Pramāṇa · Search · About · API

Brahmavaivartapurana 4.29: adhyāyaḥ 29

Brahmavaivartapurāṇa 4.29

Language
Sanskrit

adhyāyaḥ 29

4.29.1

nārāyaṇa uvāca ..

4.29.2

brahmaṇo vacanaṃ śrutvā praṇamya ca jagadgurum..

4.29.3

sphītastasmādvaraṃ prāpya śivalokaṃ jagāma saḥ .. 1 ..

4.29.4

lakṣayojanamūrdhvaṃ ca brahmalokādvilakṣaṇam ..

4.29.5

anirvācyasuśobhāḍhyaṃ vāyvādhāraṃ manoharam .. 2 ..

4.29.6

vaikuṇṭhaṃ dakṣiṇe yasya gaurīlokaśca vāmataḥ ..

4.29.7

yadadho dhuvalokaśca sarvalokātparaḥ smṛtaḥ .. 3 ..

4.29.8

teṣāmūrdhvaṃ ca golokaḥ pañcāśatkoṭiyojanaḥ ..

4.29.9

ata ūrdhvaṃ na lokaśca sarvopari ca sa smṛtaḥ .. 4 ..

4.29.10

manoyāyī sa yogīndraḥ śivalokaṃ dadarśa ha ..

4.29.11

upamānopameyābhyāṃ rahitaṃ mahadadbhutam ..5..

4.29.12

yogīndrāṇāṃ vareṇyaiśca siddhavidyāviśāradaiḥ..

4.29.13

koṭikalpatapaḥpūtaiḥ puṇyavadbhirniṣevitam..6..

4.29.14

veṣṭitaṃ kalpavṛkṣāṇāṃ samūhairvāñchitapradaiḥ ..

4.29.15

samūhaiḥ kāmadhenūnāmasaṃkhyānāṃ virājitam .. 7 ..

4.29.16

pārijātatarūṇāṃ ca vanarājivirājitam ..

4.29.17

puṣpodyānāyutairyuktaṃ sadā cātisuśobhitam .. 8 ..

4.29.18

maṇīndrasāraracitaiḥ śobhitairmaṇivedibhiḥ ..

4.29.19

rājamārgaśatairdivyaiḥ sarvataḥ paribhūṣitam ..9..

4.29.20

maṇīndrāsāranirmāṇaśatakoṭigṛhairyutam ..

4.29.21

nānācitravicitrāḍhyairmaṇīndrakalaśojjvalaiḥ .. 10 ..

4.29.22

tanmadhyadeśe ramye ca dadarśa śaṅkarālayam ..

4.29.23

maṇīndrasāraracitaprākāraṃ sumanoharam .. 11 ..

4.29.24

atyūrdhvamambarasparśi kṣīranīranibhaṃ param ..

4.29.25

ṣoḍaśadvārasaṃyuktaṃ śobhitaṃ śatamandiraiḥ .. 12 ..

4.29.26

amūlyaratnaracitai ratnasopānabhūṣitaiḥ ..

4.29.27

ratnastambhakapāṭaiśca hīrakeṇa pariṣkṛtaiḥ .. 13 ..

4.29.28

māṇikyajālamālābhiḥ sadratnakalaśojjvalaiḥ ..

4.29.29

nānāvicitracitreṇa citritaiḥ sumanoharaiḥ .. 14 ..

4.29.30

ālayasya purastatra siṃhadvāraṃ dadarśa saḥ ..

4.29.31

ratnendrasārakhacitakapāṭaiśca virājitaiḥ .. 15 ..

4.29.32

śobhitaṃ vedikābhiśca bāhyābhyantarataḥ sadā ..

4.29.33

racitābhiḥ padmarāgairmahāmarakatairgṛham .. 16 ..

4.29.34

nānāprakāracitreṇa citritaṃ sumanoharam ..

4.29.35

karālarūpāvadrākṣīd dvārapālau bhayaṃkarau .. .. 17 ..

4.29.36

mahākarāladantāsyau viraktau raktalocanau ..

