Brahmavaivartapurana 3.94: adhyāyaḥ 96

Brahmavaivartapurāṇa 3.94

Language: Sanskrit

adhyāyaḥ 96

3.94.1

atha ṣaṇṇavatitamo'dhyāyaḥ

3.94.2

nārāyaṇa uvāca
śrīkṛṣṇasmaraṇaṃ kṛtvā gamanonmukhamuddhavam .
nataṃ rādhāpadāmbhoje śirasā pulakāñcitam .. 1 ..

3.94.3

uvāca mādhavī gopī rudatī premavihvalā .
bhaktaṃ rudantamucchaiśca rādhāvicchedakātaram .. 2 ..

3.94.4

mādhavyuvāca
uddhava śṛṇu vakṣyāmi kṣaṇaṃ tiṣṭha yathocitam .
nigūḍhaṃ paramaṃ jñānaṃ yatte manasi vāñchitam .. 3 ..

3.94.5

sudurlabhaṃ purāṇeṣu vedeṣu gopanīyakam .
praśnaṃ kuru mahābhāga rādhikāṃ trijagatprasūm .. 4 ..

3.94.6

ityuktvā sā ca gopīśā samuvāsa musaṃsadi .
uvāca madhuraṃ śāntāmuddhavaścāpi rādhikām .. 5 ..

3.94.7

uddhavauvāca
ekākī bhavamāyāti yātyekākī punaḥ punaḥ .
prāṇī karmānurodhena svakarmaphalabhukpumān .. 6 ..

3.94.8

karmaṇā jāyate jantuḥ karmaṇauva pralīyate .
sukhaṃ duḥkhaṃ bhayaṃ śokaṃ karmaṇaivābhipadyate .. 7 ..

3.94.9

janturbhogāvaśeṣeṇa bhogaṃ bhuṅkte bhaveṣu ca .
punaśca karmaṇo bhogātsamāyāti ca yāti ca .. 8 ..

3.94.10

ratnādikaṃ ca yatkicinmahyaṃ dattaṃ tvayā sati .
mayā sārdha na yātyeva tena me kiṃ prayojanam .. 9 ..

3.94.11

bhavābthitāraṇe devi bhavatī taraṇirvarā .
karṇadhāraḥ svayaṃ kṛṣṇaḥ sarveṣāṃ pārakārakaḥ .. 10 ..

3.94.12

kiṃcidyānaṃ dehi mahyaṃ bhavābdhipārakāraṇam .
prāpya prasātaṃ yāsyāmi mathurāṃ kṛṣmamūlakam .. 11 ..

3.94.13

yāṃ yāṃ kālagatiṃ mātaḥ surāṇāṃ ca nṛṇāmapi .
pitṝṇāṃ brahmalokasya tadūrdhvasya ca tāṃ vada .. 12 ..

3.94.14

tāmeva dustarāṃ ghorāṃ tīrtvā yāmi hareḥ padam .
evaṃbhūtamupāyaṃ ca dehi me kamalālaye .. 13 ..

3.94.15

dūrato yatpadāmbhojaṃ dhyāyante ca divāniśam .
devā brahmeśaśeṣādyāstvaṃ tadvakṣaḥ sthalasthitā .. 14 ..

3.94.16

uddhavasya vacaḥ śrutvā jahāsa kamalālayā .
vāsasā netranīraṃ ca saṃbhārjya tamuvāca sā .. 15 ..

3.94.17

rādhovāca
mādhavīvacanenaiva karoṣi praśnamuddhava .
strījātirabalā loke kiṃ vā jñānaṃ dadāmi te .. 16 ..

3.94.18

śuddhāṃ kālagatiṃ vatsa jānāti bhagavānhariḥ .
brahma maheśaḥ śeṣaśca vedāścatvāra eva ca .. 17 ..

3.94.19

kiṃcidvedānusāreṇa santo jānanti putraka .
śrūyatāṃ kuṣṇavaktreṇa goloke rāsamaṇa़ḍale .. 18 ..

3.94.20

goloke cāpi vaikuṇṭhe brahmaloke ca sāṃpratam .
yā ca dṛṣṭā kālagatistāmeva kathayāmi te .. 19 ..

3.94.21

nṛṇāṃ pitṝṇāṃ devānāṃ brahmalokādikasya ca .
bahirlokasya brahmāṇḍātpātālānāṃ ca niścitam .. 20 ..

3.94.22

duratyayāṃ kālagatiṃ yenopāyena paṇḍitāḥ .
nistaranti budhaśreṣṭha kathayāmi niśāmaya .. 21 ..

