Pramāṇa · Search · About · API

Kaumarikakhanda 35

Kaumārīkākhaṇḍa 35

Language
Sanskrit

Contents

35.1

cha
nārada uvāca || || śrutvaitaṃ saṃstavaṃ daityaḥ saṃghuṣṭaṃ devavaṃdibhiḥ || sasmāra brahmaṇo vākyaṃ vadhaṃ bālādupasthitam

35.2

śrutvā
sa klinnasarvāṃgo dvāḥsthaṃ rājā vaco'bravīt || amātyāndraṣṭumicchāmi śīghramānaya mā ciram

35.3

tataste rājavacanātkālanemi
mukhāgatāḥ || prāha tāṃstārako daityaḥ kimidaṃ vo viceṣṭitam

35.4

yaiḥ śatrusaṃbhavā vārtā kāpi na śrāvitastvaham || madirākāmama
ttānāṃ maṃtritvaṃ vo na yujyate || hitaṃ mantrayate rājñastena maṃtrī nigadyate

35.5

amātyā ūcuḥ || || ko jānāti surāndīnā
ndaityānāmiti no matiḥ

35.6

mā viṣīda mahārāja vayaṃ jeṣyāmahe surān || bālādapi bhayaṃ kiṃ vā lajjāyai ciṃtitaṃ tvidam

35.7

sarvametatsusādhyaṃ ca bherī saṃtāḍyatāṃ dṛḍham || tato daityendravacanātsaṃnāhajananī tadā

35.8

bhṛśaṃ saṃtāḍitā bherī kaṃpayāmāsa sā jagat
smaraṇāddaityarājasya parvatebhyo mahāsurāḥ

35.9

nimnagābhyaḥ samudrebhyaḥ pātālebhyo'mbarādapi || sahasā samupāptā yugāṃtānalasaprabhāḥ

35.10

koṭikoṭisahasraistu parārdhairdaśabhiḥ śataiḥ || senāpatiḥ kālanemiḥ śīghraṃ devānupādravat

35.11

caturyojanavistīrṇe nānāvaryasamanvite
rathe sthito manāgdīnastārakaḥ samadṛśyata

35.12

etasminnaṃtare pārtha kruddhaiḥ skandasya pārṣadaiḥ || prākāraḥ pātitaḥ sarvo bhagnānyupavanāni ca

35.13

tataścacāla vasudhā devī savanakānanā || jajvala khaṃ sanakṣatraṃ pramṛḍhaṃ bhuvanaṃ bhṛśam

35.14

tamobhūtaṃ jagaccāsīdgabhairanvitaṃ nabho'bha
vat || tato nānāpraharaṇaṃ pralayāṃbudasannibham

35.15

kālanemimukhaṃ pārtha adṛśyata mahadbalam || taddhi ghoramasaṃkhyeyaṃ jagarja vividhā giraḥ

35.16

abhyadravadraṇe devānbhagavaṃtaṃ ca śaṃkaram || vinadadbhistato daityairdevānīkaṃ mahāyudhaiḥ

35.17

parvataiśca śataghnībhirāyasaiḥ parivairapi || kṣaṇena
drāvitaṃ sarvaṃ vimukhaṃ cāpyadṛśyata

35.18

asurairvadhyamāne tu pāvakairiva kānanam || apataddāvabhūmiṣṭhaṃ mahādrumavanaṃ yathā

35.19

te bhinnāsthiśi
rodehāḥ prādravaṃta divaukasaḥ || na nāthamadhyagacchaṃta vadhyamānā mahāsuraiḥ

35.20

atha tadvidrutaṃ sainyaṃ dṛṣṭvā devaḥ puraṃdaraḥ || āśvāsayannuvācedaṃ balava
ddānavārditam

35.21

bhayaṃ tyajata bhadraṃ vaḥ śūrāḥ śastrāṇi gṛhṇata || kurudhvaṃ vikrame buddhiṃ mā ca kācidvyathāstu vaḥ

35.22

eṣa kālānalaprakhyo
mayūraṃ samupasthitaḥ || rakṣitā vo mahāsenaḥ kathaṃ bhītistathāpi vaḥ

