Pramāṇa · Search · About · API

Ekadashikhanda 10

Ekādaśīkhaṇḍa 10

Language
Sanskrit

10.1

atha vaiśākhakṛṣṇaikādaśīkathā || yudhiṣṭhira uvāca || vaiśākhasyāsite pakṣe kiṃnāmaikādaśī bhavet || mahimānaṃ kathaya
me vāsudeva namostu te

10.2

śrīkṛṣṇa uvāca || saubhāgyadāyinī rājannihaloke paratra ca || vaiśākhakṛṣṇapakṣe tu
nāmnā caiva varūthinī

10.3

varūthinyā vratenaiva saukhyaṃ bhavati sarvadā || pāpahāniśca bhavati saubhāgyaprāptireva ca

10.4

durbhagā'pi karotyenāṃ strī saubhāgyamavāpnuyāt || lokānāṃ caiva sarveṣāṃ muktimuktipradāyinī

10.5

sarvapāpaharā nṛṇāṃ garbhadāsanikṛntanī || varūthinyā vrate naiva māṃdhātā svargatiṃ gataḥ

10.6

dhuṃdhumārādayaścānye rājāno bahavastathā || brahmakapālanirmukto babhūva bhagavān bhavaḥ

10.7

daśavarṣasahasrāṇi
tapastapyati yo naraḥ || tattulyaṃ phalamāpnoti varūthinyā vratādapi

10.8

śraddhāvānyastu kurute varūthinyā vrataṃ naraḥ || vāñchitaṃ labhate so'pi ihaloke paratra ca

10.9

pavitrā pāvanī hoṣā mahāpātaka nāśinī || bhuktimuktipradā hoṣā kartṛṇāṃ nṛpasattama

10.10

aśvadānānnṛpaśreṣṭha gajadānaṃ viśiṣyate || gajadānādbhūmidānaṃ tiladānaṃ tato'dhikam

10.11

tataḥ suvarṇadānaṃ tu hayannadānaṃ tato'dhikam || annadānātparaṃ dānaṃ na bhūtaṃ na bhaviṣyati

10.12

pitṛdeva-manuṣyāṇāṃ tṛptirannena jāyate || tatsamaṃ kavibhiḥ proktaṃ kanyādānaṃ nṛpottama

10.13

dhenudānaṃ ca tattulyamityāha bhagavānsvayam || proktebhyaḥ sarvadānebhyo vidyādānaṃ viśiṣyate

10.14

tatphalaṃ samavāpnoti naraḥ kṛtvā varūthinīm
kanyā vittena jīvanti ye narāḥ pāpamohitāḥ

10.15

te narā narake yānti yādavābhūtasaṃplavam || tasmātsarvaprayatnena
na grāhyaṃ kanyakādhanam

10.16

yaśca gṛhṇāti lobhena kanyāṃ krītvā ca taddhanam || so'nyajanmani rājendra oturbhavati
niścitam

10.17

kanyāṃ vittena yo dadyādyathāśakti svalaṃkṛtām || tatpuṇyasaṃkhyāṃ kartuṃ hi citragupto bhavatyalam

10.18

tatphalaṃ samavāpnoti naraḥ kṛtvā varūthinīm || kāsyaṃ māṃsaṃ masūrānnaṃ caṇakānkodravāṃstathā

10.19

śākaṃ madhu
parānnaṃ ca punarbhojanamaithune || vaiṣṇavo vratakarttā ca daśamyāṃ daśa varjayet

10.20

dyūtaṃ krīḍāṃ ca nidrāṃ ca tāmbūlaṃ
dantadhāvanam || parāpavādaṃ paiśunyaṃ patitaiḥ saha bhāṣaṇam

10.21

krodhaṃ caivānṛtaṃ vākyamekādaśyāṃ vivarjayet
kāṃsyaṃ māṃsaṃ masūrāṃśca kṣaudraṃ vitathabhāṣaṇam

10.22

vyāyāmaṃ ca prayāsaṃ ca punarbhojanamaithune || kṣāraṃ tailaṃ parānnaṃ ca
dvādaśyāṃ parivarjayet

10.23

anena vidhinā rājannivahitāyairvarūthinī || sarvapāpakṣayaṃ kṛtvā dadyāccānte'kṣayāṃ
gatim

10.24

tasmātsarvaprayatnena kartavyā pāpabhīrubhiḥ || kṣapāritanayādbhītairnaradeva varūthinī

10.25

paṭhanācchravaṇādrājan gosahasraphalaṃ labhet || sarvapāpavinirmukto viṣṇuloke mahīyate

10.11-2

iti śrībhaviṣyapurāṇe
vaiśākhakṛṣṇavarūthinyekādaśīmāhātmyaṃ samāptam

Linked texts (7)