Pramāṇa · Search · About · API

Ekadashikhanda 20

Ekādaśīkhaṇḍa 20

Language
Sanskrit

20.1

atha bhādrapadakṛṣṇaikādaśī kathā|| yudhiṣṭhira uvāca|| bhādrasya kṛṣṇapakṣe tu kināmaikādaśī bhavet|| etadicchāmyahaṃ śrotuṃ kathayasva janārdana

20.2

śrīkṛṣṇa uvāca|| śṛṇuṣvaikamanā rājankathayiṣyāmi vistarāt || ajānāmnīti vikhyātā sarvapāpapraṇāśinī

20.3

pūjayitvā hṛṣīkeśaṃ vrataṃ tasyāḥ karoti yaḥ|| pāpāni tasya naśyanti vratasya śravaṇādapi

20.4

nātaḥ paratarā rājam̐llokadvayahitāvahā || satyamuktaṃ mayā hyetannāsatyaṃ bhāṣitaṃ mama

20.5

hariścandra iti
khyāto babhūva nṛpatiḥ puraḥ || cakravartī satyasandhaḥ samastāyā bhuvaḥ patiḥ

20.6

kasyāpi karmaṇo yogādrājyabhraṣṭo
babhūva saḥ || vikrīya vanitāṃ putrānsa cakārātmavikrayam

20.7

pulkasasya ca dāsatvaṃ gato rājā sa puṇyakṛt
satyamālaṃbya rājendramṛtacailāpahārakaḥ

20.8

so'bhavannṛpatiśreṣṭho na satyāccalitastathā || evaṃ gatasya nṛpaterbahavo
vatsarā gatāḥ

20.9

tataścintāparo rājā babhūvātyantaduḥkhitaḥ || kiṃ karomi ka gacchāmi niṣkṛtirme kathaṃ bhavet

20.10

iti cintayatastasya magnasya vṛjinārṇave || ājagāma muniḥ kaścijjñātvā rājānamāturam

20.11

paropakaraṇārthāya nirmito brahmaṇā dvijaḥ || sa taṃ dṛṣṭvā dvijavaraṃ namāma nṛpasattamaḥ

20.12

kṛtāñjalipuṭo
bhūtvā gautamasyāgrataḥ sthitaḥ || kathayāmāsa vṛttāṃtamātmano duḥkhasaṃyutam

20.13

śrutvā nṛpativākyāni gautamo
viṣayānvitaḥ || upadeśaṃ nṛpataye vratasyāsya munirdadau

20.14

māsi bhādrapade rājan kṛṣṇapakṣe tu śobhanā || ekādaśī samāyātā ajānāmnyatipuṇyadā

20.15

tasyāḥ kuru
vrataṃ rājan pāpanāśo bhaviṣyati || tava bhāgyavaśādeṣā saptame'hni samāgatā

20.16

upavāsaparo bhūtvā rātrau
jāgaraṇaṃ kuru || evaṃ tasyā vrate cīrṇe sarvapāpakṣayo bhavet

20.17

tava puṇyaprabhāveṇa cāgato'haṃ nṛpottama
ityevaṃ kathayitvā tu munirantaradhīyata

20.18

munivākyaṃ nṛpaḥ śrutvā cakāra vratamuttamam || kṛte tasmin vrate rājñaḥ
pāpasyānto'bhavatkṣaṇāt

20.19

śrūyatāṃ rājaśārdūla prabhāvo'sya vratasya ca || yadduḥkhaṃ bahubhirvarṣairbhoktavyaṃ
tatkṣayo bhavet

20.20

nistīrṇaduḥkho rājāsīd vratasyāsya prabhāvataḥ || patnyā saha samāyogaṃ putrajīvanamāpa saḥ

20.21

devadundubhayo neduḥ puṣpavarṣamabhūddivaḥ || ekādaśyāḥ prabhāveṇa prāptaṃ rājyamakaṇṭakam

20.22

svargaṃ lebhe hariścandraḥ sapuraḥ saparicchadaḥ || īdṛgvidhaṃ vrataṃ rājanye kurvanti dvijottamāḥ

20.23

sarvapāpavinirmuktā tridivaṃ yānti te dhruvam || paṭhanācchravaṇādrājannaśvamedhaphalaṃ labhet

20.19-2

iti śrī brahmavaivartapurāṇe
bhādrapadakṛṣṇe ajānāmaikādaśīmāhātmyaṃ samāptam

Linked texts (5)