Pramāṇa · Search · About · API

Kaumarikakhanda 104

Kaumārīkākhaṇḍa 104

Language
Sanskrit

Contents

104.1

ch
mārkaṃḍeya uvāca || || svāmitrityaśivānanda bhagavaṃnnaṃdikeśvara || āhlādito'smi śoṇeśamāhātmyasudhayā tvayā

104.2

kathaṃ vajrāṃgadaḥ pāṃḍyarā
jaḥ śoṇavyatikramam || cakre kathaṃ tadbhaktyaiva prāptavānsaṃpadaṃ punaḥ

104.3

kathaṃ vidyādharādhīśau kāṃtiśālikalādharau || durvāsaḥśāpanirviddhāvavitau
śoṇaśaṃbhunā

104.4

naṃdikeśvara uvāca || || dīrghāyuṣyatvasāphalyaṃ labdhavāṃstvaṃ mṛkaṇḍuja || yadiyaṃ stheyasī bhaktirbhavato bhūtanāyake

104.5

vakṣye vajrāṃgadodaṃtaṃ vṛttaṃ vidyābhṛtorapi || yato'bhūnmahito loke śoṇādrīśvaravaibhavaḥ

104.6

āsīdvajrāṃgadonāma purā pāṃḍyeṣu pārthivaḥ || āste
yasya bhujastambhe vasudhā sālabhaṃjikā

104.7

dhārmiko nyāyavijñātā gaṃbhīro dakṣiṇam kṣamaḥ || śāṃto vinayavāndhīmānekadāravrataḥ kṛtī

104.8

śivapūjārcanarataḥ śrīmāñchīlavatāṃ varaḥ || pṛthvīmāsetukedārācchāsāsa jitaśātravaḥ

104.9

kadācinmṛgayāvyājātsa caransuturaṃgamaḥ
aruṇācalaparyaṃtaṃ kāṃtāraṃ samagāhata

104.10

sa tatra bahalāmodaṃ kaṃcitkastūrikāmṛgam || dṛṣṭvā tamanvaktaragaṃ prāvartayata kautukāt

104.11

sa mṛgo'nudrutastena abhitaḥ śoṇaparvatam || prādakṣiṇyātparīyāya papāta ca manojavaḥ

104.12

tataḥ sa bhagnasāropi rājā jātaśra
maścaran || papāta vāhādvicchāyāḥ kṣīṇapuṇya iva dyutaḥ

104.13

ajñātakāraṇenaivaṃ mātaṃgeneva pīḍitaḥ || nājñāsītkṣaṇamātmānaṃ rājā
grahagṛhītavat

104.14

aciṃtayacca koyaṃ me nirhetuḥ sattvaviplavaḥ || kva gataḥ sa hyakasmānme upavāhyasturaṃgamaḥ

104.15

iti ciṃtākule tasmiṃsta
jjñānepyapaṭīyasi || taḍittaṭajaṭāleva sahasā dyauradṛśyata

104.16

nirīkṣamāṇa evāsminhitvā tiryakkalevaram || tūrṇaṃ turaṃgasāraṃgau khecaratvamupāga
tau

104.17

kirīṭinau kuṇḍalinau hārakeyūradhāriṇau || kṣaumāṃtarīyottarīyau sragviṇau ca virejatuḥ

104.18

avocatāṃ ca nṛpatimāścaryākṛṣṭamā
nasam || haraṃtāviva dantāṃśujālaistvasyārttijaṃ tamaḥ

104.19

rājannalaṃ viṣādena śoṇādrīśaprabhāvataḥ || etāṃ jānīhi saṃjātāṃ navāṃ nau cedṛśīṃ
daśām

104.20

tadovāca tayoḥ kiṃcidāśvasta iva pārthivaḥ || kṛtāṃjalirabhāṣiṣṭa tāvubhau vinayānvitaḥ

104.21

kau yuvāṃ nirmito yābhyāmabhiṣaṃgo
mamedṛśaḥ || bhadrau bhaṇatamārttānāṃ trāṇaṃ hi mahatāṃ guṇaḥ

104.22

iti tena kṛte praśne tamuvāca kalādharaḥ || rājānaṃ janitāścaryaṃ nirdiṣṭaḥ kāṃtiśā
linā

104.23

avehi rājannāvaṃ hi purā vidyādhareśvarau || parasparātisauhārdau vasaṃtamadanāviva

104.24

ekadā tu suvarṇādreḥ pārśve durvāsaso muneḥ
tapovanamagacchāva manaso'pi durāsadam

104.25

krośeddhāṃ tapasastasya śivārodhanasādhanīm || puṣpojjvalāmapaśyāva puṇyāmārāmavāṭikām

104.26

vinītāvapyasaṃjātau tattvocitasudhīgaṇau || prāviśāva tadudyānaṃ prasūnāvacayotsukau

104.27

sthalasya tasya sauhārdātkāṃtiśālyatigarvitaḥ
saṃcacāra muhuḥ pādanyāsairāghaṭṭayanmahīm

104.28

ahaṃ tu tatra puṣpāṇāṃ gaṃdhātiśayamohitaḥ || vikasvareṣu puṣpeṣu nyastahasto durāśayaḥ