35.23

śakrasya vacanaṃ śrutvā samāśvastā divaukasaḥ || dānavānpratyayudhyaṃta śakraṃ
kṛtvā vyapāśrayam

35.24

kālanemirmahendreṇa saṃyuge samayujyata || sahasrākṣauhiṇīyukto jaṃbhakaḥ śaṃkareṇa ca

35.26

kujaṃbho viṣṇunā caiva tāvatya
kṣauhiṇīvṛtaḥ || anye ca tridaśāḥ sarve marutaśca mahābalāḥ||25||pratyayudhyaṃta daityeṃdraiḥ sādhyāśca vasubhiḥ saha || tato bahuvidhaṃ yuddhaṃ kālanemirvidhāya
ca

35.27

utsṛjya sahasā pārtha airāvaṇaśiraḥsthitaḥ || sa tu pādaprahāreṇa muṣṭinā caiva taṃ gajam

35.28

śakraṃ ca jagrahe vinadanpetatustāvubhau bhuvi
tataḥ śakraṃ samādāya kālanemirvicetasam

35.29

rathamāśritya bhūyopi tārakābhimukho yayau || atha kuṃbhaṃ tadā devaiḥ sahasā cāṃtakādibhiḥ

35.30

hriyate hriyate rājā trātā ko'pi na vidyate || etasminnaṃtare śarvaḥ pinākadhanuṣaścyutaiḥ

35.31

bāṇaiḥ sasainyaṃ kṛtvā ca jaṃbhakaṃ gṛdhramodanam
kālanemiṃ samāgamya rathastho vākyamabravīt

35.32

kimetena mahendreṇa mayā yudhyasva dānava || vīraṃmanya sudurbuddhe tato jñāsyasi vīratām

35.35

kālanemiruvāca || || nagnena saha ko yudhyeddhatenāpi ca yena vā||śaṃsatsu daityavīrāṇāmupahāsaḥ prajāyate||33||ātmanastu samaṃ kiṃcidvilokaya
sudurmate||tadākarṇya ca sāvajñaṃ vacaḥ śarvo visiṣmiye||34||tataḥ kumāraḥ sahasā mayūrastho'bhyadhāvata || kujaṃbhaṃ sānugaṃ hatvā vāsudevopyadhāvata

35.36

tato hariḥ skaṃdamāha kimetena tava prabho || daityādhamena pāpena muhūrtaṃ paśya me balam

35.37

evamuktvā nivāryainaṃ keśavo garuḍasthitaḥ || śārṅgaṃko
daṃḍanirmuktairbāṇairdaityamavākirat

35.38

sa tairbāṇaistāḍyamāno vajrairiva mahāsuraḥ || vimucya vāsavaṃ kruddho bāṇāṃstānvyadhamaccharaiḥ

35.39

yānyā
nbāṇānhirdiṃvyānastrāṇi ca mumoca ha || nivārayati daityastānrahasaṃllīlayaiva ca

35.40

tataḥ kaumodakīṃ gṛhya kṣiprakārī janārdanaḥ || mumoca
sainyanāthāya sārathiṃ ca vyacūrṇayat

35.41

tato rathādavaplutya vivṛtya vadanaṃ mahat || garuḍaṃ caṃcunādāya sa viṣṇuṃ kṣitavānmukhe

35.42

tato'
bhūtsarvadevāṃnāṃ vimoho jagatāmapi || cacāla vasudhā celuḥ parvatāḥ sapta cārṇavāḥ

35.43

kālanemirnadaṃścaiva prānṛtyata mahāraṇe || asaṃmūḍhastato
viṣṇustvarākāla upasthite

35.44

kukṣiṃ vidārya cakreṇa bhāskaro'bhādivoditaḥ || bahirbhūto hariścainaṃ mohayitvā svanindayā

35.45

pātā
lasya talaṃ ninye tatra śiśye sa kāṣṭhavat || tataścakreṇa daityānāṃ nihatā daśakauṭayaḥ

35.46

pramoditāstathā devā vimohāstatkṣaṇādbabhuḥ || tataḥ
śarvastamāliṃgya sādhusādhu janārdana

35.47

tvayā yadvihitaṃ karma tatkartānnyo na vidyate || mahiṣādyāḥ sudurjeyā devyā ye vinipātitāḥ

