Pramāṇa · Search · About · API

Ekadashikhanda 5

Ekādaśīkhaṇḍa 5

Language
Sanskrit

5.1

atha māghaśuklaikādaśī kathā || yudhiṣṭhira uvāca || sādhu kṛṣṇa tvayā proktā ādideva jagatpate || svedajā aṃḍajāścaiva
udbhijjāśca jarāyujāḥ

5.2

teṣāṃ karttā vikarttā ca pālakaḥ kṣayakārakaḥ || māghasya kṛṣṇapakṣe tu ṣaṭtilā kathitā
tvayā

5.3

śukle caikādaśī yā ca kathayasva prasādataḥ || kiṃ nāma ko vidhistasyāḥ ko devastatra pūjyate

5.4

śrībhagavānuvāca || kathayiṣyāmi rājendra śukle māghasya yā bhavet || jayānāmnīti vikhyātā sarvapāpaharā parā

5.5

pavitrā pāpaghnī ca piśācatvavināśinī || naiva tasyā vrate jīrṇaiṃ pretatvaṃ jāyate nṛṇām

5.6

nātaḥ
paratarā kācitpāpaghnī mokṣadāyinī || etasmātkāraṇādrājankartavyeyaṃ prayatnataḥ

5.7

śrūyatāṃ rājaśārdūla kathāṃ
paurāṇikīṃ śubhām|| paṅkaje ca purāṇe'syā mahimā kathito mayā

5.8

ekadā nāgaloke vai indro rājyaṃ cakāra ha
devāśca tatra saṃkhyena nivasaṃti manorame

5.9

pīyūṣapānaniratā hyapsarogaṇasevitāḥ || nandanaṃ tu vanaṃ tatra pārijātopaśobhitam

5.10

ramayanti ramaṃtyatra hyapsarobhirdivaukasaḥ || ekadā ramamāṇo'sau devendraḥ svecchayā
nṛpa

5.11

nartayāmāsa harṣātsa pañcāśatkoṭināyikāḥ || gandharvāstatra gāyanti gandharvaḥ puṣpadantakaḥ

5.12

citrasenaśca
tatraiva citrasena sutāstathā || mālinīti ca nāmnā tu citrasenasya kāminī

5.13

mālinyāṃ tu samutpannaḥ
puṣpavāniti nāmataḥ || puṣpadantasya putro vai mālyavānnāma nāmataḥ

5.14

gandharvī puṣpavatyākhyā mālyavatyatimohitā || kāmasya ca śaraistīkṣṇairviddhāṅgī sā babhūva hai

5.15

tayā bhāvaiḥ kaṭākṣaiśca mālyavāṃśca vaśīkṛtaḥ
lāvaṇyarūpasaṃpannā tasyā rūpaṃ nṛpa śṛṇu

5.16

bāhū tasyāstu kāmena kaṇṭhapāśau kṛtāviva || candravadvadanaṃ tasyā
nayane śravaṇāyate

5.17

karṇau tu śobhitau tasyāḥ kuṇḍalābhyāṃ nṛpottama || kaṃbugrīvāyutā caiva divyābharaṇabhūṣitā

5.18

pīnonnatau kucau tasyāḥ muṣṭimātraṃ ca madhyamam || nitambau vipulau tasyā vistīrṇa jaghanasthalam

5.19

caraṇau
śobhamānau tau raktotpalasamadyutī || īdṛśyā puṣpavatyā ca mālyavānatimohitaḥ

5.20

śakrasya paritoṣāya
nṛtyārthaṃ tau samāgatau || gāyamānau ca tau tatra hyapsarogaṇasaṃgatau

5.21

śuddhagānana gāyetāṃ cittabhrama samanvitau
baddhadṛṣṭī tathā'nyonyaṃ kāmabāṇavaśaṃ gatau

5.22

jñātvā lekharṣabhastatra saṃgataṃ mānasaṃ tayoḥ || tālakālakriyā
mānalopādgītāvamuñjanāt

5.23

cintayitvā tu maghavā hyavajñānaṃ tathā''tmanaḥ || kupitaśca tayoritthaṃ śāpaṃdāsyannidaṃ jagau

5.24

dhigvāṃ
pāparatau mūḍhāvājñābhaṃgakarau mama || yuvāṃ piśācau bhavatāṃ dampatīrūpadhāriṇau

5.25

mṛtyulokamanuprāptau mujñānau
karmaṇaḥphalam || evaṃ maghavatā śaptāvubhau duḥkhitamānasau

5.26

himavantamanuprāptāvi ndraśāpavimohitau || ubhau
piśācatāṃ prāptau dāruṇaṃ duḥkhameva ca

