Dashamaskandha 15
Daśamaskandha 15
- Language
- Sanskrit
Contents
- 15.40 — 2 parts
15.1
śrīśuka uvāca
atha kṛṣṇaśca rāmaśca kṛtaśaucau parantapa !
malladundubhinirghoṣaṃ śrutvā draṣṭumupeyatuḥ
15.2
raṅgadvāraṃ samāsādya tasminnāgamavasthitam
apaśyatkuvalayāpīḍaṃ kṛṣṇo'mbaṣṭhapracoditam
15.3
baddhvā parikaraṃ śauriḥ samuhya kuṭilālakān
uvāca hastipaṃ vācā meghanādagabhīrayā
15.4
ambaṣṭhāmvaṣṭha ! mārgaṃ nau dehyapakramamāciram
nocetsakuñjaraṃ tvā'dya nayāmi yamasādanam
15.5
evaṃ nirbhartsito'mbaṣṭhaḥ kupitaḥ kopitaṃ gajam
codayāmāsa kṛṣṇāya kālāntakayamopamam
15.6
karīndrastamabhidrutya kareṇa tarasā 'grahīt
karādvigalitaḥ so'dhuṃ nihatyāṅghriṣvalīyata
15.7
saṃkruddhastamacakṣāṇo ghrāṇadṛṣṭiḥ sa keśavam
parāmṛśatpuṣkareṇa sa prasahya vinirgataḥ
15.8
pucche pragṛhyātibalaṃ dhanuṣaḥ pañcaviṃśatim
vicakarṣa yathā nāgaṃ suparṇa iva līlayā
15.9
sa paryāyavarttamānena savyadakṣiṇato'cyutaḥ
babhrāma bhrāmyamāṇena govatseneva bālakaḥ
15.10
tato'bhimukhamabhyetya pāṇināhatya vāraṇam
prādravan pātayāmāsa spṛśyamānaḥ pade pade
15.11
sa dhāvan krīḍayā bhūmau patitvā sahasotthitaḥ
taṃ matvā patitaṃ kruddho dantābhyāṃ so'hanat kṣitim
15.12
svavikrame pratihate kuñjarendro'tyamarṣitaḥ
codyamāno mahāmātraiḥ kṛṣṇamabhyadravadruṣā
15.13
tamāpatantamāsādya bhagavān madhusūdanaḥ
nigṛhya pāṇinā hastaṃ pātayāmāsa bhūtale
15.14
patitasya padākramya mṛgendra iva līlayā
dantamutpāṭya tenebhaṃ hastipāṃścāhanaddhariḥ
15.15
mṛtakaṃ dvipamutsṛjya dantapāṇiḥ samāviśat
aṃsanyastaviṣāṇo'sṛṅmadabindubhiraṅkitaḥ
virūḍhasvedakaṇikāvadanāmburuho babhau
15.16
vṛtau gopaiḥ katipayairbaladevajanārdanau
raṅgaṃ viviśatū rājan ! gajadantavarāyudhau
15.17
mallānāmaśanirnṛṇāṃ naravaraḥ strīṇāṃ smaro mūrtimān
gopānāṃ svajano'satāṃ kṣitibhujāṃ śāstā svapitroḥ śiśuḥ
mṛtyurbhojapatervirāḍaviduṣāṃ tattvaṃ paraṃ yoginām
vṛṣṇīnāṃ paradevateti vidito raṅgaṃ gataḥ sāgrajaḥ
15.18
hataṃ kuvalayāpīḍaṃ dṛṣṭvā tāvapi durjayau
kaṃso manasyapi tadā bhṛśamudvivije nṛpa !
15.16-2
tau rejatū raṅgatau mahābhujau vicitraveṣābharaṇasragambarau
yathā naṭāvuttamaveṣadhāriṇau manaḥkṣipantau prabhayā nirīkṣatām
15.20
nirīkṣya tāvuttamapūruṣau janā mañcasthitā nāgararāṣṭrakā nṛpa !
