Pramāṇa · Search · About · API

Devimahatmya or Saptashaticandi 24

Devīmāhātmya or Saptaśatīcaṇḍī 24

Language
Sanskrit

Contents

24.1

uvāca 4, ardhaślokaḥ 1, ślokāḥ 27, evam 32, evamāditaḥ 575
ekādaśo'dhyāyaḥ
dhyānam—'oṃ' udyadinadyutimindukirīṭāṃ tuṅgakucāṃ nayanatrayayuktām
smeramukhīṃ varadāṅkuśapāśābhītikarāṃ prabhaje bhuvaneśīm
'oṃ' ṛṣiruvāca

24.2

devyā hate tatra mahāsurendre sendrāḥ surā vahnipurogamāstām
kātyāyanīṃ tuṣṭuvuriṣṭalābhād vikāśivaktrābjavikāśitāśāḥ

24.3

devi prapannārtihare prasīda prasīda mātarjagato'khilasya
prasīda viśveśvari pāhi viśvaṃ tvamīśvarī devi carācarasya

24.4

ādhārabhūtā jagatastvamekā mahīsvarūpeṇa yataḥ sthitāsi
apāṃ svarūpasthitayā tvayaitadāpyāyate kṛtsnamalaṅghyavīrye

24.5

tvaṃ vaiṣṇavī śaktiranantavīryā viśvasya bījaṃ paramāsi māyā
sammohitaṃ devi samastametat tvaṃ vai prasannā bhuvi muktihetuḥ

24.6

vidyāḥ samastāstava devi bhedāḥ striyaḥ samastāḥ sakalā jagatsu
tvayaikayā pūritamambayaitat kā te stutiḥ stavyaparā paroktiḥ

24.7

sarvaṃbhūtā yadā devī svargamuktipradāyinī
tvaṃ stutā stutaye kā vā bhavantu paramoktayaḥ

24.8

sarvasya buddhirūpeṇā janasya hṛdi saṃsthite
svargāpavargade devi nārāyaṇi namo'stu te

24.9

kalākāṣṭhādirūpeṇā pariṇāmapradāyinī
viśvasyoparatau śakte nārāyaṇi namo'stu te

24.10

sarvamaṅgalamāṅgalye śive sarvārthasādhike
śaraṇye tryambake gauri nārāyaṇi namo'stu te

24.11

sṛṣṭisthitivināśānāṃ śaktibhūte sanātani
guṇāśraye guṇamaye nārāyaṇi namo'stu te

24.12

śaraṇāgatadīnārtaparitrāṇaparāyaṇe
sarvasyārtihare devi nārāyaṇi namo'stu te

24.13

haṃsayuktavimānasthe brahmāṇīrūpadhāriṇi
kauśāmbhaḥkṣarike devi nārāyaṇi namo'stu te

24.14

triśūlacandrāhidhare mahāvṛṣabhavāhini
māheśvarīsvarūpeṇa nārāyaṇi namo'stu te

24.15

mayūrakukkuṭavṛte mahāśaktidhare'naghe
kaumārīrūpasaṃsthāne nārāyaṇi namo'stu te

24.16

śaṃkhacakragadāśārṅgagṛhītaparamāyudhe
prasīda vaiṣṇavīrūpe nārāyaṇi namo'stu te

24.17

gṛhītogramahācakre daṃṣṭroddhṛtavasundhare
varāharūpiṇi śive nārāyaṇi namo'stu te

24.18

nṛsiṃharūpeṇogreṇa hantuṃ daityān kṛtodyame
trailokyatrāṇasahite nārāyaṇi namo'stu te

24.19

kirīṭini mahāvajre sahasranayanojjvale
vṛtraprāṇahare caindri nārāyaṇi namo'stu te

24.20

śivadūtīsvarūpeṇa hatadaityamahābale
ghorarūpe mahārāve nārāyaṇi namo'stu te

24.21

daṃṣṭrākarālavadane śiromālāvibhūṣaṇe
cāmuṇḍe muṇḍamathane nārāyaṇi namo'stu te

24.22

lājjama lajje mahāvidye śraddhe puṣṭisvadhe dhruve
mahārātri mahāvidye nārāyaṇi namo'stu te

24.23

medhe sarasvati vare bhūti bābhravi tāmasi
niyate tvaṃ prasīdeśe nārāyaṇi namo'stu te

24.24

sarvasvarūpe sarveśe sarvaśaktisamanvite
bhayebhyastrāhi no devi durge devi namo'stu te

24.25

etatto vadanaṃ saumyaṃ locanatrayabhūṣitam
pātu naḥ sarvabhītibhyaḥ kātyāyani namo'stu te

24.26

jvālākarālamatyugramaśeṣāsurasūdanam
triśūlaṃ pātu no bhīterbhadrakālī namo'stu te

24.27

hinasti daityatejāṃsi svanenāpūrya yā jagat
sā ghaṇṭā pātu no devi pāpebhyo naḥ sutāniva

