Krishnajanmakhanda 129
Kṛṣṇajanmakhaṇḍa 129
- Language
- Sanskrit
129.1
iti śrībrahmavaivartte mahāpurāṇe nārāyaṇanāradasaṃvāde śrīkṛṣṇajanmakhaṇḍe bāṇayuddhe
ṣoḍaśādhikaśatatamo'dhyāyaḥ
saptadaśādhikaśatatamo'dhyāyaḥ
śrīnārāyaṇa uvāca
gaṇeśastu śivasthānaṃ gatvā natvā maheśvaram
sarvaṃ vijñāpayāmāsa krameṇa ca pṛthak pṛthak
129.2
bāṇāniruddhayoryuddhaṃ subhadranidhanaṃ tathā
skandāniruddhayoryuddhamaniruddhasya vikramam
129.3
gaṇeśavacanaṃ śrutvā prahasya bhagavān bhavaḥ
uvāca ślakṣṇayā vācā suguptaṃ vedasammatam
129.4
śrīmahādeva uvāca
gaṇeśvara mahābhāga śrūyatāṃ vacanaṃ mama
hitaṃ tathyaṃ nītisāraṃ pariṇāmasukhāvaham
129.5
asaṃkhyaviśvasaṅghañca sarvaṃ kṛṣṇātmajaṃ sutam
kṛṣṇaṃ jānīhi yat kāryyaṃ kāraṇānāñca kāraṇam
129.6
brahmāditṛṇaparyyantaṃ jagat sarvaṃ gaṇeśvara
nibodha satyaṃ kṛṣṇañca bhagavantaṃ sanātanam
129.7
goloke dvibhujaṃ śāntaṃ rādhākāntaṃ manoharam
śiśurūpaṃ gopaveṣaṃ paripūrṇatamaṃ prabhum
129.8
gopībhirgopanikaraiḥ sahitaṃ kāmadhenubhiḥ
puṇye vṛndāvane ramye sundare rāsamaṇḍale
129.6-2
carantaṃ muralīhastaṃ brahmeśaśeṣavanditam
śataśṛṅge ca śailendre vaṭamūle nirākule
129.10
goṣṭhe bhāṇḍīranikaṭe nirmale virajātaṭe
navīnanīradaśyāmaṃ śobhitaṃ pītavāsasā
129.11
yathā navaṃ ghanaughañca saudāminyā virājitam
āvirbhāvaśca teṣāṃ vai goloke rāsamaṇḍale
129.12
tāvanto gokule ramye puṇye vṛndāvane vane
sarve cāṃśakalāḥ puṃsaḥ kṛṣṇastu bhagavān svayam
129.13
paripūrṇatamo rāmo brahmaśāpāt khavismṛtaḥ
tasya putro'niruddhaśca mahābalaparākramaḥ
129.14
mayā prasthāpitaḥ skando mahāyuddhe sudāruṇe
mṛto bāṇaśca saṃgrāme tena skandena rakṣitaḥ
129.15
skandāniruddhayoryuddhe samatvaṃ tu gaṇeśvara
aṣṭau ca bhairavāḥ sarve rudrāścaikādaśaiva te
129.16
aṣṭau ca vasavaścaite devāḥ śakrādayastathā
tathaiva dvādaśādityāḥ sarve daityeśvarāstathā
129.17
devānāgraṇīḥ skando bāṇaśca sagaṇastathā
sarve te cāniruddhañca saṃgrāme jetumakṣamāḥ
129.18
aniruddhaḥ svayaṃ brahmā pradyumnaḥ kāma eva ca
baladevaḥ svayaṃ śeṣaḥ kṛṣṇaśca prakṛteḥ paraḥ
129.16-2
etatte kathitaṃ sarvaṃ bāṇaṃ rakṣa gaṇeśvara
bhavān śubhasvarūpaśca vighnakhaṇḍanakārakaḥ
129.20
ārādyāyāsyati harirgṛhītvā ca sudarśanam
avyarthamastrapravaraṃ sūryakoṭisamaprabham
Linked texts (1)
- Brahmavaivartapurāṇa — Vyāsa, Sanskrit