35.48

teṣāmatibalo hyeṣa tvayā viṣṇo vinirjitaḥ || tārakāmayasaṃgrāme vadhyastesau janārdana

35.49

kaṃsarūpaḥ punaste'yaṃ haṃtavyo'ṣṭamajanmani
evaṃ praśaṃsamānāste vāsudevaṃ jagadgurum

35.50

śastrajālairlabdhasaṃjñāndaityasainyānanāśayat || tāni daityaśarīrāṇi jarjarāṇi mahāyudhaiḥ

35.51

apatanrbhūtale pārtha cchinnābhrāṇīva sarvaśaḥ || tatastaddānavaṃ sainyaṃ hatanāthamabhūttadā

35.52

devaiḥ skaṃdānugaiścaiva kṛtaṃ śastraiḥ parāṅmukham || atho
kruṣṭaṃ tadā hṛṣṭaiḥ sarvairdevairmudānvitaiḥ

35.53

saṃhatāni ca sarvāṇi tadā tūryāṇyavādayan || atha bhagnaṃ balaṃ prekṣya hatavīraṃ mahāraṇaṃ

35.54

devānāṃ
ca mahāmodaṃ tārakaḥ prāha sārathim || sārathe paśya sainyāni drāvyamāṇāni me suraiḥ

35.55

yesmābhistṛṇavaddṛṣṭāḥ paśya kālasya citratām
tanme vāhaya śīghraṃ tvaṃ rathamenaṃ surānprati

35.56

paśyaṃtu me balaṃ bāhvordravaṃtu ca surādhamāḥ || bruvannevaṃ sārathiṃ sa vidhunvansumahaddhanuḥ

35.57

krodha
raktekṣaṇo rājā devasainyaṃ samāviśat || āgacchamānaṃ taṃ dṛṣṭvā hariḥ skaṃdamathābravīt

35.58

kumāra paśya daityeṃdraṃ kālaṃ yadvadyugātyaye || ayaṃ
sa yena tapasā ghoreṇārādhitaḥ śivaḥ

35.59

ayaṃ sa yena śakrādyāḥ kṛtā markāḥ samārbudam || ayaṃ sa sarvaśastraughairyo'smābhirna jito raṇe

35.60

nāvajñayā pradraṣṭavyastārako'yaṃ mahāsuraḥ || saptamaṃ hi dinaṃ te'dya madhyāhno'yaṃ ca vartate

35.61

arvāgastamanādenaṃ jahi vadhyo'nyathā
na hi || evamuktvā sa śakrādīṃstvaritaḥ keśavo'bravīt

35.62

āyāsayata daityeṃdraṃ sukhavadhyo yathā bhavet || tataste viṣṇuvacanādvinadanto divau
kasaḥ

35.63

tamāsādya śaravrātairmuditāḥ samavākiran || prahasanniva devāṃstāndrāvayāmāsa tārakaḥ

35.64

yathā nāstikadurvṛtto nānāśāstropade
śakān || soḍhuṃ śaktā na te vīraṃ mahati syaṃdane sthitam

35.65

mahā'pasmārasaṃkrāṃtaṃ yathaivāpriyavādinam || vidhūya sakalāndevānkṣaṇamātreṇa
tārakaḥ

35.66

ājagāma kumārāya vidhuvansa mahādhanuḥ || āgacchamānaṃ taṃ dṛṣṭvā skaṃdaḥ pratyudyayau tataḥ

35.67

tasyārakṣadbhavaḥ pārśvaṃ
dakṣiṇaṃ caiva taṃ hariḥ || pṛṣṭhe ca pārṣadāstasya koṭiśo'rbudaśastathā

35.68

tatastau sumaha hisyuddhe saṃsaktau devadaityayoḥ || dharmādharmāvivodrathau
jagadāścaryakārakau

35.69

tataḥ kumāramāsādya līlayā tārako'bravīt || aho bālātibālastvaṃ yattvaṃ gīrvāṇavākyataḥ

35.70

āsādayasi
māṃ yuddhe pataṃga iva pāvakam || vadhena tava ko lābho mama mukto'si bālaka

35.71

piba kṣīraṃ gṛhāṇemaṃ kaṃdukaṃ krīḍa līlayā || evamuktaḥ prahasyāha
tārakaṃ yogināṃ guruḥ