3.94.23

bhajanti jagatāṃ nāthaṃ kālakālaṃ jagadgurum .
nirguṇaṃ ca nirīhaṃ ca paramātmānamīśvaram .. 22 ..

3.94.24

sadyaḥ patati deho'yaṃ vinā yena sadātmanā .
taṃ niṣevya kālagatiṃ taratyeva hi kevalam .. 23 ..

3.94.25

āyurharati sarveṣāṃ prāṇināṃ ravireva ca .
śrīhareḥ śuddhabhaktānāṃ satāṃ puṇyavatāṃ vinā .. 24 ..

3.94.26

vidhermānasikānputrāṃścaturaḥ paśya putraka .
sanakādīnbhāgavatānyeṣāṃ ca susthiraṃ vamaḥ .. 25 ..

3.94.27

rudrādyānvayasā nityāñjñātināṃ ca gurorgurūn .
bālānanupanītāṃśca pañcavarṣaśiśūnyathā .. 26 ..

3.94.28

amyantare mahāsphītānsasmitāṃśca digambarān .
śrīkṛṣṇadhyānapūtāśca tīrthapūtāṃśca vaiṣṇavān .. 27 ..

3.94.29

vedavedāṅgaśāstrāṇāṃ cintāhīnānpraphullitān .
bhaktyā divāniśaṃ śaśvaddharibhāvena tatparān .. 28 ..

3.94.30

bāhyapūjāvihīnāṃśca pūtānmānasikāṃstathā .
mṛtyuñjayānmahābhāgānkālavyālajitastathā .. 29 ..

3.94.31

sanakaṃ ca sanandaṃ ca tṛtīyaṃ ca sanātanam .
paraṃ sanatkumāraṃ ca ye smaranti ca sarvaśaḥ .. 30 ..

3.94.32

tīrthasnānaphalaṃ labdhvā mucyate kṛtapātakāt .
haribhaktirbhavetteṣāṃ haridāsyaṃ labhanti ca .. 31 ..

3.94.33

mṛkaṇḍubālakaṃ paśya karmaṇā ca dvijottamam .
daśavarṣāyuṣaṃ tīvraṃ jvalantaṃ brahmatejasā .. 32 ..

3.94.34

harisevanataḥ paścātsaptakalpāntajīvinam .
voḍhuṃ pañcaśikhaṃ paśya lomaśaṃ cā''suriṃ tathā .. 33 ..

3.94.35

sarvakarmavihīnaṃ ca harisevanatatparam .
śatakalpāyuṣaṃ caiva dhyāyamānaṃ hareḥ padam .. 34 ..

3.94.36

jamadagneḥ sutaṃ paśya rāmaṃ taṃ cirajīvinam .
hanumantaṃ baliṃ vyāsamaśvatthāmānameva ca .. 35 ..

3.94.37

vibhīṣaṇaṃ kṛpaṃ vipraṃ jāmbavantaṃ ca bhallukam .
haribhāvanayā caite śuddhāḥ sucirajīvinaḥ .. 36 ..

3.94.38

siddhendreṣu munīndreṣu nareṣvanyeṣu coddhava .
haribhāvanaśuddhāśca sarve te cirajīvinaḥ .. 37 ..

3.94.39

prahlādaṃ paśya daityeṣu hiraṇyakaśipoḥ sutam .
haridviṣo durantasya haribhāvanatatparam .. 38 ..

3.94.40

cirāyuṣaṃ kālajitaṃ paśyānyaṃ cāpyasaṃkhyakam .
anekajanmatapasā labdhvā janma ca bhārate .. 39 ..

3.94.41

ye hariṃ taṃ na sevante te mūḍhāḥ kṛtapāpinaḥ .
vāsudevaṃ parityajya viṣaye nirato janaḥ .. 40 ..

3.94.42

tyaktvā'mṛtaṃ mahāmūḍho viṣaṃ bhuṅkte nijecchayā .
kasya strī kasya vā putraḥ kasya vā bāndhavāstathā .. 41 ..

3.94.43

kaḥ kasya bandhurvipadi śrīkṛṣṇena vinā bhuvi .
tasmātsantaḥ sadā kṛṣṇaṃ bhajantyeva divāniśam .. 42 ..

3.94.44

janmamṛtyujarāvyādhiharaṃ sarvaharaṃ param .
kālasya taraṇopāyaṃ bhajanaṃ paramātmanaḥ .. 43 ..

