Pramāṇa · Search · About · API

Dashamaskandha 12

Daśamaskandha 12

Language
Sanskrit

Contents

12.1

ekacatvāriṃśo'dhyāyaḥ
śrīśuka uvāca
stuvatastasya bhagavān darśayitvā jale vapuḥ
bhūyaḥ samāharat kṛṣṇo naṭo nāṭyamivātmanaḥ

12.2

so'pi cāntarhitaṃ vīkṣya jalādunmajjya satvaraḥ
kṛtvā cāvaśyakaṃ sarvaṃ vismito rathamāgamat

12.3

tamapṛcchaddhṛṣīkeśaḥ kiṃ te dṛṣṭamivādbhutam
bhūmau viyati toye vā tathā tvāṃ lakṣayāmahe

12.4

akrūra uvāca
adbhutānīha yāvanti bhūmau viyati vā jale
tvayi viśvātmake tāni kiṃ me 'dṛṣṭaṃ vipaśyataḥ

12.5

yatrādbhutāni sarvāṇi bhūmau viyati vā jale
taṃ tvā'nupaśyato brahman kiṃ me dṛṣṭamihādbhutam

12.6

ityuktvā codayāmāsa syandanaṃ gāndinīsutaḥ
mathurāmanayadrāmaṃ kṛṣṇaṃ caiva dinātyaye

12.7

mārge grāmajanā rājaṃstatra tatropasaṅgatāḥ
vasudevasutau vīkṣya prītā dṛṣṭiṃ nacādaduḥ

12.8

tāvadvrajaukasastatra nandagopādayā'grataḥ
puropavanamāsādya pratīkṣanto'vatasthire

12.6-2

gamayāmāsa tato rāmaṃ kṛṣṇaṃ ca dinātyaye dināvasāne śrīmathurāṃ
prāpayāmāsa

12.7-2

tadā tatra mārge grāmeṣu janāḥ vasudevasya sutau rāmakṛṣṇauvupasaṃgatāḥ saktaḥ tau dṛṣṭvā prītāḥ dṛṣṭi nādaduḥ na pratyājahuḥ
paśyanta eva sthitā ityarthaḥ

12.8-2

tāvaditi | yāvadrāmakṛṣṇau mathurāmanayat tāvadeva tataḥ
pūrvameva nandādayo gopāḥ upavanaṃ prāpya śrīrāmakṛṣṇagamanaṃ pratīkṣamāṇāḥ sthitāḥ

12.9

tān sematyaha bhagavānakrūraṃ jagadīśvaraḥ
gṛhītvā pāṇinā pāṇiṃ praśritaṃ prahasanniva

12.10

bhavān praviśatāmagre sahayānaḥ purīṃ gṛham
vayaṃ tvihāvamucyātha tato drakṣyāmahe purīm

12.11

akrūra uvāca
nāhaṃ bhavadbhyā rahitaḥ pravekṣye mathurāṃ prabho !
tyaktuṃ nārhasi māṃ nātha ! bhaktaṃ te bhaktavatsala !

12.12

āgaccha yāma gehān naḥ sanāthān kurvadhokṣaja !
sahāgrajaḥ sagopālaiḥ suhṛdbhiśca suhṛttama !

12.13

punīhi pādarajasā gṛhānno gṛhamedhinām
yacchaucenāmṛtṛpyanti pitaraḥ sāgnayaḥ surāḥ

12.14

avanirjyāṅghriyugalamāsīcchūlo'kiyo balirmahān
aiśvaryamatulaṃ lebhe gatiṃ caikāntināṃ tu yā

12.15

āpaste'ṅghryavanejinyastrīṃllokāṃñchucayo'punan
śirasādhatta yāḥ śarvaḥ svargātāḥ sagarātmajāḥ

12.16

devadeva ! jagannātha ! puṇyaśravaṇakīrttana !
yadūtamottamaśloka ! nārāyaṇa ! namo'stu te

12.17

śrībhagavānuvāca
āyāsye bhavato gehamahamāryasamanvitaḥ
yaducakradruhaṃ hatvā vitariṣye suhṛtpriyam