35.72

śiśutvaṃ māvamaṃsthā me śiśuḥ kaṣṭo bhujaṃgamaḥ || duṣprekṣyo bhāskaro bālo duḥsparśo'lpo'pi pāvakaḥ

35.73

alpākṣaro na maṃtraḥ kiṃ sasphuro daitya dṛśyate || evamuktvā daityamuktaṃ gṛhītvā kaṃdukaṃ ca tam

35.74

tasmiñchaktyastramādāya daityāya pramumoca ha
tasyai tena prahāreṇa rathaścūrṇīkṛto'bhavat

35.75

caturyojanamātro yo nānāvaryasamanvitaḥ || garuḍasya sutā ye ca śīryamāṇe rathottame

35.76

muktāḥ kathaṃcidutpatya sāgarāṃtaramāviśan || tataḥ kruddhastārakaśca mudgaraṃ kṣiptavānguhe

35.77

viṃdhyādrimiva taṃ skaṃdo gṛhītvā taṃ vyatāḍayat
sthire tasyorasi vyūḍhe mudgaraḥ śatadhā'ga his mat

35.78

mene ca durjayaṃ daityastadā ṣaḍānanaṃ raṇe || ciṃtayāmāsa buddhyā ca prāptaṃ tadbrahmaṇo vacaḥ

35.79

taṃ bhītamiva cālakṣya daityavīrāśca koṭiśaḥ || nadaṃto'timahāsenaṃ nānāśāstrairavākiran

35.80

kruddhasteṣu tataḥ skaṃdaḥ śaktiṃ ghoramathādade
abhyasyamāne śaktyagre skaṃdenāmitatejasā

35.81

ulkājālaṃ mahāghoraṃ papāta vasudhātale || cālyamānā tathā śaktiḥ sughorā bhavasūnunā

35.82

tataḥ koṭyo viniṣpetuḥ śaktīnāṃ bharatarṣabha || sa śaktyagreṇa balavānkarasthenāhanatprabhuḥ

35.83

aṣṭau padmāni daityānāṃ daśakoṭi
śatāni ca || tathā niyutasāhasraṃ vāhanaṃ koṭireva ca

35.84

hṛdodaraṃ ca daityeṃdraṃ nikharvairdaśabhirvṛtam || tatrākurvansutumulaṃ nādaṃ vadhyeṣu śatrupu

35.85

kumārānucarāḥ pārtha pūrayaṃto diśo daśa || śaktyagrasyārciḥsaṃbhūtaśaktibhiḥ ke'pi sūditāḥ

35.86

patākāyānadhūtāśca hatāḥ kecitsahasraśaḥ
kecidghaṃṭāravatrastāśchinnabhinnahṛdo'patan

35.87

kecinmayūrapakṣābhyāṃ caraṇābhyāṃ ca sūditāḥ|| koṭiśastāmracūḍena vidāryaiva ca bhakṣitāḥ

35.88

pārṣadairmātṛbhiḥ sārdhaṃ padmaśo nihatāḥ pare || evaṃ nihanyamāneṣu dānaveṣu guhādibhiḥ

35.89

abhāgyairiva lokeṣu tārakaḥ skaṃdamāyayau || jagrāha
ca gadāṃ divyāṃ lakṣaghaṃṭādurāsadām

35.90

tayā mayūramājaghne mayūro vimukho'bhavat || dṛṣṭvā parāṅmukhaṃ skaṃdaṃ vāsudevo'bravīttvaran

35.91

devasenāpate śīghraṃ śaktiṃ muṃca mahāsure || pratijñāmātmanaḥ pāhi laṃbate ravimaṃḍalam

35.92

skaṃda uvāca || || tvayaiva rudrabhakto'yaṃ
janārdana mameritam || vadhārthaṃ rudrabhaktasya bāhuḥ śaktiṃ muṃcati

35.93

nārudraḥ pūjayedrudraṃ bhaktarūpasya yo haraḥ || rudrarūpamamuṃ hatvā kīdṛśaṃ janma
no bhavet

