Brahmavaivartapurana 4.16: adhyāyaḥ 16

Brahmavaivartapurāṇa 4.16

Language: Sanskrit

adhyāyaḥ 16

4.16.1

nārāyaṇa uvāca ..

4.16.2

ityevamuktvā taṃ śīghraṃ bodhayitvā ca kṛttikāḥ ..

4.16.3

uvāca kiṃcidyuktaṃ ca vacanaṃ śaṅkarātmajaḥ .. 1 ..

4.16.4

kārtikeya uvāca ..

4.16.5

yāsyāmi śaṃkarasthānaṃ drakṣyāmi surasañcayam ..

4.16.6

mātaraṃ bandhuvargāṃścāpyājñāṃ me datta mātaraḥ .. 2 ..

4.16.7

daivādhīnaṃ jagatsarvaṃ janma karma śubhāvaham ..

4.16.8

saṃyogaśca viyogaśca na ca daivātparaṃ balam .. 3 ..

4.16.9

kṛṣṇāyattaṃ ca taddaivaṃ sa ca daivātparastataḥ ..

4.16.10

bhajanti satataṃ santaḥ paramātmānamīśvaram .. 4 ..

4.16.11

daivaṃ varddhayituṃ śaktaḥ kṣayaṃ karttuṃ svalīlayā ..

4.16.12

na daivabaddhastadbhaktaścāvināśīti nirṇayaḥ ..5..

4.16.13

tasmādbhajata govindaṃ mohaṃ tyajata duḥkhadam..

4.16.14

sukhadaṃ mokṣadaṃ sāraṃ janmamṛtyubhayāpaham .. 6 ..

4.16.15

paramānandajananaṃ mohajālanikṛntanam ..

4.16.16

śaśvadbhajanti yatsarve brahmaviṣṇuśivādayaḥ .. 7 ..

4.16.17

ko'haṃ bhavābdhau yuṣmākaṃ kā vā yūyaṃ mamātmikāḥ ..

4.16.18

tatkarmasrotasāṃ sarvaṃ puñjībhūtaṃ ca phenavat .. 8 ..

4.16.19

saṃśleṣaṃ vā viyogaṃ vā sarvamīśvaracintayā ..

4.16.20

brahmāṇḍamīśvarādhīnaṃ na svatantraṃ vidurbudhāḥ .. 9 ..

4.16.21

jalabudbudavatsarvamanityaṃ ca jagattrayam ..

4.16.22

māyāmanitye kurvanti māyayā mūḍhacetasaḥ .. 10 ..

4.16.23

santastatra na lipyante vāyuvatkṛṣṇacetasaḥ ..

4.16.24

tasmānmohaṃ parityajya cājñaptiṃ datta mātaraḥ .. 11 ..

4.16.25

ityevamuktvā tā natvā sārddhaṃ śaṅkarapārṣadaiḥ ..

4.16.26

yātrāṃ cakāra bhagavānmanasā śrīhariṃ smaran .. 12 ..

4.16.27

etasminnantare tatra dadarśa rathamuttamam ..

4.16.28

viśvakarmakṛtaṃ ramyaṃ hīrakeṇa virājitam .. 13 ..

4.16.29

sadratnasāraracitaṃ māṇikyena virājitam ..

4.16.30

pārijātaprasūnānāṃ mālājālaiśca śobhitam .. 14 ..

4.16.31

maṇīndradarpaṇaḥ śvetacāmarairatidīpitam ..

4.16.32

krīḍārhamandirai ramyaiścitritaiścitritaṃ varam .. 15 ..

4.16.33

śatacakraṃ suvistīrṇaṃ manoyāyi manoharam ..

4.16.34

prasthāpitaṃ ca pārvatyā veṣṭitaṃ pārṣadairvaraiḥ .. 16 ..

4.16.35

samāruhantaṃ yānaṃ tā hṛdayena vidūyatā ..

4.16.36

sahasā cetanāṃ prāpya muktakeśyaḥ śucā''turāḥ .. 17 ..

4.16.37

dṛṣṭvā ca svapuraḥ skandaṃ staṃbhitāścātiśokataḥ ..

4.16.38

unmattā iva tatraiva vaktumārebhire bhiyā .. 18 ..

4.16.39

kṛttikā ūcuḥ ..

