Dashamaskandha 7

Daśamaskandha 7

aṣṭātriṃśo'dhyāyaḥ
śrīśuka uvāca
akrūro'pi ca tāṃ rātriṃ madhupuryāṃ mahāmatiḥ
uṣitvā rathamāsthāya prayayau nandagokulam

gacchan pathi mahābhāgo bhagavatyambujekṣaṇe
bhaktiṃ parāmupagata evametadacintayat

kiṃ mayā caritaṃ bhadraṃ kiṃ taptaṃ paramaṃ tapaḥ
kiṃ vāthāpyarhate dattaṃ yaddrakṣyāmyadya keśavam

mamaitaddurlabhaṃ manye uttamaślokadarśanam
viṣayātmano yathā brahmakīrtanaṃ śūdrajanmanaḥ

maivaṃ mamādhamasyāpi syādevācyutadarśanam
hriyamāṇāḥ kālanadyā kvacittarati kaścana

mamādyāmaṅgalaṃ naṣṭaṃ phalavāṃścaiva me bhavaḥ
yannamasye bhagavato yogidhyeyāṅghripaṅkajam

kaṃso batādyākṛta me'tyanugrahaṃ drakṣye 'ṅghri padmaṃ prahito 'munā hareḥ
kṛtāvatārasya duratyayaṃ tamaḥ pūrve'taran yannakhamaṇḍalaṃ tviṣā

yadaccitaṃ brahmabhavādibhiḥ suraiḥ śriyā ca devyā munibhiḥ sasāttvataiḥ
gocāraṇāyānucaraiścaradvane yadgopikānāṃ kucakuṅkumāṅkitam

drakṣyāmi nūnaṃ sukapolanāsikaṃ smitāvalokāruṇakañjalocanam
mukhaṃ mukundasya guḍālakāvṛtaṃ pradākṣiṇaṃ me pracaranti vai mṛgāḥ

apyadya viṣṇormanujatvamīyuṣo bhārāvatārāya bhuvo nijecchayā
lāvaṇyadhāmno bhavitopalambhanaṃ mahyaṃ na na syātphalamañjasā dṛśaḥ

ya īkṣitā'haṃrahito 'pyasattvatoḥ svatejasā'pāstatamobhidābhramaḥ
svamāyayātman racitaistadīkṣayā prāṇākṣadhībhiḥ sadaneṣvabhīyate

yasyākhilāmīvahabhiḥ sumaṅgalairvāco vimiśrā guṇakarmajanmabhiḥ
prāṇanti śumbhanti punanti vai jagadyāstadviraktāḥ śavaśobhanā matāḥ

sa cāvatīrṇaḥ kila sātvatānvaye svasetupālāma ravaryaśarmakṛt
yaśo vitanvan vraja āsta īśvaro gāyanti devā yadaśeṣamaṅgalam

taṃ tvadya nūnaṃ mahatāṃ gatiṃ guruṃ trailokyakāntaṃ dṛśimanmahotsavam
rūpaṃ dadhānaṃ śriya īpsitāspadaṃ drakṣye mamāsanvṛṣabhāḥ sudarśanāḥ

Linked texts (6)