3.94.45

ānandanandanasyaiva paripūrṇatamasya ca .
śṛṇu kālagatiṃ vatsa madīyajñānagocarām .. 44 ..

3.94.46

narāṇāṃ ca pitṝṇāṃ ca surāṇāṃ cāpi brahmaṇaḥ .
nāgānāṃ rākṣasādīnāṃ tatpareṣāṃ ca putraka .. 45 ..

3.94.47

kathayāmi nigūḍhārthaṃ sāvadhānaṃ niśāmaya .
sarvasmācca paraṃ sthānaṃ sarvādhāro mahānvirāṭ .. 46 ..

3.94.48

yasya lomasu viśvāni cāsaṃkhyāni ca tāni ca .
sarvasmācca paraṃ sūkṣmaṃ paramāṇuṃ niśāmaya .. 47 ..

3.94.49

kālārambhātmakaṃ sarvamanūraṃ paramīpsitam .
caramaḥ sadviśeṣāṇāmaneko'saṃyutaḥ sadā .. 48 ..

3.94.50

paramāṇuḥ sa vijñeyo nṛpāmaikyabhramo yataḥ .
paramāṇudvayenāṇustrasareṇustu te trayaḥ .. 49 ..

3.94.51

trasareṇutrikeṇāpi truṭiruktā manīṣibhiḥ .
vedhastruṭiśatenaiva trivedhena lavastathā .. 50 ..

3.94.52

trilavena nimeṣaśca tri nimeṣeṇa ca kṣaṇaḥ .
kāṣṭhā pañcakṣaṇenaiva laghuśca daśakāṣṭhayā .. 51 ..

3.94.53

laghupañcadaśaṃ daṇḍastatpramāṇaṃ niśāmaya .
dvādaśārdhapalonmānaṃ caturbhiścaturaṅgulaiḥ .. 52 ..

3.94.54

svarṇamāṣaiḥ kṛtacchidraṃ yāvatprasthajalaplutam .
daṇḍadvaye muhūrtaḥ syātvaṣṭidaṇḍātmikā tithiḥ .. 53 ..

3.94.55

tadaṣṭabhāgaḥ praharaḥ pramāṇaṃ ca nirūpaṇam .
caturbhiḥ praharai rātriścaturbhirdinamucyate .. 54 ..

3.94.56

tithipañcadaśenaiva pakṣamānaṃ prakīrtitam .
pakṣadvayena māsaḥ syācchuklakṛṣṇābhidhena ca .. 55 ..

3.94.57

ṛturmāsadvayenaiva tatṣaṭkenaiva vatsaraḥ .
vasantagrīṣmavarṣāśca śaraddhemantaśītakāḥ .. 56 ..

3.94.58

varṣāḥ pañcavidhā jñeyāḥ kālavidbhirnirūpitāḥ .
saṃvatsaraḥ pravatsara ilāvatsara eva ca .. 57 ..

3.94.59

anuvatsaro vatsaro'yamiti kālavido viduḥ .
abdo dviṣaṭkamāsaiśca tannāma śuṇu coddhava .. 58 ..

3.94.60

vaiśākho jyeṣṭha āṣāḍhaḥ śrāvaṇo bhādra eva ca .
āśvinaḥ kārtiko mārgaḥ pauṣo māghastu phālgunaḥ .. 59 ..

3.94.61

saitrastu caramo jñeyo varṣaśeṣī nirūpitaḥ .
vasantaścaitravaiśākhamāsayugmena kīrtitaḥ .. 60 ..

3.94.62

jyeṣṭhāvāḍhadvayenaiva grīṣmastu parikīrtitaḥ .
varṣā śrāvaṇabhadre ca hyāśvine kārtike śarat .. 61 ..

3.94.63

mārge pauṣe ca hemantaḥ śiśiro māghaphālgune .
abdastu cāyanai dve vai cottare dakṣiṇāyane .. 62 ..

3.94.64

māghādiṣaḍvinirmitamuttarāyaṇamīpsitam .
śrāvaṇādimāsaṣaṭkaṃ dakṣiṇāyanameva ca .. 63 ..

3.94.65

māghādāṣāḍhaparyantaṃ dinaṃ vṛddhaṃ krameṇa vai .
naktaṃ vṛddhaṃ śrāvaṇaśca pauṣaparyantameva ca .. 64 ..

3.94.66

pratipatpūrṇimāntaśca śuklapakṣaḥ prakīrtitaḥ .
pūrṇimāyāḥ pratipadaścāmāvāsyānta eva ca .. 65 ..

