Pramāṇa · Search · About · API

Dashamaskandha 1

Daśamaskandha 1

Language
Sanskrit

Contents

1.5

kaścinmahānahistasmin vipine'tibubhukṣitaḥ
yadacchayāgato nandaṃ śayānamurago'grasīt

1.6

sa cukrośā'hinā grastaḥ kṛṣṇa ! kṛṣṇa ! mahānayam
sarpo māṃ grasate tāta ! prapannaṃ parimocaya

1.7

tasya cākranditaṃ śrutvā gopālāḥ sahasotthitāḥ
grastaṃ ca dṛṣṭvā nibhrāntāḥ sarpaṃ vivyadhurulmukaiḥ

1.8

alātairdahyamāno'pi nāmuñcattamuraṅgamaḥ
tamaspṛśatpadābhyetya bhagavān sātvatāṃ patiḥ

1.9

sa vai bhagavataḥ śrīmatpādasparśahatāśubhaḥ
bheje sarpavapurhitvā rūpaṃ vidyādharā'rcitam

1.10

tamapṛcchadṛṣīkeśaḥ praṇāmaṃ samupasthitam
dīpyamānena vapuṣā puruṣaṃ hemamālinam

1.11

ko bhavān parayā lakṣmyā rocate 'dbhutadarśanaḥ 1
kathaṃ jugupsitāmetāṃ gatiṃ vā prāpito'vaśaḥ

1.12

sarpa uvāca
ahaṃ vidyādharaḥ kaścit sudarśana iti śrutaḥ
śriyā svarūpasaṃpattyā vimānenācaraṃ diśaḥ

1.13

ṛṣīn virūpānaṅgirasaḥ prāhasaṃ rūpadarpitaḥ
tairaimāṃ prāpito yoniṃ pralabdhaiḥ svena pāpmanā

1.14

śāpo me'nugrahāyaiva kṛtastaiḥ karuṇātmabhiḥ
yadahaṃ lokaguruṇā padāspṛṣṭo hatāśubhaḥ

1.15

taṃ tvāhaṃ bhayabhītānāṃ prapannānāṃ bhayārpaham
āpṛcche śāpanirmuktaḥ pādasparśādamīvahan !

1.16

prapanno'smi mahāyogin mahāpuruṣa satpate !
anujānīhi māṃ deva ! sarvalokeśvareśvara !
brahmadaṇḍādvimukto'haṃ sadyaste'cyuta ! darśanāt

1.17

yannāma gṛhṇannakhilān śrotṝnātmānameva ca
sadyaḥ punāti kiṃ bhūyastasya spṛṣṭaḥ padā hi te

1.18

ityanujñāpya dāśārhaṃ parikramyābhivandya ca
sudarśano divaṃ yātaḥ kṛcchrānnandaśca mocitaḥ

1.19

niśamya kṛṣṇasya tadātmavaibhavaṃ brajaukaso vismitacetasastataḥ
samāpya tasminniyamaṃ punarvrajaṃ nṛpāyayustatkathayanta ākṛtāḥ

1.20

kadācidatha govindo rāmaścādbhutavikramaḥ
vijahraturvane rātryāṃ madhyagau brajayoṣitām

1.21

upagīyamānau lalitaṃ strījanairbaddhasauhṛdaiḥ
svalaṃkṛtānuliptāṅgausragviṇau virajo'mbarau

1.22

niśāmukhaṃ mānayantāvuditoḍupatārakam
mallikāgandhamattālijuṣṭaṃ kumudavāyunā

1.23

jagatuḥ sarvabhūtānāṃ manaḥśravaṇāmaṅgalam
tau kalpayantau yugapatsvaramaṇḍalamūrcchitam

1.24

gopyastadgītamākarṇya mūrcchitā nāvidannṛpa !
sraṃsaddukūlamātmānaṃ srastakeśasrajaṃ tataḥ

1.25

evaṃ vikrīḍatoḥ svairaṃ gāyatoḥ saṃpramattavat
śaṅkhacūḍa iti khyāto dhanadānucaro 'bhyagāt

1.26

tayornirīkṣatau rājaṃstannāthaṃ pramadājanam
krośantaṃ kālayāmāsa diśyudīcyāmaśaṅkitaḥ

1.27

krośantaṃ kṛṣṇarāmeti vilokya svaparigraham
yathā gā dasyunā grastā bhrātarāvanvadhāvatām

1.28

mābhaiṣṭetyabhayārāvau śālahastau tarasvinau
āsedatustaṃ tarasā tvaritaṃ guhyakādhamam

1.26-2

sa vīkṣya tāvanuprāptau kālamṛtyū ivodvijan
visṛjya strījanaṃ mūḍhaḥ prādravajjīvitecchayā

1.30

tamanvadhāvadgovindo yatra yatra sa dhāvati
jihīrṣustacchiroratnaṃ tasthau rakṣan striyo balaḥ

1.31

avidūra ivābhyetya śirastasya durātmanaḥ
jahāra muṣṭinaivāṅga ! sahacūḍāmaṇiṃ vibhuḥ

1.32

śaṅkhacūḍaṃ nihatyaivaṃ maṇimādāya bhāsvaram
agrajāyādadatprītyā paśyantīnāṃ ca yoṣitām

1.32.p1

iti śrīmadbhāgavate mahāpurāṇe daśamaskandhe pūrvārdhe śaṅkhacūḍavadhonāma catustriṃśattamo'dhyāyaḥ

1.32.p2

itiśrīmadbhāgavate daśamaskandhe pūrvārdhe catustriṃśo'dhyāyaḥ || 34

Linked texts (5)