35.94

tiraskṛtā vipralabdhāḥ śaptāḥ kṣiptāḥ prapīḍitāḥ || rudrabhaktāḥ kulaṃ sarvaṃ nirdahaṃti hatāḥ kimu

35.95

eṣa ceddhaṃti tadrudraṃ
hanyatāmeṣa māṃ raṇe || rudrabhakte punarviṣṇo nāhaṃ śastramupādade

35.96

śrībhagavānuvāca || || naitattavocitaṃ skaṃda rudrabhakto yathā śṛṇu || dve tanū
girijābharturvedajñā munayo viduḥ

35.97

ekā jīvātmikā tatra pratyakṣā ca tathāparā || drogdhā bhūteṣu bhaktaśca rudrabhakto na sa smṛtaḥ

35.98

bhakto
rudre kṛpāvāṃśca jaṃtuṣveva haravrataḥ || tadenaṃ bhūtamartyeṣu drogdhvāraṃ tvaṃ pinākinaḥ

35.99

jahi naivātra paśyāmi doṣaṃ kaṃcana te prabho || śrutveti vācaṃ
goviṃdātsatyārthāmapi bhārata

35.100

haṃtuṃ na kurute buddhiṃ rudrabhakta iti smaran || tārakastu tataḥ kruddho yayau vegena keśavam

35.101

prāha caivaṃ sudurbuddhe hanmi tvāṃ paśya me balam || devānāṃ cāpi dharmmāṇāṃ mūlaṃ matimanāṃ tathā || hatvā tvāmadya sarvāṃstāṃśchetsye paśyādya me balam

35.102

viṣṇuruvāca || || daityeṃdra tava cāsmābhiḥ kimaho śṛṇu satyatām

35.103

rathe ya eṣa śarvo'yaṃ hate'sminsakalaṃ hatam
śrutveti tārakaḥ kruddhastūrṇaṃ rudrarathaṃ yayau

35.104

abhisṛtya sa jagrāha rudrasya rathakūbaram || yadā sa kūbaraṃ kruddhastārakaḥ sahasā'grahīt

35.105

resattu rodasī tūrṇaṃ mumuhuśca maharṣayaḥ || vyanadaṃśca mahākāyā daityā jaladharopamāḥ

35.106

āsīcca niścitaṃ teṣāṃ jitamasmābhirityata || tāra
kasyāpyabhiprāyaṃ bhagavānvīkṣya śaṃkaraḥ

35.107

umayā saha saṃtyaktā rathaṃ vṛṣabhamāvahat || omityatha japanbrahmā ākāśaṃ sahasāśritaḥ

35.108

tatastaṃ śatasiṃhaṃ ca rathaṃ rudreṇa nirmitam || utkṣipya pṛthvyāmāsphovya cūrṇayāmāsa tārakaḥ

35.109

śūlapāśupatādīni sahasopasthi
tāni ca || vārayāmāsa giriśo bhavaḥ sādhya iti bruvan

35.110

tataḥ svavaṃcitaṃ jñātvā rudreṇātmānamīrṣyā || vinadansahasā'dhāvadvṛṣabhasthaṃ
maheśvaram

35.111

tato janārddano'dhāvaccakramudyamya vegataḥ || vajramiṃdrastathodyamya daṃḍaṃ cāpi yamo nadan

35.112

gadāṃ dhaneśvaraḥ kruddhaḥ pāśaṃ
ca varuṇo nadan || vāyurmahāṃkuśaṃ ghoraṃ śaktiṃ vahnirmahāprabhām

35.113

nirṛtirniśitaṃ khaḍgaṃ rudrāḥ śūlāni kopitāḥ || dhanūṃṣi sādhyā devāśca
parighānvasavastathā

35.114

viśvedevāśca musalaṃ caṃdrākau svaprabhāmapi || oṣadhīścāśvinau devau nāgāśca jvalitaṃ viṣam

35.115

himādri
pramukhāścāpi samudyamya mahīdharān || bhṛśamunnadato devāndhāvato vīkṣya tārakaḥ

35.116

nivṛttaḥ sahasā pārtha mahāgaja ivonnadan || sa vajramuṣṭi
nāhatya bhuje śakramapātayat

35.117

daṃḍaṃ yamādupādāya mūrdhyāhatya nyapātayat || urasāhatya sagadaṃ dhanadaṃ bhuvyapātayat