12.18

śrīśuka uvāca
evamukto bhagavatā so'krūro vimanā iva
purīṃ praviṣṭaḥ kaṃsāya karmāvedya gṛhaṃ yayau

12.16-2

athāparāhne bhagavān kṛṣṇaḥ saṅkarṣaṇānvitaḥ
mathurāṃ prāviśadgopairdikṣuḥ parivāritaḥ

12.20

dadarśa tāṃ sphāṭikatuṅkagopuradvārāṃ vṛhaddhemakapāṭatoraṇām
tāmrārakoṣṭhāṃ parikhādurāsadāmudyānaramyopavanopaśobhitām

12.21

sauvarṇaśṛṅgāṭakaharmyaniṣkuṭaiḥ śreṇīsabhābhirbhavanairupaskṛtām
vaidūryavajrāmalanīlavidrumairmuktāharidbhirvalabhīṣu vediṣu

12.22

juṣṭeṣu jālāmukharandhrakuṭṭimeṣvāviṣṭapārāvatabarhināditām
saṃsiktarathyāpaṇamārgacatvarāṃ prakīrṇamālyāṅkuralājataṇḍulām

12.23

āpūrṇakumbhairdadhicandanokṣitaiḥ prasūnadīpāvalibhiḥ sapallavaiḥ
savṛndarambhākramukaiḥ saketubhiḥ svalaṃkṛtadvāragṛhāṃ sapaṭṭikaiḥ

12.24

tāṃ sampraviṣṭā vasudevandanau vṛtau vayasyairnaradevavartmanā
draṣṭuṃ samīyustvaritāḥ purastriyo harmyāṇi caivāruruhurnṛpotsukāḥ

12.24-2

yā pūrve karṇārkarṇisaundaryā tāṃ naradevavartmanā rājamārgeṇa

12.25

kāścidviparyyadhṛtavastrabhūṣaṇā vismṛtya caikaṃ yugaleṣvathāparāḥ
kṛtaikapatraśravaṇaikanūpurā nāṅktvā dvitīyaṃ tvaparāśca locanam

12.26

aśnantya ekāstadapāsya sotsavā abhyajyamānā akṛtopamajjanāḥ |'
svapantya utthāya niśamya niḥsvanaṃ prapāyayantyo 'rbhamapohya mātaraḥ

12.27

manāṃsi tāsāmaravindalocanaḥ pragalbhalīlāhasitāvalokanaiḥ
jahāra mattadviradendravikramo dṛśāṃ dadacchrīmadraṇātmanotsavam

12.28

dṛṣṭvā muhuḥ śrutamanudrutacetasastaṃ tatprekṣaṇossmitasudhokṣaṇalabdhamānāḥ
ānandamūrttimupaguhya dṛśātmalabdhaṃ hṛṣyattvaco jahuranantamarindamādhim

12.28.p1

śrīmadbhāgavatam

12.28.p2

[ ekacatvāriṃśaḥ ]

12.29

prāsādaśikharārūḍhāḥ prītyutphullamukhāmbujāḥ
abhyavarṣan saumanasyaiḥ pramadā valakeśavau

12.30

dadhyakṣataiḥ sodapātraiḥ sraggandhairabhyupāyanaiḥ
tāvānarcuḥ pramuditāstatra tatra dvijātayaḥ

12.31

1ūcuḥ paurā aho gopyastapaḥ kimacaranmahat
yā hyetāvanupaśyanti naralokamahotsavau

12.32

rajakaṃ kañcidāyāntaṃ raṅgakāraṃ gadāgrajaḥ
dṛṣṭvā'yācata vāsāṃsi dhautānyatyuttamāni ca

12.30-2

dvijātayo brāhmaṇastatra tatra pramuditāḥ satyaḥ dadhyādibhistau rāmakṛṣṇavāṇarcuḥ

12.31-2

paurāḥ striyaḥ parasparamūcuḥ uktimevāha | aho ityādinā | gopyaḥ
kiṃ mahatpañcaśvakruḥ anyathaitanna sambhāvyata ityabhipretyāhuḥ | yā gopyaḥ
naralokasya mahānutsavo yābhyāṃ tau rāmakṛṣṇāyanupaśyanti