4.16.40

kiṃ kurmaḥ kva ca yāsyāmo vayaṃ vatsa tvadāśrayāḥ ..

4.16.41

vihāyāsmānkva yāsi tvaṃ nāyaṃ dharmmastavādhunā .. 19 ..

4.16.42

snehena varddhito'smābhiḥ putro'smākaṃ svadharmataḥ ..

4.16.43

nāyaṃ dharmo mātṛvargānanuraktaḥ sutastyajet .. 20 ..

4.16.44

ityuktvā kṛttikāḥ sarvāḥ kṛtvā vakṣasi taṃ sutam ..

4.16.45

punarmūrcchāmavāpustāḥ sutavicchedadāruṇam .. 21 ..

4.16.46

kumāro bodhayitvā tā adhyātmavacanena vai ..

4.16.47

tābhiśca pārṣadaiḥ sārddhamāruroha rathaṃ mune .. 22 ..

4.16.48

pūrṇakumbhaṃ dvijaṃ veśyāṃ śukladhānyāni darpaṇam..

4.16.49

dadhyājyaṃ madhu lājāṃśca puṣpaṃ dūrvākṣatānsitān .. 23 ..

4.16.50

vṛṣaṃ gajendraṃ turagaṃ jvaladagniṃ suvarṇakam ..

4.16.51

pūrṇaṃ ca paripakvāni phalāni vividhāni ca .. 24 ..

4.16.52

patiputravatīṃ nārīṃ pradīpaṃ maṇimuttamam ..

4.16.53

muktāṃ prasūnamālāṃ ca sadyomāṃsaṃ ca candanam .. 25 ..

4.16.54

dadarśaitāni vastūni maṅgalāni puro mune ..

4.16.55

śṛgālaṃ nakulaṃ kumbhaṃ śavaṃ vāme śubhāvaham .. 26 ..

4.16.56

rājahaṃsaṃ mayūraṃ ca khañjanaṃ ca śukaṃ pikam ..

4.16.57

pārāvataṃ śaṅkhacillaṃ cakravākaṃ ca maṅgalam .. 27 ..

4.16.58

kṛṣṇasāraṃ ca surabhiṃ camarīṃ śvetacāmaram..

4.16.59

dhenuṃ ca vatsasaṃyuktāṃ patākāṃ dakṣiṇe śubhām.. .. 28 ..

4.16.60

nānāprakāravādyaṃ cāpyaśrauṣīnmaṃgaladhvanim ..

4.16.61

manoharaṃ ca saṃgītaṃ ghaṇṭāśaṃkhadhvaniṃ tathā .. 29 ..

4.16.62

dṛṣṭvā śrutvā maṅgalaṃ sa hyagamattātamandiram ..

4.16.63

kṣaṇenānandayuktaśca manoyāyirathena ca .. 30 ..

4.16.64

kumāraḥ prāpya kailāsaṃ nyagrodhākṣayamūlake ..

4.16.65

kṣaṇaṃ tasthau kṛttikābhiḥ pārṣadapravaraiḥ saha .. 31 ..

4.16.66

pārvatī maṃgalaṃ kṛtvā rājamārgaṃ manoharam ..

4.16.67

padmarāgairindranīlaiḥ saṃskṛtaṃ paritaḥ puram .. 32 ..

4.16.68

rambhāstambhasamūhaiśca paṭṭasūtrāṃśukaistathā ..

4.16.69

śrīkhaṇḍapallavairyuktaṃ pūrṇakumbhaiḥ suśobhitam .. 33 ..

4.16.70

pūrṇakumbhajalairvyāptaṃ siktaṃ candanavāribhiḥ ..

4.16.71

asaṃkhyaratnadīpaiśca maṇirājairvirājitam .. 34 ..

4.16.72

naṭanarttakaveśyānāmutsavaiḥ saṃkulaṃ sadā ..

4.16.73

bandibhirvipravargaiśca dūrvāpuṣpakarairyutam..35..

4.16.74

patiputravatībhiśca sādhvībhiśca samanvitam..

4.16.75

lakṣmīṃ sarasvatīṃ durgāṃ sāvitrīṃ tulasīṃ ratim..36..

4.16.76

arundhatīmahalyāṃ ca ditiṃ tārāṃ manoramām ..