5.27

santaptamānasau tatra mahākṛcchragatāvubhau || gandhaṃ rasaṃ ca sparśaṃ ca na
jānantau vimohitau

5.28

pīḍyamānau tu dāhena dehapātakareṇa ca || tau na nidrāsukhaṃ prāptau karmaṇā tena
pīḍitau

5.29

parasparaṃ vādamānau ceraturgirigahvaram || pīḍyamānau tu śītena tuṣāraprabhaveṇa tau

5.30

dantavarṣaṃ prakurvāṇau romāñcitavapurdharau || ūce piśācaḥ śītārttaḥ svapatnīṃ tāṃ piśācikām

5.31

kimāvābhyāṃ kṛtaṃ
pāpamatyantaṃ duḥkhadāyakam || yena prāptaṃ piśācatvaṃ svena duṣkṛtakarmaṇā

5.32

narakaṃ dāruṇaṃ manye piśācatvaṃ
ca garhitam || tasmātsarvaprayatnena pāpaṃ naiva samācaret

5.33

iti cintāparau tatra hyāstāṃ duḥkhena karśitau
daivayogāttayoḥ prāptā māghasyaikādaśī sitā

5.34

jayā nāmnīti vikhyātā tithīnāmuttamā tithiḥ || tasmindine tu saṃprāpte tāvāhāravivarjitau

5.35

āsāte
tatra nṛpate jalapāna vivarjitau || na kṛtau jīvaghātaśca na patraphalabhakṣaṇam

5.36

aśvatthasya samīpe tu patitau
duḥkhasaṃyutau || ravirastaṃ gato rājaṃstathaiva sthitayostayoḥ

5.37

prāptā caiva niśā ghorā dāruṇā śītakāriṇī
vepamānau tu tau tatra himena ca jaḍīkṛtau

5.38

paraspareṇa saṃlagnau gātrayorbhujayorapi || na nidrāṃ na ratiṃ tatra
na tau saukhyamavindatām

5.39

evaṃ tau rājaśārdūla śāpenendrasya pīḍitau || itthaṃ tayorduḥkhitayornirjagāma
tadā niśā

5.40

jayāyāstu vrate cīrṇe rātrau jāgaraṇe kṛte || tayorvrataprabhāveṇa yathā hyāsīttathā śṛṇu

5.41

dvādaśīdivase prāpte tābhyāṃ cīrṇaṃ jayāvrate || viṣṇoḥ prabhāvānnṛpate piśācatvaṃ tayorgatam

5.42

puṣpavatī
mālyavāṃśca pūrvarūpau babhūvatuḥ || purātanasnehayutau pūrvālaṃkārasaṃyutau

5.43

vimānamadhirūḍhau tāvapsarogaṇasevitau
stūyamānau tu gaṃdharvaistumburupramukhaistathā

5.44

hāvabhāvasamāyuktau gatau nāke manorame || devendrasyāgrato gatvā
praṇāmaṃ cakraturmudā

5.45

tathāvidhau tutau dṛṣṭvā maghavā vismito'bravīt || indra uvāca || vadataṃ kena puṇyena
piśācatvaṃ vinirgatam

5.46

mama śāpavaśaṃ prāptau ke devena mocitau || mālyavānuvāca || vāsudevaprasādena jayāyāḥ
suvratena ca

5.47

piśācatvaṃ gataṃ svāmin satyaṃ bhaktiprasādataḥ || iti śrutvā vacastasya pratyuvāca sureśvaraḥ

5.48

indra uvāca
pavitrau pāvanau jātau vandanīyau mamāpi ca|| harivāsara karttārau viṣṇubhaktiparāyaṇau

5.49

haribhaktiratā ye ca
śivabhaktiratāstathā || asmākamapi te martyāḥ pūjyā vaṃdyā na saṃśayaḥ

5.50

viharasva yathāsaukhyaṃ puṣpavatyā
surālaye || etasmātkāraṇādrājankartavyo harivāsaraḥ

5.51

jayāvrataṃ tu rājendra brahmahatyāpahārakam || sarvadānāni dattāni yajñāstena kṛtā nṛpa

5.52

sarvatīrtheṣu sa snātaḥ kṛtaṃ yena jayāvratam || yaḥ karoti naro bhaktyā
śraddhāyuktā jayāvratam

5.53

kalpakoṭiśataṃ yāvadvaikuṇṭhe modate dhruvam paṭhanācchravaṇādrājannagniṣṭomaphalaṃ labhet

5.6-2

iti bhaviṣyottarapurāṇe māghaśuklaikādaśījayāmāhātmyaṃ samāptam

Linked texts (7)