Pramāṇa · Search · About · API

Devimahatmya or Saptashaticandi 6

Devīmāhātmya or Saptaśatīcaṇḍī 6

Language
Sanskrit

6.23

śaṅkhinī cakṣuṣormadhye śrotrayordvāravāsinī
kapolau kālikā rakṣet karṇamūle tu śāṅkarī

6.24

nāsikāyāṃ sugandhā ca uttaroṣṭhe ca carcikā
adhare cāmṛtakalā jihvāyāṃ ca sarasvatī

6.25

dantān rakṣatu kaumārī kaṇṭhadeśe tu caṇḍikā
ghaṇṭikāṃ citraghaṇṭā ca mahāmāyā ca tāluke

6.26

kāmākṣī cibukaṃ rakṣed vācaṃ me sarvamaṅgalā
grīvāyāṃ bhadrakālī ca pṛṣṭhavaṃśe dhanurdharī

6.27

nīlagrīvā bahiḥ kaṇṭhe nalikāṃ nalakūbarī
skandhayoḥ khaḍginī rakṣed bāhū me vajradhāriṇī

6.28

hastayordaṇḍinī rakṣedambikā cāṅgulīṣu ca
nakhāñchūleśvarī rakṣetkukṣau rakṣet kuleśvarī

6.29

stanau rakṣenmahādevī manaḥśokavināśinī
hṛdaye lalitā devī udare śūladhāriṇī

6.30

nābhau ca kāminī rakṣed guhyaṃ guhyeśvarī tathā
pūtanā kāmikā meḍhraṃ gude mahiṣavāhinī

6.31

kaṭayāṃ bhagavatī rakṣejjānunī vindhyavāsinī
jaṅghe mahābalā rakṣetsarvakāmapradāyinī

6.32

gulphayornārasiṃhī ca pādapṛṣṭhe tu taijasī
pādāṅgulīṣu śrīrakṣetpādādhastalavāsinī

6.33

nakhān daṃṣṭrākarālī ca keśāṃścaivordhvakeśinī
romakūpeṣu kauberī tvacaṃ vāgīśvarī tathā

6.34

raktamajjāvasāmāṃsānyasthimedāṃsi pārvatī
antrāṇi kālarātriśca pittaṃ ca mukuṭeśvaro

6.35

padmāvatī padmakośe kaphe cūḍāmaṇistathā
jvālāmukhī nakhajvālābhedyā sarvasandhiṣu

6.36

śukraṃ brahmāṇī me rakṣecchāyāṃ chatreśvarī tathā
ahaṃkāraṃ mano buddhiṃ rakṣenme dharmadhāriṇī

6.37

prāṇāpānau tathā vyānamudānaṃ ca samānakam
vajrahastā ca me rakṣet prāṇāṃ kalyāṇaśobhanā

6.38

rase rūpe ca gandhe ca śabde sparśe ca yoginī
sattvaṃ rajastamaścaiva rakṣennārāyaṇī sadā

6.39

āyū rakṣatu vārāhī dharmaṃ rakṣatu vaiṣṇavī
yaśaḥ kīrtiṃ ca lakṣmīṃ ca dhanaṃ vidyāṃ ca cakriṇī

6.40

gotrendrāṇī me rakṣetpaśūnme rakṣa caṇḍike
putrān rakṣenmahālakṣmīrbhāryāṃ rakṣatu bhairavī

6.41

panthānaṃ supathā rakṣenmārgaṃ kṣemakarī tathā
rājadvāre mahālakṣmīrvijayā sarvataḥ sthitā

6.42

rakṣāhīnaṃ tu yatsthānaṃ varjitaṃ kavacena tu
tatsarvaṃ rakṣa me devi jayantī pāpanāśinī

6.43

padamekaṃ na gacchettu yadīcchecchubhamātmanaḥ
kavacenāvṛto nityaṃ yatra yatraiva gacchati

6.44

tatra tatrārthalābhaśca vijayaḥ sārvakāmikaḥ
yaṃ yaṃ cintayate kāmaṃ taṃ taṃ prāpnoti niścitam
paramaiśvaryamatulaṃ prāpsyate bhūtale pumān

6.45

nirbhayo jāyate martyaḥ saṃgrāmeṣvaparājitaḥ
trailokye tu bhavetpūjyaḥ kavacenāvṛtaḥ pumān

6.46

idaṃ tu devyāḥ kavacaṃ devānāmapi durlabham
yaḥ paṭhetprayato nityaṃ trisandhyaṃ śraddhayānvitaḥ

6.47

daivī kalā bhavettasya trailokyeṣvaparājitaḥ
jīved varṣaśataṃ sāgramapamṛtyuvivarjitaḥ

6.48

naśyanti vyādhayaḥ sarve lūtāvisphoṭakādayaḥ
sthāvaraṃ jaṅgamaṃ caiva kṛtrimaṃ cāpi yadviṣam

6.49

abhicārāviyo sarvāṇi mantrayantrāṇi bhūtale
bhūcarāḥ khecarāścaiva jalajāścopadeśikāḥ

6.50

sahajā kulajā mālā ḍākinī śākinī tathā
antarikṣacarā ghorā ḍākinyaśca mahābalāḥ

6.51

grahabhūtapiśācāśca yakṣagandharvarākṣasāḥ
brahmarākṣasavetālā kūṣmārāḍā bhairavādayaḥ

6.52

naśyanti darśanāttasya kavace hṛdi saṃsthite
mānonnatirbhaved rājyastejovṛddhikaraṃ param

6.53

yaśasā varddhate so'pi kīrtimaṇḍitabhūtale
japet saptaśatīṃ caṇḍīṃ kṛtvā tu kavacaṃ purā

6.54

yāvadbhūmaṇḍalaṃ dhatte saśailavanakānanam
tāvattiṣṭhati medinyāṃ santatiḥ putrapautrikī

6.55

dehānte paramaṃ sthānaṃ yatsurairapi durlabham
prāpnoti puruṣo nityaṃ mahāmāyāprasādataḥ

6.56

labhate paramaṃ rūpaṃ śivena saha modate || oṃ

Linked texts (11)