3.94.67

kṛṣṇapakṣastu vijñeyo vedavidbhirnirūpitaḥ .
dvitīyā ca tṛtīyā ca caturthī pañcamī tathā .. 66 ..

3.94.68

ṣaṣṭhī ca saptamī caiva hyaṣṭamī navamī tathā .
daśamyekādaśī cāpi dvādaśī ca trayodaśī .. 67 ..

3.94.69

caturdaśī kuhūryāvaddinaṃ tu gaṇanaṃ smṛtam .
aśvinī bharaṇī cāpi kṛttikā rohiṇī tathā .. 68 ..

3.94.70

mṛgaśirastthā''rdrā ca nakṣatre dve punarvasū .
puṣyāśleṣe maghā caiva pūrvā cottaraphālgunī .. 69 ..

3.94.71

hastacitre tathā svātī viśākhā cānurādhikā .
jyeṣṭhā mūlaṃ tathā jñeyā pūrvāṣāḍhottarā tathā .. 70 ..

3.94.72

śravaṇābhijitī caiva dhaniṣṭhā ca prakīrtitā .
tataḥ śatabhiṣā jñeya pūrvābhādrapadā tathā .. 71 ..

3.94.73

tathottarā tu vijñeyā revatī caramā smṛtā .
aṣṭāviṃśati nakṣatraṃ kalatraṃ śaśinastathā .. 72 ..

3.94.74

krameṇa tābhiḥ sārdha ca candrastiṣṭhati nityaśaḥ .
saptaviṃśati nakṣatraṃ kalatraṃ ca śrutau śrutam .. 73 ..

3.94.75

abhijicchūvaṇacchāyā tenāṣṭāviṃśatiḥ smṛtā .
ekadā ca madhau candro rohiṇyā vāmayā saha .. 74 ..

3.94.76

reme divāniśaṃ nityaṃ śravaṇā ca cukopa sā .
chāyāṃ ca dattvā candrāya yayau tātāntikaṃ bhiyā .. 75 ..

3.94.77

tataḥ pitaramādāya sā cakre ca vibhāgakam .
babhūva tena nakṣatramabhijinnāmakaṃ purā .. 76 ..

3.94.78

etacchrutvā kṛṣṇamukhācchataśrṛṅge ca parvate .
nakṣatraṃ kathitaṃ vatsa tithyā bhramati nityaśaḥ .. 77 ..

3.94.79

yogaṃ ca karaṇaṃ caiva madvaktreṇa niśāmaya .
viṣkambhaḥ prītirāyuṣmānsaubhāgyaḥ śobhanastathā .. 78 ..

3.94.80

atigaṇḍaḥ sukarmā ca ghṛtiḥ śūlastathaiva ca .
gaṇḍo vṛddhirdhruvaścaiva vyāghāto harṣaṇāstathā .. 79 ..

3.94.81

vajraṃ siddhirvyatīpāto varīyānparighaḥ śivaḥ .
siddhiḥ sādhyaḥ śubhaḥ śuklo brahmendro vaidhṛtistathā .. 80 ..

3.94.82

kīrtitaste yogagaṇaḥ karaṇaṃ śrūyatāmiti .
bavaśca bālavaścaiva kaulavastaitilastathā .. 81 ..

3.94.83

garaśca vaṇijaścāpi viṣṭiśca śakunistathā .
catuṣpāccāpi nāgaśca kiṃstughna iti kīrtitam .. 82 ..

3.94.84

narāṇāṃ cāpi māsena pitṝṇāṃ ca divāniśam .
śukle cāpi dinaṃ teṣāṃ kṛṣṇe naktaṃ prakīrtitam .. 83 ..

3.94.85

vatsareṇa nārāṇāṃ ca surāṇāṃ ca divāniśam .
dinaṃ teṣāmuttare ca naktaṃ ca dakṣiṇāyane .. 84 ..

3.94.86

manvantaraṃ tu divyānāṃ yugānāmekasaptatiḥ .
manorāyuḥ parimitaṃ śakrasyā''yuḥ prakīrtitam .. 85 ..

3.94.87

pañcaviṃśatsahasraṃ ca tathā pañcaśataṃ param .
tatra sūryagatirnāsti śakrapātānusārataḥ .. 86 ..

3.94.88

divāniśaṃ ca jānanti brahmalokanivāsinaḥ .
daṇḍadvayaṃ narapalaṃ śakrapātena tatpalam .. 87 ..

