Devimahatmya or Saptashaticandi 20
Devīmāhātmya or Saptaśatīcaṇḍī 20
- Language
- Sanskrit
Contents
- 20.27 — 1 part
20.1
uvāca 4, ślokāḥ 20, evam 24,
evamāditaḥ 412
oṃ dhyāyeyaṃ ratnapīṭhe śukaparipaṭhitaṃ śrṛṇvatīṃ śyāmalāṅgā
nyastaikāṅghriṃ saroje śaśiśakaladharāṃ vallakīṃ vādayantīm
kahlārāvaddhamālāṃ niyamitavilasaccolikāṃ raktavastrāṃ
mātaṅgīṃ śaṅkhapātrāṃ madhuramadhumadāṃ citrakoddhāsimālām
oṃ ṛṣiruvāca
20.2
ājñaptāste tato daityāścaṇḍamuṇḍapurogamāḥ
caturaṅgabalopetā yayyurabhyudyatāyudhāḥ
20.3
dadṛśuste tato devīmīṣaddhāsāṃ vyavasthitām
siṃhasyopari śailendraśṛṃge mahati kāñcane
20.4
te dṛṣṭvā tāṃ samādātumudyamaṃ cakrurudyatāḥ
ākṛṣṭacāpāsidharāstathānye tatsamīpagāḥ
20.5
tataḥ kopaṃ cakāroccairambikā tānarīn prati
kopena cāsyā vadanaṃ maṣīvarṇamabhūttadā
20.6
bhrukuṭīkuṭilāttasyā lalāṭaphalakāddrutam
kālī karālavadanā viniṣkrāntāsipāśinī
20.7
vicitrakhaṭvāṅgadharā naramālāvibhūṣaṇā
dvīpicarmaparīdhānā śuṣkamāṃsātibhairavā
20.8
ativistāravadanā jihvālelanabhīṣaṇā
nimagnāraktanayanā nādāpūritadiṅmukhā
20.9
sā vegenābhipatitā ghātayantī mahāsurān
sainye tatra surārīṇāmabhakṣayata tadbalam
20.10
pārṣṇigrāhāṅkuśagrāhiyodhaghaṇṭāsamanvitān
samādāyaikahastena mukhe cikṣepa vāraṇān
20.11
tathaiva yodhaṃ turagai rathaṃ sārathinā saha
nikṣipya vaktre daśanaiścarvayantyatibhairavam
20.12
ekaṃ jagrāha keśeṣu grīvāyāmatha cāparam
pādenākramya caivānyamurasānyamapothayat
20.13
tairmuktāni ca śastrāṇi mahāstrāṇi tathāsuraiḥ
mukhena jagrāha ruṣā daśanairmathitānyapi
20.14
balināṃ tad balaṃ sarvamasurāṇāṃ durātmanām
mamardābhakṣayaccānyānanyāṃścātādayat tadā
20.15
asinā nihatāḥ kecitkecitkhaṭvāṅgatāḍitāḥ
jagmurvināśamasurā dantāgrābhihatāstathā
20.16
kṣaṇena tad balaṃ sarvamasurāṇāṃ nipātitam
dṛṣṭvā carāḍo'bhidudrāva tāṃ kālīmatibhīṣaṇām
20.17
śaravarṣairmahābhīmairbhīmākṣīṃ tāṃ mahāsuraḥ
chādayāmāsa cakraiśca muṇḍaḥ kṣiptaiḥ sahasraśaḥ
20.18
tāni cakrāṇyanekāni viśamānāni tanmukham
babhūryurarkabimbāni subahūni ghanodaram
20.19
tato jahāsātiruṣā bhīmaṃ bhairavanādinī
kālī karālavaktrāntadurdarśadaśanojjvalā
20.20
utthāya ca mahāsiṃhād devī carā'dhāvata
gṛhītvā cāsya keśeṣu śirastenāsinācchinat
20.21
atha muṇḍo'pyadhāvattāṃ dṛṣṭvā caṇḍaṃ nipātitam
tamapyapātayad bhūmau sā khaḍgābhihataṃ ruṣā
20.22
hataśeṣaṃ tataḥ sainyaṃ dṛṣṭvā caṇḍaṃ nipātitam
muṇḍaṃ ca sumahāvīryaṃ diśo bheje bhayāturam
20.23
śiraścaṇḍasya kālī ca gṛhītvā muṇḍameva ca
prāha pracaṇḍāṭṭahāsamiśramabhyetya caṇḍikām
20.24
mayā tavātropahatau caṇḍamuṇḍau mahāpaśū
yuddhayajñe svayaṃ śumbhaṃ niśumbhaṃ ca haniṣyasi
20.25
ṛṣiruvāca
20.26
tāvānītau tato dṛṣṭvā caṇḍamuṇḍau mahāsurau
uvāca kālīṃ kalyāṇī lalitaṃ caṇḍikā vacaḥ
20.27
yasmāccaṇḍaṃ ca muṇḍaṃ ca gṛhītvā tvamupāgatā
cāmuṇḍeti tato loke khyātā devi bhaviṣyasi ||oṃ
20.27.p1
iti śrīmārkaṇḍeyapurāṇe sāvarṇike manvantare devīmāhātmye caṇḍamuṇḍavadho nāma saptamo'dhyāyaḥ || 7
Linked texts (11)
- Devīmāhātmya — Sanskrit
- Durgārcanasṛti — Sanskrit
- Durgāstotra or saptaśatī — Sanskrit
- Śrīcaṇḍī — Sanskrit
- Caṇḍīmāhātmya Devīmāhātmya — Sanskrit
- Devīmāhātoriginal — Sanskrit
- Durgārahasya — Sanskrit
- Caṇḍīsaptasatī — Sanskrit
- Saptaśatīmahāstotra — Sanskrit
- Durgāsaptaśatī Devīmāhātmya — Sanskrit
- Durgāpāṭha — Vyāsa, Sanskrit