Ekadashikhanda 12

Ekādaśīkhaṇḍa 12

athajyeṣṭhakṛṣṇaikādaśīkathā|| yudhiṣṭhira uvāca|| jyeṣṭhasya kṛṣṇapakṣe tu kiṃnāmaikādaśī bhavet||śrotumicchāmi māhātmyaṃtaddasva janārdana

śrīkṛṣṇa uvāca|| sādhu pṛṣṭaṃ tvayā rājan lokānāṃ hitakāmyayā|| bahupuṇyapradā hyeṣā
mahāpātaka nāśinī

aparā nāma rājendra apāraphaladāyinī|| loke prasiddhatāṃ yāti aparāṃ yastu sevate

brahmahatyābhibhūto'pi gotrahā bhrūṇahā tathā || parāpavādī ca parastrīrasiko'pi ca

aparāsevanādrājan
vipāpmā bhavati dhruvam || kūṭasākṣyaṃ mānakūṭaṃ tulākūṭaṃ karoti yaḥ

kūṭavedaṃ paṭhedvipraḥ kūṭaśāstraṃ karoti
ca || jyotiṣī kūṭagaṇakaḥ kūṭāyurvedako bhiṣak

kūṭasākṣisamā hote vijñeyā narakaukasaḥ|| aparāsevanādrājan
pāpamuktā bhavanti te

kṣatriyaḥ kṣātradharmaṃ yastyaktvā yuddhātpalāyate || sa yāti narakaṃ ghoraṃ svīyadharmabahiṣkṛtaḥ

aparāsevanādrājan pāpaṃ tyaktvā divaṃ vrajet || vidyāmadhītya yaḥ śiṣyo gurunindāṃ karoti vai

mahāpātakayuktohi nirayaṃ yāti dāruṇam || aparāsevanātso'pi sadgatiṃ prāpnuyānnaraḥ

aparāmahimānaṃ tu śṛṇu
rājanvadāmyaham || puṣkaratritaye snātvā kārtikyāṃ yatphalaṃ labhet

gaṃgāyāṃ piṇḍadānena pitṛṇāṃ tṛptido
yathā || siṃhasthite devagurau gautamīsnānato naraḥ

yatphalaṃ samavāpnoti kumbhe kedāradarśanāt || badaryāśramayātrāyāṃ tattīrthasevanādapi

yatphalaṃ samavāpnoti kurukṣetre ravigrahe || gajāśva haimadānāni yajñe kṛtsnasuvarṇadaḥ

yatphalaṃ samavāpnoti hyaparāyā vratānnaraḥ || ardhaprasūtāṃ gauṃ dattvā suvarṇaṃ vasudhāṃ tathā

narastatphalamāpnoti aparāvratasevanāt || pāpadrumakuṭhāro'yaṃ pāpendhanadavānalaḥ

pāpāndhakārasūryo'yaṃ
pāpasāraṅgakeśarī || budbudā iva toyeṣu puttikā iva jantuṣu

jāyante maraṇāyaiva ekādaśyā vrataṃ vinā
aparāṃ samupoṣyaiva pūjayitvā trivikramam

sarvapāpavinirmukto viṣṇulokaṃ vrajennaraḥ || lokānāṃ ca hitārthāya
tavāgre kathitaṃ mayā

paṭhanācchravaṇādrājansarvapāpaiḥ pramucyate

iti śrībrahmāṇḍapurāṇe jyeṣṭhakṛṣṇaikādaśīparāmāhātmyaṃ samāptam

Linked texts (5)