Pramāṇa · Search · About · API

Devimahatmya or Saptashaticandi 33

Devīmāhātmya or Saptaśatīcaṇḍī 33

Language
Sanskrit

33.1

iti vaikṛtikaṃ rahasyaṃ samāptam
atha mūrtirahasyam
ṛṣiruvāca
oṃ nandā bhagavatī nāma yā bhaviṣyati nandajā
stutā sā pūjitā bhaktyā vaśīkuryājjagattrayam

33.2

kanakottamakāntiḥ sā sukāntikanakāmbarā
devī kanakavarṇābhā kanakottamabhūṣaṇā

33.3

kamalāṅkuśapāśābjaralaṃkṛtacaturbhujā
indirā kamalā lakṣmīḥ sā śrīraktāmbujāsanā

33.4

yā raktadantikā nāma devī proktā mayānagha
tasyāḥ svarūpaṃ vakṣyāmi śṛṇu sarvabhayāpaham

33.5

raktāmbarā raktavarṇā raktasarvāṅgabhūṣaṇā
raktāyudhā raktanetrā raktakeśātibhīṣaṇā

33.6

raktatīkṣṇanakhā raktadaśanā raktadantikā
patiṃ nārīvānuraktā devībhaktaṃ bhajejjanam

33.7

vasudheva viśālā sā sumeruyugalastanī
dīrghau lambāvatisthūlau tāvatīva manoharau

33.8

karkaśāvatikāntau tau sarvānandapayonidhī
bhaktān sampāyayeddevī sarvakāmadughau stanau

33.9

khaḍgaṃ pātraṃ ca musalaṃ lāṅgalaṃ ca bibharti sā
ākhyātā raktacāmuṇḍā devī yogeśvarīti ca

33.10

anayā vyāptamakhilaṃ jagatsthāvarajaṅgamam
imāṃ yaḥ pūjayedbhaktyā sa vyāpnoti carācaram

33.11

bhuktvā bhogān yathākāmaṃ devīsāyujyamāpnuyāt
adhīte ya imaṃ nityaṃ raktadantyā vapuḥstavam
taṃ sā paricareddevī patiṃ priyamivāṅganā

33.12

śākambharī nīlavarṇā nīlotpalavilocanā
gambhīranābhistrivalīvibhūṣitatanūdarī

33.13

sukarkaśasamottuṅgavṛttapīnaghanastanī
suṣṭi śilīsukhāpūrṇāṃ kamalaṃ kamalālayā

33.14

puṣpapallavamūlādiphalāḍhyaṃ śākasaṃccayam
kāmyānantarasairyuktaṃ kṣuttṛṣṇāmṛtyubhayāpaham

33.15

kārmukaṃ ca sphuratkānti bibhratī parameśvarī
śākambharī śatākṣī sā saiva durgā prakīrtitā

33.16

viśokā duṣṭadamanī śamanī duritāpadām
umā gaurī satī caṇḍī kālikā sā ca pārvatī

33.17

śākambharī stuvan dhyāyañjapan sampūjayannaman
akṣayyamaśnute śīghramannapānāmṛtaṃ phalam

33.18

bhīmāpi nīlavarṇā sā daṃṣṭrādaśanabhāsurā
viśālālocanā nārī vṛttapīnapayodharā

33.19

candrahāsaṃ ca ḍamaruṃ śiraḥ pātraṃ ca bibhratī
ekavīrā kālarātriḥ saivoktā kāmadā stutā

33.20

tejomarāḍaladurdharṣā bhrāmarī citrakāntibhṛt
citrānulepanā devī citrābharaṇabhūṣitā

33.21

citrabhramarapāṇiḥ sā mahāmārīti gīyate
ityetā mūrtayo devyāḥ yāḥ khyātā vasudhādhipa

33.22

jaganmātuścaṇḍikāyāḥ kīrtitāḥ kāmadhenavaḥ
idaṃ rahasyaṃ paramaṃ na vācyaṃ kasyacittvayā

33.23

vyākhyānaṃ divyamūrtīnāmiṣṭaphaladāyakam
tasmāt sarvaprayatnena devīṃ japa nirantaram

33.24

saptajanmārjitairghorairbrahmahatyāsamairapi
pāṭhamātreṇa mantrāṇāṃ mucyate sarvakilbiṣaiḥ

33.25

devyā dhyānaṃ mayā khyātaṃ guhyād guhyataraṃ mahat
tasmāt sarvaprayatnena sarvakāmaphalapradam

33.26

etasyāstvaṃ prasādena sarvamānyo bhaviṣyasi
sarvarūpamayī devī sarvaṃ devomayaṃ jagat
ato'haṃ viśvarūpāṃ tāṃ namāmi parameśvarīm

Linked texts (11)