṃdinoktastātreṇa tuṣṭāva saṃpuṭāṃjaliḥ .. 62 ..

3.42.126

himālaya uvāca ..

3.42.127

prasīda dakṣayajñaghna narakārṇavatāraka ..

3.42.128

sarvātmarūpa sarveśa paramānaṃdavigraha .. 63 ..

3.42.129

guṇārṇava guṇātīta guṇayukta gaṇeśvara ..

3.42.130

guṇabīja mahābhāga prasīda guṇināṃ vara .. 64 ..

3.42.131

yogādhāra yogarūpa yogajña yogakāraṇa ..

3.42.132

yogīśa yogināṃ bīja prasīda yogināṃ guro .. 65 ..

3.42.133

pralayapralayādyaikabhavapralayakāraṇa ..

3.42.134

pralayānte sṛṣṭibīja prasīda paripālaka .. 66 ..

3.42.135

saṃhārakāle ghore ca sṛṣṭisaṃhārakāraṇa ..

3.42.136

durnivārya durārādhya cāśutoṣa prasīda me .. 67 ..

3.42.137

kālasvarūpa kāleśa kāle ca phaladāyaka ..

3.42.138

kālabījaikakālaghna prasīda kālapālaka .. 68 ..

3.42.139

śivasvarūpa śivada śivabīja śivāśraya ..

3.42.140

śivabhūta śivaprāṇa prasīda paramāśraya .. 69 ..

3.42.141

ityevaṃ stavanaṃ kṛtvā virarāma himālayaḥ ..

3.42.142

praśaśaṃsuḥ surāḥ sarve munayaśca girīśvaram .. 4.44.70 ..

3.42.143

himālayakṛtaṃ stotraṃ saṃyato yaḥ paṭhennaraḥ ..

3.42.144

pradadāti śivastasmai vāñchitaṃ rādhike dhruvam .. 71 ..

3.42.145

iti śrībrahmavaivarte mahāpurāṇe śrīkṛṣṇajanmakhaṇḍe nārāyaṇanāradasaṃvāde pārvatīsaṃpradāne catuścatvāriṃśo'dhyāyaḥ .. 44 ..

Linked texts (2)