Ekadashikhanda 19
Ekādaśīkhaṇḍa 19
- Language
- Sanskrit
19.1
atha śrāvaṇaśuklaikādaśīkathā || yudhiṣṭhira uvāca || śrāvaṇasya site
pakṣe kināmaikādaśī bhavet || kathayasva prasādena mamāgre madhusūdana
19.2
śrīkṛṣṇa uvāca || śṛṇuṣvāvahito rājan
kathāṃ pāpahārāṃ parām || yasyāḥ śravaṇamātreṇa vājapeyaphalaṃ labhet
19.3
dvāparasya yugasyādau purā māhiṣmatīpure
rājāmahījidākhyāto rājyaṃ pālayati svayam
19.4
putrahīnasya tasyaiva na tadrājyaṃ sukhapradam || aputrasya sukhaṃ
nāsti iha loke paratra ca
19.9
yatato'sya sutaprāptau kālo bahutaro gataḥ || na prāptaśca suto rājñā sarvasaukhyaprado
nṛṇām
19.6
dṛṣṭvā''tmānaṃ pravayasaṃ rājā cintāparo'bhavat || sadogataḥ prajāmadhya idaṃ vacanamabravīt
19.7
iha janmani bho lokā na mayā pātakaṃ kṛtam || anyāyopārjitaṃ vittaṃ kṣiptaṃ kośe mayā na hi
19.8
brahmasvaṃ
devadraviṇaṃ na gṛhītaṃ mayā kvacit || nyāsāpahāro na kṛtaḥ parasya bahupāpadaḥ
19.9-2
sutavatpālitā lokā dharmeṇa vijitā mahī || duṣṭeṣu pātito daṇḍo bandhuputropameṣvapi || śiṣṭāḥ supūjitā lokā
dveṣyāścāpi mahājanāḥ
19.10
ityevaṃ vrajato mārgaṃ dharmayukte dvijottamāḥ || kasmānmama gṛhe putro na jātastadvicāryatām
19.11
iti vākyaṃ dvijāḥ śrutvā saprajāḥ sapurohitāḥ || maṃtrayitvā nṛpahitaṃ jagmuste gahanaṃ vanam
19.12
itastataśca paśyantaścāśramānṛṣisevitān || nṛpaterhitamicchanto dahaśurmunisattamam
19.13
tapyamānaṃ tapo ghoraṃ
cidānandaṃ nirāmayam|| nirāhāraṃ jitātmānaṃ jitakrodhaṃ sanātanam
19.14
lomaśaṃ dharmatattvajñaṃ sarvaśāstra viśāradam
dīrghāyuṣaṃ mahātmānamanekabrahmasammitam
19.15
kalpe gate yasya ekamekaṃ loma viśīryate|| ato lomaśa nāmānaṃ
trikālajñaṃ mahāmunim
19.16
taṃ dṛṣṭvā harṣitāḥ sarve hyājagmustasya sannidhim|| yathānyāyeyaṃ yathārhaṃ te namaścakruḥ
ryathoditam
19.17
vinayā'vanatāḥ sarve ūcuścaiva parasparam || asmadbhāgyavaśādeva prāpto'haṃ munisattamaḥ
19.18
tāṃstathā praṇatān dṛṣṭvā hyuvāca munisattamaḥ|| lomaśa uvāca|| kimarthamiha saṃprāptāḥ kathayadhvaṃ sakāraṇam
19.19
maddarśanāhlādagiraḥ stuvanta iva māṃ kimu || asaṃśayaṃ kariṣyāmi bhavatāṃ yaddhitaṃ bhavet
19.20
paropakṛtaye janma māhajñānaṃ na saṃśayaḥ || janā ūcuḥ || śrūyatāmabhidhāsyāmo vayamāgamakāraṇam
19.21
saṃśayacchedanārthāya tava sannidhimāgatāḥ || padmayoneḥ paratastvattaḥ śreṣṭho na vidyate