35.118

varuṇā
tpāśamādāya tena baddhvā nyapātayat || mahāṃkuśena vāyuṃ ca ciraṃ mūrdhni jaghāna saḥ

35.119

phūtkārairuddhataṃ vahniṃ śamayāmāsa tārakaḥ || nirṛtiṃ
khaḍgamādāya hatvā tena nyapātayat

35.120

1śūlaireva tathā rudrāḥ sādhyāśca dhanuṣārditāḥ || parighaireva vasavo muśalaireva viśvakāḥ

35.121

reṇunācchādya caṃdrākau valmīkasthāvivekṣitau || mahogrāścauṣadhīstālairaśvibhyāṃ so'bhyavartayat

35.122

saviṣāśca kṛtā nāgā nirviṣāḥ pādaku
ṭṭanaiḥ || parvatāḥ parvataireva nirucchvāsā bhṛśaṃ kṛtāḥ

35.123

evaṃ taddevasainyaṃ ca hāhābhūtamacetanam || kṛtvā muhūrttādādhāvaccakrapāṇiṃ samunnadan

35.124

tataścāṃtardadhe sadyaḥ prahasanniva keśavaḥ || kuyogina iva svāmī sadā buddhimatāṃ varaḥ

35.125

apaśyaṃstārako viṣṇuṃ punarvṛṣabhavā
hanam || adhāvatkupito daityo muṣṭimudyamya vegataḥ

35.126

acirāṃśukhilālakṣyo lakṣyautha bhagavānhariḥ || ābabhāṣe tato devānbāhumudyamya
coccakaiḥ

35.127

palāyadhvamaho devāḥ śaktiścedvaḥ palāyitum || vimūḍhā hi vayaṃ sarve ye bālavacasāgatāḥ

35.128

kiṃ na śrutaḥ purā gītaḥ
ślokaḥ svāyaṃbhuvena yaḥ || yathā bāleṣu nikṣiptāḥ strīṣu paṃḍitakeṣu ca || apasmāriṣu caivāpi sarve te saṃśayaṃ gatāḥ

35.129

pratyakṣaṃ tadidaṃ sarvamadhunā
cātra dṛśyate

35.130

ajñāsiṣma puraivaitadrudrabhaktaṃ na haṃtyasau || yatpratijñāṃ nākariṣyanna syānnaḥ kadanaṃ mahat

35.132

athaiṣa yadi daityeṃdraṃ na nihaṃti
kubuddhimān||mā bhayaṃ vo mahābhāgā nihaniṣyāmi vo 1ripūn||131||adya me vipulaṃ bāhrorbalaṃ paśyata devatāḥ||daityādhamaṃ nāśayāmi muṣṭinaikena paśyata

35.133

mayā hi dakṣiṇo bāhurdattaśca bhavatāṃ sadā || ripūnvā nihaniṣyāmi satyaṃ tatparipālaye

35.134

yeṃ'bare ye ca pātāle bhuvi ye ca mahāsurāḥ
kṣaṇāttānnāśayiṣyāmi mahāvāto ghanāniva

35.135

evamuktvā jagannātho muṣṭimudyamya dakṣiṇam || nirāyudhastākṣryapṛṣṭhādavaplutyābhyadhāvat

35.136

tasmindhāvati goviṃde cacāla bhuvanatrayam || vimūrcchitamabhūdviśvaṃ devā bhītiṃ parāṃ yayuḥ

35.137

dhāvataścāpi kalpāṃtaṃ rudrakalpasya tasya yāḥ || mukhā
tsamudyayurjvālāstābhiḥ kharvaśataṃ hatam

35.138

tatoṃ'tarikṣe vācaśca procuḥ siddhāḥ svayaṃ tadā || jahi kopaṃ vāsudeva tvayi kruddhe kva vai jagat

35.139

anādṛtyaiva tadvākyaṃ bruvannānyatkaromyaham || āhvayaṃśca mahādaityaṃ kruddho hariradhāvata

35.140

uvāca vācaṃ sādhūṃśca yatnātpālayatāṃ
phalam || duṣṭānvinighnatāṃ caiva tatphalaṃ mama jāyatām

