Pramāṇa · Search · About · API

Ekadashikhanda 17

Ekādaśīkhaṇḍa 17

Language
Sanskrit

17.1

samāptau
gopradānena sa gacchedviṣṇumandiram || payovratī tathā''pnoti brahmalokaṃ sanātanam

17.2

vratānte ca tathā dadyāddhāmekāṃ
ca payasvinīm || raṃbhāphalapalāśeṣu yo bhuṃkte ca ṛtudvaye

17.3

vastrayugmaṃ ca kāṃsyaṃ ca śaktyā dadyātsukhī bhavet
kāṃsye brahmā śivo lakṣmīḥ kāṃsyameva vibhāvasuḥ

17.4

kāṃsyaṃ viṣṇumayaṃ yasmādataḥ śāntiṃ prayaccha me
nityaṃ palāśabhojī ca tailābhyaṃgavivarjitaḥ

17.5

sa nihantyatipāpāni tūlarāśimivānalaḥ || brahmaghnaśca surāpaśca bālaghātakaraśca yaḥ

17.6

asatyavādino ye ca
strīghātī vrataghātakaḥ || agamyāgāminaścaiva vidhavāgāminastathā

17.7

cāṇḍālī gāminaścaiva viprastrīgāminastathā
te sarve pāpanirmuktā vratenānena keśava

17.8

samāptau kāṃsyapātraṃ tu catuḥṣaṣṭipalairyutam || sa vatsāṃ gāṃ ca vai dadyātsālaṃkārāṃ payasvinīm

17.9

alaṃkṛtāya viduṣe suvastrāya suveṣiṇe || bhūmau vilipya yo bhuṅke devaṃ nārāyaṇaṃ smaran

17.210

dadyādbhūmiṃ yathāśakti kṛṣyāṃ bahujalāṃtike|| ārogyaputrasaṃpanno rājā bhavati dhārmikaḥ

17.11

śatrorbhayaṃ na
labhate viṣṇulokaṃ sa gacchati|| ayācite tvanaḍuvāhaṃ sahiraṇyaṃ sacandanam

17.12

ṣaḍrasaṃ bhojanaṃ dadyātsa yāti
paramāṃ gatim|| yastu supte hṛṣīkeśe naktaṃ ca kurute vratam

17.13

brāhmaṇān bhojayetpaścācchivaloke mahīyate
ekabhaktaṃ naraḥ kṛtvā mitāśī ca dṛḍhavrataḥ

17.14

yo'rcayeccaturo māsān vāsudevaṃ sa nākabhāk|| samāptau bhojayedviprāṃcchaktyā dadyācca dakṣiṇām

17.15

yastu supte hṛṣīkeśe kṣitiśāyī bhavennaraḥ|| śayyāṃ sopaskarāṃ dadyācchivaloke
mahīyate

17.16

pāpābhyaṃgaṃ naro yastu varjayecca ṛtudvaye|| pāpābhyaṅgaṃ naraḥ kuryādbrāhmaṇānāṃ ca bhojanam

17.17

dakṣiṇāṃ ca yathāśaktyā sa gacchedviṣṇumaṃdiram || āṣāḍhāccaturo māsānvarjayennakhakṛṃtanam

17.18

ārogyaputrasampanno rājā bhavati dhārmikaḥ|| pāyasaṃ lavaṇaṃ caiva madhu sarpiḥ phalāni ca

17.19

cāturmāsye varjayatigaurīśaṃkaratuṣṭaye || kārtikyāṃ ca punastāni brāhmaṇāya nivedayet

17.220

sa rudralokamāpnoti rudravrataniṣevaṇāt || yavānnaṃ
bhakṣayedyastu athavā śālayaḥ śubhāḥ

17.21

putrapautrādibhiḥ sārddhaṃ śivaloke mahīyate || tailābhyaṅgaparityāgī
viṣṇubhaktaḥ sadā vratī

