Pramāṇa · Search · About · API

Devimahatmya or Saptashaticandi 27

Devīmāhātmya or Saptaśatīcaṇḍī 27

Language
Sanskrit

Contents

27.1

uvāca 2, ardhaślokau 2, ślokāḥ 37, evam 41, evamāditaḥ 671
trayodaśo'dhyāyaḥ
dhyānam—
oṃ bālārkamaṇḍalābhāsāṃ caturbāhuṃ trilocanām
pāśāṅkuśavarābhītīrdhārayantīṃ śivāṃ bhaje
'oṃ' ṛṣiruvāca

27.2

etatte kathitaṃ bhūpa devīmāhātmyamuttamam
evaṃprabhāvā sā devī yayedaṃ dhāryate jagat

27.3

vidyā tathaiva kriyate bhagavadviṣṇumāyayā
tayā tvameṣa vaiśyaśca tathaivānye vivekinaḥ

27.4

mohyante mohitāścaiva mohiṣyanti cāpare
tāmupaihi mahārāja śaraṇaṃ parameśvarīm

27.5

ārādhitā saiva nṛṇāṃ bhogasvargāpavargadā

27.6

mārkaṇḍeya uvāca

27.7

iti tasya vacaḥ śrutvā surathaḥ sa narādhipaḥ

27.8

praṇipatya mahābhāgaṃ tamṛṣiṃ śaṃsitavratam
nirviṇṇo'timamatvena rājyāpaharaṇena ca

27.9

jagāma sadyastapase sa ca vaiśyo mahāmune
saṃdarśanārthamambāyāḥ nadīpulinasaṃsthitaḥ

27.10

sa ca vaiśyastapastepe devīsūktaṃ paraṃ japan
tau tasmin puline devyāḥ kṛtvā mūrtiṃ mahīmayīm

27.11

arhaṇāṃ cakratustasyāḥ puṣpadhūpāgnitarpaṇaiḥ
nirāhārau yatāhārau tanmanaskau samāhitau

27.12

dadatustau baliṃ caiva nijagātrāsṛgukṣitam
evaṃ samārādhayatostribhirvarṣairyatātmanoḥ

27.13

parituṣṭā jagaddhātrī pratyadgaṃ prāha caṇḍikā

27.14

devyuvāca

27.15

yatprārthyate tvayā bhūpa tvayā ca kulanandana
sarvastatprāpyatāṃ sarvaṃ parituṣṭā dadāmi tat

27.16

mārkaṇḍeya uvāca

27.17

tato vavre nṛpo rājyamavibhraṃśyanyajanmani
atraiva ca nijaṃ rājyaṃ hataśatrubalaṃ balāt

27.18

so'pi vaiśyastato jñānaṃ vavre nirviṇṇamānasaḥ
matvetyarhamiti prājñaḥ saṅgavicyutikārakam

27.19

devyuvāca

27.20

svalpairahobhirnṛpate svaṃ rājyaṃ prāpsyate bhavān

27.21

hatvā ripūnaskhalitaṃ tava tatra bhaviṣyati

27.22

mṛtaśca bhūyaḥ samavāpya janma devādvivasvataḥ

27.23

sāvarṇiko nāma manurbhavān bhuvi bhaviṣyati

27.24

vaiśyavarya tvayā yaśca varo'smatto'bhivāñchitaḥ

27.25

taṃ prayacchāmi saṃsiddhyai tava jñānaṃ bhaviṣyati

27.26

mārkaṇḍeya uvāca

27.27

iti dattvā tayordevī yathābhilaṣitaṃ varam

27.28

babhūvāntarhitā sadyo bhaktyā tābhyāmabhiṣṭutā
evaṃ devyā varaṃ labdhvā surathaḥ kṣatriyarṣabhaḥ

27.29

sūryājjanma samāsādya sāvarṇirbhavitā manuḥ
evaṃ devyā varaṃ labdhvā surathaḥ kṣatriyarṣabhaḥ
sūryajjjanma samāsādya sāvarṇirbhavitā manuḥ || klīṃ oṃ

27.29.p1

iti śrīmārkaṇḍeyapurāṇe sāvarṇike manvantare devīmāhātmye surathavaiśyayorvarapradānaṃ nāma trayodaśo'dhyāyaḥ || 13

Linked texts (10)