Pramāṇa · Search · About · API

Devimahatmya or Saptashaticandi 15

Devīmāhātmya or Saptaśatīcaṇḍī 15

Language
Sanskrit

Contents

15.1

tṛtīyo'dhyāyaḥ
dhyānam—
oṃ udyadbhānusahasrakāntimaruṇakṣaumāṃ śiromālikāṃ
raktāliptapayodharāṃ japavaṭīṃ vidyāmabhītiṃ varam
hastābjairdadhatīṃ trinetravilasadvaktrāravindaśriyaṃ
devīṃ baddhahimāṃśuratnamukuṭāṃ vande'ravindasthitām
'oṃ' ṛṣiruvāca

15.2

nihanyamānaṃ tatsainyamavalokya mahāsuraḥ
senānīścikṣuraḥ kopādyayau yoddhumathāmbikām

15.3

sa devīṃ śaravarṣeṇa vavarṣa samare'suraḥ
yathā merugireḥ śṛṅgaṃ toyavarṣeṇa toyadaḥ

15.4

tasyācchittvā tato devī līlayaiva śarotkarān
jaghāna turagān bāṇairyantāraṃ caiva vājinām

15.5

ciccheda ca dhanuḥ sadyo dhvajaṃ cātisamucchritam
vivyādha caiva gātreṣu chinnadhanvānamāśugaiḥ

15.6

sacchinnadhanvā viratho hatāśvo hatasārathiḥ
abhyadhāvata tāṃ devīṃ khaḍgacarmadharo'suraḥ

15.7

siṃhamāhatya khaḍgena tīkṣṇadhāreṇa mūrdhani
ājaghāna bhuje savye devīmapyativegavān

15.8

tasyāḥ khaḍgo bhujaṃ prāpya paphāla nṛpanandana
tato jagrāha śūlaṃ sa kopādaruṇalocanaḥ

15.9

cikṣepa ca tatastattu bhadrakālyāṃ mahāsuraḥ
jājvalyamānaṃ tejobhī ravibimbamivāmbarāt

15.10

dṛṣṭvā tadāpatacchūlaṃ devī śūlamamuñcata
tacchūlaṃ śatadhā tena nītaṃ sa ca mahāsuraḥ

15.11

hate tasminmahāvīrye mahiṣasya camūpatau
ājagāma gajārūḍhaścāmarastridaśārdanaḥ

15.12

so'pi śaktimumocātha devyāstāmambikā drutam
huṃkārābhihatāṃ bhūmau pātayāmāsa niṣprabhām

15.13

bhagnāṃ śaktiṃ nipatitāṃ dṛṣṭvā krodhasamanvitaḥ
cikṣepa cāmaraḥ śūlaṃ bāṇaustadapi sācchinat

15.14

tataḥ siṃhaḥ samutpatya gajakumbhāntare sthitaḥ
bāhuyuddhena yuyudhe tenoccaistridaśāriṇā

15.15

yuddhyamānau tatastau tu tasmāccāgānmahīṃ gatau
yuyudhāte'tisaṃrabdhau prahārairatidāruṇaiḥ

15.16

tato vegāt khamutpatya nipatya ca mṛgāriṇā
karaprahāreṇa śiraścāmarasya pṛthakkṛtam

15.17

udagraśca raṇe devyā śilāvṛkṣādibhirhataḥ
dantamuṣṭitalaiścaiva karālaśca nipātitaḥ

15.18

devī kruddhā gadāpātaiścūrṇayāmāsa coddhatam
vāṣkalaṃ bhindipālena bāṇaistāmraṃ tathāndhakam

15.19

ugrāsyamugravīryaṃ ca tathaiva ca mahāhanum
trinetrā ca triśūlena jaghāna parameśvarī

15.20

biḍālasyāsinā kāyāt pātayāmāsa vai śiraḥ
durdharaṃ durmukhaṃ cobhau samare yamasādhayam

15.21

evaṃ saṃkṣīyamāṇe tu svasainye mahiṣāsuraḥ
māhiṣeṇa svarūpeṇa trāsayāmāsa tān gaṇān