17.22

varṣāsu viṣṇumabhyarcya vaiṣṇavīṃ labhate gatim || samāptau kāṃsyapātraṃ ca suvarṇena
samanvitam

17.23

tailena pūritaṃ kṛtvā brāhmaṇāya nivedayet || vārṣikāṃścaturo māsānchākādi parivarjayet

17.24

viṣṇulokamavāpnoti pitṛtṛptiḥ prajāyate|| vratānte harimuddiśya pātraṃ rājatameva hi

17.25

vastreṇa veṣṭayedgandhapatrapuṣpaiḥ
samarcayet|| mūlapatrakarīrāgraphalakāṇḍādhirūḍhakam

17.26

tvakpuṣpaṃ kavacaṃ ceti śākamaṣṭavidhaṃ smṛtam|| samabhyarcya
yathāśaktyā brāhmaṇānvedapāragān

17.27

dadyāddakṣiṇayā sārdhaṃ vratasampūrṇahetave|| śivasāyujyamāpnoti prasādācchūlapāṇinaḥ

17.28

apūpavarjanaṃ kṛtvā bhojanaṃ vratamācaret|| kārtike svarṇagodhūmānvastraṃ datvā'śvamedhakṛt

17.29

godhūmāḥ sarvajantūnāṃ balapuṣṭivivardhanāḥ|| mukhyāśca havyakavyeṣu tasmānme dadatu śriyam

17.230

āṣāḍhādi
caturmāsānvṛntākaṃ varjayennaraḥ|| kāravallīphalaṃ vāpyalābuṃ paḍavalaṃ tathā

17.31

yadvā tadvā phalaṃ vāpi yacca priyatamaṃ
bhavet || cāturmāsye tato vṛtte raupyāṇaye tāni kārayet

17.32

madhye vidrumayuktāni hyarcayitvā tu śaktitaḥ
dadyādakṣiṇayā sārddhaṃ brāhmaṇāyātibhaktitaḥ

17.33

abhīṣṭaṃ devamuddiśya devo me prīyatāmiti || sa dīrghamāyurārogyaṃ
putrapautrānsurūpakān

17.34

akṣayyāṃ santatiṃ kīrtiṃ labdhvā svarge mahīyate || phalatyāgī bhavedyastu viṣṇuloke sa
pūjyate

17.35

samāptau kaladhautāni tāni dadyāddvijātaye || śrāvaṇe varjayecchākaṃ dadhi bhādrapade tathā

17.36

dugdhamāśvayuje māsi kārtike dvidalaṃ tyajet || catvāryetāni nityāni caturāśramavartinām

17.37

prathame māsi kartavyaṃ
nityaṃ śākavrataṃ naraiḥ || dvitīye māsi kartavyaṃ dadhivratamanuttamam

17.38

payovrataṃ tṛtīye tu caturthaṃ dvidalaṃ tathā || kūṣmāṇḍaṃ rājamāṣāṃśca mūlakaṃ gṛñjanaṃ tathā

17.39

karamardaṃ cekṣudaṇḍaṃ cāturmāsye tyajennaraḥ|| masūraṃ bahubījaṃ ca vṛntākaṃ caiva
varjayet

17.240

nityānyetāni viprendra vratānyāhurmanīṣiṇaḥ|| viśeṣādbadarīṃ dhātrīmalābuṃ ciñciṇīṃ tyajet

17.41

jīrṇaṃ dhātrīphalaṃ grāhyaṃ jīrṇā grāhyā ca ciñciṇī|| vārṣikāṃścaturo māsānprasupte ca janārdane

17.42

mañcakhaṭvādiśayanaṃ
varjayedraktimānnaraḥ|| anṛtau varjayeddāryāmṛtau gacchanna duṣyati

17.43

madhuvelīṃ ca śiguṃ ca caturmāsye tyajennaraḥ
vṛntākaṃ ca kaliṃgaṃ ca bilvodumbarabhissaṭāḥ