3.94.89

evaṃ triśaddinenaiva dhāturmāsaḥ prakīrtitaḥ .
abdo dvādaśabhirmāsairevaṃ tasya śatāyuṣaḥ .. 88 ..

3.94.90

brahmaṇaḥ patanenaiva nimeṣācchrīharerapi .
dhātuḥ pātānusāreṇa vaikuṇṭhe na divāniśam .. 89 ..

3.94.91

tatra sūryagatirnāsti caivaṃ golokataḥ smṛtam .
vaikuṇṭhavāsinaḥ sarve na vai jānantyaharniśam .. 90 ..

3.94.92

candrasyāpi grahāṇāṃ ca gatirnāsti ca tatra vai .
cakraṃ naiva bhramatyeva rāśīnāmicchayā hareḥ .. 91 ..

3.94.93

dinaṃ ca tejasā dīptaṃ kṛṣṇasya paramātmanaḥ .
naktaṃ tejovihīnaṃ ca harau ca mandiraṃ gate .. 92 ..

3.94.94

evaṃ kālagatistatra viṣṇuloke'sti saṃtatam .
kālasvarūpo bhagavānparamātmā nirākṛtiḥ .. 93 ..

3.94.95

candrasūryagatirnāsci pātāleṣu ca saptaṣu .
,dvāsinaśca jānanti śaṅkante na divāniśam .. 94 ..

3.94.96

dine ca mūrdhnināgānāṃ maṇirjvalati nityaśaḥ .
saṃdhyāyāṃ dīptamagniśca rātriśca tamasā''vṛtā .. 95 ..

3.94.97

kālaṃ tāmrīpramāṇena jānanti tannivāsinaḥ .
yathā bhuvi tathā tatra parimāṇaṃ prakīrtitam .. 96 ..

3.94.98

kṛtaṃ tretā dvāparaṃ ca kaliśceti caturyugam .
divyairdvādaśasāhasrairvatsaraiścāpi tanmitam .. 97 ..

3.94.99

aṣṭau śatānyapyadhikaṃ sahasrāṇāṃ catuṣṭayam .
divyairvarṣaiḥ kṛtayugaṃ kālavidbhirnirūpitam .. 98 ..

3.94.100

aṣṭāviṃśatsahasrāṇyapyadhikaṃ parimāṇakam .
lakṣāṇāṃ ca saptadaśaṃ nṛmānaṃ parikīntitam .. 99 ..

3.94.101

adhikaṃ ṣaṭśatānyeva sahasrāṇāṃ trayaṃ tathā .
divyairvarṣaiśca treteti vatsa kālavido viduḥ .. 100 ..

3.94.102

ṣaṇṇavatisahasrāṇi lakṣairdvādaśabhiḥ saha .
nṛṇāṃ varṣaiśca treteti kālavidbhiḥ prakīrtitaḥ .. 101 ..

3.94.103

catuṣṭayaṃ śatānāṃ cāpyadhikaṃ dvisahasrakam .
varṣa divyaṃ dvāparaṃ ca kālajñaiḥ parikīrtitam .. 102 ..

3.94.104

catuḥṣaṣṭisahasrāṇi lakṣairaṣṭabhireva ca .
nṛṇāṃ varṣairdvāparaṃ ca kālajñaiḥ parikīrtitam .. 103 ..

3.94.105

adhikaṃ dviśataṃ caiva divyaṃ varṣasahasrakam .
evaṃmitaṃ kaliyugaṃ vatsa prājñairnirūpitam .. 104 ..

3.94.106

dvātriṃśacca sahasraṃ ca caturlakṣaṃ nṛmānakam .
varṣa ceti kaliyuge cakāra kālakovidaḥ .. 105 ..

3.94.107

lakṣairdvicatvāriṃśadbhiḥ saha viṃśatsahasrakaiḥ .
nṛmānavarṣaiḥ kālajñairvyaktameva caturyugam .. 106 ..

3.94.108

iti te kathitaṃ vatsa kālasaṃkhyānirūpaṇam .
yathāśrutaṃ yathājñānaṃ gaccha vatsa hareḥ puram .. 107 ..

3.94.109

iti śrībrahmao mahāo śrīkṛṣṇajanmakhao uttao nāradanāo rādhodvavasaṃo
kālanirūpaṇaṃ nāma ṣaṇṇvatitamo'dhyāyaḥ .. 96 ..

Linked texts (1)

Kālikāpurāṇa — Sanskrit