Pramāṇa · Search · About · API

Kaumarikakhanda 27

Kaumārīkākhaṇḍa 27

Language
Sanskrit

27.1

cha || || arjuna uvāca || || devarṣe varṇyate ceyaṃ kathā pīyūṣasodarā || punaretanmune brūhi yadā vetti maheśvaraḥ

27.2

bhagavānsvāṃ satīṃ bhāryā vadhārthaṃ cāpi tārakam || satyāśca virahāttaipyandadāha kimaso smaram

27.3

tvayaivoktaṃ sa virahātsatyāstapsyati vai tapaḥ
himādrimāsthito devastasyāḥ saṃgamavāṃchayā

27.4

nārada uvāca || || satyametatpurā pārtha bhavasyedaṃ manīṣitam || ataptatapasā yogo
na kartavyo mayā'nayā

27.5

tapo vinā śuddhadeho na kathaṃcana jāyate || aśuddhadehena samaṃ saṃyogo naiva daihikaḥ

27.6

mahatkarmāṇi yānīha teṣāṃ
mūlaṃ sadā tapaḥ || nātaptatapasāṃ siddhirmahatkarmāṇi yāṃti vai

27.7

etasmātkāraṇāddevo darpitaṃ taṃ dadāha tu || tato dagdhe smare cāpi pārvatīmapi
vrīḍitām

27.8

vihāya sagaṇo devaḥ kailāsaṃ samapadyata || devī ca paramodvignā praskhalaṃtī padepade

27.9

jīvitaṃ svaṃ viniṃdaṃtī babhrāmetastataśca
sā || himādrirapi sve śṛṃge rudatīṃ pṛṣṭavānratim

27.10

kāsi kasyāsi kalyāṇi kimarthaṃ cāpi rodiṣi || pṛṣṭā sā ca ratiḥ sarvaṃ yathāvṛttaṃ nyave
dayat

27.11

nivedite tathā ratyā śailaḥ saṃbhrāṃtamānasaḥ || prāpya svāṃ tanayāṃ pāṇāvādāyāgātsvakaṃ puram

27.12

sā tatra pitarau prāha sakhīnāṃ
vadanena ca || durbhagena śarīreṇa kimanena hi kāraṇam

27.13

dehavāsaṃ parityakṣye prāpsye vābhimataṃ patim || asādhyaṃ cāpyabhīṣṭaṃ ca kathaṃ
prāpyaṃ tapo vinā

27.14

niyamairvividhaistasmācchoṣayiṣye kalevaram || anujānīta māṃ tatra yadi vaḥ karuṇā mayi

27.15

śrutveti vacanaṃ
mātā pitā ca prāha tāṃ śubhām || u meti capale putri na kṣamaṃ tāvakaṃ vapuḥ

27.16

soḍhuṃ kleśātmarūpasya tapasaḥ saumyadarśane || bhāvīnyapyani
vāryāṇi vastūni ca sadaiva tu

27.17

bhāvinorthā bhavaṃtyeva narasyānicchatopi hi || tasmānna tapasā te'sti bāle kiṃcitprayojanam

27.18

śrīdevyuvāca || || yadidaṃ bhavato vākyaṃ na samyagiti me matiḥ || kevalaṃ na hi daivena prāptumartho hi śakyate

27.19

kiṃciddaivāddhaṭhātkiṃci
tkiṃcideva svabhāvataḥ || puruṣaḥ phalamāpnoti caturthaṃ nātra kāraṇam

27.20

brahmaṇā cāpi brahmatvaṃ prāptaṃ kila tapobalāt || anyairapi ca yallabdhaṃ tatra
saṃkhyātumutsahe

27.21

adhruveṇa śarīreṇa yadyabhīṣṭaṃ na sādhyate || paścātsa śocyate maṃdaḥ patite'smiñśarīrake

27.22

yasya dehasya dharmo'yaṃ
kvacijjāyetakvacinmriyatet || kvacidgarbhagataṃ naśyejjātamātraṃ kvacittathā

27.23

bālye ca yauvane cāpi vārdhakyepi vinaśyati || tena caṃcaladehena
ko'rthaḥ svārtho na cedbhavet