35.141

athāpaśyanmahāseno rudraṃ yāṃtaṃ ca tārakam || tārakaṃ cānvadhāvantaṃ purāṇapuruṣaṃ
harim

35.142

jagacca kṣubdhamatyarthaṃ svāṃ pratijñāṃ purā kṛtām || paścimāṃ pratilaṃbaṃtaṃ bhāskaraṃ cāpi lohitam

35.143

ākāśavāṇīṃ śṛṇvaṃśca
kiṃ skanda tvaṃ viṣīdasi || paścāttāpo yadi bhavetkṛtvā brahmavadhaṃ tvayi

35.144

sthāpayelliṃgamīśasya mokṣo hatyāśatairapi || āviṃveśa mahā
krodhaṃ didhakṣuriva medinīm

35.145

athotplutya mayūrātsa prahasanniva keśavam || bāhubhyāmapyupādāya provāca bhavanaṃdanaḥ

35.146

jānāmi
tvāmahaṃ viṣṇo mahābuddhiparākramam || bhūtabhavyabhaviṣyāṃśca daityānhaṃsyapi huṃkṛtaiḥ

35.147

tvameva haṃtā daityānāṃ devānāṃ paripālakaḥ || dharmasaṃ
sthāpakaśca tvameṣa te racitoṃ'jaliḥ

35.148

kṣaṇārdhaṃ paśya me vīryaṃ bhāskaro lohitāyate || evaṃ praṇamya skandena vāsudevaḥ prasāditaḥ

35.149

viroṣāe'bhūttamāliṅgya vacanaṃ keśavo'bravīt || sanāthastvadya dharmoṃ'yaṃ surāścaiva tvayā guha

35.150

smarātmānaṃ yadarthaṃ tvamutpanno'si maheśva
rāt || sādhūnāṃ pālanārthāya duṣṭasaṃharaṇāya ca || suraviprakṛte janma jīvitaṃ ca mahātmanām

35.151

rudrasya devyā gaṃgāyāḥ kṛttikānāṃ ca
tejasā || svāṃhāvahveśca jātastvaṃ tattejaḥ saphalīkuru || sādhūnāṃ ca kṛte yasya dhanaṃ vīryaṃ ca saṃpadaḥ

35.152

saphalaṃ tasya tatsarvaṃ nānyathā
rudranaṃdana

35.153

adya dharmaśca devāśca gāvaḥ sādhyāśca brāhmaṇāḥ || naṃdaṃtu tava vīryeṇa pradarśaya nijaṃ balam

35.154

skanda uvāca || || yā
gatiḥ śivatyāgena tvattyāgena ca keśava || tāṃ gatiṃ prāpnuyāṃ kṣipraṃ hanmi cenna hi tārakam

35.155

yā gatiḥ śrutityāgena sādhvī
bhāryātipīḍanāt || sādhūnāṃ ca parityāgāddṛthā jīvitasādhanāt || niṣṭhurasya gatiryā ca tāṃ gatiṃ yāmi keśava

35.156

ityukte sumahānnādaḥ saṃpra
jajñe divaukasām || praśaśaṃsurgṛhaṃ kecitkecinnārāyaṇaṃ prabhum

35.157

tatastārkṣyaṃ samāruhya harirastasminmahāreṇe || tāmracūḍaṃ mahāsena
stārakaṃ cāpyadhāvatām

35.158

lohitāṃbarasaṃvīto lohitasragvibhūṣaṇaḥ || lohitākṣo mahābāhurhiraṇyakavacaḥ prabhuḥ

35.159

bhujena tola
yañchaktiṃ sarvabhūtāni kampayan || prāpya taṃ tārakaṃ prāha mahāseno hasanniva

35.160

tiṣṭhatiṣṭha sudurbuddhe jīvitaṃ te mayi sthitam || sudṛṣṭaḥ
kriyatāṃ loko durlabhaḥ sarvasiddhidaḥ

35.161

yatte suniṣṭhuratvaṃ ca dharme deveṣu goṣu ca || tasya te praharāmyadya smara śastraṃ suśikṣitam

35.162

evamukte guhenātha nivṛttasyāsya bhārata || tārakasya śirodeśātkāpi nārī viniryayau

