Pramāṇa · Search · About · API

Devimahatmya or Saptashaticandi 36

Devīmāhātmya or Saptaśatīcaṇḍī 36

Language
Sanskrit

36.1

iti durgāmānasapūjā samāptā
durgā durgatiśamanī durgadvinivāriṇī
durgamacchedinī durgasādhinī durganāśinī
durgatoddhāriṇī durganihantrī durgamāpahā
durgamajñānadā durgadaityalokadavānalā
durgamā durgamālokā durgamātmasvarūpiṇī
durgamārgapradā durgamavidyā durgamāśritā
durgamajñānasaṃsthānā durgamadhyānabhāsinī
durgamohā durgasagā durgamāryasvarūpiṇī
durgamāsurasaṃhantrī durgamāyudhadhāriṇī
durgamāṅgī durgamatā durgasyā durgameśvarī
durgabhīmā durgabhāmā durgabhā durgadāriṇī
nāmāvalimimāṃ yastu durgāyā mama mānavaḥ
paṭhet sarvabhayānmukto bhaviṣyati na saṃśayaḥ
atha devyaparādhakṣamāpanastotram
na mantraṃ no yantraṃ tadapi ca na jāne stutimaho
na cāhvānaṃ dhyānaṃ tadapi ca na jāne stutikathāḥ
na jāne mudrāste tadapi ca na jāne vilapanaṃ
paraṃ jāne mātastvadanusaraṇāṃ kleśaharaṇām

36.2

vidherajñānena draviṇaviraheṇālasatayā
vidheyāśakyatvāttava caraṇāyoryā cyutirabhūt
tadetat kṣantavyaṃ janani sakaloddhāriṇi śive
kuputro jāyeta kvacidapi kumātā na bhavati

36.3

pṛthivyāṃ putrāste janani bahavaḥ santi saralāḥ
paraṃ teṣāṃ madhye viralataralo'haṃ tava sutaḥ
madīyo'yaṃ tyāgaḥ samucitamida no tava śive
kuputro jāyeta kvacidapi kumātā na bhavati

36.4

jaganmātarmātastava caraṇāsevā na racitā
na vā dattaṃ devi draviṇamapi bhūyastava mayā
tathāpi tvaṃ snehaṃ mayi nirupamaṃ yatprakuruṣe
kuputro jāyeta kvacidapi kumātā na bhavati

36.5

parityaktvā devā vividhavidhasevākulatayā
mayā pañcāśīteradhikamapanīte tu vayasi
idānīṃ cenmātastava yadi kṛpā nāpi bhavitā
nirālambo lambodarajanani kaṃ yāmi śaraṇam

36.6

śvapāko jalpāko bhavati madhupākopamagirā
nirātaṅko raṅko viharati ciraṃ koṭikanakaiḥ
tavāparṇe karau viśati manuvarau phalamidaṃ
janaḥ ko jānīte janāni jananīyaṃ japavidhau

36.7

citāmasmālepo garalamaśanaṃ dikpaṭadharo
jaṭādhārī karaṭhe bhujagapatihārī paśupatiḥ
kapālī bhūteśo bhajati jagadīśaikapadavīṃ
bhavāni tvatpāṇigrahaṇaparipāṭīphalamidam

36.8

na mokṣasyākāṃkṣā bhavavibhavavāñchāpi ca na me
na vijñānāpekṣā śaśimukhi sukhecchāpi na punaḥ
atastvāṃ saṃyāce janani jananaṃ yātu mama vai
mṛḍānī rudrāṇī śiva śiva bhavānīti japataḥ

36.9

nārādhitāsi vidhinā vividhopacāraiḥ
kiṃ rūkṣacintanaparairna kṛtaṃ vacobhiḥ
dhyāyase tvameva yadi kiñcana mayyanāthe
dhatse kṛpāmucitamamba paraṃ tavaiva

36.10

āpatsu magnaḥ smaraṇaṃ tvadīyaṃ karomi durge karuṇārṇaveśi
naitacchaṭhatvaṃ mama bhāvayethāḥ kṣudhātṛṣārtā jananīṃ smaranti

36.11

jagadamba vicitramatra kiṃ paripūrṇā karuṇāsti cenmayi
aparādhaparamparāparaṃ na hi mātā samupekṣate sutam

36.12

matsamaḥ pātakī nāsti pāpaghnī tvatsamā na hi
evaṃ jñātvā mahādevi yathāyogyaṃ tathā kuru

Linked texts (7)