27.24

ityuktvā svasakhīyuktā pitṛbhyāṃ sāśru vīkṣitā || śrṛṃgaṃ himavataḥ puṇyaṃ nānāśrcaryaṃ jagāma sā

27.25

tatrāṃ
varāṇi saṃtyajya bhūṣaṇāni ca śailajā || saṃvītā valkalairdivyaistapo'tapyata saṃyatā

27.26

īśvaraṃ hṛdi saṃsthāpya praṇavābhyāsanādṛtā || muṃnīnāmapya
bhūnmānyā tadānīṃ pārtha pārvatī

27.27

tristrātā pāṭalāpatrabhakṣakābhūcchataṃ samāḥ || śataṃ ca bilvapatreṇa śīrṇena kṛtabhojanā

27.28

jalabhakṣā śataṃ
cābhūcchataṃ vai vāyubhojanā || tato niyamamādāya pādāṃguṣṭhasthitābhavat

27.29

nirāhārā tatastāpaṃ prāpustattapaso janāḥ || tato jagatsamālokya
tadīyaṃtapasorjitam

27.30

harastatrāyayau sākṣādbrahmacārivapurddharaḥ || vasāno valkalaṃ divyaṃ rauravājinasaṃvṛtaḥ

27.32

sulakṣaṇāṣāṃḍhadharaḥ sadgṛtaḥ prati
bhānavān || tatastaṃ pūjayāmāsustatsakhyo bahumānataḥ ||31||vaktumicchuḥ śailaputrīṃ sakhībhiriti coditaṃḥ || brahmanniyaṃ mahābhāgā gṛhītaniyamā śubhā

27.33

muhūrtapaṃcamātreṇa niyamo'syāḥ samāpyate || tatpratīkṣasva taṃ kālaṃ paścādasmatsakhīsamam

27.34

nānāvidhā dharmavārtāḥ prakariṣyasi brāhmaṇa
ityuktvā vijayādyāstā devīcaritavarṇanaiḥ

27.35

aśrumukhyau dvijasyāgre ninyuḥ kālaṃ ca taṃ tadā || tataḥ kāle kiṃcidūna kāla kiṃcidūne brahmacārī mahāmatiḥ

27.36

vilokanamiṣeṇāgādāśramopasthitaṃ hradam || nipapāta ca tatrāsau cukrośātitarāṃ tataḥ

27.37

ahamatra nimajjāmi ko'pi māmuddhareta bhoḥ
iti tāreṇa krośaṃtaṃ śrutvā taṃ vijayādikāḥ

27.38

ājagmustvarayā yuktā dadustasmai karaṃ ca tāḥ || sa cukrośa tato gāḍhaṃ dūredūre punaḥpunaḥ

27.39

nāhaṃ spṛśāmyasaṃsiddhāṃ priye vā nānṛtaṃ tvidam || tataḥ samāptaniyamā pārvatī svayamāyayau

27.40

savyaṃ karaṃ dadāvasya taṃ cāsau
nābhyanandata || bhadre yacchuci naiva syādyaccaivāvajñayā kṛtam

27.41

sadoṣeṇa kṛtaṃ yacca tadādadyānna karhicit || savyaṃ cāśuci te hastaṃ nāvalaṃ
bāmi karhicit

27.42

ityuktā pārvatī prāha nāhaṃ dattaṃ ca dakṣiṇam || dadāmi kasyacidvipra devadevāya kalpitam

27.43

dakṣiṇaṃ me karaṃ devo
grahītā bhava eva ca || śīryate cogratapasā satyametanmayoditam

27.44

vipra uvāca || || yadyevamavalepaste gamanaṃ kena vāryate || yathā tava
pratijñeyaṃ mamāpīyaṃ tathācalā

27.45

rudrasyāpi vayaṃ mānyāḥ kīdṛśaṃ te tapo vada || viṣamasthaṃ yatra vipraṃ mriyamāṇamupekṣasi

27.46

avajñā
nāsi viprāṃstvaṃ tacchīghraṃ vraja darśanāt || yadi vā manyase pūjyāṃstato'bhyuddhara nānyathā

