Dashamaskandha 10
Daśamaskandha 10
- Language
- Sanskrit
Contents
- 10.30 — 1 part
10.1
catvāriṃśo'dhyāyaḥ
śrīśuka uvāca
“evaṃ dṛṣṭvā tamakrūraḥ prasannahṛdayendriyaḥ
tuṣṭāva puṇḍarīkākṣaṃ bhaktyāvanatakandharaḥ ||”
“ayaṃ vijayadhvaja pāṭhaḥ”
akrūra uvāca
nato'smyahaṃ tvākhilahetuhetuṃ nārāyaṇaṃ pūruṣamādyamavyayam
yannābhijātādaravindakośādbrahmāvirāsīdyata eṣa lokaḥ
10.2
bhūstoyamagniḥ pavanaḥ khamādirmahānajādirmanaindriyāṇi
sarvendriyārthā vibudhāśca sarve ye hetavaste jagato'ṅgabhūtāḥ
10.3
naite svarūpaṃ vidurātmanaste tvajādayo 'nātmatayā gṛhītāḥ
ajo'nubaddhaḥ sa guṇairajāyā guṇātparaṃ veda na te svarūpam
10.4
tvāṃ yogino yajantyaddhā mahāpuruṣamīśvaram
sādhyātmaṃ sādhibhūtaṃ ca sādhidaivañca sādhavaḥ
10.5
trayyā ca vidyayā kecintvāṃ vai vaitānikā dvijāḥ
yajante vitatairyajñairnānārūpamarākhyayā
10.6
1eke tvākhilakarmāṇi sannyasyopaśamaṃ gatāḥ
jñānino jñānayajñena yajanti jñānavigraham
10.7
anye ca saṃskṛtātmāno vidhinābhihitena te
yajanti tvanmayāstvāṃ vai bahumūrtyekamūrtikam
10.8
tvāmevānye śivoktena mārgeṇa śivarūpiṇam
bahvācāryavibhedena bhagavan ! samupāsate
10.9
ye'pyanyadevatā bhaktāyajante śraddhayānvitāḥ
te'pi māmeva kaunteya ! yajantyavidhipūrvakam
sarva eva yajanti tvāṃ sarvadevamayeśvaram
ye'pyanyadevatābhaktā yadyapyanyadhiyaḥ prabho !
10.10
yathādriprabhavā nadyaḥ parjanyāpūritāḥ prabho !
viśanti sarvataḥ sindhuṃ tadvattvāṃ gatayo'ntataḥ
10.11
sattvaṃ rajastama iti bhavataḥ prakṛterguṇāḥ
teṣu hi prākṛtāḥ protā ābrahmasthāvarādayaḥ
10.12
tubhyaṃ namaste'stvaviṣaktadṛṣṭaye sarvātmane sarvadhiyāñca sākṣiṇe
guṇapravāho 'yamavidyayā kṛtaḥ pravartate devanṛtiryagātmasu
10.13
agnirmukhaṃ te 'vanirhaṅghrīkṣaṇaṃ sūryo nabho nābhirathodiśaḥ śrutiḥ
dyauḥ kaṃ surendrāstava bāhavo'rṇavāḥ kukṣirmarutprāṇabalaṃ prakalpitam
10.14
romāṇi vṛkṣauṣadhayaḥ śiroruhā meghāḥ parasyāsthinakhāni te 'drayaḥ
nimeṣaṇaṃ rātryahanī prajāpatirmeḍhrastu vṛṣṭistava vīryamiṣyate
10.15
tvayyavyayātman ! puruṣe prakalpitā lokāḥ sapālā bahujīvasaṅkulāḥ
yathā jale sañcihate jalaukaso'pyudumbare vā maśakā manomaye
10.16
yāni yānīha rūpāṇi krīḍanārthaṃ bibharṣi hi
tairāmṛṣṭaśuco lokā mudā gāyanti te yaśaḥ
10.17
namaḥ kāraṇamatsyāya pralayābdhicarāya ca
hayaśīrṣṇe namastubhyaṃ madhukaiṭabhamṛtyave
10.18
akūpārāya vṛhate namo mandaradhāriṇe
kṣityuddhāravihārāya namaḥ sūkaramūrttaye
10.19
namaste'dbhutasiṃhāya sādhulokabhayāpaha !
vāmanāya namastubhyaṃ krāntatribhuvanāya ca
10.20
namo bhṛgūṇāṃ pataye dṛptakṣatravanācchide
namaste raghuvaryāya rāvaṇāmtakarāya ca
10.21
namaste vāsudevāya namaḥ saṅkarṣaṇāya ca
pradyumnāyāniruddhāya sātvatāmpataye namaḥ
10.22
namo buddhāya śuddhāya daityadānavamohine
mlecchaprāyakṣatrahantre namaste kalkirūpiṇe
10.23
bhagavan ! jīvaloko'yaṃ mohitastava māyayā
ahaṃ mametyasadgrāho bhrāmyate karmavartmasu
10.24
ahaṃ cātmātmajāgāradārārthasvajanādiṣu
bhramāmi svapnakalpeṣu mūḍhaḥ satyadhiyā vibho !
10.25
anityānātmaduḥkheṣu viparyayamatirhyaham
dvandvārāmastamoviṣṭo na jāne tvātmanaḥ priyam
10.26
yathābudho jalaṃ hitvā praticchannaṃ tadudbhavaiḥ
abhyeti mṛgatṛṣṇāṃ vai tadvattvāhaṃ parāṅmukhaḥ
10.27
notsahe'haṃ kṛpaṇadhīḥ kāmakarmahataṃ manaḥ
roddhuṃ pramāthibhiścākṣairhriyamāṇamitastataḥ
10.28
so'haṃ tavāṅghryupagato'smyasatāṃ durāpaṃ taccāpyahaṃ bhavadanugraha īśa ! manye
puṃso bhavedyarhi saṃsaraṇāpavargastvayyabjanābha ! sadupāsanayā matiḥ syāt
10.29
namo vijñānamātrāya sarvapratyayahetave
puruṣeśapradhānāya brahmaṇe 'nantaśaktaye
10.30
namaste vāsudevāya sarvabhūtakṣayāya ca
hṛṣīkeśa ! namastubhyaṃ prapannaṃ pāhi māṃ prabho !
10.30.p1
iti śrīmadbhāgavate mahāpurāṇe daśamaskandhe pūrvārdhe akrūrastutirnāma catvāriṃśo'dhyāyaḥ
Linked texts (3)
- Bhāgavatamāhātmya — Kṛṣṇacandra, Sanskrit
- Bhāgavatapurāṇa daśamaskandha — Sanskrit
- Bhāgavatakathāsāptāhika — Śrīrāmamūrti Śāstrī Paurāṇika, Sanskrit