24.28

asurāsṛgvasāpaṅkacarcitaste karojjvalaḥ
śubhāya khaḍgo bhavatu caṇḍike tvāṃ natā vayam

24.29

rogānaśeṣānapahaṃsi tuṣṭā ruṣṭā tu kāmān sakalānabhīṣṭān
tvāmāśritānāṃ na vipannarāṇāṃ tvāmāśritā hyāśrayatāṃ prayānti

24.30

etatkṛtaṃ yatkadanaṃ tvayādya dharmadviṣāṃ devi mahāsurāṇām
rūpairanekairbahudhā''tmamūrtiṃ kṛtvāmbike tatprakaroti kānyā

24.31

vidyāsu śāstreṣu vivekadīpeṣvādyeṣu vākyeṣu ca kā tvadanyā
mamatvagarte'timahāndhakāre vibhrāmayatyetadatīva viśvam

24.32

rakṣāṃsi yatrograviṣāśca nāgā yatrārayo dasyubalāni yatra
dāvānalo yatra tathābdhimadhye tatra sthitā tvaṃ paripāsi viśvam

24.33

viśveśvari tvaṃ paripāsi viśvaṃ viśvātmikā dhārayasīti viśvam
viśveśavandyā bhavatī bhavanti viśvāśrayā ye tvayi bhaktinamrāḥ

24.35

devi prasīda paripālaya no'ribhīternityaṃ yathāsuravadhādadhunaiva sadyaḥ
pāpāni sarvajagatāṃ praśamaṃ nayāśu utpātapākajanitāṃśca mahopasargān
praṇatānāṃ prasīda tvaṃ devi viśvārtihāriṇi
trailokyavāsināmīḍye lokānāṃ varadā bhava

24.36

devyuvāca

24.37

varadāhaṃ suragaṇā varaṃ yanmanasecchatha
taṃ vṛṇudhvaṃ prayacchāmi jagatāmupakārakam

24.38

devā ūcuḥ

24.39

sarvābādhāpraśamanaṃ trailokyasyākhileśvari
evameva tvayā kāryamasmadvairivināśanam

24.40

devyuvāca

24.41

vaivasvate'ntare prāpte aṣṭāviṃśatime yuge
śumbho niśumbhaścaivānyāvutpatsyete mahāsurau

24.42

nandagopagṛhe jātā yaśodāgarbhasambhavā
tatastau nāśayiṣyāmi vindhyācalanivāsinī

24.43

punarapyatiraudreṇa rūpeṇā pṛthivītale
avatīrya haniṣyāmi vaipracittāṃstu dānavān

24.44

bhakṣayantyāśca tānugrān vaipracittānmahāsurān
raktā dantā bhaviṣyanti dāḍimīkusumopamāḥ

24.45

tato māṃ devatāḥ svarge martyaloke ca mānavāḥ
stuvanto vyāhariṣyanti satataṃ raktadantikām

24.46

bhūyaśca śatavārṣikyāmanāvṛṣṭayāmasambhavi
munibhiḥ saṃstutā bhūmau sambhaviṣyāmyayonijā

24.47

tataḥ śatena netrāṇāṃ nirīkṣiṣyāmi yanmunīn
kīrtayiṣyanti manujāḥ śatākṣīmiti māṃ tataḥ

24.48

tato'hamakhilaṃ lokamātmadehasamudbhavaiḥ
bhariṣyāmi surāḥ śākairāvṛṣṭaḥ prāṇādhārakaiḥ

24.49

śākambharīti vikhyātiṃ tadā yāsyāmyahaṃ bhuvi
tatraiva ca vadhiṣyāmi durgamākhyaṃ mahāsuram

24.50

durgā devīti vikhyātaṃ tanme nāma bhaviṣyati
punaścāhaṃ yadā bhīmaṃ rūpaṃ kṛtvā himācale

24.51

rakṣāṃsi bhakṣayiṣyāmi munīnāṃ trāṇakāraṇāt
tadā māṃ munayaḥ sarve stoṣyantyānamramūrtayaḥ

24.52

bhīmā devīti vikhyātaṃ tanme nāma bhaviṣyati
yadāruṇākhyastrailokye mahābādhāṃ kariṣyati

24.53

tadāhaṃ bhrāmaraṃ rūpaṃ kṛtvāsaṃkhyeyaṣaṭpadam
trailokyasya hitārthāya bhaviṣyāmi mahāsuram

24.54

bhrāmarīti ca māṃ lokāstadā stoṣyanti sarvataḥ
itthaṃ yadā yadā bādhā dānavotthā bhaviṣyati

24.55

tadā tadāvatīryāhaṃ kariṣyāmyarisaṃkṣayam ||oṃ

24.55.p1

iti śrīmārkaṇḍeyapurāṇe sāvarṇike manvantare devīmāhātmye devyāḥ stutirnāmaikādaśo'dhyāyaḥ || 11

Linked texts (10)