27.47

tato vicārya bahudhā iti ceti ca sā
śubhā || viprasyoddharaṇaṃ sarvadharmebhyo'manyatādhikam

27.48

tataḥ sā dakṣiṇaṃ dattvā karaṃ taṃ projjahāra ca || naraṃ nārī proddharati sajjantaṃ
bhavavāridhau || etatsandarśanārthāya tathā cakre bhavodbhavaḥ

27.49

proddhṛtya ca tataḥ snātvā baddhā yogāsanaṃ sthitā

27.50

brahmacārī tataḥ
prāha prahasannikamidaṃ śubhe || kartukāmāsi tanvaṃgi dṛḍhayogāsanasthitā

27.51

devī prāha jvālayiṣye śarīraṃ yogavahninā || mahādevakṛtamatiru
cchiṣṭāhaṃ yato'bhavam

27.52

brahmacārī tataḥ prāha kāścidbrāhmaṇakāmyayā || kṛtvā vārtāstataḥ svīyamabhīṣṭaṃ kuru pārvati

27.53

nopahanyām̐
kadāciddhi sādhubhirviprakāmanā || dharmamenaṃ manyase cenmuhūrtaṃ brūhi pārvati

27.54

devī prāha brūhi vipra muhūrtaṃ saṃsthitā tvaham || tataḥ svayaṃ vratī
prāha devīṃ tāṃ svasakhīyutām

27.55

kimarthamiti rambhoru nave vayasi duścaram || tapastvayā samārabdhaṃ nānurūpaṃ vibhāti me

27.56

durlabhaṃ prāpya
mānuṣyaṃ girirājagṛhe'dhunā || bhogāṃśca durlabhāndevi tyaktvā kiṃ kliṣyate vapuḥ

27.57

atīva dūye vīkṣya tvāṃ sukumāratarākṛtim || atyugratapasā
kliṣṭā padminīva himārditā

27.58

idaṃ cānyattava śubhe śiraso rogadaṃ mama || yaddehaṃ tyaktukāmā tvaṃ prabuddhā nāsi bālike

27.59

vāmaḥ kāmo
manuṣyeṣu satyametadvaco yataḥ || spṛhaṇīyāsi sarveṣāmevaṃ pīḍayase vapuḥ

27.60

avijñātānvayo nagnaḥ śūlī bhūtagaṇādhipaḥ || śmaśānanilayo
bhasmoddhūlano vṛṣavāhanaḥ

27.61

gajājino dvijivhādyalaṃkṛtāṃgo jaṭādharaḥ || virūpākṣaḥ kathaṃkāraṃ nirguṇaḥ syāttavocitaḥ

27.62

guṇā ye kulaśīlādyā varāṇāmuditā budhaiḥ || teṣāmeko'pi naivāsti tasmiṃstannocitaḥ sa te

27.63

śocanīyatamā pūrvamāsītpārvati kaumudī
tvaṃ saṃvṛttā dvitīyāsi tasyāstatsaṃgamāśayā

27.64

tapodhanāḥ sarvasamā vayaṃ yadyapi pārvati || dunotyeva tavāraṃbhaḥ śūlāyāṃ yūpasatkriyā

27.65

vṛṣabhārohaṇaṃ vāsaḥ śmaśāne pāṇisaṃgrahaḥ || savyālapāṇinā kṣaumaġajatvagbaṃdhanaḥ katham

27.66

janahāsyakaraṃ sarvaṃ tvayārabdhamasāṃpratam
strībhāvāddṛtisaṃparkaḥ kathaṃ cābhimatastava

27.67

nivartaya manastasmādasmātsarvavirodhinaḥ || mṛgākṣi madanārātermarkaṭākṣasya prārthanāt

27.68

viruddhavādinaṃ caivaṃ brahmacāriṇamīśvaram || niśamya kupitā devī prāha vācā sagadgadam

27.69

mā mā brāhmaṇa bhāṣiṣṭhā viruddhamiti śaṃkare
mahattamo yāti pumāndevadevasya niṃdayā

Linked texts (8)