12.32-2

itthaṃ tāsu kathayantīṣu satīṣu tadā gadāgrajo bhagavān kañcidāyāntaṃ rajako vastranirṇejakaḥ sa eva vastrāṇāṃ raṅgamapi kurvan
raṅgakārastaṃ dṛṣṭvā dhautāni nirṇitāni adbhutāni vastrāṇi ayācata

12.33

dehmāvayoḥ samucitānyaṅga ! vāsāṃsi cārhatoḥ
bhaviṣyati paraṃ śreyo dātuste nātra saṃśayaḥ

12.34

sa yācito bhagavatā paripūrṇena sarvataḥ
sākṣepaṃ ruṣitaḥ prāha bhṛtyo rājñaḥ sudurmadaḥ

12.35

īdṛśānyeva vāsāṃsi nityaṃ girivanecarāḥ
paridhatta kimunmattā rājadravyāṇyabhīpsatha

12.36

yātāśu bāliśā maivaṃ prārthyaṃ yadi jijīviṣā
badhnanti ghnanti lumpanti dṛptaṃ rājakulāni vai

12.37

evaṃ vikatthamānasya kupito devakīsutaḥ
rajakasya karāgreṇa śiraḥ kāyādapātayat

12.38

tasyānujīvinaḥ sarve vāsaḥkośān visṛjya vai
dudruvuḥ sarvato mārgaṃ vāsāṃsi jagṛhe 'cyutaḥ

12.39

vasitvātmapriye vastre kṛṣṇaḥ saṅkarṣaṇastathā
śeṣāṇyādatta gopebhyo visṛjya bhuvi kānicit

12.40

tatastu vāyakaḥ prītastayorveṣamakalpayat
vicitravarṇaiścailaiyairākalpairanurūpataḥ

12.41

nānālakṣṇairvaṣairbhāyāṃ kṛṣṇarāmau virejatuḥ
svalaṃkṛtau bālagajau parvaṇīva sitetarau

12.42

tasya prasanno bhagavān prādāttārūpyamātmanaḥ
śriyaṃ ca paramāṃ loke balaiśvaryyasmṛtīndriyam

12.43

tataḥ sudāmno bhavanaṃ mālākārasya jagmatuḥ
tau dṛṣṭvā sa samutthāya nanāma śirasā bhuvi

12.44

tayorāsanamānīya pādyaṃ cārghyārhaṇādibhiḥ
pūjāṃ sānugayoścakre sraktāmbūlāmulepanaiḥ

12.45

prāha naḥ sārthakaṃ janma pāvitaṃ ca kulaṃ prabho !
pitṛdevarṣayo mahyaṃ tṛptā hyāgamanena vām

12.46

bhavantau kila viśvasya jagataḥ kāraṇaṃ param
avatīrṇāvihāṃśena kṣemāya ca bhavāya ca

12.47

na hi vāṃ viṣamā dṛṣṭiḥ suhṛdorjagadātmanoḥ
samayoḥ sarvabhūteṣu bhajantaṃ bhajaṃtorapi

12.48

tāvājñāpayataṃ bhṛtyaṃ kimahaṃ karavāṇi vām
puṃso'tyanugraho hyeṣa bhavadbhiryanniyujyate

12.49

ityabhipretya rājendra ! sudāmā prītamānasaḥ
śastaiḥ sugandhaiḥ kusumairmālā viracitā dadau

12.50

tābhiḥ svalaṃkṛtau prītau kṛṣṇarāmau sahānugau
praṇatāya prapannāya dadaturvaradau varān

12.51

so'pi vavre 'calāṃ bhaktiṃ tasminnevākhilātmani
tadbhakteṣu ca sauhārdaṃ bhūteṣu ca dayāṃ parām

12.52

iti tasmai varaṃ dattvā śriyaṃ cānvayavardhinīm
balamāyuryaśaḥ kāntiṃ nirjagāma sahāgrajaḥ

12.52.p1

iti śrīmadbhāgavate mahāpurāṇe daśamaskandhe pūrvārdhe mathurāpurapraveśo nāma ekacatvāriṃśo'dhyāyaḥ

Linked texts (8)