35.163

tejasā bhāsayaṃtī tamadha ūrdhvaṃ diśo daśa
dṛṣṭvā nārīṃ guhaḥ prāha kāsi kasmācca nirgatā

35.164

nāryuvāca || || ahaṃ śaktirguhākhyātā bhūtaleṣu sadā sthitā || anena daityarājena
mahatā tapasārjitā

35.165

sureṣu sarveṣu vasāmi cāhaṃ vipreṣu śāstrārtharateṣu cāham || sādhvīṣu nārīṣu tathā vasāmi vinā guṇānnāsmiṃ vasāmi kutra
cit

35.116-2

tadasya puṇyasaṃghasya saṃprāptodyāvadhirguha || tadenaṃ tyajya yāsyāmi jahyenaṃ viśvahetave

35.167

tasyāṃ tato nirgatāyāṃ daityaśīrṣaṃ vyaka
mpayat || kaṃpitaṃ cāsya taddehaṃ gatavīryo'bhavatkṣaṇāt

35.168

etasminnaṃtare śaktiṃ so'kṣipadgirijātmajaḥ || ulkājvālā vimuñcaṃtīmatisūryā
gnisaprabhām

35.169

kalpāṃbhodhisamunnādāṃ didhakṣaṃtīṃ jagadyathā || tārakasyāṃtakālāya abhāgyasya daśāmiva

35.170

dāraṇīṃ parvatānāṃ ca sarva
sattvabalādhikām || utkṣipya tāṃ vinadyoccaiḥsubhṛśatkupito guhaḥ

35.171

dharmaścedvalavām̐lloke dharmo jayati cetsadā || tena satyena daityoyaṃ pralayaṃ
yātvitīrayan

35.172

sā kumārabhujotsṛṣṭā durnivāryā durāsadā || bibheda hṛdayaṃ cāsya bhittvā ca dharaṇiṃ gatā

35.173

niḥsṛtya jalakallo
lapūrvikā skaṃdamāyayau || sa ca saṃtāḍitaḥ śaktyā vibhinnahṛdayosuraḥ || nādayanvasudhāṃ sarvāṃ papātāthomukho mṛtaḥ

35.174

evaṃ pratāpya trailokyaṃ
nirjitya bahuśaḥ surān || mahāraṇe kumāreṇa nihataḥ pārtha tārakaḥ

35.175

etasminnihate daitye praharṣaṃ viśvamāyayau

35.176

vavurvātāstathā
puṇyāḥ suprabhobhūddivākaraḥ || jajvaluścāgnayaḥ śāṃtāḥ śāṃtā diggajavitasvanāḥ

35.177

tataḥ punaḥ skaṃdamāha prahṛṣṭaḥ keśavo'rihā || skaṃdaskaṃda
mahābāho bāṇonāma balātmajaḥ

35.178

krauṃcaparvatamādāya devasaṃghānprabādhate || so'dhunā te bhayādvīra palāyitvā nagaṃ gataḥ || jahi taṃ
pāpasaṃkalpaṃ krauṃcasthaṃ śaktivegataḥ

35.179

tataḥ krauṃca mahātejā nānābyālavināditam || śaktyā bibheda bahubhirvṛkṣairjīvaiśca saṃkulam

35.180

tatra vyālasahasrāṇi daityakoṭyayutaṃ tathā || dadāha bāṇaṃ ca giriṃ bhittvā śaktirmahāravā

35.181

adyāpi chidraṃ tatpārtha krauṃcasya parivartate

35.182

yena haṃsāśca krauṃcāśca mānasāya prayāṃti ca || hatvā bāṇaṃ mahāśaktiḥ punaḥ skaṃdaṃ samāgatā || pratyāyāti manaḥ sādhorāhvataṃ prahitaṃ
tathā

35.183

tato harīṃdrapramukhāḥ pratuṣṭuvurnanṛtuśca raṃbhāpramukhā varāṃganāḥ || vādyāni sarvāṇi ca vādayaṃtastaṃ sādhusādhvityamarā jagurbhṛśam

35.183.p1

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe kaumārikākhaṇḍe kumāreśvaramāhātmye kumārakṛtatārakavadhavarṇanaṃnāma dvātriṃśo'dhyāyaḥ

Linked texts (11)