104.29

tataḥ śāṃḍilyamūlastho vyāghracarmāsane sthitaḥ || durvāsāstapasāṃ rāśirjvalanniva hutāśanaḥ

104.30

amarṣotkarṣanīraṃdhraspaṃdamānādharacchadaḥ || karāla
bhrukuṭībaṃdhasārālitaviśālabhūḥ

104.31

saroṣo'bhūttejasāḍhyo gharmadaṃturavigrahaḥ || dahanniva dṛśā paśyannabhartsayata nau muniḥ

104.32

āḥ pāpau
pracyutācārāai kau yuvāmatigarvitau || jvalataḥ kopavahnerme śalabhatvamupāgatau

104.33

tapovanamidaṃ matkaṃ pāvanaṃ bhūtabhāvanam || pādairna spṛśataḥ kvāpi
sūryācaṃdramasāvapi

104.34

puravairisaparyāyāḥ paryāyakamidaṃ vanam || na spaṃdate'tra vātopi na lipyaṃte'tra ṣaṭpadāḥ

104.35

tadetatpādasaṃcārairdūṣayanneṣa
pātakī || hayo bhavatu bhūloke paravāhyatvapīḍitaḥ

104.36

aparoṣyayamatyugre patatvacalakaṃdare || prasūnagaṃdhalobhādyo gaṃdhasāraṃgatāṃ gataḥ

104.37

iti tenograroṣeṇa śāpavajre nipātite || tatkṣaṇādvigaladdarvāvāvāṃ taṃ śaraṇaṃ gatau

104.38

abhidhāya ca taṃ devamāhitāṃghriparigrahaiḥ
amogha eṣa tvacchāpastadasyāṃto nivedyatām

104.39

athātidīnamanasāvāvāmālokya pārthiva || sānugraho'bhūnmunirāṭ kāruṇyādatiśītalaḥ

104.40

abhāṣata ca maivaṃ bho bhavatoḥ kvāpi durdhiyoḥ || śāpasya bhavitā śāṃtiraruṇādreḥ pradakṣiṇāt

104.41

purā khalu purārātiradhyatiṣṭhacchubhāṃ
sabhām || paryupāsyata dikpālairiṃdropeṃdrayamādibhiḥ

104.42

tadā ca devadevāya naṃdanāraṇyadevatā || upāyanīkṛtavatī phalaṃ kimapi pāṭalam

104.43

bālyātkutūhalākrāntau gajānanaṣaḍānanau || pitaraṃ tadyācetāṃ lobhanīyataraṃ phalam

104.44

atha tāvavadaddevastanayau phalatarpitau
gopayitvā phalaṃ pāṇisaṃpuṭena kumārakau

104.45

imāṃ samastāṃ pṛthivīṃ lokālokena veṣṭitām || yo vāṃ pradakṣiṇīkartumīṣṭe tasmai dadāmyaham

104.46

ityukte pārvatīśene smayamānamukheṃdunā || skaṃdaḥ pradakṣiṇīkartuṃ medinīmupacakrame

104.47

laṃbodarastu devasya śoṇaśailākṛteḥ pituḥ
pradakṣiṇaṃ tataḥ kṛtvā purastādeva tatkṣaṇāt

104.48

taddṛṣṭvā tasya cāturyaṃ heraṃbāya triyaṃbakaḥ || phalaṃ vitīrṇavānasmai praṇayānnātamastakaḥ

104.49

adyaprabhṛti sarveṣāṃ phalānāmadhayānakaḥ || bhavetyasmai varaṃ dattvā hyekadaṃtāya śaṃkaraḥ

104.50

babhāṣe ca sabhāstārānsarvānapi surāsurān
prasaraddaśanajyotsnākarburīkṛtamaṃdiraḥ

104.51

sthāvaroyaṃ mamākāraḥ śoṇādriryo'sya bhaktitaḥ || pradakṣiṇāṃ vitanute sa me sārūpyabhāgbhavet

104.52

gireḥ pradakṣiṇenāsya yasya dhattaḥ pade rujam || sa samrāṭ sakalotkṛṣṭaṃ labhate śāśvataṃ padam

104.53

iti śāsantaḥ śaṃbhoḥ śoṇaśailapradakṣiṇam
vidhāya sarvagīrvāṇā lebhire svaṃ svamīpsitam

104.54

yuvāmapi madodbhūtamālinyau śikṣitau mayā || pradakṣiṇena śoṇādreḥ śāpāṃto vāṃ bhaviṣyati

104.55

tiraścorapi vāṃ sidhyedaruṇādreḥ pradakṣiṇā || vajrāṃgadasya pāṃḍyasya nṛpateranubaṃdhataḥ

104.56

ityamarṣaṇamaharṣimahābdheḥ śāpahālahala
śoṣitagātrau || pātitau bahulapātakabhārātkṣipramaśvamṛgajātiṣu jātau

104.56.p1

iti śrīskāānde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmya uttarārdhe 'ruṇācalapradakṣiṇāmāhātmye vajrāṃgada vṛttāṃtavarṇanaṃ nāma dvāviṃśatitamo'dhyāyaḥ

Linked texts (4)