Pramāṇa · Search · About · API

Ekadashikhanda 21

Ekādaśīkhaṇḍa 21

Language
Sanskrit

21.1

atha bhādrapadaśuklaikādaśīkathā || yudhiṣṭhira uvāca
nabhasyasitapakṣe tu kināmaikādaśī bhavet || ko devaḥ ko vidhistasyāḥ kiṃ puṇyaṃ ca vadasva naḥ

21.2

śrīkṛṣṇa uvāca || kathayāmi mahāpuṇyāṃ svargamokṣapradāyinīm || vāmanaikādaśī rājansarvapāpaharāṃ parām

21.3

imāmeva jayantyākhyāṃ prāhurekādaśīṃ nṛpa || tasyā śravaṇamātreṇa sarvapāpakṣayo bhavet

21.4

vājapeyaphalaṃ proktaṃ
nātaḥ parataraṃ nṛṇām|| pāpināṃ pāpaśamanaṃ jayantīvratamuttamam

21.5

nātaḥ paratarā rājanra vai mokṣapradāyinī
etasmāt kāraṇādrājan kartavyā gatimicchatā

21.6

vaiṣṇavairmama bhaktaistu manujairmatparāyaṇaiḥ || nabhasye vāmano
yaistu pūjitastairjagattrayam

21.7

pūjitaṃ nātra saṃdehaste yānti harisannidhim|| vāmanāḥ pūjito yena kamalaiḥ kamalekṣaṇaḥ

21.8

nabhasyasitapakṣe tu jayaṃtyekādaśīdinam || tenārcitaṃ jagatsarvaṃ trayo devā sanātanāḥ

21.9

etasmātkāraṇādrājankartavyo harivāsaraḥ || asmin kṛte na kartavyaṃ kiṃcidasti jagatraye

21.10

asyāṃ prasupto bhagavānetyaṅgaparivartanam || tasmādenāṃ janāḥ sarve vadaṃti parivartinīm

21.11

yudhiṣṭhira uvāca || saṃśayo'sti mahānmahyaṃ śrūyatāṃ ca janārdana || kathaṃ supto'si deveśa kathaṃ yāsyaṅgavartanam

21.12

kimarthaṃ devadeveśa balirbadstvayāsuraḥ || santuṣṭā pṛthivī devāḥ kimakurvañjanārdana

21.13

ko vidhiḥ kiṃ vrataṃ caiva cāturmāsyamupāsatām
tvayi supte jagannātha kiṃ kurvaṃti janāḥ prabho

21.14

etadvistarato brūhi saṃśayaṃ hara me prabho || śrīkṛṣṇa uvāca || śrūyatāṃ rājaśārdūla kathāṃ pāpaharāṃ parām

21.15

balirvai dānavaḥ pūrvamāsītretāyuge nṛpa || apūjayacca māṃ nityaṃ madbhakto matparāyaṇaḥ

21.16

japaistu vividhaiḥ sūktyairyajate māṃ sanityaśaḥ || dvijānāṃ pūjako nityaṃ yajñakarmakṛtāśayaḥ

21.17

paraṃ tvindrakṛtadveṣī devalokamajījayat || maddattamindralokaṃ vai jitaṃ tena mahātmanā

21.18

vilokya ca tataḥ sarve devāḥ saṃhatya mantrayan || sarvairmilitvā gaṃtavyaṃ devaṃ vijñāpituṃ prabhum

21.19

tataśca devarṣibhiḥ sākamindro gataḥ prabhum || śirasā hyavaniṃ gatvā stuta indreṇa sūktibhiḥ

21.20

guruṇā daivataiḥ sārddhaṃ bahudhā pūjito hyaham || tato vāmanarūpeṇa
hyavatīrṇaśca pañcame

21.21

atyugrarūpeṇa tadā sarvabrahmāṇḍarūpiṇā || bālakena jitaḥ so vai satyamālambya
tasthivān

21.22

yudhiṣṭhira uvāca || tvayā vāmanarūpeṇa so'suraśca jitaḥ katham || etatkathaya deveśa
mahyaṃ bhaktāya vistarāt

21.23

śrīkṛṣṇa uvāca|| mayā bālena sa baliḥ prārthito baṭurūpiṇā || padatrayamitāṃ
bhūmiṃ dehi me bhuvanatrayam

21.24

dattaṃ bhavati te rājannatra kāryā vicāraṇā || ityuktaśca mayā rājā dattavāṃstripadāṃ
bhuvam

21.25

saṃkalpamātrādvavṛdhe dehastraivikramaḥ param || bhūloke tu kṛtau pādau bhuvarloke tu jānunī

21.26

svarloke tu kaṭiṃ nyasya maharloke tathodaram || janaloke tu hṛdayaṃ tapoloke ca kaṇṭhakam

21.27

satyaloke
mukhaṃ sthāpya uttamāṃgaṃ tathordhvataḥ || candrasūryagrahāścaiva bhagaṇo yogasaṃyutaḥ

21.28

sendrāścaiva tathā devānāgāḥ
śeṣādayaḥ pare || stuvaṃto veda saṃbhūtaiḥ sūktaiśca vividhaistu mām

21.29

kare gṛhītvā tu balimabruvaṃ vacanaṃ tadā
ekenapūritā pṛthvī dvitīyena triviṣṭapam

21.30

tṛtīyasya tu pādasya sthānaṃ dehi mamānagha || evamukta mayā
so'pi mastakaṃ dattavānbaliḥ

21.31

tato vai mastakaṃ hyekaṃ padaṃ dattaṃ mayā tadā || kṣipto rasātale rājandānavo mama
pūjakaḥ

21.32

vinayāvanataṃ dṛṣṭvā prasanno'smi janārdanaḥ || bale vasāmi satataṃ sannidhau tava mānada

21.33

ityavocaṃ
mahābhāgaṃ baliṃ vairocanaṃ tadā || nabhasyaśuklapakṣe tu parivartini vāsare

21.34

mayaikā tatra mūrttiśca balimāśritya
tiṣṭhati || dvitīyā śeṣapṛṣṭhe vai kṣīrābdhau sāgarottame

21.35

supyate ca hṛṣīkeśo yāvatprāyāti kārtikī || tāvadvati tatpuṇyaṃ sarvapuṇyottamottamam

21.36

etasmātkāraṇādrājankartavyā ca prayatnataḥ || ekādaśī mahāpuṇyā
pavitrā pāpahāriṇī

21.37

asyāṃ prasupto bhagavānetyaṃgaparivartanam || etasyāṃ pūjayedevaṃ trailokyasya pitāmaham

21.38

dadhidānaṃ prakartavyaṃ raupyataṃdulasaṃyutam || rātrau jāgaraṇaṃ kṛtvā mukto bhavati mānavaḥ

21.39

evaṃ yaḥ kurute rājannekādaśyāṃ vrataṃ śubham || sarvapāpaharaṃ caiva bhuktimuktipradāyakam

21.40

sa devalokaṃ saṃprāpya
bhrājate candramā yathā || śṛṇuyāccaiva yo martyaḥ kathāṃ pāpaharāṃ parām || aśvamedhasahasrasya phalaṃ prāpnoti mānavaḥ

21.20-2

iti śrīskandapurāṇe bhādrapadaśuklaparivartinīnāmaikādaśīmāhātmyaṃ samāptam

Linked texts (6)