4.29.37

dagdhaśailapratīkāśau mahābalaparākramau .. 18 ..

4.29.38

vibhūtibhūṣitāṃgau ca vyāghracarmāmbarau varau ..

4.29.39

piṅgalākṣau viśālākṣau jaṭilau ca trilocanau ..19..

4.29.40

triśūlapaṭṭiśadharau jvalantau brahmatejasā ..

4.29.41

tau dṛṣṭvā manasā bhītastrastaḥ kiñciduvāca ha .. 20 ..

4.29.42

vinayena vinītaśca durvinītau mahābalau ..

4.29.43

ātmanaḥ sarvavṛttāntaṃ kathayāmāsa tatpuraḥ .. .. 21 ..

4.29.44

viprasya vacanaṃ śrutvā kṛpāyuktau babhūvatuḥ ..

4.29.45

gṛhītvā''jñāṃ caradvārā śaṃkarasya mahātmanaḥ .. 22 ..

4.29.46

praveṣṭumājñāṃ dadaturīśvarānucarau varau ..

4.29.47

bhṛgustadājñāmādāya praviveśa hariṃ smaran .. 23 ..

4.29.48

pratyekaṃ ṣoḍaśa dvāro dadarśa sumanoharāḥ ..

4.29.49

dvārapālairniyuktāśca nānācitravicitritāḥ .. 24 ..

4.29.50

dṛṣṭvā tā mahadāścaryyādapaśyacchūlinaḥ sabhām ..

4.29.51

nānāsiddhagaṇākīrṇāṃ maharṣigaṇasevitām .. 25 ..

4.29.52

pārijātasugandhāḍhyavāyunā surabhīkṛtām ..

4.29.53

dadarśa tatra deveśaṃ śaṅkaraṃ candraśekharam .. 26 ..

4.29.54

triśūlapaṭṭiśadharaṃ vyāghracarmāmbaraṃ param..

4.29.55

vibhūtibhūṣitāṃgaṃ taṃ nāgayajñopavītinam ..

4.29.56

ratnasiṃhāsanasthaṃ ca ratnabhūṣaṇabhūṣitam ..27..

4.29.57

mahāśivaṃ śivakaraṃ śivabījaṃ śivāśrayam..

4.29.58

ātmārāmaṃ pūrṇakāmaṃ sūryyakoṭisamaprabham .. 28 ..

4.29.59

īṣaddhāsyaṃ prasannāsyaṃ bhaktānugrahakātaram ..

4.29.60

śaśvajjyotissvarūpaṃ ca lokānugrahavigraham..29..

4.29.61

dhṛtavantaṃ jaṭājālaṃ dakṣakanyāsamanvitam ..

4.29.62

tapasāṃ phaladātāraṃ dātāraṃ sarvasampadām ..30..

4.29.63

śuddhasphaṭikasaṃkāśaṃ pañca vaktraṃ trilocanam ..

4.29.64

guhyaṃ brahma pravocantaṃ śiṣyebhyastattvamudrayā .. 31 ..

4.29.65

stūyamānaṃ ca yogīndraiḥ siddhendraiḥ parisevitam ..

4.29.66

pārṣadapravaraiśśaśvatsevitaṃ śvetacāmaraiḥ..32..

4.29.67

dhyāyamānaṃ paraṃ brahma paripūrṇatamaṃ param..

4.29.68

svecchāmayaṃ guṇātītaṃ jarāmṛtyuharaṃ param..33..

4.29.69

jyotīrūpaṃ ca sarvādyaṃ śrīkṛṣṇaṃ prakṛteḥ param ..

4.29.70

dhyāyantaṃ paramānandaṃ pulakāñcitavigraham ..

4.29.71

susvaraṃ sāśrunetraṃ tamudgāyantaṃ guṇārṇavam .. 34 ..

4.29.72

bhūtendrairvai rudragaṇaiḥ kṣetrapālaiśca veṣṭitam ..

4.29.73

mūrdhnā nanāma paraśurāmo dṛṣṭvā tamādarāt .. 35 ..