praharṣavegotkalitekṣaṇānanāḥ papurna tṛptā nayanaistadānanam
15.21
pibanta iva cakṣurbhyāṃ lihanta iva jihvayā
jighranta iva nāsābhyāṃ śliṣyanta iva bāhubhiḥ
15.22
ūcuḥ parasparaṃ te vai yathādṛṣṭaṃ yathāśrutam
tadrūpaguṇamādhuryaprāgalbhyasmāritā iva
15.23
etau bhagavataḥ sākṣāddharernārāyaṇasya hi
avatīrṇāvihāṃśena vasudevasya veśmani
15.24
eṣa vai kila devakyāṃ jāto nītaśca gokulam
kālametaṃ vasan gūḍho vavṛdhe nandaveśmani
15.25
pūtanā'nena nītāntaṃ cakravātaśca dānavaḥ
arjunau guhyakaḥ keśī dhenuko'nye ca tadvidhāḥ
15.26
gāvaḥ sapālā etena dāvāgneḥ parimocitāḥ
kāliyo damitaḥ sarpa indraśca vimadaḥ kṛtaḥ
15.27
saptāhamekahastena dhṛto'dripravaro'munā
varṣavātāśanibhyaśca paritrātaṃ ca gokulam
15.28
gopyo'sya nityamuditahasitaprekṣaṇaṃ mukham
paśyantyo vividhāṃstāpāṃstaranti smāśramaṃ mudā
15.26-2
vadantyanena vaṃśo'yaṃ yadoḥ subahuviśrutaḥ
śriyaṃ yaśo mahattvañca lapsyate parirakṣitaḥ
15.30
ayañcāsyāgrajaḥ śrīmān rāmaḥ kamalalocanaḥ
pralambo nihato yena vatsako ye bakādayaḥ
15.31
janeṣvevaṃ bruvāṇeṣu tūryeṣu ninadatsu ca
kṛṣṇarāmau samābhāṣya cāṇūro vākyamabravīt
15.32
he nandasūno ! he rāma ! bhavantau vīrasammatau
niyuddhakuśalau śrutvā rājñāhūtau didṛkṣuṇā
15.33
priyaṃ rājñaḥ prakurvantyaḥ śreyo vindanti vai prajāḥ
manasā karmaṇā vācā viparītamato'nyathā
15.34
nityaṃ pramuditā gopā vatsapālā yathā sphuṭam
vaneṣu mallayuddhena krīḍantaścārayanti gāḥ
15.35
tasmādrājñaḥ priyaṃ yūyaṃ vayaṃñca karavāma he
bhūtāni naḥ prasīdanti sarvabhūtamayo nṛpaḥ
15.36
tanniśāmyābravītkṛṣṇo deśakālocitaṃ vacaḥ
niyuddhamātmano'bhīṣṭaṃ manyamāno'bhinandya ca
15.37
prajā bhojapaterasya vayaṃ cāpi vanecarāḥ
karavāma priyaṃ nityaṃ tannaḥ paramanugrahaḥ
15.38
bālā vayaṃ tulyabalaiḥ krīḍiṣyāmo yathocitam
bhavenniyuddhaṃ mā'dharmaḥ spṛśenmallasabhāsadaḥ
15.39
cāṇūra uvāca
na bālo na kiśorastvaṃ balaśca balināṃvaraḥ
līlayaibho hato yena sahasradvipasattvabhṛt
15.40
tasmādbhavadbhyāṃ balibhiryoddhavyaṃ nānayo'tra vai
mayi vikrama vārṣṇeya ! balena saha muṣṭikaḥ
15.40.p1
iti śrīmadbhāgavate mahāpurāṇe daśamaskandhe pūrvārdhe kuvalayāpīḍavadho nāma tricatvāriṃśo'dhyāyaḥ
15.40.p2
iti śrīmadbhāgavate daśamaskandhe pūrvārdhe tricatvāriṃśo'dhyāyaḥ || 43
Linked texts (8)
- Bhāgavatapurāṇa — Vyāsa, Sanskrit
- Critical edition (BORI) — Sanskrit
- Anvitārthaprakāśikā — Gaṅgāsahāya Śarman, Sanskrit
- Bhāgavatamāhātmya — Kṛṣṇacandra, Sanskrit
- Toḍararāja — Nīlakaṇṭha Dīkṣita, Sanskrit
- Ṭoḍarānanda — Ṭoḍaramalla 1564, Sanskrit
- Bhāgavatapurāṇa daśamaskandha — Sanskrit
- Bhāgavatakathāsāptāhika — Śrīrāmamūrti Śāstrī Paurāṇika, Sanskrit