4.16.77

aditiṃ śatarūpāṃ ca śacīṃ sandhyāṃ ca rohiṇīm .. 37 ..

4.16.78

anasūyāṃ tathā svāhāṃ saṃjñāṃ varuṇakāminīm..

4.16.79

ākūtiṃ ca prasūtiṃ ca devahūtiṃ ca menakām .. 38 ..

4.16.80

tāmekapāṭalāmekaparṇāṃ mainākakāminīm ..

4.16.81

vasundharāṃ ca manasāṃ puraskṛtya samāyayau.. .. 39 ..

4.16.82

rambhā tilottamā menā ghṛtācī mohinī śubhā ..

4.16.83

urvaśī ratnamālā ca suśīlā lalitā kalā .. 40 ..

4.16.84

kadambamālā surasā vanamālā ca sundarī ..

4.16.85

etāścānyāśca bahavo viprendrāpsarasāṃ gaṇāḥ .. 41 ..

4.16.86

saṃgītanarttanaparāḥ sasmitā veṣasaṃyutāḥ ..

4.16.87

karatālakarāḥ sarvā jagmurānandapūrvakam .. 42 ..

4.16.88

devāśca munayaḥ śailā gandharvāḥ kinnarāstathā ..

4.16.89

sarve yayuḥ pramuditāḥ kumārasyānumajjane .. 43 ..

4.16.90

nānāprakāravādyaiśca rudrairvā pārṣadaiḥ saha ..

4.16.91

bhairavaiḥ kṣetrapālaiśca yayau sārddhaṃ maheśvaraḥ .. 44 ..

4.16.92

atha śaktidharo hṛṣṭo dṛṣṭvā ''rātpārvatīṃ tadā ..

4.16.93

avaruhya rathāttūrṇaṃ śirasā praṇanāma ha..45..

4.16.94

taṃ padmāpramukhaṃ devīgaṇaṃ ca munikāminīm ..

4.16.95

śivaṃ ca parayā bhaktyā sarvānsaṃbhāṣya yatnataḥ .. 46 ..

4.16.96

kārttikeyaṃ śivā dṛṣṭvā kroḍe kṛtvā cucumba ca ..

4.16.97

śaṅkaraśca surāḥ śailā devyo vai śailayoṣitaḥ ..47..

4.16.98

pārvatīpramukhā devyastathā devaśca śaṅkaraḥ ..

4.16.99

śailāśca munayaḥ sarve dadustasmai śubhāśiṣaḥ .. 48 ..

4.16.100

kumāraḥ sa gaṇaiḥ sārddhamāgatya ca śivālayam ..

4.16.101

dadarśa taṃ sabhāmadhye viṣṇuṃ kṣīrodaśāyinam..49..

4.16.102

ratnasiṃhāsanasthaṃ ca ratnabhūṣaṇabhūṣitam ..

4.16.103

dharmabrahmendracandrārkavahnivāyvādibhiryutam .. 50 ..

4.16.104

īṣaddhāsyaṃ prasannāsyaṃ bhaktānugrahakārakam ..

4.16.105

stutaṃ munīndrairdevendraiḥ sevitaṃ śvetacāmaraiḥ ..51..

4.16.106

taṃ dṛṣṭvā jagatāṃ nāthaṃ bhaktinamrātmakandharaḥ ..

4.16.107

pulakānvitasarvāṃgaḥ śirasā praṇanāma ha .. 52 ..

4.16.108

vidhiṃ dharmaṃ ca devāṃśca munīndrāṃśca mudā'nvitān ..

4.16.109

praṇanāma pṛthaktatra prāpa tebhyaśśubhāśiṣaḥ .. 53 ..

4.16.110

pṛthaksaṃbhāṣya sarvāṃścāpyuvāsa kanakāsane ..

4.16.111

dadau dhanāni viprebhyaḥ pārvatyā saha śaṅkaraḥ .. 54 ..

4.16.112

iti śrībrahmavaivartte mahāpurāṇe tṛtīye gaṇapatikhaṇḍe nāradanārāyaṇasaṃvāde kārttikeyāgamanaṃ nāma ṣoḍaśo'dhyāyaḥ .. 16 ..

Linked texts (2)

Śivapurāṇa (complete text) — Sanskrit
Gaṇeśakhaṇḍa — Sanskrit