4.29.74

tadvāme kārttikeyaṃ ca dakṣiṇe ca gaṇeśvaram ..

4.29.75

nandīśvaraṃ mahākālaṃ vīrabhadraṃ ca tatpuraḥ ..

4.29.76

aṃke dadarśa kāntāṃ tāṃ gaurīṃ śailendrakanyakām .. 36 ..

4.29.77

nanāma sarvānmūrdhnā ca bhaktyā ca parayā mudā ..

4.29.78

dṛṣṭvā haraṃ paraṃ toṣātstotuṃ samupacakrame ..37..

4.29.79

sagadgadapadaṃ dīnassāśrunetro'tikātaraḥ ..

4.29.80

kṛtāñjalipuṭaḥ śāntaḥ śokārtaḥ śokanāśanam .. 38 ..

4.29.81

paraśurāma uvāca ..

4.29.82

īśa tvāṃ stotumicchāmi sarvathā stotumakṣamaḥ ..

4.29.83

akṣarākṣayabījaṃ ca kiṃ vā staumi nirīhakam ..39..

4.29.84

na yojanāṃ karttumīśo deveśaṃ staumi mūḍhadhīḥ ..

4.29.85

vedā na śaktā yaṃ stotuṃ kastvāṃ stotumiheśvaraḥ .. ..40..

4.29.86

vāgbuddhimanasāṃ dūraṃ sārātsāraṃ parātparam ..

4.29.87

jñānamātreṇa sādhyaṃ ca siddhaṃ siddhairniṣevitam.. 41..

4.29.88

yamākāśamivādyantamadhyahīnaṃ tathā'vyayam ..

4.29.89

viśvatantramatantraṃ ca svatantraṃ tantrabījakam .. 42 ..

4.29.90

dhyānāsādhyaṃ durārādhyamatisādhyaṃ kṛpānidhim ..

4.29.91

trāhi māṃ karuṇāsindho dīnabandho'tidīnakam .. 43 ..

4.29.92

adya me saphalaṃ janma jīvitaṃ ca sujīvitam ..

4.29.93

svapne'pyadṛṣṭaṃ bhaktaiścādhunā paśyāmi cakṣuṣā .. 44 ..

4.29.94

śakrādayaḥ suragaṇāḥ kalayā yasya sambhavāḥ ..

4.29.95

carācarāḥ kalāṃśena taṃ namāmi maheśvaram .. 45 ..

4.29.96

strīrūpaṃ klībarūpaṃ ca pauruṣaṃ ca bibharti yaḥ ..

4.29.97

sarvādhāraṃ sarvarūpaṃ taṃ namāmi maheśvaram .. 46 ..

4.29.98

yaṃ bhāskarasvarūpaṃ ca śaśirūpaṃ hutāśanam ..

4.29.99

jalarūpaṃ vāyurūpaṃ taṃ namāmi maheśvaram .. 47 ..

4.29.100

anantaviśvasṛṣṭīnāṃ saṃhartāraṃ bhayaṃkaram ..

4.29.101

kṣaṇena līlāmātreṇa taṃ namāmi maheśvaram ..48..

4.29.102

yaḥ kālaḥ kālakālaśca kalirbījaṃ ca kālajaḥ..

4.29.103

ajaḥ prajaśca yaḥ sarvastaṃ namāmi maheśvaram..49..

4.29.104

ityevamuktvā sa bhṛguḥ papāta caraṇāmbuje ..

4.29.105

āśiṣaṃ ca dadau tasmai suprasanno babhūva saḥ .. 50 ..

4.29.106

jāmadagnyakṛtaṃ stotraṃ yaḥ paṭhedbhaktisaṃyutaḥ ..

4.29.107

sarvapāpavinirmuktaḥ śivalokaṃ sa gacchati .. 51 ..

4.29.108

iti śrībrahmavaivarte mahāpurāṇe tṛtīye gaṇapatikhaṇḍe nāradanārāyaṇasaṃvāde paraśurāmasya kailāsagamananāmaikonatriṃśo'dhyāyaḥ .. 29 ..

Linked texts (1)