Brahmavaivartapurana 4.18: adhyāyaḥ 18

Brahmavaivartapurāṇa 4.18

Language: Sanskrit

adhyāyaḥ 18

4.18.1

nārada uvāca ..

4.18.2

nārāyaṇa mahābhāga vedavedāṃgapāraga ..

4.18.3

pṛcchāmi tvāmahaṃ kiṃcidatisandehavānyataḥ .. 1 ..

4.18.4

sutasya tridaśeśasya śaṃkarasya mahātmanaḥ ..

4.18.5

vighnanighnasya yadvighnamīśvarasya kathaṃ prabho ..2..

4.18.6

paripūrṇatamaḥ śrīmānparamātmā parātparaḥ ..

4.18.7

golokanāthaḥ svāṃśena pārvatītanayaḥ svayam..3..

4.18.8

aho bhagavatastasya mastakacchedanaṃ vibho ..

4.18.9

grahadṛṣṭyā graheśasya kathaṃ me vaktumarhasi .. 4 ..

4.18.10

nārāyaṇa uvāca ..

4.18.11

sāvadhānaṃ śṛṇu brahmannitihāsaṃ purātanam ..

4.18.12

vighneśasya babhūvedaṃ vighnaṃ yena ca nārada .. 5..

4.18.13

ekadā śaṃkaraḥ sūryyaṃ jaghāna paramaṣṭadhā ..

4.18.14

sumālimālihantāraṃ śūlena bahuvatsalaḥ .. 6 ..

4.18.15

śrīsūryyo'moghaśūlenāśanitulyena tejasā ..

4.18.16

jahau sa cetanāṃ sadyo rathācca nipapāta ha .. 7 ..

4.18.17

dadarśa kaśyapaḥ putraṃ mṛtamuttānalocanam ..

4.18.18

kṛtvā vakṣasi taṃ śokādvilalāpa bhṛśaṃ muhuḥ ..8..

4.18.19

hāhākāraṃ surāścakrurvilepurbhayakātarāḥ ..

4.18.20

andhībhūtaṃ jagatsarvaṃ babhūva tamasā vṛtam .. 9 ..

4.18.21

niṣprabhaṃ tanayaṃ dṛṣṭvā cāśapatkaśyapaḥ śivam ..

4.18.22

tapasvī brahmaṇaḥ pautraḥ prajvanbrahmatejasā .. 10 ..

4.18.23

matputrasya yathā vakṣaśchinnaṃ śūlena te'dya vai ..

4.18.24

tvatputrasya śiraśchinnaṃ bhaviṣyati na saṃśayaḥ .. 11 ..

4.18.25

śivaśca galitakrodhaḥ kṣaṇenaivāśutoṣakaḥ ..

4.18.26

brahmajñānena tatpūrṇaṃ jīvayāmāsa tatkṣaṇāt .. 12 ..

4.18.27

brahmaviṣṇumaheśānāmaṃśaśca triguṇātmakaḥ ..

4.18.28

sūryyaśca cetanāṃ prāpya samuttasthau pituḥ puraḥ .. 13 ..

4.18.29

nanāma pitaraṃ bhaktyā śaṃkaraṃ bhaktavatsalaḥ ..

4.18.30

vijñāya śambhoḥ śāpaṃ ca kaśyapaṃ sa cukopa ha .. 14 ..

4.18.31

viṣayānnaiva jagrāha kopenaivamuvāca ha ..

4.18.32

viṣayāṃśca parityajya bhaje śrīkṛṣṇamīśvaram ..15..

4.18.33

sarvaṃ tucchamanityaṃ ca naśvaraṃ ceśvaraṃ vinā ..

4.18.34

vihāya maṅgalaṃ satyaṃ vidvānnecchedamaṃgalam .. 16 ..

4.18.35

devaiśca prerito brahmā samāgatya sasambhramaḥ ..

4.18.36

bodhayitvā raviṃ tatra yuyoja viṣayeṣvajaḥ .. 17 ..

4.18.37

tasmai dattvā''śiṣaśśambhurbrahmā ca svālayaṃ mudā ..

4.18.38

jagāma kaśyapaścaiva svarāśiṃ ravireva ca .. 18 ..

4.18.39

atha mālī sumālī ca vyādhigrastau babhūvatuḥ ..

4.18.40

śvitrau galitasarvāṃgau śaktihīnau hataprabhau.. 19 ..

4.18.41

tāvuvāca svayaṃ brahmā yuvāṃ ca bhajatāṃ ravim ..

4.18.42

sūryyakopena malinau yuvāmevaṃ hataprabhau .. 20 ..

4.18.43

sūryyasya kavacaṃ stotraṃ sarvapūjāvidhiṃ vidhiḥ ..

4.18.44

jagāma kathayitvā tau brahmalokaṃ sanātanaḥ ..21..

4.18.45

tatastau puṣkaraṃ gatvā siṣevāte raviṃ mune..

4.18.46

snātvā trikālaṃ bhaktyā ca japantau mantramuttamam .. 22 ..

4.18.47

tataḥ sūryyādvaraṃ prāpya nijarūpau babhūvatuḥ ..

4.18.48

ityevaṃ kathitaṃ sarvaṃ kiṃ bhayaḥ śrotumicchasi .. 23 ..

4.18.49

iti śrībrahmavaivartte mahāpurāṇe tṛtīye gaṇapatikhaṇḍe nāradanārāyaṇasaṃvāde vighneśavighnakathanaṃnāmāṣṭādaśo'dhyāyaḥ .. 18 ..