15.22

kāṃścittuṇḍaprahāreṇa khurakṣepaistathāparān
lāṅgūlatāḍitāṃścānyāñśṛṅgābhyāṃ ca vidāritān

15.23

vegena kāṃścidaparāmnādena śramaṇena ca
niḥśvāsapavanenānyān pātayāmāsa bhūtale

15.24

nipātya pramathānīkamabhyadhāvata so'suraḥ
siṃhaṃ hantuṃ mahādevyāḥ kopaṃ cakre tato'mbikā

15.25

so'pi kopānmahāvīryaḥ khurakṣuṇṇamahītalaḥ
śṛṅgābhyāṃ parvatānuccāṃścikṣepa ca nanāda ca

15.26

vegabhramaṇavikṣuṇṇā maho tasya vyaśīryata
lāṅgūlenāhataścābdhiḥ plāvayāmāsa sarvataḥ

15.27

dhutaśṛṅgavibhinnāśca khaṇḍaṃ khaṇḍaṃ yayurghanāḥ
śvāsānilāstāḥ śataśo nipeturnabhaso'calāḥ

15.28

iti krodhasamādhmātamāpatantaṃ mahāsuram
dṛṣṭvā sā caṇḍikā kopaṃ tadadhāya tadākarot

15.29

sā kṣiptvā tasya vai pāśaṃ taṃ babandha mahāsuram
tatyāja māhiṣaṃ rūpaṃ so'pi baddho mahāmṛdhe

15.30

tataḥ siṃho'bhavat sadyo yāvattasyāmbikā śiraḥ
chinatti tāvat puruṣaḥ khaḍgapāṇiradṛśyata

15.31

tata evāśu puruṣaṃ devī ciccheda sāyakaiḥ
taṃ khaḍgacarmaṇā sāddhaṃ tataḥ so'bhūnmahāgajaḥ

15.32

kareṇa ca mahāsiṃhaṃ taṃ cakarṣa jagarja ca
karṣatastu karaṃ devī khaḍgena nirakṛntata

15.33

tato mahāsuro bhūyo māhiṣaṃ vapurāsthitaḥ
tathaiva cakṣobhayāmāsa trailokyaṃ sacarācaram

15.34

tataḥ kruddhā jaganmātā caṇḍikā pānamuttamam
papau punaḥ punaścaiva jahāsāruṇalocanā

15.35

nanarda cāsuraḥ so'pi balavīryamadoddhataḥ
viṣāṇābhyāṃ ca cikṣepa caṇḍikāṃ prati bhūdharān

15.36

sā ca tān prahitāṃstena cūrṇayantī śarotkaraiḥ
uvāca taṃ mahoddhūtamukharāgākulākṣaram

15.37

devyuvāca

15.38

garja garja kṣaṇaṃ mūḍha madhu yāvatpibāmyaham
mayā tvayi hate'traiva garjiṣyantyāśu devatāḥ

15.29-2

ṛṣiruvāca

15.40

evamuktvā samutpatya sā''rūḍhā taṃ mahāsuram
pādenākramya kaṇṭhe ca śūlenainamatāḍayat

15.41

tataḥ so'pi padā''krāntastayā nijamukhāttataḥ
ardhaniṣkrānta evāsīd devyā vīryeṇa saṃvṛttaḥ

15.42

ardhaniṣkrānta evāsau yudhyamāno mahāsuraḥ
tayā mahāsinā devyā śiraśchittvā nipātitaḥ

15.43

tato hāhākṛtaṃ sarvaṃ daityasainyaṃ nanāśa tat
praharṣaṃ ca paraṃ jagmuḥ sakalā devatāgaṇāḥ

15.44

tuṣṭuvustāṃ surā devīṃ saha divyairmaharṣibhiḥ
jagurgandharvapatayo nanṛtuścāpsarogaṇāḥ

15.44.p1

iti śrīmārkaṇḍeyapurāṇe sāvarṇike manvantare devīmahātmye mahiṣāsuravadho nāma tṛtīyo'dhyāyaḥ || 3

Linked texts (12)