17.44

udare yasya jīryante tasya dūrataro hariḥ|| upavāsastathā
naktamekabhaktamayācitam

17.45

aśaktastu yathā kuryātsāyaṃ prātarakhaṃḍitam|| snānapūjādisaṃyuktaḥ sa naro
harilokabhāk

17.46

gītavādyakaro viṣṇorgāndharvaṃ lokamāpnuyāt|| madhubhukca bhavedrājā puruṣo guḍavarjanāt

17.47

labhecca saṃtatiṃ dīrghāṃ putrapautrādivardhinīm || tailasya varjanādrājansundarāṃgaḥ prajāyate

17.48

kausumbhatailasantyāgācchatrunāśamavāpnuyāt|| madhūkatailatyāgācca susaubhāgyaphalaṃ labhet

17.49

kaṭu tiktaṃ ca madhuraṃ kaṣāyalavaṇāmlasān
varjayet sa ca vairūpyaṃ daurgaṃdhyaṃ nāpnuyātsadā

17.50

puṣpādibhogatyāgena svarge vidyādharo bhavet|| yogābhyāsī
bhavedyastu sa brahmapadavīmiyāt

17.51

tāmbūlavarjanādrogī sadyo muktāmayo bhavet|| pādābhyaṃgaparityāgācchirobhyaṃgasya pārthiva

17.52

dīptimān dīpakaraṇo yakṣadravyapatirbhavet|| dadhidugdhaparityāgī golokaṃ labhate naraḥ

17.53

iha lokamavāpnoti sthālīpākavivarjanāt|| ekāntaropavāsena brahmaloke mahīyate

17.54

caturo vārṣikānmāsān
nakharomāṇi dhārayet|| kalpasthāyī bhavedrājansa naro nātra saṃśayaḥ

17.55

namo nārāyaṇāyeti japitvā'nantakaṃ
phalam|| viṣṇupādāṃbujasparśātkṛtakṛtyo bhavennaraḥ

17.56

lakṣapradakṣiṇā yastu karoti harimaṃdire|| haṃsayukta vimānena
sa yāti vaiṣṇavīṃ purīm

17.57

trirātrabhojanatyāgānmodate divi devavat || parānnavarjanādrājandevo vai mānuṣo
bhavet

17.58

prājāpatyaṃ caredyo vai cāturmāsyavratānnaraḥ || mucyate pātakaiḥ sarvaistrividhairnātra saṃśayaḥ

17.59

tattakṛcchrātikṛcchrābhyāṃ yaḥ kṣipecchayanaṃ hareḥ || sa yāti paramaṃ sthānaṃ punarāvṛttivarjitam

17.260

cāndrāyaṇena
yo rājan kṣipenmāsacatuṣṭayam || divya deho bhavetso'tha śivalokaṃ ca gacchati

17.61

cāturmāsye naro yo vai
tyajedannādibhakṣaṇam || sa gaccheddharisāyujyaṃ na bhūyastu prajāyate

17.62

bhikṣābhojī naro yo hi sa bhavedvedapāragaḥ
payovratena yo rājan kṣipenmāsacatuṣṭayam

17.63

tasya vaṃśasamucchedaḥ kadācinnopapadyate || paṃcagavyāsanaḥ pārtha
cāndrāyaṇaphalaṃ labhet

17.64

dinatrayaṃ jalatyāgānna rogairabhibhūyate||evamādivrataiḥ pārtha tuṣṭimāyāti keśavaḥ

17.265

dugdhābdhivīciśayane bhagavānaṃto yasmindine svapiti cātha vibudhyate ca || tasminnananyamanasāmupavāsabhājāṃ
puṃsāṃ dadāti ca gatiṃ garuḍāsano'sau

17.16-2

iti śrībhaviṣyottarapurāṇe viṣṇoḥ śayanyekādaśīcāturmāsyamāhātmyaṃ sampūrṇam

Linked texts (4)