19.22
ataḥ kāryavaśātprāptāḥ
samīpaṃ bhavato vayam || mahījitnāma rājā'sau putrahīno'sti sāṃpratam
19.23
vayaṃ tasya prajā brahmanputravattena
pālitāḥ || taṃ putrarahitaṃ dṛṣṭvā tasya dukhena dukhinaḥ
19.24
tapaḥ kartumihāyātā matiṃ kṛtvā tu naiṣṭhikīm || tasya
bhāgyavaśāddṛṣṭastvamasmābhirdvijottama
19.25
mahatāṃ darśanenaiva kāryasiddhirbhavennṛṇām || upadeśaṃ vada mune rājñaḥ
putro yathā bhavet
19.26
iti teṣāṃ vacaḥ śrutvā muhūrtaṃ dhyānamāsthitaḥ || pratyuvāca munirjñātvā tasya janma
purātanam
19.27
lomaśa uvāca || pūrvajanmani vaiśyo'yaṃ dhanahīno nṛśaṃsakṛt || vāṇijyakarmanirato grāmādgrāmāntaraṃ bhṛśam
19.28
jyeṣṭhamāse site pakṣe dvādaśīdivase tathā || madhyāhne dyumaṇau prāpte grāmasīmni jalāśayam
19.29
kūpikāṃ sajalāṃ dṛṣṭvā jalapāne manodadhau || sadyaḥ sūtā savatsā ca dhenustatra samāgatā
19.30
tṛṣāturā nidāghārtā tasyāmambu papau tu sā || pibantīṃ vārayitvā tāmasau toyaṃ svayaṃ papau
19.31
karmaṇastasya
pāpena sa putrarahito nṛpaḥ || pūrvajanmakṛtātpuṇyātprāptaṃ rājyamakaṇṭakam
19.32
janāḥ ūcuḥ || puṇyātpāpaṃ kṣayaṃ yāti purāṇe śrūyate mune || puṇyopadeśaṃ kathaya yena pāpakṣayo bhavet
19.33
yathā bhavatprasādena putro'sya bhavitā tathā || lomaśa uvāca || śrāvaṇe śuklapakṣe tu putradā nāma viśrutā
19.34
ekādaśī tithiścāsti kurudhvaṃ tadvrataṃ janāḥ || yathāvidhi yathānyāyaṃ yathoktaṃ jāgarānvitam
19.35
tasyāḥ
puṇyaṃ suvimalaṃ dadatāṃ nṛpaterjanāḥ || evaṃ kṛte suniyataṃ rājñaḥ putro bhaviṣyati
19.36
śrutvaitallomaśavacastaṃ
praṇamya dvijottamam || prajagmuḥ svagṛhānsarve harṣotphullavilocanāḥ
19.37
śravaṇaṃ tu samāsādya smṛtvā lomaśabhāṣitam || rājñā saha vrataṃ cakruḥ sarve śraddhāsamanvitāḥ
19.38
dvādaśīdivase puṇya dadurnṛpataye janāḥ || datte
puṇye yathā rājñī garbhamādhata śobhanam
19.39
prāpte prasavakāle sā suṣuve putramūrjitam || evameṣā nṛpaśreṣṭha
putradā nāma viśrutā
19.40
kartavyā sukhamicchadbhiriha loke paratra ca
19.41
śrutvā māhātmyametasyāḥ sarvapāpaiḥ
pramucyate|| iha putrasukhaṃ prāpya paratra svargatirbhavet
19.18-2
iti śrībhaviṣyottarapurāṇe śrāvaṇa śuklaikādaśīputradāmāhātmyaṃ samāptam
Linked texts (3)
- Padmapurāṇa — Vyāsa, Sanskrit
- Skandamahāpurāṇa (vulgate) — Sanskrit
- Ṣaḍviṃśatyekādaśīmāhātmya — Sanskrit